“Ol Dispela Samting i Mas Kamap”

“Jisas i bekim tok bilong ol olsem, ‘. . . Ol dispela samting i mas kamap, tasol las de i no yet.’ ”​—⁠MATYU 24:​4-6.

1. Gutpela yumi laik save long wanem samting?

YU SAVE tingim i stap bilong yu long nau na ol samting bai painim yu long bihain, a? Sapos olsem, ating yu laik save tu long wanpela tok em C. T. Russell i laik save long en long yia 1877. Russell, bihain em i kamapim Sosaiti Was Taua, em i bin raitim buklet The Object and Manner of Our Lord’s Return. Dispela buklet i gat 64 pes bilong en na i stori long kambek bilong Jisas. (Jon 14:⁠3) Wanpela taim Jisas i stap long maunten Oliv na ol aposel i askim em long taim em bai kam bek, olsem: “Wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek [olsem, “kam i stap,” NW ] na dispela graun i laik pinis?”​—⁠Matyu 24:⁠3.

2. Bilong wanem i gat kain kain tingting long ol samting Jisas i bin tok profet long en?

² Yu save long bekim bilong Jisas long dispela askim, na yu klia gut long en? Yumi ken painim dispela bekim long 3-pela Gutnius. Profesa D. A. Carson i tok: “Ol man bilong kamapim insait bilong tok bilong Baibel ol i save tok pait moa yet long tok profet bilong Matyu sapta 24 na ol wankain tok profet i stap long Mak 13 na Luk 21.” Nau em i kamapim tingting bilong em yet​—⁠dispela tu em tingting bilong ol man tasol, em tingting bilong ol i save pait wantaim. Kirap long yia 1900 samting na i kam inap nau, planti kain tingting olsem i bin kamapim klia olsem ol man i sot long bilip. Ol man i kamapim ol dispela kain tingting ol i tok Jisas i no bin mekim ol tok yumi kaunim long ol Gutnius, bihain ol man i bin paulim ol tok bilong em, o tok profet bilong em i no bin kamap​—⁠ol man i save daunim ol tok bilong Baibel ol i kamapim kain tingting olsem. Wanpela man i kamapim as bilong ol tok bilong Baibel, em i kamapim tok bilong Gutnius bilong Mak ‘long rot bilong tingting bilong ol Budis Mahayana’!

3. Ol Witnes Bilong Jehova i mekim wanem bilong save long tok profet bilong Jisas?

³ Tasol ol Witnes Bilong Jehova i bilip olsem ol tok bilong Baibel i tru na ol i ken bilip tru long en, na ol i bilip tu long ol tok Jisas i mekim long 4-pela aposel em ol i bin stap wantaim em long maunten Oliv 3-pela de paslain long taim em i dai. Kirap long taim bilong C. T. Russell na i kam inap long nau, lain bilong God i bin wok long kisim stretpela save long dispela tok profet Jisas i bin mekim. Inap sampela yia pinis, nius Wastaua i bin kamapim sampela save moa bilong stretim tingting bilong lain bilong God long dispela tok profet. Olsem wanem? Yu bin kisim gut ol dispela tok na dispela i mekim sampela samting long i stap bilong yu?a Orait nau yumi ken stori gen long dispela tok profet.

Ol Samting Nogut i Laik Kamap

⁴ Ol aposel i save olsem Jisas em i Mesaia. Olsem na taim ol i harim em i toktok long indai, na kirap bek, na kambek bilong em, ating ol i tingting olsem, ‘Sapos Jisas i dai na lusim mipela, olsem wanem em inap kamapim ol gutpela samting em Mesaia i mas kamapim?’ Na Jisas i bin tok long Jerusalem na tempel bilong en bai bagarap. Ating ol aposel i tingting, ‘Long wanem taim na olsem wanem dispela samting bai kamap?’ Ol aposel i laik save long ol dispela samting, olsem na ol i kamapim askim olsem: “Wanem taim ol dispela samting bai i kamap? Wanem mak bai i kamap pastaim, na mipela i ken save, ol dispela samting klostu i laik kamap?”​—⁠Mak 13:4; Matyu 16:​21, 27, 28; 23:⁠37–​24:⁠2.

5. Ol tok Jisas i mekim, olsem wanem ol i kamap tru long taim bilong ol aposel?

⁵ Jisas i tok profet olsem bai i gat ol bikpela pait, hangre, bikpela sik, guria, pasin bilong bel nogut na bagarapim ol Kristen, ol mesaia giaman, na wok bilong autim gutnius bilong Kingdom long olgeta hap. Bihain las de bai kamap. (Matyu 24:​4-​14; Mak 13:​5-​13; Luk 21:​8-​19) Jisas i bin mekim dispela tok long kirap bilong yia 33 C.E. Kirap long dispela taim na i go inap long yia 70 C.E., ol disaipel i was i stap ol inap luksave olsem ol samting Jisas i bin tok profet long en i kamap tru. Ol samting i kamap long bipo i kamapim long ples klia olsem ol samting Jisas i bin kolim olsem mak, truim bilong en i kamap long dispela taim, na long yia 66 i go inap long yia 70 C.E. ol Rom i pinisim pasin na lo ol Juda i stap aninit long en. Dispela samting i kamap olsem wanem?

6. Wanem samting i kamap namel long ol Rom na ol Juda long yia 66 C.E.?

⁶ Long taim bilong bikpela san long hap bilong Judia long yia 66 C.E., ol Selot bilong lain Juda ol i pait long ol man i was long wanpela kem bilong ol Rom klostu long tempel bilong Jerusalem, na dispela i kirapim pasin pait long sampela narapela hap bilong kantri. Long buk History of the Jews, Profesa Heinrich Graetz, em i tok: “Sestius Galus, em wok bilong em olsem namba wan gavman bilong Siria long lukautim biknem bilong ami bilong Rom . . . em i no inap larim pasin bikhet bilong ol Juda i wok long kamap long olgeta hap, olsem na em i mas mekim wanpela samting bilong daunim dispela pasin bikhet. Em i bungim ol lain soldia bilong em, na ol hetman bilong ol kantri i stap klostu ol tu i salim ami bilong ol.” Dispela ami i gat 30,000 soldia ol i banisim Jerusalem. Ol i pait i go inap liklik hap taim, na bihain ol Juda i surik bek na ol i hait long banis klostu long tempel. “Inap 5-pela de ol Rom i laik bagarapim banis, tasol ol Juda i sutim ol samting bilong pait i go long ol na ol Rom i mas surik bek. Long de namba 6 tasol ol inap long brukim banis long hap not klostu long Tempel.”

