Lukaut Long Ol Trap Bilong Satan!

“Lusim trap bilong Satan.”—2 TIM. 2:26.

BAI YU BEKIM OLSEM WANEM?

Sapos oltaim yu save skelim skelim na daunim wok bilong ol arapela, orait yu mas mekim wanem?

Yumi kisim wanem skul long Pailat na Pita long pasin bilong no ken larim presa na pasin bilong pret long man i daunim yumi?

Yu ken mekim wanem na bel bilong yumi i no ken kotim yumi tumas?

1, 2. Wanem ol trap bilong Satan bai yumi stori long en long dispela stadi?

SATAN i olsem man bilong painim abus, em i traim long holimpasim ol wokboi bilong Jehova. Ol man bilong painim abus i save kilim i dai abus ol i kisim, tasol Satan i no save mekim olsem long olgeta taim. Bikpela laik bilong Satan em bilong mekim dispela man em i holimpasim em long bihainim laik bilong em.—Ritim 2 Timoti 2:24-26.

² Man i save yusim trap bilong kisim abus. Ating em bai traim long kirapim animal long lusim ples hait bilong en na bai i isi moa long holimpasim em long rop. O em inap haitim wanpela trap we animal i no inap lukim. Satan tu i yusim ol trap bilong holimpasim ol wokboi bilong God. Sapos yumi no laik bai Satan i trapim yumi, yumi mas was i stap na luksave long ol samting i soim olsem trap bilong Satan i stap. Long dispela stadi, bai yumi stori long olsem wanem yumi inap abrusim 3-pela trap Satan i bin yusim bilong holimpasim sampela wokboi bilong God. Ol dispela trap em olsem: (1) pasin bilong i no bosim gut maus, (2) larim pasin bilong pret na presa i daunim yu, na (3) bel i kotim yu tumas long rong yu bin mekim. Stadi i kamap bihain long dispela bai stori long 2-pela narapela trap bilong Satan.

KILIM I DAI PAIA BILONG I NO BOSIM GUT MAUS

3, 4. Wanem samting inap kamap sapos yumi no bosim gut maus bilong yumi? Kamapim wanpela eksampel.

³ Taim ol animal i stap long bus ol i save stap gut. Ating man bai kukim hap bilong bus bilong pretim ol animal long ranawe na lusim ples hait bilong ol. Long dispela rot man inap holimpasim ol. Taim ol bratasista i stap insait long kongrigesen, ol i save stap gut. Yumi ken tok piksa olsem, Satan i laik kirapim wanpela paia insait long kongrigesen na bai ol bratasista i ranawe lusim kongrigesen. Na nau Satan inap holimpasim ol. Olsem wanem yumi inap helpim Satan long mekim olsem na yumi no luksave long dispela, na i olsem em i trapim yumi pinis?

⁴ Disaipel Jems i tok tang i olsem paia. (Ritim Jems 3:6-8.) Sapos yumi no bosim gut tang, olsem toktok yumi mekim, yumi inap kirapim wanpela paia insait long kongrigesen. Olsem wanem dispela inap kamap? Piksaim dispela: Long miting bilong kongrigesen ol i toksave olsem wanpela sista bai mekim wok painia oltaim. Bihain long miting 2-pela pablisa i toktok wantaim long dispela. Wanpela i tok olsem em i gutpela long dispela sista i kirap painia na em i laik bai wok painia bilong sista i kamap gutpela. Narapela i tok i luk olsem sista i painia bikos em i laik kisim biknem insait long kongrigesen. Long dispela tupela pablisa, yu laik bai husat i stap olsem pren bilong yu? I no hatwok long luksave long husat inap kamapim hevi insait long kongrigesen long toktok em i mekim.

5. Sapos yumi laik kilim i dai paia em pasin bilong i no bosim gut maus i kamapim, orait yumi mas mekim wanem?

⁵ Olsem wanem yumi inap kilim i dai paia em pasin bilong i no bosim gut maus i kamapim? Jisas i tok: “Maus i save autim ol tingting i pulap long bel.” (Mat. 12:34) Olsem na namba 1 samting yumi mas mekim em yumi mas skelim bel bilong yumi yet. Yumi mas wok strong long sakim ol tingting nogut bilong bel we inap kirapim yumi long mekim ol tok i bagarapim narapela. Olsem, taim yumi harim olsem wanpela brata i laik mekim bikpela wok moa long kongrigesen, yumi save ting olsem em i mekim bilong amamasim Jehova? O em i mekim bilong helpim em yet? Sapos yumi ting ol brata i tingim ol yet tasol na mekim wok bilong Jehova, orait tingim, Satan i bin mekim wankain tok long gutpela wokboi bilong God, em Jop. (Jop 1:9-11) Yumi no ken saspek nating long brata bilong yumi, nogat, mobeta yumi skelim wai na yumi kisim tingting nogut long em. Olsem wanem? Yumi gat gutpela risen long holim dispela kain tingting? O nau long taim bilong las de yumi larim pasin bilong ol man long i no laikim ol arapela i bosim tingting bilong yumi?—2 Tim. 3:1-4.

