Yu wanbel long tok bilong Rogelio? Yu ting wanem tok i stap daunbilo i stret?

• Satan i no man tru, em i makim ol laik nogut.

• Satan i stap, tasol em i no inap helpim o bagarapim ol man.

• Satan em wanpela strongpela spirit na em i gat strong long kontrolim ol man.

Ating planti milion man i gat ol dispela kain tingting. Tasol yu ting em bikpela samting long save long wanem tok long Satan i tru? Sapos Satan i no man tru, orait ol man husat i gat kain tingting olsem i bin popaia. Na sapos Satan em man tru, na em i no save mekim wanpela samting long nogutim ol man, orait i nogat as long pret long em. Na tu, sapos Satan em man bilong giamanim ol man, orait em i man nogut tru, tasol planti man i no luksave long ol pasin hait bilong em.

Yumi laik skelim tok bilong Baibel long painim bekim bilong ol dispela askim: Satan i husat? Em man i stap tru o em i makim ol laik nogut? Sapos Satan i stap tru, yu ting em inap mekim sampela samting bilong nogutim yu? Na olsem wanem yu inap sakim Satan?

Planti man i ting Satan i makim ol laik nogut na em i no wanpela man tru. Tasol Baibel i tok wanem long dispela? Sapos Satan i makim ol laik nogut, bilong wanem Baibel i stori olsem Satan i toktok wantaim Jisas Krais na God i Gat Olgeta Strong? Yumi ken skelim ol dispela stori.

SATAN I TOKTOK WANTAIM JISAS

Taim Jisas i kirap long mekim wok autim tok long graun, 3-pela taim Satan i traim em. Namba 1 traim, Satan i fosim Jisas long yusim strong God i givim long em long inapim laik bilong em long kaikai. Namba 2 traim, Satan i tokim Jisas olsem sapos em i pikinini bilong God, orait em i mas kalap i go daun na bai ol ensel i ken seivim em. Na namba 3 traim, Satan i tokim Jisas olsem sapos em i lotu long em, em bai givim olgeta kingdom bilong graun long Jisas. Tasol Jisas i sakim dispela 3-pela traim, na em i kamapim ol skripsa bilong Baibel taim em i bekim tok long Satan.—Matyu 4:1-11; Luk 4:1-13.

Jisas i toktok wantaim husat? Yu ting em i toktok long laik nogut i stap long bel bilong em yet? Baibel i tok long Jisas olsem, “olgeta traim i save kamap long yumi, ol i bin kamap long em tu, tasol em i no gat sin.” (Hibru 4:15) Na tu, Baibel i tok: “Em i no bin mekim sin, na i no gat wanpela tok giaman i bin kamap long maus bilong en.” (1 Pita 2:22) Jisas i stap gut long God, i nogat wanpela taim em i bin bihainim laik bilong em yet. I klia tru olsem Jisas i no toktok long laik nogut i stap long bel bilong em, nogat, em i toktok long wanpela man tru.

Dispela stori i kamapim klia olsem Satan em man i stap tru.

• Tingim, Satan i tok long givim olgeta kingdom bilong graun long Jisas sapos em i brukim skru na lotu long em. (Matyu 4:8, 9) Sapos Satan i no man tru, orait i no gat as long Jisas i mas sakim em. Na tu, Jisas i luksave olsem Satan i bosim olgeta gavman bilong graun.

• Bihain long Jisas i sakim Satan, em i “lusim em na wetim narapela taim.” (Luk 4:13) Dispela i soim olsem Satan em man tru na em i wok strong long pulim ol man long lusim bilip bilong ol.

• Na tu, bihain long Satan i lusim Jisas, “ol ensel i kam na helpim” em. (Matyu 4:11) Yu ting ol dispela ensel husat i strongim na helpim Jisas em ol spirit tru? Yes, ol dispela ensel em ol spirit tru, olsem na i gat as na yumi ken bilip olsem Satan tu i wanpela spirit.

SATAN I TOKTOK WANTAIM GOD

Long stori bilong Jop, Baibel i kamapim olsem tupela taim Satan i bin toktok wantaim God. Dispela stori i kamapim klia olsem Jop i stap gut long God, olsem na Em i tok amamas long Jop. Tasol Satan i sutim tok long Jop olsem God i mekim gut long em, olsem na em i stap gut long God. Taim Satan i sutim dispela tok, i olsem em i tok God i no save long as na Jop i lotuim em. Jehova i larim Satan i mekim na Jop i bungim planti hevi. Olsem na Jop i lusim mani kago bilong em, ol pikinini bilong em i dai, na tu, em i kisim bikpela sik.a Maski ol dispela hevi i painim Jop, em i stap gut long God na dispela i soim olsem Satan em man bilong giaman. Olsem na God i blesim Jop.—Jop 1:6-12; 2:1-7.

Baibel i stori olsem God i toktok wantaim Satan, olsem na yu ting i stret long ting olsem Jehova i toktok long wanpela laik nogut i stap long bel bilong em? Baibel i tok: “Pasin bilong God i gutpela tru na i stret olgeta.” (2 Samuel 22:31) Na tu, Baibel i tok: “God Jehova, em i God i Gat Olgeta Strong, em i holi, em i holi, em i holi.” (Revelesen 4:8) Dispela tok holi i makim samting i klin olgeta. Jehova em i holi, olsem na em i no inap tingting long mekim pasin nogut.