7. Bilong wanem ol disaipel bilong Jisas ol i gat narapela tingting long planti Juda?

⁷ Dispela i bin paulim tru tingting bilong ol Juda, long wanem, inap longtaim pinis ol i ting olsem God bai lukautim ol na taun holi bilong ol! Tasol ol disaipel bilong Jisas i save pinis ol dispela samting nogut bai kamap long Jerusalem. Jisas i bin tok profet olsem: “Bihain wanpela taim bai i kamap, na ol birua bilong yu bai i kam hipim graun raunim bikpela banis bilong yu. Na ol bai i banisim yu tru long olgeta hap. Na ol bai i brukim yu na bagarapim yu tru, yu wantaim ol pikinini bilong yu i stap insait long yu. Na ol bai i no larim wanpela ston bilong yu i stap antap long narapela ston.” (Luk 19:​43, 44) Tasol olsem wanem? Dispela i makim olsem ol Kristen i stap long Jerusalem long yia 66 C.E. ol bai bagarap?

⁸ Taim Jisas i bekim tok bilong ol aposel long maunten Oliv, em i tok profet olsem: “Long dispela taim bai i gat bikpela hevi tru. Stat long taim God i wokim olgeta samting na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos Bikpela i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis bilong em yet. Olsem na em i sotim dispela taim.” (Mak 13:​19, 20; Matyu 24:​21, 22) Olsem na Bikpela bai sotim taim na em i ken kisim bek “ol manmeri em i makim pinis” na ol i no ken lus. Husat ol dispela manmeri? Ol i no ol bikhetlain Juda em ol i tok ol i lotu long Jehova, tasol ol i bin sakim Pikinini bilong em. (Jon 19:​1-7; Aposel 2:​22, 23, 36) Ol dispela manmeri em i bin makim long dispela taim bipo, em ol Juda na ol man i no bilong lain Juda em ol i bilip long Jisas olsem em i Mesaia na Man bilong kisim bek ol. God i bin makim ol dispela manmeri, na long de Pentikos bilong yia 33 C.E., em i kisim ol i kamap wanpela nupela lain bilong spirit, em “lain Israel tru bilong God.”​—⁠Galesia 6:​16; Luk 18:7; Aposel 10:​34-​45; 1 Pita 2:⁠9.

9, 10. Taim ol Rom i pait long Jerusalem, olsem wanem God i “sotim taim” bilong ol? Wanem samting i kamap long dispela?

⁹ Olsem wanem? God i bin “sotim taim” na bai em i ken kisim bek ol manmeri em i bin makim, em ol i stap long Jerusalem? Profesa Graetz i tok: “[Sestius Galus] i no ting i gutpela long pait yet long ol man i gat strongpela tingting long pait na pait inap longpela taim, long wanem, klostu taim bilong ren bai kamap . . . na dispela inap pasim ami long kisim kaikai samting. Ating dispela em i as na em i ting i gutpela long lusim Jerusalem i go.” Maski Sestius Galus i gat wanem tingting, ami bilong Rom i lusim Jerusalem i go, na ol Juda i ranim ol Rom na bagarapim planti bilong ol.

¹⁰ Wantu ol Rom i lusim Jerusalem i go na dispela i opim rot long God i kisim bek ol “manmeri”​—⁠em ol disaipel bilong Jisas i stap long Jerusalem na bagarap inap painim ol. Ol buk i stori long ol samting i bin kamap long dispela taim i tok, taim rot i op ol Kristen i ranawe lusim dispela ples. Man! Dispela samting i kamapim long ples klia olsem God i gat save long wanem samting bai kamap long bihain na long helpim ol manmeri i lotuim em long abrusim bagarap! Tasol olsem wanem long ol Juda i no bilip na ol i no lusim Jerusalem na Judia?

Ol Manmeri Bilong Dispela Taim Bai Lukim

11. Jisas i tok wanem long “ol manmeri bilong dispela taim”?

¹¹ Planti Juda i ting olsem pasin bilong ol long lotu, em tempel i bikpela samting bilong en, dispela i no inap pinis. Tasol Jisas i bin tok: “Yupela i ken kisim save long diwai fik. Taim han bilong en i gat wara na ol nupela lip i kamap, yupela i save, taim bilong gutpela san i laik kamap nau. Olsem tasol, taim yupela i lukim dispela olgeta samting i kamap pinis, orait yupela i ken save, Pikinini Bilong Man i kam klostu pinis, na i stap long dua. Mi tok tru long yupela, taim ol manmeri bilong dispela taim i no i dai yet, dispela olgeta samting bai i kamap. Skai wantaim graun bai i lus, tasol tok bilong mi bai i no inap lus.”​—⁠Matyu 24:​32-35.

12, 13. Taim Jisas i toktok long “ol manmeri bilong dispela taim,” ol disaipel i kisim wanem tingting?

¹² Long ol yia paslain long 66 C.E., ol Kristen i bin lukim pinis truim bilong planti samting bilong dispela mak i gat planti hap bilong en​—⁠olsem ol bikpela pait, hangre, na wok bilong autim gutnius bilong Kingdom i go long planti hap. (Aposel 11:28; Kolosi 1:23) Tasol las de bai kamap long wanem taim? Wanem insait bilong tok bilong Jisas olsem: “Taim ol manmeri bilong dispela taim [tok Grik, ge·ne·aʹ] i no i dai yet”? Ol Juda i birua long God na ol i stap long taim bilong Jisas, na ol hetman bilong lotu tu, planti taim Jisas i bin kolim ol olsem “lain manmeri nogut na ol i no save bel tru long God.” (Matyu 11:16; 12:​39, 45; 16:4; 17:17; 23:36) Olsem na taim Jisas i stap long maunten Oliv na em i toktok gen long “ol manmeri bilong dispela taim,” em i no toktok long olgeta Juda em ol i bin stap kirap long bipo yet na i kam inap long dispela taim, nogat; na em i no toktok long ol disaipel bilong em, maski ol i olsem wanpela “lain manmeri bilong [God] stret.” (1 Pita 2:⁠9) Na Jisas i no tok “ol manmeri bilong dispela taim” ol i bilong wanpela hap taim. Nogat.