6, 7. (a) Wanem sampela risen na yumi skelim skelim na daunim wok bilong ol arapela? (b) Sapos narapela i tok nogut long yumi, orait yumi mas mekim wanem?

⁶ Tingim ol arapela samting em inap kirapim yumi long skelim skelim na daunim wok bilong ol arapela. Ating yumi laik bai ol man i tingim tru ol wok yumi mekim. Ating yumi daunim wok narapela i mekim, long wanem, yumi laik kamapim olsem yumi winim ol arapela. O yumi mekim olsem na bai yumi gat eskius long sampela wok em yumi yet i no bin mekim. Maski i gat wanem as na yumi daunim narapela, olsem pasin antap, pasin jeles, o yumi no bilip long yumi yet, dispela pasin bilong daunim narapela bai kamapim bikpela hevi.

⁷ Ating yumi pilim olsem yumi gat gutpela risen na yumi skelim skelim ol arapela. Ating wanpela i bin mekim sampela tok i bagarapim bel bilong yumi. Tasol maski ol i bin mekim olsem, i no stret long bekim wankain pe nogut long ol. Kain pasin olsem bai mekim hevi i go nogut moa. Taim yumi mekim olsem yumi bihainim laik bilong Satan, laik bilong God nogat. (2 Tim. 2:26) Mobeta yumi bihainim pasin bilong Jisas. Taim ol man i tok nogut long em, “em i no bekim tok nogut long ol” na mekim tok bilong daunim ol. Em i “putim ol samting long han bilong dispela man husat i save skelim ol samting long stretpela pasin.” (1 Pita 2:21-23) Jisas i bilip olsem Jehova bai stretim dispela samting long taim na long rot em yet i makim. Yumi tu mas i gat wankain bilip long God. Taim yumi mekim ol gutpela tok bilong strongim ol arapela, yumi helpim kongrigesen long i stap wanbel na bel isi.—Ritim Efesus 4:1-3.

SAKIM TRAP BILONG PRET NA PRESA

8, 9. Bilong wanem Pailat i bin tok Jisas i mas i dai?

⁸ Animal i stap pinis long trap em i no fri moa long raun. Na olsem tasol, sapos wanpela i larim presa na pret i daunim em, dispela i pasim em long mekim sampela samting. (Ritim Sindaun 29:25.) Nau yumi ken skelim stori bilong tupela man husat i bin larim presa na pret i daunim ol. Samting i painim tupela i ken givim skul long yumi.

⁹ Gavana Pontius Pailat bilong Rom i save olsem Jisas i no gat asua, olsem na em i no laik kilim em i dai. Pailat i bin tok Jisas i no bin “mekim wanpela samting inap long em i dai.” Tasol Pailat i tok Jisas i mas i dai. Bilong wanem em i tok olsem? Long wanem, ol manmeri i putim presa long em. (Luk 23:15, 21-25) Bilong fosim Pailat long bihainim laik bilong ol, ol i singaut olsem: “Sapos yu lusim dispela man i go, orait yu no pren bilong Sisar”! (Jon 19:12) Ating Pailat i pret olsem sapos em i lusim Krais i go, Rom bai rausim wok gavana bilong em o kilim em i dai. Em i larim presa i daunim em na em i bihainim laik bilong Satan.

10. Bilong wanem Pita i bin tok em i no save long Krais?

¹⁰ Aposel Pita em i gutpela pren tru bilong Jisas. Pita i no pret long tokim ol arapela olsem Jisas em i Mesaia. (Mat. 16:16) Pita i bin stap gut long Jisas maski sampela disaipel i bin lusim Jisas taim ol i no kliagut long sampela tok em i mekim. (Jon 6:66-69) Na taim ol birua i kam long arestim Jisas, Pita i yusim bainat bilong helpim em. (Jon 18:10, 11) Tasol bihain Pita i larim pasin bilong pret long man i daunim em na em i tok olsem em i no save long Jisas Krais. Pasin bilong pret long man i olsem wanpela trap, na inap sotpela taim dispela aposel i pas insait long en. Pret i kirap bosim em na em i no gat strong moa long mekim pasin i stret na stap gut long Jisas.

