Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • Yu Mas Mekim Wanem na Bai Yu Winim Kot?
    Wastaua—1995 | Oktoba 15
    • Yu Mas Mekim Wanem na Bai Yu Winim Kot?

      “Taim Pikinini Bilong Man i kam [long bikpela lait] wantaim olgeta ensel, orait em bai i sindaun long sia king bilong en.”​—⁠MATYU 25:⁠31.

      ‘EM I GAT ASUA O NOGAT?’ Planti man i save askim olsem taim ol i harim tok long man i gat kot. Ol jas na ol man bilong harim kot i wok strong long mekim stretpela pasin, tasol planti taim wanem samting i kamap? I no gat stretpela kot, a? Dispela i no nupela samting, olsem tok piksa bilong Jisas long Luk 18:​1-8 i makim.

      2 Maski yu lukim ol kot bilong graun i mekim wanem kain pasin, tingim tok bilong Jisas, em i tok: “Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai i no helpim ol, a? . . . Mi tokim yupela, em bai i helpim ol kwiktaim. Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?”

      3 Tru tumas, Jehova bai mekim stretpela kot na helpim ol wokboi bilong em. Jisas tu i insait long dispela wok long nau, long wanem, nau em i “taim bilong las de” bilong pasin nogut bilong dispela graun. Klostu nau bai Jehova i givim wok long strongpela Pikinini bilong em bilong pinisim pasin nogut olgeta long graun. (2 Timoti 3:1; 2 Tesalonaika 1:​7, 8; KTH 19:​11-16) Bilong helpim yumi long save long wok bilong Jisas, yumi ken skelim wanpela tok piksa em i mekim klostu long taim em i dai, em tok piksa bilong ol sipsip na meme.

      4 Longtaim pinis yumi ting olsem dispela tok piksa i makim Jisas i kamap King na sindaun long sia king bilong em long yia 1914, na yumi ting olsem kirap long yia 1914 na i kam inap long nau em i bin wok long skelim ol manmeri na makim ol manmeri i kain olsem sipsip bilong kisim laip oltaim, na ol manmeri i kain olsem meme bilong lus olgeta. Tasol sapos yumi skelim gen dispela tok piksa bai yumi save, yumi mas stretim tingting bilong yumi long taim bilong truim bilong en na long ol samting em i makim. Na dispela save yumi kisim bai kamapim klia olsem wok autim tok bilong yumi em i bikpela samting, na ol manmeri i mekim wanem long en, dispela tu i bikpela samting. Bilong kisim gut as bilong nupela save long dispela tok piksa, yumi ken skelim ol tok bilong Baibel long wok king na wok jas bilong Jehova tupela Jisas.

      Jehova Em i Nambawan Bikpela Jas

      5 Jehova i bosim olgeta samting em i bin wokim long graun na long antap. Em i no bin kamap nupela long wanpela taim na em i no save dai, olsem na em i “King bilong olgeta taim.” (1 Timoti 1:17; Song 90:​2, 4; KTH 15:⁠3) Em i gat strong bilong putim ol lo na bosim ol man long rot bilong ol dispela lo. Na em i gat bikpela strong olsem Jas tu. Aisaia 33:22 i tok: “Bikpela yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.”

      6 Longtaim pinis ol wokboi bilong Jehova i save em i stap Jas na em i skelim ol rong na ol bikpela tok i kamap. “Jas bilong olgeta graun” i skelim pasin nogut bilong ol manmeri bilong Sodom na Gomora na em i save, i stret ol i mas bagarap, olsem na em i bekim dispela pe long ol i stret long pasin ol i bin mekim. (Stat 18:​20-33; Jop 34:​10-12) Taim yumi save Jehova em i stretpela Jas na oltaim em inap mekim ol samting em i stretim tok long mekim, dispela i strongim bel bilong yumi!

      7 Long Israel bipo, sampela taim Jehova yet i mekim kot. Sapos yu stap long dispela taim bipo na yu save, wanpela Jas i gutpela olgeta em i skelim ol samting, bel bilong yu bai i stap gutpela, a? (Wok Pris 24:​10-16; Namba 15:​32-36; 27:​1-11) Na God i putim ol “lo” i gutpela olgeta bilong helpim ol man long skelim wanem pasin i stret na wanem pasin i no stret. (Wok Pris 25:​18, 19; Nehemia 9:13; Song 19:​9, 10; 119:​7, 75, 164; 147:​19, 20) Em i “Jas bilong olgeta graun,” olsem na em i skelim pasin bilong yumi olgeta.​—⁠Hibru 12:⁠23.

      8 I gat wanpela man i “lukim” samting em inap helpim yumi long save long dispela samting. God i givim driman long profet Daniel na em i lukim sampela animal nogut i makim ol bikpela gavman o strongpela kantri. (Daniel 7:​1-8, 17) Daniel i stori moa olsem: “Mi lukim ol i kisim ol sia king i kam na putim i stap. Na wanpela Man bilong bipo bipo yet i kam sindaun long wanpela sia king. Ol klos bilong en i waitpela tru olsem ais.” (Daniel 7:⁠9) Daniel i lukim ol sia king i stap na “Man bilong bipo bipo yet [Jehova] i kam sindaun.” Yu ting Daniel i lukim God i kamap King?