¹³ Jisas i toktok long ol Juda i birua long God long dispela taim bipo em ol bai lukim truim bilong dispela mak em i bin kolim. Profesa Joel B. Green i stori long “ol manmeri bilong dispela taim” em Luk 21:32 i toktok long en, olsem: “Long Namba 3 Gutnius, ‘ol manmeri bilong dispela taim’ (na sampela tok olsem) long olgeta taim em i makim wanpela lain i birua long laik bilong God. . . . [Em i makim] ol manmeri i bikhet na givim baksait long laik bilong God.”b

14. Wanem samting i painim “ol manmeri bilong dispela taim”? Wanem samting i painim ol Kristen?

¹⁴ Ol manmeri nogut bilong lain Juda i birua long God, em ol i lukim truim bilong dispela mak Jisas i bin kolim, ol bai lukim tu las de i kamap. (Matyu 24:​6, 13, 14) Na tru tumas, ol i lukim dispela samting i kamap! Long yia 70 C.E., ami bilong Rom em Taitus i bosim, em pikinini man bilong King Vespesian, ol i kam bek. Yumi no inap tingim bikpela pen na hevi i bin painim ol Juda i stap insait long Jerusalem.c Wanpela man i bin lukim ol samting i bin kamap, em Flavius Josifas, em i stori olsem long taim ol Rom i bagarapim pinis dispela taun, inap olsem 1,100,000 Juda i dai pinis na ol i kisim olsem 100,000 manmeri i go kalabus, tasol i no longtaim na planti bilong ol i kisim nogut tru​—⁠ol i dai long hangre o long ol ples pilai bilong ol Rom. Tru tumas, bikpela hevi tru i kamap long yia 66 i go inap long yia 70 C.E., em nambawan bikpela hevi i bin painim Jerusalem na lain Juda i kam inap long dispela taim bipo o i kamap bihain long dispela taim. Tasol dispela bikpela hevi i no painim ol Kristen i bin bihainim tok profet bilong Jisas na ol i ranawe lusim Jerusalem bihain long ol ami bilong Rom i lusim dispela hap long yia 66 C.E.! Ol Kristen God i bin makim, olsem “ol manmeri em i makim pinis,” ol i abrusim bagarap, o ol i no lus, long yia 70 C.E.​—⁠Matyu 24:​16, 22.

Narapela Truim Bai Kamap

15. Olsem wanem yumi ken save, tok profet bilong Jisas i gat bikpela truim bilong en bihain long yia 70 C.E.?

¹⁵ Tasol i no dispela samting tasol i mas kamap. Pastaim Jisas i bin tok, bihain long taim Jerusalem i bagarap em bai kam long nem bilong Jehova. (Matyu 23:​38, 39; 24:⁠2) Em i kamapim klia moa dispela samting long tok profet em i mekim long maunten Oliv. Em i toktok long “bikpela hevi tru” bai kamap, na bihain em i tok ol Krais giaman bai kamap, na inap bikpela hap taim lek bilong ol man bilong ol arapela lain bai i krungutim Jerusalem. (Matyu 24:​21, 23-​28; Luk 21:24) Olsem wanem? Narapela truim, olsem bikpela truim bilong dispela samting bai kamap? Ol samting i kamap i makim olsem. Taim yumi skelim tok bilong Kamapim Tok Hait 6:​2-8 (em ol i raitim bihain long bikpela hevi tru i painim Jerusalem long yia 70 C.E.) wantaim Matyu 24:​6-8 na Luk 21:​10, 11, yumi lukim olsem ol bikpela pait, na hangre, na bikpela sik bai kamap bikpela moa. Bikpela truim bilong tok bilong Jisas i wok long kamap kirap long Namba Wan Pait long yia 1914 na i kam inap long nau.

16-18. Yumi ting wanem samting bai kamap bihain?

¹⁶ Inap planti yia pinis, ol Witnes Bilong Jehova i skulim ol man olsem truim bilong ol samting Jisas i bin kolim olsem mak i kamap long nau em i kamapim klia olsem wanpela “bikpela hevi tru” bai kamap bihain. Ol manmeri nogut bilong dispela taim nau bai lukim dispela bikpela hevi. Yumi ken ting olsem long nau tu bai i gat wanpela samting i kirapim dispela bikpela hevi tru (olsem ol bai kirap na bagarapim ol lotu giaman), wankain olsem long yia 66 C.E. taim Galus i kirapim bikpela hevi long Jerusalem.d Bihain, long wanpela hap taim em yumi no save long taim stret bilong en, las de bai kamap​—⁠bikpela bagarap bai kamap long olgeta hap bilong graun, wankain olsem long yia 70 C.E.

¹⁷ Jisas i toktok long bikpela hevi tru klostu bai kamap, na em i tok: “Taim bilong ol dispela bikpela hevi i pinis [bagarap bilong ol lotu giaman], orait kwiktaim san bai i kamap tudak, na mun bai i no moa lait, na ol sta bai i lusim skai na pundaun, na ol strongpela samting i stap long skai bai i guria. Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.”​—⁠Matyu 24:​29, 30.

¹⁸ Olsem na Jisas yet i tok, ‘taim ol dispela bikpela hevi i pinis,’ ol narapela kain samting bai i kamap long skai. (Skelim wantaim Joel 2:​28-​32; 3:​15.) Dispela bai mekim na ol man i bikhet long God ol bai kirap nogut tru na ol “bai i krai.” Planti “ol bai i pret tru na ai bilong ol bai i raun, long wanem, ol strongpela samting bilong skai bai i guria.” Tasol ol Kristen tru i no inap pret! Ol bai ‘litimapim het bilong ol, long wanem, taim bilong God i kisim bek ol em i kam klostu pinis.’​—⁠Luk 21:​25, 26, 28.

Kot Bai Kamap!

19. Olsem wanem yumi ken save long wanem taim truim bilong tok piksa bilong ol sipsip na meme bai kamap?

¹⁹ Tingim: Matyu 24:​29-31 i tok profet olsem (1) Pikinini bilong man bai i kam, (2) em bai kam wantaim bikpela strong na bikpela lait bilong en, (3) ol ensel bai stap wantaim em, na (4) ol manmeri bilong graun bai lukim em. Long tok piksa bilong em long ol sipsip na meme, Jisas i stori gen long dispela 4-pela samting. (Matyu 25:​31-46) Olsem na yumi ken ting olsem truim bilong dispela tok piksa bai kamap bihain long taim bikpela hevi tru i kirap, taim Jisas i kam wantaim ol ensel bilong em na sindaun long sia king bilong skelim ol manmeri long kot. (Jon 5:​22; Aposel 17:31; skelim wantaim 1 King 7:7; Daniel 7:​10, 13, 14, 22, 26; Matyu 19:28.) Em bai skelim husat, na wanem samting bai painim ol? Tok piksa i kamapim olsem Jisas bai tingim olgeta lain manmeri, i olsem ol i sanap long poret bilong sia king bilong heven.

