1-3. (a) Bilong wanem Josua i stap olsem gutpela eksampel long pasin bilong mekim gutpela disisen? (b) Yumi mas tingim wanem samting taim yumi laik mekim ol disisen?

OL DISISEN bilong yumi em i bikpela samting. Ol disisen bai stiaim ol samting yumi mekim long laip bilong yumi. Yumi ken tok piksa olsem: Wanpela man i bihainim wanpela rot na bihain dispela rot i bruk i go long 2-pela han rot. Em i mas makim wanem rot em bai bihainim. Ating em bai makim rot we bai bringim em i go klostu moa long ples em i laik i go long en, na i no bringim em i go longwe.

² Baibel i kamapim stori bilong planti man em wankain samting i bin painim ol. Olsem: Kein i mas mekim disisen olsem em bai larim belhat i bosim em o em bai daunim belhat. (Stt. 4:6, 7) Josua i mas mekim disisen long em bai lotuim God tru o lotuim ol giaman god. (Jos. 24:15) Josua i laik stap klostu long Jehova, olsem na em i mekim disisen we i helpim em long mekim olsem. Tasol Kein i mekim disisen we i mekim na em i stap longwe long Jehova.

³ Sampela taim yumi tu i mas mekim ol bikpela disisen bambai yumi ken bihainim yet stretpela rot. Yumi mas tingim olsem ol disisen bilong yumi inap givim glori long Jehova na helpim yumi long stap klostu long em, o inap mekim na yumi stap longwe long em. (Ritim Hibru 3:12.) Long dispela stadi na long stadi bai kamap bihain, yumi bai skelim 7-pela samting long laip bilong yumi we yumi no ken larim wanpela samting i mekim na yumi stap longwe long Jehova.

WOK MANI

4. Bilong wanem em i bikpela samting long man i mekim wok bilong kisim mani?

⁴ Kristen i gat wok long lukautim em yet na famili bilong em. Baibel i tok sapos wanpela man i no lukautim ol wanhaus bilong em, em i nogut moa winim man i no gat bilip. (2 Tes. 3:10; 1 Tim. 5:8) Dispela i soim olsem em i bikpela samting long mekim wok bilong kisim mani, tasol sapos yu no was gut, dispela wok inap mekim na yu stap longwe long Jehova. Olsem wanem dispela inap kamap?

5. Taim ol i laik givim yu wanpela wok, yu mas skelim wanem ol samting?

⁵ Tingim olsem yu yet i wok long painim wanpela wok mani. Sapos yu sindaun long hap we i no gat planti wok mani, ating yu bai amamas tasol long mekim olgeta kain wok ol i givim long yu. Tasol olsem wanem sapos dispela wok ol i givim long yu i pait wantaim ol stiatok bilong Baibel? Olsem wanem sapos dispela wok i pulim bikpela haptaim na yu no gat taim bilong mekim wok Kristen o stap wantaim famili bilong yu? Bai yu kisim tasol dispela wok, long wanem, yu yet i pilim olsem i gutpela yu gat wanpela wok maski em i wok nogut? Tingim, sapos yu mekim wanpela disisen i no stret, dispela inap mekim na yu stap longwe long Jehova. (Hib. 2:1) Maski yu traim long painim wok o yu skelim gen wok em nau yu mekim, olsem wanem yu inap mekim gutpela disisen?

6, 7. (a) Wanem ol tingting inap kirapim man long kisim wok mani? (b) Wanem tingting bai helpim man long i go klostu moa long Jehova? Bilong wanem?

⁶ Disisen bilong yu bai makim samting yu laik mekim long laip bilong yu. Askim yu yet olsem: ‘Mi gat wanem tingting na mi laik kisim dispela wok?’ Sapos bikpela tingting bilong yu em long helpim yu na famili bilong yu long mekim wok bilong Jehova, orait Jehova bai blesim hatwok bilong yu. (Mat. 6:33) Sapos ol i pinisim yu long wanpela wok mani o hevi bilong mani i bungim yu, Jehova i save long olsem wanem em bai helpim yu. (Ais. 59:1) Em “i save long rot bilong kisim bek ol man i save givim bel tru long Em.”—2 Pita 2:9.

⁷ Tasol olsem wanem sapos bikpela tingting bilong yu em olsem, yu laik kamap maniman? Ating yu bai winim dispela mak. Tasol maski yu kamap maniman, yu mas tingim olsem i gat samting yu mas givim bek olsem pe, em samting we inap givim bikpela hevi long yu. (Ritim 1 Timoti 6:9, 10.) Sapos mani kago na wok mani i stap nambawan samting long laip bilong yu, dispela bai mekim na yu stap longwe long Jehova.