      9 Taim yumi kaunim tok olsem wanpela man i “sindaun” long sia king, yumi inap ting dispela i makim olsem em i kamap king, long wanem, sampela taim Baibel i mekim dispela kain tok. Olsem: “Taim [Simri] i kamap king pinis na em i sindaun long sia king bilong em, em . . . ” (1 King 16:​11, NW; 1 King 1:​17, 24, 35; Jeremaia 36:30) Wanpela tok profet long Mesaia i tok: “Em i mas sindaun long sia king bilong em na bosim ol manmeri.” Olsem na dispela tok ‘sindaun long sia king’ inap makim olsem man i kamap king. (Sekaraia 6:​12, 13, NW) Baibel i tok, Jehova em i wanpela King na em i sindaun long sia king. (1 King 22:19; Aisaia 6:1; KTH 4:​1-3) Em i “King bilong olgeta taim.” Tasol taim em i mekim nupela wok olsem king, yumi inap tok em i kamap King, i olsem em i kam sindaun gen long sia king bilong em bilong mekim dispela wok.​—⁠Aisaia 52:7; 1 Timoti 1:17; KTH 11:​15-17; 19:​1, 2, 6.

      10 Tasol bikpela samting yumi mas tingim em olsem: Wanpela bikpela wok bilong ol king bilong bipo em bilong harim kot na stretim tok. (Sindaun 20:8; 29:⁠14) Tingim gutpela wok Solomon i mekim olsem jas taim em i stretim tok bilong tupela meri i tok pait long wanpela pikinini. (1 King 3:​16-28; 2 Stori 9:⁠8) Wanpela haus gavman bilong em ol i kolim “Haus bilong Sia King, narapela nem bilong en Haus bilong Harim Kot. Em i haus Solomon i save harim kot bilong ol manmeri long en.” (1 King 7:⁠7) Ol i stori long Jerusalem na ol i tok, “long dispela ples haus kot i stap na king i save harim kot na stretim tok.” (Song 122:⁠5) Olsem na dispela tok ‘sindaun long sia king’ inap makim tu wok bilong mekim kot.​—⁠Kisim Bek 18:13; Sindaun 20:⁠8.

      11 Orait, nau yumi ken tingim gen stori bilong Daniel, em i lukim “Man bilong bipo bipo yet i kam sindaun.” Long sapta 7 ves 10, Daniel i stori moa olsem: “Na sampela i opim ol buk, bilong kirapim kot.” Em nau, Man bilong bipo bipo yet i kam sindaun bilong mekim kot na stretim tok long husat i ken bosim graun, na em i givim dispela wok long Pikinini Bilong Man, em inap tru long mekim. (Daniel 7:​13, 14) Na Baibel i tok moa olsem: “Man bilong bipo bipo yet em i kamap, na i mekim kot” na “ol manmeri bilong God Antap Tru” ol i win​—⁠em i skelim ol na ol inap tru long kamap king wantaim Pikinini Bilong Man. (Daniel 7:22) Na bihain God “i kirapim kot” long laspela bikpela gavman bilong graun na God i tok, dispela “king” i mas bagarap.​—⁠Daniel 7:26.a

      12 Olsem na taim Daniel i lukim God “i kam sindaun long wanpela sia king,” dispela i makim olsem God i kam sindaun bilong mekim kot. Pastaim Devit i bin mekim singsing na tok olsem: “Yu sindaun long sia olsem jas na yu mekim stretpela kot. Yu skelim pasin bilong mi na mi winim kot.” (Song 9:​4, 7) Na Joel i tok: “Ol lain manmeri i mas redi na i kam long dispela ples daun, ol i kolim God Em I Jas. Mi Bikpela [Jehova], bai mi sindaun long dispela ples na kotim olgeta lain pipel.” (Joel 3:12; skelim wantaim Aisaia 16:⁠5.) Jisas na Pol i bin kisim kot na wanpela man i sindaun harim kot na stretim tok.b​—⁠Jon 19:​12-16; Aposel 23:3; 25:⁠6.

      Wok Bilong Jisas

      13 Jehova i stap King na Jas tu. Orait, olsem wanem long Jisas? Taim ensel i tokaut olsem mama i karim em, ensel i tok: “God bai i putim em i stap king olsem tumbuna bilong en Devit. . . . Na wok king bilong en bai i no inap pinis.” (Luk 1:​32, 33) Jisas em i man bilong lain bilong Devit em i bilong i stap king oltaim oltaim. (2 Samuel 7:​12-16) Em bai stap long heven na bosim graun, long wanem, Devit i tok: “Bikpela [Jehova] i tokim Bikpela bilong mi [Jisas] olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ Bikpela i stap long Saion, na bai em i mekim yu i bosim planti ples, na em i tok, ‘Yu bosim ol birua bilong yu.’ ”​—⁠Song 110:​1-4.

      14 Dispela i mas kamap long wanem taim? Jisas i no bin kamap King long taim em i stap man long graun. (Jon 18:​33-37) Long yia 33, em i dai na kirap bek na go antap long heven. Hibru 10:12 i tok: “Krais em i mekim wanpela ofa tasol bilong tekewe sin, na dispela ofa em inap long i stap olgeta taim. Em i mekim olsem pinis, orait em i sindaun long han sut bilong God.” Long dispela taim Jisas i kisim wanem wok bos? “God i kirapim em na i bringim em i go sindaun long han sut bilong em long heven. Olsem na Krais i stap antap tru long olgeta kain strongpela spirit, na long olgeta hetman na long olgeta gavman, na long olgeta samting i gat strong. . . . [God] i mekim em i stap het tru bilong olgeta samting, na long dispela pasin em i stap het bilong sios.” (Efesus 1:​20-22) Jisas i kisim wok bilong bosim ol Kristen olsem king bilong ol. Olsem na Pol inap tok: “Yumi bin i stap aninit long long strong bilong tudak, na [Jehova] i bin kisim bek yumi na putim yumi insait long lain [olsem kingdom] bilong Pikinini bilong en, em dispela Pikinini em i save laikim tru.”​—⁠Kolosi 1:13; 3:⁠1.