20, 21. (a) Wanem samting bai painim ol sipsip long tok piksa bilong Jisas? (b) Wanem samting bai painim ol meme long bihain?

²⁰ Ol man na meri i olsem sipsip, Jisas bai makim ol long go long han sut bilong em​—⁠olsem em i orait long ol. Bilong wanem? Long wanem, taim rot i op ol i mekim gut long ol brata bilong em​—⁠em ol Kristen God i bin makim, na ol bai stap king wantaim Krais long Kingdom bilong heven. (Daniel 7:27; Hibru 2:9–​3:⁠1) Olsem tok piksa i kamapim, inap planti milion Kristen i olsem sipsip ol i luksave long lain brata spirit bilong Jisas na ol i wok long helpim ol. Olsem na dispela bikpela lain inap tingting long abrusim bagarap long taim bilong “bikpela hevi tru” olsem Baibel i tok, na bihain ol inap kisim laip oltaim long Paradais long graun aninit long Kingdom bilong God.​—⁠KTH 7:​9, 14; 21:​3, 4; Jon 10:⁠16.

²¹ Tasol narapela kain samting bai painim ol meme! Matyu 24:30 i stori long ol olsem taim Jisas i kam ol “bai i krai.” Na i gat as na ol i mas krai, long wanem, ol i sakim gutnius bilong Kingdom, na ol i biruaim ol disaipel bilong Jisas, na ol i laikim pasin bilong dispela graun em liklik taim bai i pinis. (Matyu 10:​16-​18; 1 Jon 2:​15-​17) Jisas yet​—⁠i no ol disaipel bilong em long graun​—⁠bai makim husat i olsem meme. Em i tok long ol olsem: “Ol dispela lain bai i go bilong kisim pe nogut, em pen i save stap oltaim.”​—⁠Matyu 25:⁠46.

22. Yumi laik skelim yet wanem hap bilong tok profet bilong Jisas?

²² Yumi bin amamas tru long kisim nupela save long tok profet long Matyu sapta 24 na 25. Tasol i gat wanpela hap long dispela tok profet bilong Jisas em yumi laik skelim yet​—⁠em ‘dispela samting nogut tru i sanap i stap long haus bilong God yet.’ Jisas i bin tokim ol disaipel bilong em olsem ol i mas tingim gut dispela samting na ol i mas redi long mekim wanpela samting. (Matyu 24:​15, 16) Dispela “samting nogut tru” em i wanem samting? Long wanem taim em bai sanap i stap long ples holi? Dispela i mekim wanem long yumi long nau na long bihain? Stori i kamap bihain long dispela bai stori long dispela samting.

“Man i Ritim Dispela Tok, Em i Mas Tingim Gut”

“Yupela bai i lukim dispela samting nogut tru . . . i sanap i stap long haus bilong God yet. . . . Long dispela taim ol manmeri i stap long distrik Judia ol i mas ranawe i go long ples maunten.”​—⁠MATYU 24:​15, 16.

1. Toksave Jisas i bin mekim long Luk 19:​43, 44 i kamap tru olsem wanem?

SAPOS wanpela man i toksave long yumi long wanpela bagarap i laik kamap, dispela inap helpim yumi long abrusim dispela bagarap. (Sindaun 22:⁠3) Olsem na tingim i stap bilong ol Kristen long Jerusalem bihain long ol Rom i kam pait long ol long yia 66 C.E. Jisas i bin toksave olsem ol birua bai banisim na bagarapim dispela taun. (Luk 19:​43, 44) Klostu olgeta Juda i bin sakim tok bilong em. Tasol ol disaipel bilong em ol i bihainim dispela toksave. Olsem na ol i abrusim bikpela bagarap i kamap long yia 70 C.E.

2, 3. Bilong wanem yumi mas laik long kisim save long tok profet bilong Jisas long Matyu 24:​15-21?

² Jisas i kamapim wanpela tok profet na ol samting em i kolim i mekim sampela samting long yumi long nau. Long dispela tok profet em i kolim planti samting olsem wanpela mak, olsem ol bikpela pait, hangre, guria, bikpela sik, na ol bai mekim nogut long ol Kristen i autim tok bilong Kingdom bilong God. (Matyu 24:​4-​14; Luk 21:​10-​19) Na Jisas i kamapim wanpela mak bilong helpim ol disaipel bilong em long save olsem las de i klostu​—⁠em wanpela ‘samting nogut tru i sanap i stap long haus bilong God yet.’ (Matyu 24:15) Gutpela yumi skelim gen dispela bikpela tok na yumi ken save em inap mekim wanem long i stap bilong yumi long nau na long bihain.

³ Taim Jisas i kolim pinis dispela mak, em i tok: “ ‘Yupela bai i lukim dispela samting nogut tru bipo profet Daniel i bin tok long en, na dispela samting bai i sanap i stap long haus bilong God yet.’ Man i ritim dispela tok, em i mas tingim gut. ‘Na long dispela taim ol manmeri i stap long distrik Judia ol i mas ranawe i go long ples maunten. Na sapos man i stap antap long haus, orait taim em i go daun em i no ken ting long kisim ol samting i stap insait long haus bilong en. Na man i stap long gaden, em i no ken i go bek long haus bilong kisim longpela klos bilong en. Sori tumas long ol meri i gat bel na ol meri i givim susu long ol pikinini long dispela taim. Yupela i mas beten, bai yupela i no mas ranawe long taim bilong kol o long de Sabat. Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.’ ”​—⁠Matyu 24:​15-21.

⁴ Gutnius em Mak na Luk i raitim i kamapim sampela tok moa long dispela. Long hap em Matyu i kolim olsem “sanap i stap long haus bilong God yet,” Mak 13:14 i kolim olsem “sanap i stap long ples i tambu long en.” Luk 21:20 i kamapim wanpela tok moa bilong Jisas olsem: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau.” Dispela i helpim yumi long save olsem namba wan truim i kamap taim ol Rom i kam bilong bagarapim Jerusalem na tempel bilong en long yia 66 C.E.​—⁠em wanpela ples i holi long ol Juda, tasol em i no wanpela ples i holi moa long Jehova. Long yia 70 C.E., ol Rom i bagarapim Jerusalem na tempel bilong en olgeta. Long dispela taim bipo “dispela samting nogut tru” em i wanem samting? Na olsem wanem em i bin “sanap i stap long haus bilong God yet”? Sapos yumi save long bekim bilong ol dispela askim, em bai helpim yumi long save long truim bilong en long nau.