11. Yumi mas wok strong long sakim wanem ol presa?

¹¹ Olgeta Kristen i mas wok strong long sakim presa long mekim ol samting God i no orait long en. Ating bosman o ol arapela bai traim fosim yumi long giaman o mekim pasin pamuk. Ol Kristen i go long skul inap bungim ol arapela yangpela husat i traim long pulim ol long lukstil long taim bilong eksem, lukim ponografi, smok, kisim drak, dring alkohol, o mekim pasin pamuk. Pret long man na presa bilong mekim ol samting Jehova i no laikim i olsem trap bilong holimpasim yumi. Wanem samting inap helpim yumi long sakim dispela trap?

12. Yumi kisim wanem skul long Pailat na Pita?

¹² Yumi kisim wanem skul long pasin bilong Pailat na Pita? Pailat i gat sampela save long Krais. Em i save olsem Jisas i no gat asua na em i no wanpela man nating. Tasol Pailat i gat pasin antap na em i no laikim Jehova, em God tru. Olsem na i isi long Satan i kirapim Pailat long bihainim laik bilong em. Pita i gat stretpela save na em i laikim tumas God. Tasol sampela taim Pita i no bihainim pasin daun, em i pret long man, na em i larim presa i daunim em. Paslain long ol i arestim Jisas, Pita i hambak na tok: “Maski sapos olgeta arapela i pundaun, bai mi no inap pundaun.” (Mak 14:29) Sapos Pita i bin trastim God olsem man bilong raitim song, em bai i redi long sanap strong taim traim i painim em. Man bilong raitim i song i tok: “Bikpela i stap wantaim mi na mi no inap pret. Ol man i no inap mekim wanpela samting long mi.” (Sng. 118:6) Long laspela nait em i stap laip hia long graun, Jisas i kisim Pita na tupela arapela aposel i go wantaim em long gaden Getsemani. Jisas i askim ol long was i stap, tasol Pita na tupela arapela aposel i slip. Taim Jisas i kirapim ol, em i tok: “Yupela i mas was i stap na beten, nogut traim i kamap long yupela.” (Mak 14:38) Tasol Pita i slip gen na bihain em i larim presa na pasin bilong pret long man i daunim em.

13. Yumi mas mekim wanem na bai presa bilong mekim pasin i no stret i no ken daunim yumi?

¹³ Stori bilong Pailat na Pita inap skulim yumi long narapela bikpela samting olsem: Sapos yumi no laik bai presa na pasin bilong pret i daunim yumi, yumi mas i gat save, pasin daun, pasin bilong laikim God, na pret long Jehova. Sapos stretpela save i as bilong bilip bilong yumi, orait bai yumi no pret long tokaut long bilip bilong yumi. Dispela bai helpim yumi na bai yumi no larim presa na pasin bilong pret long man i daunim yumi. Yumi no ken bilip tumas long strong bilong yumi yet. Nogat. Yumi mas i gat pasin daun na luksave olsem yumi mas kisim strong i kam long God sapos yumi no laik bai presa i daunim yumi. Yumi mas askim Jehova long givim holi spirit long yumi. Pasin bilong yumi long laikim tumas Jehova i mas kirapim yumi long bihainim ol lo bilong em na sakim ol pasin we inap nogutim nem bilong em. Taim traim i no kamap yet, yumi mas redi long sakim. Olsem, yumi mas beten wantaim ol pikinini bilong yumi na redim ol na bai ol i kliagut long ol samting ol i mas mekim taim ol arapela pikinini i laik kirapim ol long mekim pasin i no stret.—2 Kor. 13:7.a

ABRUSIM TRAP BILONG BEL I KOTIM YU TUMAS

14. Satan i laik bai yumi gat wanem tingting long ol rong yumi bin mekim bipo?

¹⁴ Sampela taim man i wokim trap olsem, em i hangamapim bikpela hap diwai o ston antap long rot ol animal i save wokabaut long en. Man i save taitim wanpela waia long dispela rot na taim animal i tatsim waia, hap diwai o ston i save pundaun na krungutim animal. Sapos bel i kotim yumi tumas, yumi inap pilim olsem bikpela hap diwai o ston i krungutim yumi. Olsem, taim yumi tingim wanpela rong yumi bin mekim, yumi inap pilim olsem ‘wanpela samting i krungutim yumi strong.’ (Ritim Song 38:3-5, 8.) Satan i laik bai yumi gat tingting olsem yumi mekim planti sin tumas na Jehova i no inap marimari long yumi, na yumi no inap bihainim ol lo bilong God.

15, 16. Olsem wanem yu inap abrusim trap bilong bel i kotim yu tumas?