      15 Tasol long yia 33 Jisas i no kisim wok bilong i stap King na Jas bilong olgeta lain manmeri. Nogat. Em i sindaun klostu long God, na wetim taim bilong mekim wok olsem King bilong Kingdom bilong God. Pol i stori long em na i tok: “Bipo God i tokim Pikinini olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ Tasol wanem taim God i mekim dispela kain tok long wanpela ensel? Nogat tru.”​—⁠Hibru 1:13.

      16 Ol Witnes Bilong Jehova i bin wokim ol buk na nius i kolim planti samting i makim olsem Jisas i wet i go inap long yia 1914 na long dispela yia em i kamap King bilong Kingdom bilong God long heven, em ples yumi no inap lukim. Kamapim Tok Hait 11:​15, 18 i tok: “Bikpela bilong yumi wantaim dispela man em i makim bilong kisim bek ol manmeri bilong en, tupela i kamap king bilong olgeta hap bilong graun. Na Bikpela bai i stap king oltaim oltaim.” “Ol haiden [olsem ol lain man] i belhat tru, tasol taim bilong yu long belhat em i kamap pinis.” Long taim bilong Namba Wan Pait, ol lain man i belhat na ol i pait. (Luk 21:24) Kirap long yia 1914 na i kam inap long nau yumi bin lukim ol bikpela pait i kamap, na ol bikpela guria, na sik, na hangre, na olkain samting olsem, na dispela i makim tru olsem nau Jisas i stap King long Kingdom bilong God, na las de bilong pasin bilong dispela graun i klostu.​—⁠Matyu 24:​3-14.

      17 Orait, nau yumi ken kolim gen ol bikpela tok yumi save pinis long en: Yumi save God i stap King na em i sindaun long sia king bilong em, na em inap sindaun long sia king bilong mekim kot tu. Long yia 33, Jisas i sindaun long han sut bilong God, na nau em i stap King bilong Kingdom. Em i stap King, tasol yu ting em i mekim wok olsem Jas tu? Bilong wanem yumi mas tingim dispela samting moa yet long nau?

      18 I stret Jehova i ken makim ol jas, na em i makim Jisas i stap Jas, long wanem, Jisas i bihainim ol lo na stretpela pasin bilong Em. Jisas i kamapim klia dispela samting taim em i stori long ol man i kamap laip long ol samting bilong spirit na em i tok: “Papa i no save skelim wanpela man long kot. Olgeta wok bilong harim kot, em i givim pinis long Pikinini.” (Jon 5:22) Na Jisas i kisim bikpela wok moa bilong mekim kot, long wanem, em bai skelim pasin bilong ol man i stap laip na bilong ol man i dai pinis tu. (Aposel 10:42; 2 Timoti 4:⁠1) Pol i tok: “[God] i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man [Jisas] bilong bosim dispela kot. Dispela man i bin dai na God i kirapim em bek long matmat. Olsem na yumi ken bilip tru long God i bin givim dispela wok long em.”​—⁠Aposel 17:31; Song 72:​2-7.

      19 Olsem wanem? I stret yumi ken ting Jisas i sindaun long sia king bilong mekim wok olsem Jas? I stret yumi ting olsem. Jisas i tokim ol aposel: “Long taim olgeta samting i kamap nupela, na Pikinini Bilong Man bai i gat biknem na i sindaun long sia king bilong en, long dispela taim yupela ol man i bin bihainim mi yupela tu bai i sindaun long 12-pela gutpela sia na yupela bai i bosim [olsem skelim] ol 12-pela lain bilong Israel.” (Matyu 19:28) Tru, nau Jisas i stap King bilong Kingdom, tasol em bai mekim narapela wok tu em Matyu 19:28 i tok long en, olsem em bai sindaun long sia king bilong em na mekim kot; em bai mekim olsem long Taim Bilong Wan Tausen Yia. Long dispela taim bai em i skelim pasin bilong olgeta manmeri, em ol stretpela man na ol man nogut wantaim. (Aposel 24:15) Yumi mas tingim dispela samting taim yumi skelim tok piksa bilong Jisas i makim taim bilong yumi na ol samting yumi mekim.

      Tok Piksa i Tok Wanem?

      20 Klostu long taim Jisas i dai, ol aposel i askim em: “Wanem taim ol dispela samting bai i kamap? Wanem mak bai i kamap na mipela i ken save, yu kam i stap na pasin bilong dispela graun i laik pinis?” (Matyu 24:​3, NW) Jisas i kolim sampela bikpela samting i mas kamap long graun na bihain bai “las de i kamap.” Paslain liklik long taim las de i kamap, ol lain manmeri bai “i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.”​—⁠Matyu 24:​14, 29, 30.

      21 Tasol taim Pikinini Bilong Man i kam wantaim bikpela lait bilong em, wanem samting bai painim ol dispela lain manmeri? Bilong kisim save long dispela yumi ken lukim tok piksa bilong ol sipsip na meme, em namba wan tok bilong en i olsem: “Taim Pikinini Bilong Man i kam [long bikpela lait, NW] wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em.”​—⁠Matyu 25:​31, 32.