5, 6. (a) Bilong wanem ol man i ritim Daniel sapta 9 ol i mas tingim gut dispela tok? (b) Tok profet bilong Jisas long “dispela samting nogut tru” dispela i bin kamap tru olsem wanem?

⁵ Jisas i kirapim ol man i ritim dispela tok long ol i mas tingim gut. Ol i ritim wanem tok? Ating em dispela tok bilong Daniel sapta 9. Long dispela sapta yumi inap ritim wanpela tok profet i makim taim Mesaia bai kam na bihain long 3-pela yia na hap ol bai “kilim” em i dai. Dispela tok profet i stori olsem: “Ol bai i putim wanpela samting nogut tru antap long het bilong haus bilong God, na man bilong bagarapim ol samting bai i stap long dispela hap inap long taim em i kisim dispela bagarap God i makim pinis bilong en.”​—⁠Daniel 9:​26, 27; lukim tu Daniel 11:31; 12:⁠11.

⁶ Ol Juda i ting dispela samting i bin kamap taim Antiokas Namba 4 i bagarapim haus bilong God, olsem mekim i kamap doti, inap olsem 200 yia paslain long taim bilong ol. Tasol Jisas i no tok olsem​—⁠em i tok ol i mas tingim gut dispela samting, long wanem, “dispela samting nogut tru” i no kamap yet na sanap i stap long “haus bilong God yet.” Yumi save Jisas i bin toktok long ol ami bilong Rom em ol bai kam long yia 66 C.E., na ol bai karim sampela samting olsem plak o mak bilong ol. Ol Rom i mekim wok long ol dispela samting inap planti yia pinis, em samting bilong lotuim ol god giaman, na long ai bilong ol Juda em samting nogut tru.a Tasol ol bai ‘sanap i stap long haus bilong God yet’ long wanem taim? Dispela i kamap taim ol ami bilong Rom wantaim ol mak bilong ol, ol i kam kirapim pait long Jerusalem na tempel bilong en, em ol Juda i ting em ples holi. Na ol Rom i kirap brukim as bilong banis long hap bilong tempel tu. Tru tumas, samting i nogut tru inap longtaim pinis, nau em i sanap i stap long wanpela ples holi!​—⁠Aisaia 52:1; Matyu 4:5; 27:53; Aposel 6:​13.

“Dispela Samting Nogut Tru” Bilong Nau

7. Wanem tok profet bilong Jisas i kamap tru long taim bilong yumi?

⁷ Kirap long taim bilong Namba Wan Pait na i kam inap long nau, yumi lukim pinis bikpela truim bilong dispela mak Jisas i bin kolim long Matyu sapta 24. Tasol tingim gen tok bilong em: “Yupela bai i lukim dispela samting nogut tru . . . i sanap i stap long haus bilong God yet. . . . Na long dispela taim ol manmeri i stap long distrik Judia ol i mas ranawe i go long ples maunten.” (Matyu 24:​15, 16) Dispela hap bilong tok profet i mas i gat truim bilong en long taim bilong yumi tu.

8. Inap planti yia, ol Witnes Bilong Jehova i bin tok “dispela samting nogut tru” em i wanem samting long nau?

⁸ Ol wokboi bilong Jehova i bilip tru olsem dispela tok profet bai kamap tru, olsem na long Wastaua (tok Inglis) bilong Janueri 1, 1921, ol i stori long dispela tok profet na ol samting i kamap long Midel-Is. Bihain Wastaua (tok Inglis) bilong Disemba 15, 1929, pes 374, i tok: “Wok bilong Lig ov Nesen em bilong pulim ol man long lusim God na lusim Krais, olsem na em i wanpela samting nogut tru, em samting bilong Satan, na samting nogut tru long ai bilong God.” Olsem na long yia 1919 “dispela samting nogut tru” i kamap. Bihain, Yunaitet Nesen i senisim Lig ov Nesen. Inap longtaim pinis ol Witnes Bilong Jehova i bin kamapim olsem ol dispela oganaisesen bilong ol man long kamapim gutaim, ol i samting nogut tru long ai bilong God.

9, 10. Tingting bilong yumi long bipo long bikpela hevi tru, em i bin givim wanem tingting long yumi long taim bilong “dispela samting nogut tru” i mas sanap i stap long ples holi?

⁹ Stori i kamap paslain long dispela i kamapim ol nupela save long Matyu sapta 24 na 25. Olsem wanem? I stret yumi kamapim sampela nupela save long ‘dispela samting nogut tru i sanap i stap long haus bilong God yet’? Yumi ken ting olsem. Tok profet bilong Jisas i bungim taim bilong dispela samting nogut tru i “sanap i stap long haus bilong God yet” wantaim kirap bilong “bikpela hevi tru” em i bin tok profet long en. Olsem na maski “dispela samting nogut tru” i stap longtaim pinis, taim yumi bungim “sanap” bilong en “long haus bilong God yet” wantaim kirap bilong “bikpela hevi tru” i laik kamap, dispela i mas mekim sampela samting long tingting bilong yumi. Olsem wanem mipela inap tok olsem?

¹⁰ Bipo lain bilong God i ting olsem namba wan hap bilong bikpela hevi tru em i bin kirap long 1914, na laspela hap bilong en bai kamap long pait bilong Armagedon. (KTH 16:​14, 16; skelim wantaim Wastaua (tok Inglis), Epril 1, 1939, pes 110.) Olsem na yumi ken save long as na bipo ol i ting olsem “dispela samting nogut tru” bilong bihain em i bin sanap i stap long ples holi bihain liklik long Namba Wan Pait.

11, 12. Long 1969, ol i kamapim wanem narapela tingting long bikpela hevi tru?

¹¹ Tasol sampela yia bihain yumi kisim narapela tingting long dispela. Long Fonde, Julai 10, 1969, long “Gutaim Long Graun” Kibung Intenesenel long Nu Yok Siti, F. W. Franz, long dispela taim em i nambatu presiden bilong Sosaiti Was Taua, em i mekim wanpela gutpela tok i kirapim tru bel bilong ol man. Brata Franz i stori gen long tingting bilong ol bilong pastaim long tok profet bilong Jisas, em i tok: “Ol i tok dispela ‘bikpela hevi tru’ i bin kirap long yia 1914 C.E. na God i no larim i stap longtaim, em i sotim na pinisim Namba Wan Pait long Novemba 1918. Kirap long dispela taim God i larim hap taim i stap bambai lain remnan bilong ol Kristen God i bin makim, ol i ken mekim wok pastaim, na bihain laspela hap bilong ‘bikpela hevi tru’ bai kamap long pait bilong Armagedon.”