¹⁵ Olsem wanem yu inap abrusim trap bilong bel i kotim yu tumas? Sapos yu bin mekim bikpela sin, orait wantu yu mas mekim ol samting bilong pas gut gen wantaim Jehova. Yu mas go lukim ol elda na askim ol long helpim yu. (Jems 5:14-16) Mekim olgeta samting yu inap mekim bilong stretim rong. (2 Kor. 7:11) Sapos ol elda i stretim yu, no ken bel hevi. Jehova i save stretim man em i laikim. (Hib. 12:6) Yu mas strong long no ken mekim gen dispela sin, na no ken mekim ol samting i bin kirapim yu long mekim dispela sin. Taim yu tanim bel pinis na baut, o kirap mekim gen ol samting God i laikim, yu mas bilip olsem God inap fogivim ol sin bilong yu long rot bilong ofa bilong Jisas Krais bilong baim bek ol man.—1 Jon 4:9, 14.

¹⁶ Bel i kotim yet sampela manmeri, maski God i fogivim ol pinis. Sapos yu wanpela bilong ol, orait tingim, Jehova i bin fogivim Pita na ol arapela aposel maski ol i bin lusim Jisas long taim we em i nidim ol stret. Na i gat wanpela man i bin mekim pasin pamuk nogut tru na ol i rausim em, tasol taim em i tanim bel, Jehova i fogivim em tu. (1 Kor. 5:1-5; 2 Kor. 2:6-8) Long Baibel, yumi ritim stori bilong ol manmeri husat i bin mekim ol bikpela rong tru, tasol God i fogivim ol, long wanem, ol i tanim bel.—2 Sto. 33:2, 10-13; 1 Kor. 6:9-11.

17. Olsem wanem pe bilong baim bek man inap helpim yu?

¹⁷ Jehova bai fogivim yu na lusim tingting long ol sin bilong yu sapos yu tanim bel na bilip tru olsem em bai marimari long yu. Yu ting olsem ofa bilong Jisas bilong baim bek man i no strongpela inap long Jehova i ken fogivim ol sin bilong yu? Sapos yu ting olsem, orait wanpela trap bilong Satan i holim yu pinis. Satan i laik bai yu ting olsem pe bilong baim bek man i no strongpela inap long Jehova i ken fogivim olgeta sin. Tasol sin bilong ol man i bin mekim rong inap tekewe olgeta sapos ol i tanim bel. (Snd. 24:16) Bilip bilong pe bilong baim bek man inap mekim na bel bilong yu i no ken kotim yu tumas na em inap strongim yu long givim laip olgeta, bel olgeta, na tingting olgeta long mekim wok bilong God.—Mat. 22:37.

YUMI SAVE LONG OL TRAP BILONG SATAN

18. Olsem wanem yumi inap abrusim ol trap bilong Satan?

¹⁸ Satan i no wari long olsem wanem em i trapim yumi. Nogat. Bikpela laik bilong en, em long holimpasim yumi, o kirapim yumi long bihainim laik bilong em. Tasol yumi save long ol trap bilong Satan, olsem na yumi inap abrusim ol. (2 Kor. 2:10, 11) Yumi no inap pas insait long ol trap bilong en sapos yumi beten askim God long givim savetingting long yumi bilong sanap strong na karim ol hevi. Disaipel Jems i bin tok: “Sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol taim em i mekim olsem.” (Jems 1:5) Sapos yumi laik bai Jehova i givim savetingting long yumi bilong sanap strong na karim ol hevi, orait oltaim yumi mas mekim stadi bilong yumi yet na bihainim ol stiatok bilong Baibel. Ol buk na nius em gutpela wokboi i gat savetingting i kamapim i save skulim yumi long ol trap bilong Satan na i helpim yumi long abrusim ol.

19, 20. Bilong wanem yumi mas heitim ol pasin nogut?

¹⁹ Pasin bilong beten na stadi long Baibel i save helpim yumi long laikim moa yet ol gutpela pasin. Tasol em i bikpela samting tu long lain long heitim ol pasin nogut. (Sng. 97:10) Yumi inap abrusim ol laik nogut bilong bel sapos yumi tingim ol hevi ol dispela laik nogut inap kamapim. (Jems 1:14, 15) Yumi mas lain long heitim ol pasin nogut na laikim ol gutpela pasin. Long dispela rot ol samting Satan i yusim bilong trapim yumi bai i no inap pulim yumi, long wanem, yumi heitim ol dispela samting.