      22 Yu ting dispela tok piksa i makim taim bilong Jisas i kamap king long yia 1914 na em i sindaun long sia king bilong em olsem yumi bin ting inap longtaim pinis? Tru, Matyu 25:34 i kolim em olsem King, olsem na truim bilong dispela tok piksa i mas kamap bihain long taim em i kamap King long yia 1914. Tasol bihain liklik long yia 1914 em i mekim wanem wok bilong skelim ol manmeri? Em i no skelim “olgeta lain manmeri” long dispela taim. Nogat. Em i kirapim kot long ol manmeri i tok ol i ‘lain bilong God yet.’ (1 Pita 4:17) Olsem Malakai 3:​1-3 i tok, Jisas em i wokman bilong Jehova na pastaim em i skelim ol Kristen em Jehova i bin makim long spirit holi na ol i stap yet long graun. Na em i skelim tu na makim pe bilong ol misin i gat nem Kristen, em ol i giaman na tok ol i ‘lain bilong God yet.’c (KTH 17:​1, 2; 18:​4-8) Tasol i no gat wanpela samting i makim olsem long yia 1914, o bihain long dispela taim, Jisas i bin sindaun na skelim ol manmeri bilong olgeta lain na tilim ol olsem sipsip na meme.

      23 Sapos yumi skelim wok bilong Jisas long dispela tok piksa yumi lukim em i mekim wok jas na skelim olgeta lain manmeri. Tok piksa i no makim olsem dispela wok i mas kisim bikpela hap taim i go inap planti yia, olsem em i mas skelim long kot olgeta wan wan man na meri ol i dai insait long taim bilong yumi na em i makim ol bilong lus olgeta o bilong kisim laip oltaim. Nogat. Yumi ken ting olsem bikpela hap lain i bin i dai insait long taim bilong yumi ol i go long ples bilong ol man i dai pinis, em matmat. (KTH 6:8; 20:13) Tasol dispela tok piksa i makim taim bilong Jisas i skelim ol manmeri bilong “olgeta lain,” em ol i stap laip long dispela taim, na em i givim pe long ol long pasin ol i bin mekim.

      24 Yumi ken save, dispela tok piksa i makim taim bihain, em taim Pikinini Bilong Man i kam wantaim bikpela lait. Em bai sindaun bilong mekim kot na skelim ol manmeri i stap laip long dispela taim. Em bai skelim pasin ol i bin mekim na i kamapim klia ol i wanem kain man. Long dispela taim tupela lain bai i stap ples klia tru, em “ol stretpela manmeri” na “ol man nogut.” (Malakai 3:18) Wok bilong makim na givim strafe long ol man em bai kisim liklik hap taim tasol. Jisas bai mekim stretpela kot na givim pe long olgeta wan wan i stret long pasin ol i bin mekim.​—⁠Lukim tu 2 Korin 5:⁠10.

      25 Olsem na taim Jisas “i sindaun long sia king bilong en” bilong mekim kot olsem Matyu 25:31 i tok, dispela i makim taim bihain, em taim dispela strongpela King bai sindaun bilong makim na givim strafe long ol lain bilong dispela graun. Dispela tok piksa long kot bilong Jisas long Matyu 25:​31-33, 46 i kain olsem stori bilong Daniel sapta 7 long Man i stap King, em i Man bilong bipo bipo yet, na em i kam sindaun bilong mekim kot.

      26 Dispela save yumi kisim long dispela tok piksa i makim olsem wok bilong skelim ol manmeri ol i sipsip o meme em bilong bihain. Dispela wok kot bai kamap taim “bikpela hevi” em Matyu 24:​29, 30 i stori long en i kirap pinis na Pikinini Bilong Man ‘i kam wantaim bikpela lait.’ (Skelim wantaim Mak 13:​24-26.) Long dispela taim, long las de bilong pasin nogut bilong nau, Jisas bai mekim kot na em bai makim na givim strafe long ol lain bilong dispela graun.​—⁠Jon 5:30; 2 Tesalonaika 1:​7-10.

      27 Dispela i helpim yumi long save klia long taim bilong truim bilong dispela tok piksa bilong Jisas, em i makim taim bilong skelim ol sipsip na meme. Tasol dispela i mekim wanem long yumi ol manmeri i wok strong long autim gutpela tok bilong Kingdom? (Matyu 24:14) Yu ting dispela i makim olsem dispela wok bilong yumi i no bikpela samting, o em i makim olsem yumi gat bikpela wok moa? Orait, tok i kamap bihain long dispela bai stori long dispela samting.

  • Wanem Samting Bai Painim Ol Sipsip na Ol Meme?
    Wastaua—1995 | Oktoba 15
    • Wanem Samting Bai Painim Ol Sipsip na Ol Meme?

      “Em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.”​—⁠MATYU 25:⁠32.

      KRAIS JISAS em i nambawan Tisa tru i bin stap long graun. (Jon 7:46) Wanpela pasin bilong em long skulim ol man, em i save mekim ol tok piksa. (Matyu 13:​34, 35) Em i mekim ol liklik stori, tasol ol dispela tok piksa i gat strong bilong skulim ol man long ol tok i tru bilong God na ol tok profet.

      2 Long tok piksa bilong ol sipsip na meme, Jisas i makim taim bilong em i mas kirap mekim wanpela bikpela wok: “Taim Pikinini Bilong Man i kam [long bikpela lait, NW] . . .” (Matyu 25:31) Yumi mas tingim dispela tok piksa, long wanem, Jisas i mekim bilong pinisim ol tok em i bekim long askim olsem: “Wanem mak bai i kamap na mipela i ken save, yu kam i stap na pasin bilong dispela graun i laik pinis?” (Matyu 24:​3, NW) Tasol yumi gat wanem wok long dispela?