8, 9. Ol papamama i mas givim wanem ol askim long ol yet taim ol i skelim wok mani bilong ol? Bilong wanem?

⁸ Sapos yu wanpela papa o mama, tingim olsem wanem pasin bilong yu bai stiaim pikinini. Taim ol i skelim pasin bilong yu, wanem samting i stap olsem bikpela samting long yu, wok mani o pasin bilong pas gut wantaim Jehova? Sapos ol i lukim olsem biknem, namba, na mani kago i stap namba 1 samting long laip bilong yu, yu ting ol bai bihainim wankain rot yu go long en? Yu ting ol bai i no rispektim yu moa olsem papa o mama? Wanpela yangpela meri Kristen i tok: “Mi inap tingim olsem, bipo papa bilong mi i save bisi tumas long wok mani bilong em. Pastaim i luk olsem em i wok hat, long wanem, em i laik bai famili bilong mipela i gat gutpela sindaun. Em i laik bai mipela i gat olgeta samting mipela i nidim. Tasol sampela yia i go pinis, pasin bilong em i senis. Oltaim em i save bisi tasol long wok, na taim em i kam long haus em i save bringim ol gutpela gutpela samting em mipela i no nidim. Olsem na ol narapela i tingim famili bilong mipela olsem ol mani lain, na i no olsem famili husat i save helpim ol narapela long i stap strong long bilip. Mi bai amamas moa sapos papa i strongim mi long bilip, na i no long sait bilong mani.”

⁹ Yupela ol papamama, yupela i no ken tingting tumas long wok mani na larim dispela i mekim na yupela i stap longwe long Jehova. Pasin bilong yupela i mas kamapim klia long ol pikinini olsem, yupela i bilip tru olsem pasin bilong pas gut wantaim Jehova em i bikpela samting moa winim mani kago.—Mat. 5:3.

10. Ol yangpela i ken skelim wanem ol samting paslain long ol i makim wanpela wok mani?

¹⁰ Sapos yu wanpela yangpela na yu tingting long wanem kain wok yu bai mekim long bihain, olsem wanem yu inap mekim gutpela disisen? Olsem yumi stori pinis, samting yu laik mekim long laip bilong yu bai stiaim disisen yu mekim. Sapos yu tingting long kisim trening bilong mekim wanpela wok, yu ting dispela wok bai helpim yu long insait moa long ol wok bilong Kingdom, o em bai mekim na yu stap longwe long Jehova? (2 Tim. 4:10) Yu laik bihainim pasin bilong ol manmeri em mani kago tasol i save mekim ol i stap amamas? O yu bai bilip tru long Jehova olsem Devit i bin mekim, em i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.” (Sng. 37:25) Tingim, wanpela disisen bai mekim na yu stap longwe long Jehova, na narapela disisen bai bringim yu i go long laip i gutpela tru. (Ritim Sindaun 10:22; Malakai 3:10.) Yu bai mekim wanem disisen?a

OL SAMTING BILONG KISIM AMAMAS

11. Baibel i tok wanem long pasin bilong kisim amamas? Yumi mas tingim wanem samting?

¹¹ Baibel i no tambuim pasin bilong kisim amamas, na tu, em i no tok olsem ol amamas em samting bilong westim nating taim, nogat. Pol i tokim Timoti olsem: “Pasin bilong kisim trening long bodi inap helpim yu liklik.” (1 Tim. 4:8) Baibel i tok tu olsem i gat “taim bilong lap” na “taim bilong singsing,” na nogut yumi mekim planti wok oltaim na yumi no gat taim bilong malolo. (Sav. 3:4; 4:6) Sapos yu no was gut, pasin bilong kisim amamas inap mekim na yu stap longwe long Jehova. Olsem wanem dispela inap kamap? Em sapos yu lusim bikpela haptaim tumas long ol samting bilong kisim amamas o sapos yu makim amamas i no stret.

12. Yu mas skelim wanem ol samting taim yu laik makim amamas yu laik kisim?

¹² Pastaim, yumi laik tingim wanem kain amamas i stret long yumi. I gat rot bilong painim ol gutpela amamas. Tasol planti amamas bilong nau i pulap long ol pasin em God i heitim, olsem pasin bilong pait na bagarapim man, wok bilong ol spirit nogut, na pasin pamuk. Olsem na yu mas skelim gut amamas yu laik kisim. Skelim ol kain askim olsem: Dispela amamas i mekim wanem long yu? Em i kirapim yu long kisim pasin bilong pait, resis, o litimapim kantri? (Snd. 3:31) Em i pinisim mani bilong yu? O em i pundaunim ol narapela? (Rom 14:21) Yu save bung wantaim wanem kain lain taim yu insait long dispela amamas? (Snd. 13:20) Em i save kirapim laik bilong yu long mekim ol pasin i no stret?—Jems 1:14, 15.