²⁰ Yumi tenkyu tru long helpim God i givim yumi na bai Satan i no inap holimpasim yumi long ol trap bilong en! Jehova i save yusim holi spirit bilong en, Baibel, na oganaisesen bilong en bilong kisim bek yumi long “han bilong Satan.” (Mat. 6:13) Long stadi i kamap bihain long dispela, bai yumi kisim save long ol samting yumi mas mekim bilong abrusim 2-pela trap moa Satan i save yusim bilong holimpasim ol wokboi bilong God.

Sanap Strong na Abrusim Ol Trap Bilong Satan!

“Sanap strong na sakim ol pasin trik bilong Satan.”—EFE. 6:11.

WANEM BEKIM BILONG YU?

Wokboi bilong Jehova i ken mekim wanem na bai trap bilong laikim tumas mani kago i no ken holimpasim em?

Wanem samting inap helpim ol marit Kristen long abrusim pasin adaltri?

Bai yumi kisim wanem gutpela samting sapos yumi no pundaun long trap bilong laikim tumas mani kago o mekim pasin pamuk?

1, 2. (a) I gat wanem as na Satan i heitim lain God i makim na “ol arapela sipsip”? (b) Long dispela stadi bai yumi stori long wanem 2-pela trap bilong Satan?

SATAN i save heitim ol manmeri, na moa yet ol manmeri i lotuim Jehova. Satan i pait yet long ol Kristen God i bin makim husat i stap yet long graun. (Rev. 12:17) Ol dispela Kristen i bin sanap strong na go pas long autim tok na soim ol manmeri olsem Satan em bosman bilong dispela graun. Satan i heitim tu “ol arapela sipsip,” em ol i bilip na wet long kisim laip oltaim long graun, na ol i sapotim wok bilong ol Kristen God i bin makim. (Jon 10:16) Satan i lus long kisim laip oltaim. Dispela i as na em belhat nogut tru. Maski yumi bilong lain Kristen God i bin makim o lain arapela sipsip, Satan em i birua bilong yumi. Em i laik bagarapim yumi.—1 Pita 5:8.

² Bilong mekim olsem, Satan i yusim ol trap. Em i “pasim tingting” bilong ol manmeri na bai ol i no inap lainim gutnius na luksave long ol trap bilong em. Tasol Satan i holimpasim tu sampela husat i kisim pinis gutnius bilong Kingdom. (2 Kor. 4:3, 4) Stadi yumi bin mekim paslain long dispela i bin soim olsem wanem yumi inap abrusim 3-pela trap bilong Satan. Olsem: (1) pasin bilong i no bosim gut maus, (2) larim pasin bilong pret na presa i daunim yu, na (3) bel i kotim yu tumas long rong yu bin mekim. Nau bai yumi stori long olsem wanem yumi inap abrusim 2-pela narapela trap bilong Satan. Em pasin bilong laikim tumas mani kago na pasin adaltri.

TRAP BILONG LAIKIM TUMAS MANI KAGO

3, 4. Olsem wanem ol wari bilong laip long dispela taim inap mekim na trap bilong laikim tumas mani kago i holimpasim yumi?

³ Long wanpela tok piksa, Jisas i stori long ol sid i pundaun namel long ol rop i gat nil. Jisas i tok olsem man inap harim tok bilong Kingdom, “tasol ol wari bilong laip long dispela taim na strong bilong mani long giamanim man, ol i karamapim tok na em i no karim kaikai.” (Mat. 13:22) Pasin bilong laikim tumas mani kago em wanpela trap Satan i save yusim.

⁴ I gat tupela samting i wok bung wantaim bilong ‘karamapim tok bilong Kingdom.’ Wanpela em “ol wari bilong laip long dispela taim.” Nau long dispela ‘taim nogut i givim hatwok long ol man,’ i gat planti samting i mekim ol man i tingting planti. (2 Tim. 3:1) Ating yu hatwok long baim ol samting yu nidim, long wanem, pe bilong ol samting i go antap o ating yu no gat wok mani. Ating yu wari long ol samting bai kamap bihain na yu askim yu yet olsem, ‘Bai mi gat mani bilong lukautim mi taim mi lapun pinis?’ Sampela i wok strong long kamap maniman, long wanem, ol i ting sapos ol i gat planti mani, dispela bai lukautim ol.

5. Olsem wanem “strong bilong mani” inap pulim yumi?

⁵ Narapela samting Jisas i tok long en, em long “strong bilong mani long giamanim man.” Dispela, wantaim pasin bilong wari, inap mekim na trap bilong laikim tumas mani kago inap holimpasim yumi. Baibel i tok ‘mani i save helpim yumi long taim nogut.’ (Sav. 7:12) Tasol yumi no bihainim savetingting sapos yumi wok strong long kisim planti mani. Planti manmeri i bin kisim save olsem taim ol i wok strong long kisim planti mani, trap bilong laikim tumas mani kago i holimpasim ol moa yet. Sampela i kamap wokboi nating bilong ol kago samting bilong ol.—Mat. 6:24.