      3 Jisas i tok, taim “bikpela hevi” i kirap pinis, orait “kwiktaim” bai sampela bikpela samting i kamap, na yumi wetim ol dispela samting i kamap. Em i tok, long dispela taim “mak bilong Pikinini Bilong Man” bai i kamap. Dispela bai givim bikpela hevi long “olgeta lain manmeri bilong graun,” em ol bai i “lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.” Pikinini Bilong Man bai kam wantaim “ol ensel bilong en.” (Matyu 24:​21, 29-31)a Orait, olsem wanem long tok piksa bilong ol sipsip na meme? Long planti Baibel bilong nau ol i putim long Matyu sapta 25, tasol em i hap bilong bekim bilong Jisas, na i makim sampela samting moa i mas kamap long taim Jisas i kam long bikpela lait na em i wok long skelim “olgeta lain manmeri.”​—⁠Matyu 25:⁠32.

      Ol Lain Insait Long Tok Piksa

      4 Bilong kirapim dispela tok piksa, Jisas i tok olsem: “Taim Pikinini Bilong Man i kam.” Yu save “Pikinini Bilong Man” em i husat, a? Planti taim ol man bilong raitim Gutnius i kolim dispela tok long Jisas. Jisas tu i kolim long em yet, na yumi ken save em i tingim driman bilong Daniel, em Daniel i lukim ‘wanpela man i wankain olsem pikinini bilong man’ em i kam long Man bilong bipo bipo yet na dispela Man i “mekim em i kamap king na i givim em strong na biknem.” (Daniel 7:​13, 14; Matyu 26:​63, 64; Mak 14:​61, 62) Jisas em i nambawan man long dispela tok piksa, tasol i gat sampela lain moa i stap. Pastaim, long Matyu 24:​30, 31, em i tok taim Pikinini Bilong Man “i kam wantaim bikpela strong na bikpela lait bilong en,” i gat bikpela wok bilong ol ensel bilong en. Na olsem tasol, long tok piksa bilong ol sipsip na meme, taim Jisas i “sindaun long sia king bilong en” bilong mekim kot, ol ensel i stap wantaim em. (Skelim wantaim Matyu 16:27.) Tasol Jas wantaim ol ensel bilong em ol i stap long heven, olsem na yu ting tok piksa i stori tu long sampela man bilong graun?

      5 Sapos yumi lukim dispela tok piksa, i gat 3-pela lain yumi mas save long ol. Em ol sipsip na ol meme, na Pikinini Bilong Man i stori long narapela lain em yumi mas save long en bambai yumi inap save long ol sipsip na ol meme. Jisas i kolim dispela namba 3 lain olsem ol brata bilong em bilong spirit. (Matyu 25:​40, 45) Yumi save em ol man i lotu tru long God, long wanem, Jisas i tok: “Man o meri i save bihainim laik bilong Papa bilong mi . . . , em i brata na susa na mama bilong mi.” (Matyu 12:50; Jon 20:17) Na Pol i stori long ol Kristen ol i “lain bilong Abraham” na pikinini bilong God. Pol i kolim ol olsem “ol brata” bilong Jisas na em i tok, ‘God i singautim ol bilong i stap long heven.’​—⁠Hibru 2:9–3:1; Galesia 3:​26, 29.

      6 Bilong wanem Jisas i tok long ol brata bilong em “i no gat nem liklik”? Dispela tok i kain olsem sampela tok ol aposel i harim em i mekim bipo. Jon Bilong Baptais i dai paslain long Jisas, olsem na em i bilong kisim laip long graun, na taim Jisas i stori long Jon na skelim em wantaim ol man bilong kisim laip long heven, Jisas i tok: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” (Matyu 11:11) Sampela bilong i go long heven, ating ol i gat nem insait long kongrigesen, olsem ol aposel, na sampela i no gat bikpela nem olsem, tasol olgeta ol i brata spirit bilong Jisas. (Luk 16:10; 1 Korin 15:9; Efesus 3:8; Hibru 8:11) Olsem na maski long graun i olsem ol i no gat nem, ol i brata bilong Jisas na ol manmeri i mas tingim dispela samting na mekim gut long ol.

      Ol Sipsip na Ol Meme Ol i Husat?

      7 Baibel i stori long Jisas i skelim pasin bilong ol sipsip na Baibel i tok: “Orait na [Jisas] bai i tokim ol manmeri i stap long han sut bilong en olsem, ‘Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet. Long wanem, bipo mi stap hangre, na yupela i bin givim kaikai long mi. Mi dai long wara, na yupela i givim wara long mi. Mi man bilong narapela ples na yupela i bringim mi i go long haus bilong yupela. Mi no gat laplap, na yupela i givim laplap long mi. Mi gat sik na yupela i lukautim mi. Mi stap long kalabus, na yupela i kam lukim mi.’ Na ol stretpela manmeri bai i bekim tok bilong en olsem, ‘Bikpela, long wanem taim mipela i lukim yu i stap hangre, na mipela i givim kaikai long yu? Na wanem taim yu dai long wara, na mipela i givim wara long yu? Long wanem taim mipela i lukim yu i stap man bilong narapela ples, na mipela i bringim yu i go long haus bilong mipela? Na long wanem taim yu no gat laplap, na mipela i givim laplap long yu? Long wanem taim mipela i lukim yu gat sik, o yu stap long kalabus, na mipela i go lukim yu?’ Na king bai i bekim tok bilong ol olsem, ‘Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.’ ”​—⁠Matyu 25:​34-40.