13, 14. Bilong wanem yu mas skelim gut haptaim yu lusim bilong kisim amamas?

¹³ Tingim tu haptaim yu lusim bilong kisim amamas. Askim yu yet olsem: ‘Mi save lusim bikpela haptaim long kisim amamas na mi gat liklik haptaim tasol bilong autim tok na go long ol miting?’ Sapos yu lusim bikpela haptaim tumas long kisim amamas, yu bai i no inap amamas tumas long en. Ol manmeri husat i skelim gut na ol i no lusim bikpela haptaim tumas long kisim ol amamas, ol i save amamas moa long ol samting ol i mekim. Bilong wanem? Ol i save olsem ol i mekim pinis ol wok we i “bikpela samting moa,” olsem na bel i no gat tok taim ol i mekim ol samting bilong kisim amamas.—Ritim Filipai 1:10, 11.

¹⁴ Em tru olsem em gutpela samting long lusim bikpela haptaim long kisim amamas, tasol dispela inap mekim na yu stap longwe long Jehova. Kain samting olsem i bin painim Kim, em wanpela sista husat i gat 20 krismas. Em i tok em i save go long ol pati long olgeta wiken long Fraide, Sarere, na Sande. Tasol nau em i luksave olsem i gat ol narapela samting em i mas mekim, em ol i bikpela samting moa. Em i tok: “Mi mekim wok painia, na mi mas kirap long 6 klok long moning bilong i go autim tok, olsem na mi no inap stap long ol bung bilong amamas i go inap long 1 klok o 2 klok long moning. Mi save olsem sampela bung bilong amamas i gutpela, tasol ol inap kisim bikpela haptaim bilong yumi.” Em i luksave olsem em i mas was gut na no ken lusim bikpela haptaim tumas long ol bung bilong kisim amamas.

15. Olsem wanem ol papamama inap helpim ol pikinini long makim gutpela amamas?

¹⁵ Ol papamama i gat wok long lukautim famili long ol samting ol i nidim. Na tu, ol i gat wok long helpim famili long pas gut wantaim Jehova na stap amamas na pilim olsem ol narapela i laikim ol. Sapos yu wanpela papa o mama, no ken ting olsem olgeta kain amamas i nogut. Em tru olsem sampela kain amamas i no gutpela. (1 Kor. 5:6) Tasol sapos yu skelim gut ol samting, yu inap painim ol gutpela amamas we inap givim nupela strong long famili bilong yu.b Long dispela rot, ol amamas yu makim bai i no inap mekim na yupela i stap longwe long Jehova.

FAMILI I PAS GUT WANTAIM

16, 17. Wanem samting i givim bikpela bel hevi long planti papamama? Olsem wanem yumi save olsem Jehova i pilim bel hevi bilong ol?

¹⁶ Pasin laikim namel long papamama na pikinini em i strong tru, olsem na Jehova i mekim tok piksa long dispela bilong makim pasin laikim bilong em long ol manmeri bilong em. (Ais. 49:15) Olsem na yumi save pilim bikpela bel hevi taim wanpela long famili bilong yumi i lusim Jehova. Wanpela sista em pikinini meri bilong em i bin lusim tok i tru, em i tok: “Mi bel hevi tru. Mi laik save, ‘Bilong wanem em i lusim Jehova?’ Mi pilim olsem em asua bilong mi, na mi sutim tok long mi yet.”

¹⁷ Sapos kain hevi olsem i painim yu, Jehova i pilim hevi bilong yu. Em yet i bin “bel hevi tru” taim namba 1 pikinini bilong em long graun i mekim pasin bikhet. Na em i bin bel hevi tu taim ol manmeri paslain long taim bilong Bikpela Tait i sakim tok bilong Noa. (Stt. 6:5, 6) Ol Kristen em ol i no gat wanpela long famili i lusim Jehova, ating ol bai i no inap pilim dispela kain bel hevi. Tasol sapos wanpela long famili bilong yu i mekim pasin i no stret na em i lusim Jehova, orait i no gutpela long larim pasin nogut bilong em i mekim na yu stap longwe long Jehova. Olsem wanem yu inap karim bikpela bel hevi taim wanpela long famili bilong yu i lusim Jehova?