6, 7. (a) Wanem samting inap kamap long ples wok we inap kirapim yu long laikim tumas mani? (b) Kristen i mas skelim wanem samting taim bos i askim em long wok ovataim?

⁶ Ating laik bilong kisim planti mani kago i kamap long bel bilong yu na yu no luksave long dispela. Olsem, bos bilong yu i tokim yu: “E, gutpela samting tru i kamap! Kampani i kisim wanpela bikpela wok. Olsem na yu mas wok ovataim inap sampela mun. Tasol bai yu kisim planti mani long dispela wok.” Sapos samting olsem i kamap long yu, bai yu gat wanem tingting? Tru, yu gat wok long lukautim famili bilong yu long sait bilong skin, tasol i gat ol arapela samting tu yu mas lukautim ol long en. (1 Tim. 5:8) I gat sampela samting moa yu mas tingting long en. Bai yu mekim wok ovataim inap long wanem mak? Olsem wanem? Wok mani bai givim hatwok long yu long mekim wok bilong God na yu bai lusim ol miting bilong kongrigesen na famili lotu?

⁷ Wanem nambawan bikpela samting long laip bilong yu? Em sampela ekstra mani o pasin bilong yu long pas gut wantaim Jehova? Olsem wanem? Laik bilong yu long kisim sampela mani moa bai mekim na yu no wok moa long painim Kingdom pastaim? Yu luksave long samting em pasin bilong laikim tumas mani kago bai mekim long pasin bilong yu na famili long pas gut wantaim Jehova? Sapos kain samting olsem i painim yu long nau, orait bai yu mekim wanem na bai pasin bilong laikim tumas mani kago i no ken pundaunim yu?—Ritim 1 Timoti 6:9, 10.

8. Wanem ol stori bilong Baibel inap helpim yumi long skelim i stap bilong yumi?

⁸ Sapos yumi no laik bai pasin bilong laikim tumas mani kago i pundaunim yumi, orait oltaim yumi mas skelim i stap bilong yumi. Yumi no laik stap olsem Iso, husat i ting olsem ol tok promis bilong Jehova em samting nating. (Stt. 25:34; Hib. 12:16) Na tu, yumi no laik i stap olsem dispela maniman em Jisas i bin askim em long salim olgeta samting bilong en, na givim mani long ol rabisman, na bihainim Jisas. Maniman i no mekim olsem, nogat. Em i gat planti samting, olsem na em i bel hevi na i go. (Mat. 19:21, 22) Ol samting bilong maniman i olsem trap i holimpasim em. Em inap bihainim Jisas, nambawan man tru i bin stap long graun! Tasol em i no mekim. Yumi mas was gut bai yumi no lusim gutpela wok bilong i stap disaipel bilong Jisas Krais.

9, 10. Olsem Baibel i makim, yumi mas i gat wanem tingting long ol samting bilong skin?

⁹ Sapos yumi no laik bai mani kago i giamanim yumi, yumi mas bihainim tok bilong Jisas. Em i tok: “No ken tingting planti na tok, ‘Bai yumi kaikai wanem samting?’ o, ‘Bai yumi dring wanem samting?’ o, ‘Bai yumi werim wanem samting?’ Em ol samting ol manmeri bilong ol arapela lain i wok strong long kisim. Papa bilong yupela long heven i save olsem yupela i nidim ol dispela samting.”—Mat. 6:31, 32; Luk 21:34, 35.

¹⁰ Sapos yumi no laik bai trap bilong mani kago i holimpasim yumi, orait yumi mas holim wankain tingting olsem man bilong raitim Baibel, em Agur, em i tok: “No ken larim mi i kamap maniman o rabisman. Nogat. Yu ken givim mi kaikai inap long skel bilong mi.” (Snd. 30:8) Agur i kliagut olsem em i mas i gat sampela mani bilong i stap laip, tasol tu em i kliagut olsem mani i gat strong bilong giamanim man. Yumi mas luksave olsem ol wari bilong laip long dispela taim na strong bilong mani long giamanim man inap mekim na yumi no pas gut moa wantaim Jehova. Sapos yumi wari tumas long ol samting bilong skin, bai yumi no gat taim, strong, o laik long tingim Kingdom pastaim. Olsem na yumi mas was gut, yumi no laik bai trap bilong Satan long laikim tumas mani kago i holimpasim yumi!—Ritim Hibru 13:5.

ADALTRI—WANPELA TRAP I STAP HAIT

11, 12. Olsem wanem trap bilong pasin adaltri inap holimpasim wanpela Kristen long ples wok?