      8 Ol sipsip i winim kot na i stap long han sut bilong Jisas, olsem ol i kisim gutnem long ai bilong em na em i orait long ol, na yumi save ol i makim wanpela lain manmeri. (Efesus 1:20; Hibru 1:⁠3) Ol i bin mekim wanem na long wanem taim? Jisas i tok ol i bin mekim gutpela pasin long em na givim planti samting long em, olsem kaikai na wara na klos, na ol i bin helpim em taim em i gat sik o em i stap kalabus. Taim ol sipsip i tok, ol i no bin mekim olsem long Jisas yet, Jisas i tok ol i bin mekim long ol brata bilong em bilong spirit, em lain remnan bilong ol Kristen God i makim long spirit holi, olsem na i olsem ol i bin mekim long em yet.

      9 Dispela tok piksa i no makim Taim Bilong Wan Tausen Yia, long wanem, long dispela taim bai ol Kristen God i makim long spirit holi ol i no i stap long graun na pilim hangre, na dai long wara, na kisim sik, na i stap kalabus. Tasol ol dispela samting i painim planti bilong ol nau long dispela taim bilong las de. Kirap long taim Satan i kam daun long graun, em i birua tru long lain remnan; em i kirapim ol man long tok bilas long ol, na givim pen long ol, na kilim sampela i dai.​—⁠KTH 12:⁠17.

      10 Yu ting Jisas i tok olgeta man i mekim liklik gutpela pasin long wanpela brata bilong em, olsem givim liklik hap bret o kap wara long em, dispela i makim olsem ol i sipsip? Tru, ol i mekim gutpela pasin sori, tasol ol sipsip long dispela tok piksa i mekim bikpela samting moa. Yumi save Jisas i no tok long ol man i no bilip long God o ol pris pasto i mekim nating liklik pasin sori long wanpela brata bilong em. Nogat. Tupela taim Jisas i kolim ol sipsip olsem “ol stretpela manmeri.” (Matyu 25:​37, 46) Olsem na ol sipsip em ol manmeri inap longtaim liklik ol i bin mekim ol samting bilong helpim ol brata bilong Krais; bilip i kirapim ol long mekim wok na God i kolim ol stretpela manmeri.

      11 Insait long ol handet yia bipo planti manmeri, olsem Abraham, ol i bin kisim nem olsem stretpela man long ai bilong God. (Jems 2:​21-23) Noa na Abraham na ol narapela bilipman bilong bipo ol i insait long lain “arapela sipsip,” em ol bai kisim laip long Paradais aninit long Kingdom bilong God. Long dispela taim nau sampela milion manmeri moa i kamap “ol arapela sipsip”​—⁠ol i kirap bihainim lotu i tru na ol i kamap “wanpela lain sipsip” wantaim ol Kristen em God i makim long spirit holi. (Jon 10:16; KTH 7:⁠9) Ol dispela manmeri i gat tingting long i stap oltaim long graun, ol i save ol brata bilong Jisas ol i mausman bilong Kingdom, olsem na ol i helpim ol​—⁠long samting bilong skin na spirit. Ol samting ol arapela sipsip i mekim long ol brata bilong Jisas long graun, Jisas i tingim dispela i olsem ol i bin mekim long em yet. Ol manmeri olsem, sapos ol i stap laip long taim Jisas i kam bilong skelim olgeta lain manmeri, bai em i tokaut olsem ol i sipsip.

      12 Ol arapela sipsip i wok wantaim lain remnan long nau long autim tok bilong Kingdom na helpim ol, olsem na i gat wanem as na ol i tok: “Bikpela, long wanem taim mipela i lukim yu i stap hangre, na mipela i givim kaikai long yu? Na wanem taim yu dai long wara, na mipela i givim wara long yu?” (Matyu 25:37) I gat planti samting inap i stap olsem as bilong dispela. Yumi mas save, dispela em i wanpela tok piksa. Long rot bilong en Jisas i kamapim bel bilong em, em i wari long ol brata bilong em bilong spirit; em i sori long ol na pilim hevi bilong ol. Pastaim Jisas i bin tok: “Man i kisim yupela na i mekim gut long yupela, em i kisim mi na i mekim gut long mi. Na man i kisim mi, em i kisim God, em i bin salim mi na mi kam.” (Matyu 10:40) Long dispela tok piksa, Jisas i kamapim klia moa dispela tok na em i makim olsem samting (gutpela o nogut) ol man i mekim long ol brata bilong em, dispela i go antap long heven; i olsem ol i mekim long em long heven. Na Jisas i kamapim klia olsem pasin bilong Jehova long skelim ol man i gutpela na i stret, maski man i winim kot o lus long kot. Ol meme i no inap tok, ‘Sori! Sapos mipela i bin lukim yu yet, bai mipela i helpim yu.’

      13 Taim yumi save pinis wanem taim dispela kot bai kamap bilong skelim ol manmeri, olsem dispela tok piksa i stori long en, yumi inap save gut ol meme i husat. Truim bilong dispela tok piksa i kamap long taim “mak bilong Pikinini Bilong Man” i kamap “na olgeta lain manmeri bilong graun bai i krai. Na ol bai i lukim Pikinini Bilong Man . . . i kam wantaim bikpela strong na bikpela lait bilong en.” (Matyu 24:​29, 30) Ol man i stap laip yet long taim Bikpela Babilon i bagarap na ol i bin mekim nogut long ol brata bilong King, ating nau bel bilong ol bai guria na ol bai kolim Jisas olsem “Bikpela,” long wanem, ol i laik abrusim bagarap.​—⁠Matyu 7:​22, 23.