18. Bilong wanem papamama i no ken sutim tok long ol yet taim pikinini i lusim Jehova?

¹⁸ No ken sutim tok long yu yet long hevi i bin kamap. Olgeta wan wan long famili em ol i dediket na baptais pinis, ol “i mas mekim ol samting em ol yet i gat wok long mekim” na mekim disisen olsem ol bai lotuim Jehova o nogat. (Gal. 6:5) Taim wanpela long famili i mekim rong, Jehova i save tingim olsem dispela man tasol i gat asua long disisen em i mekim. God i no save sutim tok long yu. (Ese. 18:20) Na tu, yu no ken sutim tok long ol narapela. Soim rispek long rot Jehova i makim bilong stretim pasin bilong yumi. Yu no ken sutim tok long ol elda em ol i mekim wok bilong lukautim kongrigesen. Yu mas sanap strong na sakim Satan, na no ken larim dispela hevi i mekim na yu stap longwe long Jehova.—1 Pita 5:8, 9.

19, 20. (a) Ol papamama bilong ol pikinini husat i raus, ol i ken mekim wanem bilong karim bel hevi bilong ol? (b) I stret long ol dispela kain papamama i ken holim wanem tingting?

¹⁹ Sapos yu kros long Jehova long hevi i bin kamap, dispela bai mekim na yu stap longwe long Jehova. Wanfamili bilong yu i mas luksave olsem yu gat strongpela tingting long laikim tru Jehova, na dispela i winim tru pasin laikim bilong yu long ol wanfamili. Olsem na yu mas strongim pasin bilong yu long pas gut wantaim Jehova bambai yu inap karim dispela bel hevi. Oltaim yu mas bung wantaim ol Kristen em ol i gutpela bratasista bilong yu. (Snd. 18:1) Beten long Jehova na kamapim olgeta tingting i stap long bel bilong yu. (Sng. 62:7, 8) No ken painim ol eskius long bung wantaim wanfamili husat i raus, olsem long rot bilong E-meil. (1 Kor. 5:11) Yu mas bisi oltaim long mekim wok bilong Jehova. (1 Kor. 15:58) Dispela sista em tok bilong em i stap antap, em i tok: “Mi save olsem mi mas bisi long mekim wok bilong Jehova na stap strong long ol samting bilong spirit, olsem na sapos pikinini meri bilong mi i kam bek long Jehova, mi bai redi long helpim em.”

²⁰ Baibel i tok man i gat pasin laikim “em i save wetim ol gutpela samting i kamap.” (1 Kor. 13:4, 7) I no gat rong sapos yu holim tingting olsem wanfamili bilong yu bai kam bek long Jehova. Long olgeta yia planti manmeri husat i mekim rong, ol i save tanim bel na kam bek long oganaisesen bilong Jehova. Taim ol i tanim bel pinis, Jehova i no save holim yet bel kros long ol, nogat. Em i redi long “rausim sin” bilong ol.—Sng. 86:5.

MEKIM OL GUTPELA DISISEN

21, 22. Yu stap fri long mekim disisen, olsem na yu laik mekim wanem kain disisen?

²¹ Jehova i larim ol man i stap fri long mekim ol disisen bilong ol. (Ritim Lo 30:19, 20.) Tasol dispela i makim olsem yumi gat wok long mekim ol gutpela disisen. Olgeta wan wan Kristen i mas askim ol yet olsem: ‘Mi wok long mekim ol disisen we i helpim mi long bihainim stretpela rot? Mi larim wok mani, ol amamas, o pasin bilong pas gut wantaim famili i mekim na mi stap longwe long Jehova?’

²² Oltaim Jehova i save laikim tru ol manmeri bilong em. Wanpela samting tasol we inap mekim na yumi stap longwe long Jehova, em sapos yumi yet i mekim ol disisen i no stret. (Rom 8:38, 39) Tasol yu yet inap pasim dispela samting long kamap! Yu mas tingting strong long no ken larim wanpela samting i mekim na yu stap longwe long Jehova. Long neks stadi, yumi bai stori long 4-pela moa samting long laip bilong yumi we yumi mas skelim gut ol disisen bilong yumi.

1, 2. (a) Olsem wanem Satan i giamanim ol man? (b) Wanem samting bai helpim yumi long i go klostu long God?

GOD JEHOVA i wokim ol man long pasin we ol bai luksave olsem ol i mas pas gut wantaim em. Tasol Satan i laik kirapim yumi long tingim olsem i no gat wok long pas gut wantaim Jehova. Dispela em i wanpela tok giaman em Satan i bin kirapim taim em i giamanim Iv long gaden Iden. (Stt. 3:4-6) Kirap long dispela taim na i kam inap long nau, planti man i bin bilipim dispela tok giaman.