¹¹ Sampela taim man bilong painim abus i save digim bikpela hul long rot we animal i save wokabaut long en. Bilong haitim hul, man i save yusim ol stik na graun bilong karamapim hul. Satan tu i save yusim wanpela kain trap olsem na i save wok gut tru. Em pasin pamuk. (Snd. 22:14; 23:27) Dispela trap i bin holimpasim sampela Kristen, long wanem, ol i insait long ol samting we em i isi long ol i pundaun long pasin pamuk. Sampela marit Kristen i bin mekim pasin adaltri bihain long ol i kirap pren wantaim narapela husat i no poroman bilong ol.

¹² Dispela pasin bilong kirap prenim narapela husat i no poroman marit inap kamap long ples wok. Winim 50 pesen bilong ol meri na klostu olgeta man husat i mekim pasin pamuk, ol i bin mekim wantaim wanwok bilong ol. Olsem wanem? Long ples wok yupela ol brata i mas wok wantaim ol meri? O yupela ol sista i mas wok wantaim ol man? Sapos olsem, orait olsem wanem long pasin bilong yu long bung na toktok wantaim ol? Yu putim sampela lo long yu yet na bai yu na wanwok bilong yu i no ken kisim tingting olsem yu laik prenim em? Olsem, ating planti taim wanpela sista i save toktok wantaim wanpela man long ples wok. Ating sista i kirap trastim dispela man olsem gutpela pren, na sista i kirap tokim em long ol hevi insait long marit bilong en. O wanpela brata i kirap pas gut wantaim wanpela meri long ples wok. Brata inap ting: “Dispela meri i laik harim tingting bilong mi na em i save putim gut yau taim mi toktok wantaim em. Em i save rispektim mi. Gutpela sapos poroman marit bilong mi i mekim olsem!” Yu inap luksave long olsem wanem dispela 2-pela Kristen inap pundaun na mekim pasin adaltri?

13. Olsem wanem wanpela brata o sista inap kirap laikim narapela insait long kongrigesen husat i no poroman marit bilong ol?

¹³ Pasin bilong kirap laikim narapela husat i no poroman marit bilong yu inap kamap insait long kongrigesen tu. Tingim dispela trupela stori. Daniel na meri bilong en, Sarah, tupela i painia oltaim.a Daniel i tok em i wanpela elda husat i orait long kisim olgeta asainmen ol i laik givim long em insait long kongrigesen. Em i mekim Baibel stadi wantaim 5-pela man, na 3-pela i kisim baptais. Bilong stap strong long bel na tingting, ol dispela nupela brata i nidim yet bikpela helpim. Daniel i save bisi tru long mekim ol wok insait long kongrigesen, olsem na planti taim Sarah i helpim ol dispela brata. Tasol Sarah tu i laik bai wanpela i tingim em, na ol sumatin bilong Daniel i mekim olsem. Dispela samting i kamap olsem wanpela trap nogut. Daniel i tok: ‘Inap planti mun meri bilong mi i yusim olgeta strong bilong em long helpim ol arapela, olsem na i mas i gat wanpela i tingim em na strongim em long pas gut wantaim Jehova. Long dispela taim mi no bin mekim olsem. Dispela i kamapim bikpela hevi. Meri bilong mi i mekim pasin adaltri wantaim wanpela man em mi bin stadi wantaim em. Mi bin bisi stret na mi no luksave olsem pasin bilong meri bilong mi long pas gut wantaim Jehova i no strong moa.’ Olsem wanem yu inap abrusim kain hevi olsem?

14, 15. Wanem samting inap helpim ol marit Kristen long abrusim pasin adaltri?

¹⁴ Bilong abrusim pasin adaltri, yu mas tingim tingim long bel wok bilong yu long stap gut long poroman bilong yu. Jisas i tok: “Samting God i pasim pinis, man i no ken katim.” (Mat. 19:6) Yu no ken ting olsem wok yu mekim insait long kongrigesen i bikpela samting moa winim poroman marit bilong yu. Na tingim, sapos planti taim yu bisi nating long mekim ol narapela narapela samting na yu no stap wantaim poroman marit bilong yu, dispela inap makim olsem marit bilong yu i no stap strong. Na traim inap painim yu o poroman marit na yupela i pundaun long pasin adaltri.