¹² Nau em i kamapim wanpela tok ol i bin stretim, olsem: ‘Yumi mas tingim samting i bin kamap pastaim long taim bilong ol aposel, na yumi save “bikpela hevi tru” bilong nau i no bin kirap long yia 1914 C.E. Samting i bin kamap long 1914 i go inap long 1918 em olsem “pen i save kamap pastaim long meri i laik karim pikinini” . . . “Bikpela hevi tru” em i no kamap yet. Long taim bilong “bikpela hevi tru,” olgeta lotu giaman [na ol lotu ol i holim nating nem Kristen tu] ol bai bagarap, na bihain long en “pait long dispela bikpela de bilong God I Gat Olgeta Strong” bai kamap long taim bilong Armagedon.’ Dispela i makim olsem olgeta samting bilong bikpela hevi tru em i no kamap yet.

13. Bilong wanem i stret yumi tok long bihain tu “dispela samting nogut tru” bai i ‘sanap i stap long haus bilong God yet’?

¹³ Dispela samting i helpim yumi long save long taim “dispela samting nogut tru” bai sanap i stap long haus bilong God yet. Tingim samting i bin kamap long taim bilong ol aposel. Ol Rom i kam pait long Jerusalem long yia 66 C.E., tasol wantu ol i kirap na lusim Jerusalem, na dispela i opim rot na God i ken kisim bek ol “manmeri” Kristen na ol i no ken lus. (Matyu 24:22) Olsem na yumi bilip olsem klostu nau dispela bikpela hevi tru bai kirap, tasol God bai sotim taim bilong en bambai em i ken kisim bek ol manmeri em i bin makim. Tingim dispela bikpela samting: Long samting i kamap bipo na i olsem piksa, ‘dispela samting nogut tru i sanap i stap long haus bilong God yet’ i makim ol ami bilong Rom em Jeneral Galus i bosim ol na ol i kam pait long Jerusalem long yia 66 C.E. Samting i mas kamap long nau na i makim dispela samting i bin kamap long bipo​—⁠em kirap bilong bikpela hevi tru​—⁠i no kamap yet. Olsem na “dispela samting nogut tru,” em i kamap long yia 1919, yumi ken ting em i no sanap yet long ples holi​—⁠em bai mekim long bihain.b Dispela bai kamap olsem wanem? Em inap mekim wanem long yumi?

Pait Bai Kamap Long Bihain

14, 15. Olsem wanem Kamapim Tok Hait sapta 17 i helpim yumi long save long ol samting i mas kamap paslain long Armagedon?

¹⁴ Buk Kamapim Tok Hait i stori long pait bai kamap long bihain bilong bagarapim ol lotu giaman. Sapta 17 i stori olsem God bai givim strafe long “Bikpela taun Babilon, em mama tru bilong olgeta pamukmeri”​—⁠em olgeta lotu giaman long graun. Ol lotu i holim nating nem Kristen ol i bikpela hap bilong en, na ol i tok ol i lain bilong God. (Skelim wantaim Jeremaia 7:⁠4.) Inap longtaim pinis, ol lotu giaman, na ol lotu i holim nating nem Kristen tu, ol i mekim pasin pamuk wantaim “ol king bilong graun,” tasol dispela pasin bai pinis taim ol dispela lotu i bagarap. (KTH 17:​2, 5) Husat bai bagarapim ol?

¹⁵ Buk Kamapim Tok Hait i stori long “wanpela retpela wel animal,” em i stap inap liklik hap taim, na em bai lus, na bihain em bai kam bek gen. (KTH 17:​3, 8) Ol hetman bilong dispela graun ol i givim strong long dispela wel animal. Sampela tok bilong dispela tok profet i helpim yumi long save olsem dispela wel animal em i wanpela oganaisesen bilong kamapim gutaim na em i bin kamap long yia 1919 olsem Lig ov Nesen (wanpela “samting nogut tru”) na nau em Yunaitet Nesen. Kamapim Tok Hait 17:​16, 17 i tok olsem God bai putim tingting long bel bilong sampela hetman bilong graun em ol i go pas long givim strong long dispela “wel animal” bilong bagarapim olgeta lotu giaman bilong graun. Taim ol dispela hetman i kirapim pait long ol lotu giaman, dispela i makim olsem bikpela hevi tru i kirap pinis.

16. Wanem ol bikpela samting i wok long kamap long ol samting bilong lotu?

¹⁶ Dispela bikpela hevi tru i no kirap yet​—⁠em i bilong kamap long bihain. Orait olsem wanem? Taim bilong dispela samting nogut tru i mas “sanap i stap long haus bilong God yet” em i kamap pinis o em bai kamap bihain? Yumi ken ting olsem. Dispela “samting nogut tru” i kamap long yia 1919, olsem na em i stap pinis inap planti yia, tasol klostu nau long narapela kain pasin em bai sanap i stap long “haus bilong God yet.” Ol disaipel bilong Krais long taim bilong ol aposel ol i gat bikpela laik long save long olsem wanem pasin bilong dispela samting nogut tru long “sanap i stap long haus bilong God yet,” em bai kamap, na olsem tasol ol Kristen long nau tu ol i laik save long dispela samting. Yumi save, bai yumi mas wet inap long taim truim bilong dispela tok profet i kamap na bai yumi ken save long ol liklik liklik samting bilong en. Tasol long sampela kantri ol man i no laikim tumas ol lotu, na dispela pasin i wok long go bikpela. Sampela lain politik, wantaim sampela man em bipo ol i Kristen na ol i lusim trupela bilip, ol i kirapim ol manmeri long birua long ol lotu na birua moa yet long ol trupela Kristen. (Song 94:​20, 21; 1 Timoti 6:​20, 21) Olsem na sampela lain politik long nau ol i “pait long Pikinini Sipsip,” na olsem Kamapim Tok Hait 17:14 i tok, dispela pait bai i go bikpela. Ol i no ken bagarapim Pikinini Sipsip bilong God​—⁠em Krais Jisas em i kisim biknem pinis long heven​—⁠tasol ol bai birua long ol manmeri i lotu tru long God, na moa yet long ol “manmeri bilong God.” (Daniel 7:25; skelim wantaim Rom 8:​27; Kolosi 1:2; KTH 12:17.) God i givim tok promis long yumi olsem Pikinini Sipsip na ol manmeri i pait wantaim em ol bai winim dispela pait.​—⁠KTH 19:​11-21.