² Yumi no ken bilipim dispela tok giaman. Baibel i tok: “Yumi save long ol trik bilong em.” (2 Kor. 2:11) Satan i laik mekim na bai yumi stap longwe long Jehova na mekim ol disisen i no stret. Tasol olsem stadi i kamap paslain i stori pinis long en, yumi ken mekim gutpela disisen long sait bilong wok mani, ol amamas, na insait long famili. Dispela stadi bai helpim yumi long holim stretpela tingting long teknoloji, helt, mani, na pasin antap, na dispela inap helpim yumi long “i go klostu long God.”—Jems 4:8.

TEKNOLOJI

3. Man inap yusim ol kompiuta na ol narapela masin samting long mekim wanem ol wok?

³ Long nau, planti man i yusim kompiuta na ol masin samting. Sapos yumi mekim gutpela wok long ol dispela masin, dispela inap helpim yumi. Tasol sapos yumi mekim wok nogut long en, dispela inap mekim na yumi stap longwe long Papa bilong yumi long heven. Ol kompiuta inap helpim yumi. Ol brata i yusim kompiuta long raitim na wokim nius Wastaua. Kompiuta inap helpim yumi long mekim wok painimaut na toktok wantaim ol narapela, na yumi inap kisim amamas long en. Tasol sapos yumi laikim tru kompiuta, yumi inap lusim bikpela haptaim tumas long tingting long en na mekim wok long en. Planti edvetaismen i soim olsem yumi mas i gat ol dispela nupela masin. Wanpela yangpela man i laikim tumas wanpela kain kompiuta, olsem na long pasin hait em i salim wanpela kidni bilong em bambai em inap kisim mani bilong baim dispela kompiuta. Dispela i givim hevi long em yet!

4. Wanpela brata i bin mekim wanem bilong senisim pasin bilong lusim bikpela haptaim tumas long yusim kompiuta?

⁴ Bikpela hevi moa inap painim yumi sapos yumi larim ol kompiuta samting i bagarapim pasin bilong yumi long pas gut wantaim Jehova. Yumi inap lusim bikpela haptaim long yusim ol kompiuta samting o yusim long mekim ol wok nogut. Wanpela brata nem bilong em Jon, em i gat 30 krismas samting, em i tok em i save lusim bikpela haptaim long kompiuta na em i no mekim stadi bilong em.a Em i save yusim Intenet i go inap long biknait. Em i tok maski em i pilim taiet tru, i hatwok long em i stop long toktok wantaim ol narapela long Intenet o lukim ol vidio, maski sampela i nogut. Em i laik senisim dispela pasin, olsem na em i stretim program bambai kompiuta yet i ken pas long taim em i makim bilong slip.—Ritim Efesus 5:15, 16.

5, 6. (a) Ol papamama i mas mekim wanem ol samting bilong lukautim ol pikinini? (b) Olsem wanem ol papamama i ken helpim ol pikinini long kisim ol gutpela poroman?

⁵ Yupela ol papamama, yupela i no ken bosim olgeta samting ol pikinini i mekim, tasol yupela i mas kontrolim pasin bilong ol long yusim kompiuta. No ken larim ol long go long ol Web-sait i stori long pasin pamuk na wok bilong ol spirit nogut, o pilaim ol gem i gat pasin pait, o toktok wantaim ol poroman nogut long Intenet. Sapos yu no laik bai ol i distebim yu na yu larim ol yet i makim samting ol i laik mekim, ol inap ting olsem i no gat rong long ol samting ol i mekim. Yupela ol papamama i gat wok long lukautim ol liklik pikinini na ol tineja bambai i no gat wanpela samting i mekim na ol i stap longwe long Jehova. Ol animal tu i save pait taim wanpela i laik bagarapim ol pikinini bilong ol. Ol papamama tu i gat wok long lukautim ol pikinini bambai hevi i no ken painim ol.—Skelim Hosea 13:8.