¹⁵ Sapos yu wanpela elda, yu gat wok long lukautim kongrigesen. Aposel Pita i tok: “Yupela ol hetman i mas lukautim gut ol sipsip bilong God i stap aninit long yupela. Yupela i no ken mekim olsem wanpela i subim yupela long mekim, nogat, yupela i mas amamas long mekim. Yupela i no ken mekim bilong kisim ol samting bilong helpim yupela yet, nogat. Yupela i mas i gat bikpela laik long mekim dispela wok.” (1 Pita 5:2) Yu no ken lusim tingting long ol bratasista insait long kongrigesen. Tasol no ken givim olgeta taim bilong yu bilong i stap gutpela elda na yu no gat taim bilong i stap gutpela poroman bilong meri bilong yu. Em i no stret sapos oltaim yu helpim ol bratasista insait long kongrigesen na yu no tingim meri bilong yu. Dispela inap bagarapim marit bilong yu. Daniel, em yumi stori pinis long en, i tok, ‘Yu no ken larim wok bilong yu insait long kongrigesen i mekim na yu bisi tumas na yu lusim tingting long famili bilong yu.’

16, 17. (a) Long ples wok ol marit Kristen inap mekim wanem bilong kamapim klia olsem ol i no inap tru long kirap prenim narapela? (b) Wanem sampela nius bilong yumi inap helpim yumi long abrusim pasin adaltri?

¹⁶ Nius Wastaua na Kirap! i save kamapim planti gutpela tok bilong helpim ol marit Kristen long abrusim pasin adaltri. Wastaua bilong Septemba 15, 2006, i tok lukaut long ol samting inap kamap long ples wok na ol arapela hap we em isi long yu kirap laikim narapela husat i no poroman marit bilong yu. Olsem, sapos yu wanpela brata i wok ovataim wantaim wanpela meri, nogut yu laik kirap prenim dispela meri. Sapos yu marit, pasin na toktok bilong yu i mas kamapim klia olsem yu no inap tru kirap prenim narapela. No ken mekim ol tok gris o pasim ol klos o bilas bilong kirapim ol arapela long lukluk long yu. Putim ol poto bilong poroman marit na ol pikinini bilong yu long ples wok. Dispela bai helpim yu yet na ol arapela long tingim olsem famili em bikpela samting long yu. Taim wanpela i mekim tok o pasin i soim olsem em i laik prenim yu, no ken mekim olsem yu amamas liklik long dispela. Yu mas soim olsem yu no orait liklik long dispela.

¹⁷ Stori long Kirap! bilong Julai-Septemba 2009, “Stap Gut Long Marit—Wanem Mining Tru Bilong En?”, i tok lukaut long pasin bilong tingting nabaut long mekim maritpasin wantaim narapela husat i no poroman marit bilong yu. Stori i tok moa olsem sapos yu tingting nabaut long maritpasin dispela inap kirapim yu long mekim pasin adaltri. (Jems 1:14, 15) Sapos yu marit, orait em savetingting long yu na poroman marit bilong yu long ritim ol nius i stori long dispela samting. Jehova i bin kamapim marit, na marit i holi. Yu na poroman marit i mas makim taim bilong toktok long marit bilong yutupela. Dispela bai soim olsem yu save tingim tru ol samting i holi.—Stt. 2:21-24.

18, 19. (a) Pasin adaltri i save kamapim wanem ol hevi? (b) Pasin bilong stap gut long poroman marit bilong yu i gat wanem gutpela pe bilong en?

¹⁸ Sapos yu kisim tingting long kirap prenim wanpela man o meri husat i no poroman marit bilong yu, orait tingim ol hevi em pasin pamuk na pasin adaltri bai kamapim. (Snd. 7:22, 23; Gal. 6:7) Jehova i no amamas long ol manmeri i mekim pasin pamuk. Ol i givim pen long poroman marit bilong ol na long ol yet. (Ritim Malakai 2:13, 14.) Gutpela moa yu tingim ol gutpela samting bai painim yu sapos yu bihainim klinpela pasin. Yu inap stap laip oltaim, na sindaun bilong yu long nau bai gutpela, na bel i no kotim yu.—Ritim Sindaun 3:1, 2.

¹⁹ Man bilong raitim song i tok ol man i laikim tumas lo bilong God na bihainim, ol bai stap bel isi na i no gat wanpela trap bai holimpasim ol. (Sng. 119:165) Olsem na yu mas laikim tumas tok i tru, na nau long dispela taim nogut bilong las de, yu mas ‘was gut tru long wokabaut bilong yu. Na wokabaut olsem ol man i gat savetingting.’ (Efe. 5:15, 16) Long nau, Satan i save yusim planti trap bilong holimpasim ol man i lotu tru long God. Tasol Jehova i givim yumi olgeta samting yumi nidim bilong helpim yumi long “sanap strong” na lukautim yumi yet na bai ol trap bilong Satan i no ken holimpasim yumi.—Efe. 6:11, 16.