17. Yumi ken ting “dispela samting nogut tru” bai sanap i stap long ples holi olsem wanem?

¹⁷ Yumi save ol lotu giaman bai bagarap. Bikpela Babilon i “dringim blut bilong ol [manmeri bilong God] na em i kamap longlong olsem man i spak” na em i mekim pasin olsem wanpela kwin, tasol em bai bagarap. Em i bin bosim strong ol king bilong graun na kirapim ol long bihainim pasin i doti, tasol klostu nau dispela ‘10-pela kom wantaim wel animal’ ol bai birua long em na bagarapim em. (KTH 17:​6, 16; 18:​7, 8) Taim “retpela wel animal” i kirapim pait long dispela pamukmeri bilong lotu, “dispela samting nogut tru” bai sanap i stap long dispela ples em ol lain i holim nating nem Kristen i kolim olsem ples holi, na i olsem em i laik pait long en.c Olsem na bagarap bai kamap pastaim long ol lotu i holim nating nem Kristen, em ol i no stap gut long God, na ol i tok ol i holi.

“Ranawe”​—⁠Olsem Wanem?

18, 19. I gat wanem ol as bilong soim olsem pasin bilong “ranawe i go long ples maunten” i no makim olsem ol man bai senisim lotu bilong ol?

¹⁸ Jisas i tok profet long ‘dispela samting nogut tru i sanap i stap long haus bilong God yet,’ na bihain Jisas i givim toksave long ol man i gat gutpela tingting long ol i mas mekim ol samting olsem em i bin tok. Olsem wanem? Jisas i laik tok olsem long dispela taim​—⁠taim “dispela samting nogut tru” em i “sanap i stap long haus bilong God yet”​—⁠planti manmeri ol bai lusim ol lotu giaman na kirap bihainim lotu i tru? Nogat. Tingim ol samting i kamap long namba wan truim. Jisas i tok: “Ol manmeri i stap long distrik Judia ol i mas ranawe i go long ples maunten. Na sapos man i stap antap long haus, orait taim em i go daun em i no ken i go insait long haus bilong kisim ol samting bilong en. Na man i stap long gaden, em i no ken i go bek long haus bilong kisim longpela klos bilong en. Sori tumas long ol meri i gat bel na ol meri i givim susu long ol pikinini long dispela taim. Na yupela i mas beten, bai ol dispela samting i no ken kamap long taim bilong kol.”​—⁠Mak 13:​14-18.

¹⁹ Jisas i no tok ol man i stap long Jerusalem ol tasol i mas ranawe, i olsem em i laik tok ol i mas lusim dispela nambawan ples bilong ol Juda bilong lotuim God, nogat; na long tok lukaut bilong em, em i no tok ol manmeri i mas senisim lotu bilong ol​—⁠olsem lusim lotu giaman na bihainim lotu i tru. Jisas i no gat wok long givim toksave long ol disaipel bilong em olsem ol i mas ranawe lusim wanpela lotu na go insait long narapela, nogat; ol i kamap trupela Kristen pinis. Na taim ol Rom i kam pait long Jerusalem long yia 66 C.E., dispela i no bin kirapim ol man i bihainim lotu Juda long Jerusalem na long ol hap bilong Judia long lusim lotu bilong ol na kamap Kristen. Profesa Heinrich Graetz i tok, ol man i ranim ol birua Rom ol i kam bek long taun: “Ol Selot, ol i mekim ol singsing bilong pait, ol i kam bek long Jerusalem (long Oktoba 8), na bel bilong ol i amamas na ol i ting bai ol i kamap fri na kisim independens. . . . Em nau, God i bin sambai long ol, olsem Em i bin sambai long ol tumbuna bilong ol, a? Ol Selot i no pret long ol samting i laik kamap long bihain.”

20. Ol disaipel bilong pastaim ol i mekim wanem long dispela toksave bilong Jisas long ranawe i go long ol maunten?

²⁰ Orait, dispela liklik hap lain bilong ol manmeri God i bin makim, ol i mekim wanem bilong bihainim dispela toksave bilong Jisas? Ol i ranawe lusim Judia na i go long ples maunten long narapela hapsait bilong wara Jordan, na long dispela rot ol i kamapim olsem ol i no insait long ol wok politik na lotu bilong ol Juda. Ol i lusim ol gaden na haus bilong ol, na ol i no go insait long haus bilong ol long kisim sampela kago. Ol i bilip tru olsem Jehova bai lukautim ol na helpim ol, olsem na ol i putim wok bilong lotuim Jehova i go pas long olgeta narapela samting i olsem bikpela samting.​—⁠Mak 10:​29, 30; Luk 9:​57-​62.

21. Yumi no ken ting wanem samting bai kamap taim “dispela samting nogut tru” i kirapim pait?

²¹ Orait, nau yumi ken tingim bikpela truim bilong dispela tok profet. Inap planti yia pinis yumi strongim ol manmeri long lusim ol lotu giaman na bihainim trupela lotu. (KTH 18:​4, 5) Planti milion manmeri i bin mekim olsem. Tok profet bilong Jisas i no makim olsem taim bikpela hevi tru i kirap, planti lain bai kirap bihainim trupela lotu; long yia 66 C.E. i no gat planti lain Juda ol i bin tanim bel na kisim bilip tru. Tasol ol trupela Kristen bai gat as tru na ol i bihainim tok lukaut bilong Jisas na ranawe i go.

22. Ating bai yumi mas mekim wanem bilong bihainim tok bilong Jisas long ranawe i go long ol maunten?

²² Long nau yumi no ken save long olgeta liklik liklik samting bilong bikpela hevi tru, tasol yumi ken ting olsem dispela pasin bilong ranawe em Jisas i bin toktok long en em i no makim olsem yumi bai ranawe long wanpela ples tru. Lain bilong God i stap pinis long olgeta hap bilong graun. Tasol yumi ken save olsem, taim ol Kristen i mas ranawe, ol i mas wok yet long i stap narapela kain long ol lotu giaman. Na tu, Jisas i bin givim tok lukaut olsem ol i no ken go bek long haus bilong ol bilong kisim klos o narapela samting bilong ol. (Matyu 24:​17, 18) Olsem na sampela traim inap kamap bilong traim tingting bilong yumi long mani kago​—⁠em i bikpela samting tru long yumi, o pasin bilong God long kisim bek yumi olgeta i insait long lain bilong em, dispela i bikpela samting moa? Tru tumas, pasin bilong yumi long ranawe inap kamapim sampela hevi na yumi inap lus long sampela samting. Yumi mas redi long mekim ol samting yumi mas mekim, olsem ol manmeri long taim bilong ol aposel ol i bin mekim​—⁠em ol i ranawe lusim Judia na go sindaun long Perea, long hapsait bilong wara Jordan.