⁶ Helpim ol pikinini bilong yu long bung wantaim ol Kristen em ol i bihainim gutpela pasin, em ol yangpela na lapun wantaim. Tingim, ol pikinini bilong yu i nidim yu long lusim sampela haptaim bilong stap wantaim ol! Olsem na yu mas makim sampela haptaim bilong mekim ol samting wantaim ol, olsem lap, pilai, wok, na “go klostu long God.”b

HELT

7. Bilong wanem yumi olgeta i laik lukautim helt bilong yumi?

⁷ Planti taim yumi save askim ol narapela long ol i pilim olsem wanem. Kirap long taim Adam na Iv i bin harim tok bilong Satan na mekim ol yet i stap longwe long Jehova, sik i stat long painim ol manmeri i kam inap long nau. Satan i save amamas taim yumi sik, long wanem, sik inap mekim na i hatwok tru long mekim wok bilong Jehova. Na sapos yumi dai, yumi no inap long mekim wok bilong Jehova. (Sng. 115:17) Olsem na yumi laik mekim ol samting bilong lukautim gut helt bilong yumi.c Yumi mas tingim helt bilong ol bratasista bilong yumi.

8, 9. (a) Yumi ken mekim wanem bambai yumi no ken tingting tasol long helt bilong yumi? (b) Bilong wanem i gutpela long yumi stap belgut?

⁸ Yumi no ken tingting na wari tasol long helt bilong yumi. Sampela man i save lusim bikpela haptaim long toktok long sampela kain kaikai bilong helpim bodi, sampela kain marasin bilong lukautim helt na mekim gut skin, na ol i no save lusim bikpela haptaim long autim tok long Kingdom Bilong God. Ol inap ting olsem ol i wok long helpim ol narapela. Tasol i no stret long yumi salim o toktok long ol dispela samting taim yumi stap long Haus Kingdom o long kibung. Bilong wanem?

⁹ Yumi save bung wantaim bilong toktok long ol tok bilong Baibel na kisim amamas em holi spirit bilong God i save kamapim. (Gal. 5:22) Taim yumi bung long ol miting, dispela em i no taim bilong toktok long ol marasin bilong lukautim helt. Dispela inap pinisim amamas bilong ol narapela. (Rom 14:17) Olgeta wan wan man i ken mekim disisen bilong ol yet long olsem wanem ol i laik lukautim helt bilong ol. Ol man, na ol dokta tu, i no inap stretim olgeta sik. Sapos yumi tingting oltaim long helt bilong yumi, dispela i no inap helpim yumi. (Luk 12:25) Baibel i tok, “pasin bilong belgut i olsem marasin bilong mekim man i stap gut.”—Snd. 17:22.

10. (a) Long tingting bilong Jehova, wanem samting i save mekim man i luk nais? (b) Wanem taim bai helt bilong yumi i kamap gutpela olgeta?

¹⁰ Olsem tasol, yumi mas tingim lukluk bilong yumi. Tasol yumi no ken traim long luk yangpela moa winim krismas bilong yumi. Baibel i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.” (Snd. 16:31) Jehova i tingim olsem pasin tru bilong yumi em i bikpela samting tru winim lukluk bilong yumi, olsem na yumi tu i mas holim wankain tingting. (Ritim 1 Pita 3:3, 4.) Olsem na yu ting i stret long yumi kisim sampela kain marasin we inap givim hevi long yumi yet o kisim operesen bilong mekim lukluk bilong yumi i kamap gutpela moa? Maski yumi gat hamas krismas o wanem kain helt, pasin bilong “amamas long Bikpela” bai mekim lukluk bilong yumi i kamap gutpela moa. (Neh. 8:10) Long nupela taim, helt bilong yumi bai kamap gutpela olgeta na yumi bai kamap yangpela gen. (Jop 33:25; Ais. 33:24) Tasol long nau yumi mas mekim ol gutpela disisen na bilip long ol tok promis bilong Jehova. Dispela bai helpim yumi long amamas long laip bilong yumi long nau, na yumi bai i no tingting na wari tumas long helt bilong yumi.—1 Tim. 4:8.

MANI

11. Olsem wanem mani inap mekim na yumi stap longwe long Jehova?

¹¹ I no gat rong long holim mani o painim rot bilong kisim mani. (Sav. 7:12; Luk 19:12, 13) Tasol sapos yumi laikim tumas mani, dispela bai mekim na yumi stap longwe long Jehova. (1 Tim. 6:9, 10) Sapos yumi gat “ol wari bilong laip long dispela taim,” olsem yumi wari tumas long kisim ol samting yumi nidim, dispela inap mekim na yumi stap longwe long Jehova. “Strong bilong mani long giamanim man” inap mekim na man i ting olsem mani bai mekim em i amamas na stap belgut. (Mat. 13:22) Jisas i tok “i no gat wanpela man” inap stap wokboi bilong God na mani wantaim.—Mat. 6:24

12. Ol man i save mekim wanem ol samting bilong kisim bikpela mani kwiktaim? Olsem wanem yumi inap abrusim pasin bilong mekim ol disisen i no stret?