      14 Ol man pastaim ol i bin i go long lotu, na ol man i no bilip long God, na ol narapela, Jisas i no ken tingim ol tok nating ol i mekim bilong abrusim bagarap na em i skelim ol long kot. Nogat. (2 Tesalonaika 1:⁠8) Em i stap Jas na em bai skelim bel bilong ol na ol samting ol i bin mekim long “wanpela bilong ol dispela brata bilong [em] i no gat nem liklik.” Tru, long nau lain Kristen em God i bin makim ol i go liklik; i no gat planti bilong ol i stap yet long graun. Tasol i gat sampela i stap na ol i olsem ‘gutpela wokboi’ na ol i wok yet long givim ol kaikai bilong spirit long lain bilong God na stiaim ol, olsem na ol manmeri i laik kamap sipsip ol i gat rot yet bilong mekim gut long dispela lain, olsem ‘bikpela lain planti manmeri tru bilong olgeta lain man na olgeta kantri na olgeta kain skin’ i bin mekim.​—⁠KTH 7:​9, 14.

      15 Tasol ol manmeri i bin mekim wanem kain pasin long ol brata bilong Krais na long sampela milion arapela sipsip i pas wantaim ol olsem wanpela lain sipsip tasol? Planti man ol yet i no bin mekim nogut long ol mausman bilong Krais, tasol ol i no bin mekim gut long ol tu. Ol manmeri i kain olsem meme ol i laikim pasin nogut bilong dispela graun na ol i sakim tok bilong Kingdom, maski man i autim stret long ol o ol i harim long narapela rot. (1 Jon 2:​15-17) Tasol yumi no ken skelim husat ol i sipsip na husat ol i meme. God i makim Jisas i stap jas na em bai skelim.​—⁠Mak 2:8; Luk 5:22; Jon 2:​24, 25; Rom 14:​10-12; 1 Korin 4:⁠5.

      Wanem Samting Bai Painim Dispela Tupela Lain?

      16 Taim Jisas i skelim pinis ol sipsip, bai em i tok: “Yupela i gat blesing bilong Papa bilong mi. . . . Yupela kam kisim kingdom Papa i bin redim na makim bilong yupela pinis, long taim graun i kamap nupela yet.” Em i mekim gutpela tok tru long ol: “Yupela kam”! Kam kisim wanem samting? Laip i stap oltaim. Bilong pinisim tok piksa em i tok: “Ol stretpela manmeri bai i kisim laip i stap oltaim oltaim.”​—⁠Matyu 25:​34, 46.

      17 Long tok piksa bilong ol wokboi i kisim mani, Jisas i kolim ol samting ol manmeri bilong mekim wok king wantaim em long heven ol i mas mekim. Tasol long dispela tok piksa em i makim ol samting ol manmeri i stap aninit long Kingdom ol i mas mekim. (Matyu 25:​14-23) Em i tok klia olsem ol sipsip bai kisim laip long graun aninit long Kingdom bilong em, long wanem, ol i bin givim bel olgeta long helpim ol brata bilong em. Bai ol i stap long Paradais long graun​—⁠em God i redim dispela bilong ol “stat long taim God i mekim kamap dispela graun,” em ol manmeri em inap baim bek ol.​—⁠Luk 11:​50, 51.

      18 Tasol taim Jisas i skelim pasin bilong ol meme, em i mekim narapela kain tok, olsem: “Orait na king bai i tokim ol lain i stap long han kais olsem, ‘Yupela manmeri bilong lus, yupela klia long mi na yupela go long paia i no save dai, em dispela paia ol i redim pinis bilong Satan wantaim ol ensel bilong en. Long wanem, bipo mi stap hangre, na yupela i no givim kaikai long mi. Mi dai long wara, na yupela i no givim wara long mi. Mi man bilong narapela ples, na yupela i no bringim mi i go long haus bilong yupela. Mi no gat laplap, na yupela i no givim laplap long mi. Mi gat sik, na mi stap long kalabus, na yupela i no kam lukim mi.’ Na bai ol tu i bekim tok bilong en olsem, ‘Bikpela, long wanem taim mipela i lukim yu i stap hangre, o yu dai long wara, o yu man bilong narapela ples, o yu no gat laplap, o yu gat sik, o yu stap long kalabus, na mipela i no mekim gut long yu?’ Na em bai i bekim tok bilong ol olsem, ‘Mi tok tru long yupela, samting yupela i no bin mekim long wanpela bilong ol dispela manmeri i no gat nem liklik, ol dispela samting yupela i no bin mekim long mi tu.’ ”​—⁠Matyu 25:​41-45.

      19 Ol man i skul gut long Baibel ol i save, dispela tok i no makim olsem ol meme i gat tewel na tewel bai kisim pen long paia oltaim oltaim. Ol man i gat laip; ol i no gat tewel. (Stat 2:7; Saveman 9:​5, 10; Esekiel 18:⁠4) Taim Jas i tok ol meme bai go long “paia i no save dai,” dispela i makim olsem bai ol i bagarap na pinis olgeta na ol i no inap kirap bek; Satan na ol ensel bilong em tu bai pinis olgeta olsem. (KTH 20:​10, 14) Dispela Jas God i makim em i mekim narapela narapela tok long dispela tupela lain. Em i tokim ol sipsip: “Yupela kam”; em i tokim ol meme: “Yupela klia long mi.” Ol sipsip bai “kisim laip i stap oltaim oltaim”; ol meme bai “kisim pe nogut”​—⁠bai ol i lus olgeta.​—⁠Matyu 25:46.b

      Yumi Gat Wanem Wok?