23, 24. (a) Yumi ken painim we ples hait bilong lukautim yumi? (b) Toksave bilong Jisas long ‘dispela samting nogut tru i sanap i stap long haus bilong God yet,’ dispela i mas mekim wanem long yumi?

²³ Yumi mas wok strong tru bambai Jehova na oganaisesen bilong em​—⁠em i kain olsem bikpela maunten​—⁠i stap yet olsem ples hait bilong yumi. (2 Samuel 22:​2, 3; Song 18:2; Daniel 2:​35, 44) Long dispela ples God bai lukautim yumi! Yumi no ken bihainim pasin bilong ol planti manmeri em ol bai ranawe i go insait long “ol hul bilong ston” na hait long baksait bilong “ol bikpela ston i stap long ol maunten”​—⁠em ol oganaisesen bilong ol man na ating ol bai stap yet inap sotpela taim bihain long Bikpela Babilon i bagarap. (KTH 6:​15; 18:​9-​11) Tru, ol hevi inap i go bikpela moa​—⁠wankain olsem hevi i painim ol meri i gat bel taim ol i ranawe lusim Judia long yia 66 C.E., o hevi i painim ol man i ranawe long taim bilong kol na ren. Tasol yumi ken bilip tru olsem God bai helpim yumi long abrusim bagarap. Long nau tu yumi mas wok long strongim pasin bilong yumi long putim hevi i go long han bilong Jehova na Pikinini bilong em, em i mekim wok king long Kingdom.

²⁴ I no gat as na yumi pret long ol samting i laik kamap. Long bipo Jisas i no laik ol disaipel bilong em i pret, na em i no laik yumi pret long ol samting bai kamap long nau o long bihain. Em i bin givim toksave long yumi bambai yumi ken redim bel na tingting bilong yumi. Taim God i bagarapim ol lotu giaman na ol narapela lain nogut bilong dispela graun, bai em i no givim strafe long ol Kristen i bihainim tok bilong em. Ol bai bihainim gutpela tingting na bihainim tok lukaut long ‘dispela samting nogut tru i sanap i stap long haus bilong God yet.’ Na ol bai strong long bihainim bilip bilong ol. Yumi no ken tru lusim tingting long tok promis bilong Jisas olsem: “Ol manmeri i stap strong inap long las de, God bai i kisim bek ol.”​—⁠Mak 13:⁠13.

[Ol Futnot]

Yu Inap Tingim?

◻ Olsem wanem “dispela samting nogut tru” i kamap ples klia long taim bilong ol aposel?

◻ Bilong wanem i stret yumi ken ting olsem “dispela samting nogut tru” bilong nau em bai sanap i stap long ples holi long wanpela taim bihain?

◻ Kamapim Tok Hait i tok profet long wanem pait bilong wanpela “samting nogut tru”?

◻ Ating bihain yumi mas mekim wanem samting na i olsem yumi “ranawe”?

4. Wanem samting i makim olsem tok bilong Matyu 24:15 i gat truim bilong en long taim bilong ol aposel?

[Piksa long pes 16]

Ol i kolim Bikpela Babilon olsem “mama tru bilong olgeta pamukmeri”

[Piksa long pes 17]

Retpela wel animal bilong Kamapim Tok Hait sapta 17 em “dispela samting nogut tru” Jisas i toktok long en

[Piksa long pes 18]

Retpela wel animal bai kirapim pait bilong bagarapim ol lotu

Was Gut na Wok Strong!

“Yupela i mas was gut. Yupela i no save long wanem de na wanem aua Bikpela bilong yupela bai i kamap.”​—⁠MATYU 25:⁠13.

1. Aposel Jon i bin wetim wanem samting?

LONG laspela tok long Baibel, Jisas i tok promis olsem: “Tru tumas, bai mi kam kwiktaim.” Aposel bilong em, Jon, i bekim tok olsem: “I tru. Bikpela Jisas, yu kam.” Aposel Jon i bilip tru olsem Jisas bai kam. Em i bin stap namel long ol aposel i bin askim Jisas: “Wanem taim bai ol dispela samting i kamap, na wanem mak bai kamap bilong makim olsem yu kam i stap [tok Grik, pa·rou·siʹa] na pasin bilong dispela graun i laik pinis?” Tru tumas, Jon i bilip tru na wet long Jisas bai kam i stap long bihain.​—⁠KTH 22:20; Matyu 24:⁠3, NW.

2. Ol lotu i ting olsem wanem long kam bek bilong Jisas?

² Long nau i no gat planti man i bilip olsem. Planti lotu i gat wanpela bilip long “kam bek” bilong Jisas, tasol wan wan man tasol bilong ol dispela lotu ol i bilip tru long dispela. Pasin bilong ol i kamapim dispela samting. Wanpela buk (The Parousia in the New Testament) i tok: “Dispela tingting olsem Jisas bai kam bek em i no mekim wanpela samting long i stap na tingting na wok bilong lotu. . . . Lotu i mas i gat strongpela tingting long helpim ol man long tanim bel na long autim tok bilong gutnius, tasol ol i no strong long mekim dispela wok, nogat; i olsem dispela wok i lus olgeta.” Tasol i no olsem long olgeta man!

3. (a) Ol Kristen tru i ting olsem wanem long pa·rou·siʹa? (b) Nau bai yumi skelim wanem samting?

³ Ol disaipel tru bilong Jisas ol i wetim las de bilong dispela pasin nogut i stap long graun. Taim yumi mekim olsem, yumi mas holimpas stretpela tingting long olgeta samting bilong i stap bilong Jisas na mekim ol samting i stret wantaim dispela tingting. Dispela bai helpim yumi long ‘stap strong inap long las de na God bai i kisim bek yumi.’ (Matyu 24:13) Taim Jisas i mekim dispela tok profet long Matyu sapta 24 na 25, em i bin mekim sampela gutpela tok yumi ken bihainim na dispela bai helpim yumi long olgeta taim bihain. Sapta 25 i stori long sampela tok piksa ating yu save long ol, olsem tok piksa bilong 10-pela yangpela meri (em ol savemeri na ol kranki meri) na tok piksa bilong ol wokboi i kisim mani. (Matyu 25:​1-30) Ol dispela tok piksa inap helpim yumi olsem wanem?