¹² Sapos yumi ting mani em i nambawan bikpela samting, dispela inap pulim yumi long mekim rong. (Snd. 28:20) Sampela man i laik kisim bikpela mani kwiktaim, olsem na ol i baim ol loto tiket. Sampela brata i insait long ol bisnis em ol i ting bai helpim ol long kisim mani kwiktaim, na ol i tok promis tu long ol arapela insait long kongrigesen olsem ol tu inap long kisim planti mani. Sampela narapela brata i bin askim ol arapela long kongrigesen long kisim dinau bilong mekim wok bisnis na ol i tok promis long givim bikpela mani moa bilong bekim dinau. Sapos yumi gat pasin gridi, yumi inap orait long insait long wok bisnis we inap pulim bikpela mani bilong yumi. Olsem na yumi mas was gut, nogut yumi kisim pasin gridi. Planti taim i no gat rot long man inap kisim bikpela mani kwiktaim.

13. Jehova i laik bai yumi holim wanem tingting long mani?

¹³ Sapos yumi putim “Kingdom” na “stretpela pasin bilong God” i stap namba 1 samting long laip bilong yumi, Jehova bai blesim ol wok yumi mekim bilong kisim ol samting yumi nidim tru. (Mat. 6:33; Efe. 4:28) Em i no laik bai yumi wok hat tumas na yumi aislip long taim bilong miting. Em i no laik bai yumi wari tumas long mani taim yumi stap insait long Haus Kingdom. Planti man i pilim olsem ol i mas mekim olgeta samting ol inap mekim bilong kisim mani. Ol i no laik mekim sampela wok taim ol i kamap lapun. Ol i save tokim ol pikinini tu long mekim wankain samting. Tasol Jisas i soim olsem dispela kain tingting i no stret. (Ritim Luk 12:15-21.) Gehasi i bin ting olsem em inap bihainim pasin gridi na long wankain taim em inap pas gut yet wantaim Jehova.—2 Kin. 5:20-27.

14, 15. Bilong wanem yumi no ken kisim tingting olsem mani bai helpim yumi long kisim gutpela sindaun? Stori long wanpela eksampel.

¹⁴ Ol tarangau i bin draun long wara, long wanem, ol i traim long kisim pis i hevi tumas. Wankain samting inap painim yumi sapos yumi wok hat long kamap maniman. Wanpela elda nem bilong em Alex, em i tok em i save yusim gut ol samting bambai em i no ken westim mani. Olsem, em i no save westim sop bilong wasim gras. Tasol em i tingting olsem sapos em i gat sampela moa mani, em inap lusim wok mani na mekim wok painia. Olsem na em i kisim sampela save long pasin bilong investim mani long stok maket na em i yusim olgeta mani bilong em long baim ol stok. Na tu, em i kisim dinau bilong baim planti stok moa! Tasol ol stok em i bin baim i no helpim em long kisim mani. Alex i tok: “Mi tingting strong long kisim bek mani bilong mi.” Em i ting olsem sapos em i wet liklik, pe bilong ol stok bai go antap gen na em bai gat rot bilong kisim mani.

¹⁵ Tingting bilong Alex i stap tasol long ol stok em i bin baim. I hatwok long em i putim wok bilong Jehova i stap namba 1 samting, na em i no inap slip gut. Tasol pe bilong ol stok i no go antap. Olgeta mani bilong Alex i pinis na em i salim haus bilong em. Em i tok em i putim bikpela hevi long famili bilong em. Dispela i skulim em long wanpela bikpela samting. Em i tok, sapos wanpela man i bilip olsem graun bilong Satan bai helpim em long kisim gutpela sindaun na stap amamas, dispela man bai bel hevi tru. (Snd. 11:28) Sapos yumi putim olgeta bilip bilong yumi long mani na long save bilong yumi long kisim mani, tru tru i olsem yumi putim bilip bilong yumi long Satan, em “god bilong dispela graun.” (2 Kor. 4:4; 1 Tim. 6:17) Bihain Alex i mekim sampela senis long laip bilong em bambai em inap lusim bikpela haptaim moa long autim gutnius. Dispela i helpim em na famili bilong em long i stap amamas moa na i go klostu moa long Jehova.—Ritim Mak 10:29, 30.