      20 Ol 4-pela aposel i bin harim bekim bilong Jisas em i tok long mak bilong taim em i kam bek na las de bai kamap, na nau i gat planti samting ol i mas tingim. Ol i mas was i stap na was gut. (Matyu 24:42) Na ol i mas autim tok olsem Mak 13:10 i tok. Ol Witnes Bilong Jehova i wok strong long mekim dispela wok long nau.

      21 Tasol nau yumi kisim nupela save long tok piksa bilong ol sipsip na meme na yumi gat wanem wok? Ol manmeri i wok long bruk long tupela lain. Sampela i bihainim ‘bikpela rot i go long ples bilong lus,’ na sampela i wok long i stap long ‘liklik rot i go long laip.’ (Matyu 7:​13, 14) Tasol taim bilong Jisas long skelim ol manmeri i no kamap yet; bihain bai em i skelim ol long kot na tok ol i sipsip o meme. Taim Pikinini Bilong Man i kam olsem Jas, em bai tok planti Kristen tru​—⁠olsem bikpela lain sipsip i dediket long God​—⁠ol inap winim laspela hap bilong “bikpela hevi” na i stap long nupela taim. Dispela i mas mekim yumi i amamas long nau. (KTH 7:​9, 14) Tasol planti planti manmeri bilong “olgeta lain man” bai kamapim klia olsem ol i man bilong bikhet olsem meme. Ol bai “i go bilong kisim pe nogut.” Bai ol i pinis olgeta. Gutpela taim bai kamap long graun!

      22 Tok piksa i makim olsem taim bilong skelim ol lain manmeri i klostu. Tasol long dispela taim nau wanpela bikpela wok i kamap. Yumi ol Kristen i mekim wok bilong helpim ol man long kisim laip​—⁠wok yumi mekim long autim tok i save brukim ol man i go tupela lain. (Matyu 10:​32-39) Pol i tok: “ ‘Olgeta manmeri i askim Bikpela long helpim ol, em bai i kisim bek ol.’ Tasol sapos ol i no bilip long em, olsem wanem bai ol i askim em long helpim ol. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:​13, 14) Wok bilong yumi long autim tok long ol man em i go kamap long 230 samting kantri; yumi tokim ol man long nem bilong God na long tok bilong em long kisim bek ol. Ol brata bilong Krais, em God i makim ol long spirit holi, ol i go pas yet long mekim dispela wok. Na nau inap 5 milion arapela sipsip i wok wantaim ol. Ol manmeri long olgeta hap i harim dispela tok ol brata bilong Jisas i autim na ol i bilip.

      23 Taim yumi go long ol haus o yumi autim tok long kain kain taim na ples, dispela i givim rot long planti man moa bilong harim tok. Sampela i kisim save long ol Witnes Bilong Jehova na tok bilong ol long narapela rot em yumi no save long en. Taim Jisas i kirap na skelim ol manmeri long kot, yu ting em bai tingim pasin bilong planti manmeri bilong wanpela lain na tok olgeta manmeri bilong dispela lain i gat asua? Yu ting em bai skelim ol pikinini long ol samting papamama yet i bin mekim? Yumi no save, olsem na yumi no ken askim nabaut long dispela. (Skelim wantaim 1 Korin 7:14.) Long nau planti manmeri i pasim yau na sakim tok yumi autim long ol, o ol i mekim ol tok bilas, o ol i poromanim ol narapela man long mekim nogut long lain bilong God. Olsem na nau em i bikpela taim bilong ol; nogut ol i wok long kamap ol man em long taim bilong kot bai Jisas i tok ol i meme.​—⁠Matyu 10:22; Jon 15:20; 16:​2, 3; Rom 2:​5, 6.

      24 Tasol gutpela tru, planti manmeri i save harim tok, na ol i stadi long Baibel, na ol i kamap Witnes Bilong Jehova. Sampela man nau ol i olsem meme, ol inap tanim bel na kamap olsem sipsip. Bikpela samting em olsem: Ol manmeri nau ol i harim tok na mekim ol wok bilong helpim lain remnan bilong ol brata bilong Krais, ol i mekim ol samting em inap helpim ol long winim kot, na klostu nau, taim Jisas i sindaun long sia king bilong em bilong mekim kot, bai em i putim ol i stap long han sut bilong em. Ol dispela manmeri i kisim blesing long nau na bai ol i kisim yet. Olsem na dispela tok piksa i mas kirapim yumi long wok strong moa long wok Kristen. Nogut taim i pinis. Olsem na yumi laik mekim bikpela wok inap tru long strong bilong yumi bambai yumi inap helpim planti moa long harim tok na bilip. Na bai Jisas yet i skelim, ol i bilong kisim strafe o kisim laip oltaim.​—⁠Matyu 25:⁠46.

Tok Pisin Pablikesen (1983-2025)
Log Aut
Log In
  • Tok Pisin
  • Serim
  • Preferens
  • Copyright © 2025 Watch Tower Bible and Tract Society of Pennsylvania
  • Ol Lo Bilong Yusim
  • Privacy Policy
  • Ol Praivesi Seting
  • JW.ORG
  • Log In
Serim