PASIN ANTAP

16. Bilong wanem yumi mas amamas tru? Wanem samting inap kamap sapos yumi ting save bilong yumi i moa yet?

¹⁶ Yumi mas amamas tru olsem yumi stap olsem ol Witnes Bilong Jehova. (Jer. 9:24) Dispela bai helpim yumi long mekim gutpela disisen long olgeta taim na bihainim ol stretpela lo bilong God. Tasol yumi mas was gut, na no ken kisim pasin antap na ting olsem save bilong yumi i winim save bilong Jehova, long wanem, dispela inap mekim na yumi stap longwe long Em.—Sng. 138:6; Rom 12:3.

17, 18. (a) Husat i gat pasin daun na Baibel i stori long em? Husat i gat pasin antap? (b) Wanpela brata i bin mekim wanem bambai pasin antap i no ken mekim na em i stap longwe long Jehova?

¹⁷ Baibel i stori long ol manmeri husat i gat pasin antap na ol manmeri husat i gat pasin daun. King Devit i bin mekim pasin daun na em i askim Jehova long stiaim em, na Jehova i blesim em. (Sng. 131:1-3) Tasol Jehova i bin givim strafe long King Nebukatnesar na King Belsasar, long wanem, ol i gat pasin antap. (Dan. 4:30-37; 5:22-30) Long nau tu, sampela samting inap painim yumi na dispela inap putim bikpela hevi long yumi sapos yumi gat pasin antap. Ryan i gat 32 krismas na mekim wok olsem kongrigesen sevan, na em i go stap long wanpela nupela kongrigesen. Em i ting olsem i no longtaim na ol bai makim em long kamap elda. Tasol wanpela yia i lus na em i no kisim wok elda. Yu ting Ryan i kisim pasin antap na kros long ol elda i no makim em long kamap elda? Yu ting em i lusim ol miting na larim pasin antap i mekim na em i stap longwe long Jehova na kongrigesen? Yu bai mekim wanem sapos dispela samting i painim yu?

¹⁸ Ryan i mekim sampela wok painimaut long ol samting em i ken mekim taim em i wet long kisim wanpela gutpela samting. (Snd. 13:12) Ryan i tok: “Mi stat long luksave olsem mi mas lain long kisim pasin bilong i no les kwik na pasin daun. Mi mas larim Jehova i trenim mi.” Ryan i tingting moa long helpim ol narapela long kongrigesen na ol manmeri em i bungim long wok autim tok. I no longtaim na em i lukautim sampela gutpela Baibel stadi. Em i tok: “Bihain long 1 na hap yia, mi kirap nogut taim ol i makim mi long kamap elda. Mi no wari moa long kisim dispela wok, long wanem, mi amamas tru long wok bilong autim tok.”—Ritim Song 37:3, 4.

STAP KLOSTU LONG JEHOVA!

19, 20. (a) Yumi ken mekim wanem bambai ol samting yumi mekim i ken helpim yumi na bai yumi no stap longwe long Jehova? (b) Baibel i kamapim stori bilong wanem sampela man em ol i bin stap klostu long Jehova?

¹⁹ Insait long dispela 2-pela stadi, i no gat rong long ol dispela 7-pela samting em yumi stori pinis long en. Yumi amamas tru, long wanem, yumi stap olsem ol Witnes Bilong Jehova, famili bilong yumi i stap amamas, na yumi gat gutpela helt. Yumi mas i gat wok na mani bilong lukautim yumi yet na famili bilong yumi. Pasin bilong painim amamas i gutpela, na ol kompiuta samting inap helpim yumi. Tasol yumi mas tingim olsem sapos yumi mekim wanpela samting long taim i no stret, na yumi lusim bikpela haptaim tumas long en, o yumi mekim wok nogut long en, yumi inap mekim yumi yet i stap longwe long Jehova.

²⁰ Satan i laik bai yu mekim yu yet i stap longwe long Jehova. Tasol yu inap wok strong long lukautim yu yet na famili bilong yu! (Snd. 22:3) Yu mas go klostu long Jehova na stap klostu long em. Baibel i kamapim stori bilong planti man husat i bin mekim olsem. Enok na Noa i bin stap olsem ol “pren tru bilong God.” (Stt. 5:22; 6:9, 10) Moses i bilip long God olsem man i stap tru na em inap lukim long ai. (Hib. 11:27) Oltaim Jisas i mekim samting em Papa bilong em i laik bai em i mekim, na Papa i blesim em. (Jon 8:29) Bihainim gutpela pasin bilong ol dispela man. Baibel i tok: “Oltaim yupela i mas amamas i stap. Yupela i mas beten oltaim. Yupela i mas tok tenkyu long God long olgeta samting.” (1 Tes. 5:16-18) No ken tru larim wanpela samting i mekim na yu stap longwe long Jehova!