Sampela man i ting Jop i no man i stap tru, na ol i tok dispela stori em wanpela tok bokis tasol. Yu ting dispela tok i stret? Ol narapela ves long Baibel i kamapim klia olsem Jop em man tru husat i stap long bipo. Olsem, Jems 5:7-11 i kirapim ol Kristen long bihainim pasin bilong Jop long sanap strong na karim ol hevi, na taim ol i mekim olsem Jehova bai blesim ol. Olsem na dispela skripsa i helpim yumi long luksave olsem Jop em wanpela man i stap tru long bipo na Satan i kamapim ol hevi long em. Na tu, long Esekiel 14:14, 20, Baibel i stori long Jop wantaim ol narapela bilipman olsem Noa na Daniel. Olsem Noa na Daniel, Jop em wanpela man i stap tru long bipo na em i gat strongpela bilip. So yumi ken ting olsem Satan, em man husat i birua na mekim nogut long Jop, em tu em wanpela man i stap tru.

Baibel i kamapim klia olsem Satan em wanpela spirit i stap tru. Ating bai yu tok, ‘Satan inap mekim sampela samting bilong nogutim mi na famili bilong mi?’

OLSEM WANEM LONG TAIM BILONG YUMI?

Tingim olsem wanpela lain raskol i kam long taun yu stap long en. Ating pasin raskol bai i go bikpela, na tu, pasin bilong ol man bai go nogut moa. Orait tingim, kain samting olsem i bin kamap: Satan na ol spirit nogut bilong em i bikhet na sakim tok bilong God, olsem na God i rausim ol i kam daun long graun. Dispela i kamapim wanem ol hevi long graun? Tingim ol stori yu harim long redio na lukim long TV samting:

• Ol gavman na oganaisesen long graun i traim long stopim pasin bilong pait na bagarapim narapela, tasol ol i no inap long mekim olsem.

• Ol muvi na ol vidio gem samting i soim ol wok bilong ol spirit nogut, na dispela i mekim na planti papamama i tingting planti.

• Ol man i traim kain kain rot long lukautim graun, tasol win na wara samting long graun i wok long bagarap.

• Pasin bilong ol man i go nogut moa, na dispela inap kamapim bikpela hevi.

Skelim tok bilong Baibel long man husat i as bilong olgeta pen na hevi, em i tok: “Na ol i tromoi dispela traipela snek i go daun, em dispela snek bilong bipo yet, ol i kolim em Devil na Satan. Em man i save giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em. . . . Yu graun na yu solwara, yupela lukaut, long wanem, Satan i kam daun pinis long yupela, na em i belhat nogut tru, em i save em i gat sotpela taim tasol bilong i stap.” (Revelesen 12:9, 12) Planti man i ritim Baibel, na dispela i helpim ol long luksave olsem Satan em wanpela spirit tru, na em i kontrolim olgeta man long dispela graun.

Olsem wanem yu inap sakim Satan? Neks atikol bai stori long sampela gutpela rot bilong helpim yu long mekim olsem.

Olsem win kabon monoksait, Satan em man nogut tru, na yumi no inap lukim em. Tasol God i stretim rot bilong helpim yumi long sakim Satan. Yumi ken stori long sampela bilong ol dispela rot.

Yumi yet inap mekim disisen. Long Jems 4:7, Baibel i tok: “Yupela i mas sakim Satan, na em bai lusim yupela na ranawe.” Maski Satan i gat strong, em i no inap fosim yu long mekim ol samting. Yu yet inap mekim disisen. Long 1 Pita 5:9, Baibel i tok: “Yupela i mas sanap strong long bilip na sakim em [Satan].” Tingim, Jisas i bin sakim Satan 3-pela taim na Satan i lusim. (Matyu 4:11) Olsem na yu tu inap sakim ol traim bilong Satan.

Yumi stap pren bilong God. Long Jems 4:8, Baibel i tokim yumi long “go klostu long God.” Jehova i singautim yumi wan wan long kamap pren bilong em. Olsem wanem yumi inap kamap pren bilong God? Namba 1 rot, em long kisim sampela save moa long God long rot bilong Baibel. (Jon 17:3) Taim yu kisim save long Jehova, bai yu laikim em, na dispela bai kirapim yu long mekim laik bilong em. (1 Jon 5:3) Wanem gutpela samting inap kamap taim yu go klostu long Papa bilong yu long heven? Jems i tok, ‘God bai kam klostu long yu.’

God bai lukautim yu. Sindaun 18:10 i tok: “Bikpela i olsem wanpela strongpela haus. Ol stretpela man i ken ran i go long en na i stap gut.” Dispela tok i no makim olsem taim man i kolim nem bilong God, God bai lukautim em, nogat. Em i makim olsem ol man husat i lotu long God, ol i ken beten askim Em long lukautim ol taim ol i nidim helpim.

Wanpela gutpela eksampel. Aposel 19:19 i stori long ol nupela Kristen long Efesus long bipo olsem: “Planti bilong ol husat i save wokim ol kain kain marila posin samting, ol i karim ol buk bilong ol i kam na kukim long ai bilong olgeta manmeri. Ol i kaunim pe bilong ol dispela buk na em inap olsem 50,000 mani silva.”a Maski ol dispela buk i gat bikpela pe, ol i kukim olgeta buk, long wanem, ol tok bilong en i stori long wok bilong ol spirit nogut. Gutpela eksampel bilong ol i ken helpim yumi tu. Long nau ol man i insait tru long wok bilong ol spirit nogut. Maski sampela wok na pasin ol man i mekim i insait long wok bilong spirit nogut, ol i ting olsem i nogat rong long mekim olsem. Tasol em i bikpela samting long sakim ol dispela pasin.—Lo 18:10-12.

Rogelio em yumi stori long em long fes atikol, inap 50 yia em i no bilip olsem Satan em wanpela man i stap tru. Tasol bihain em i senisim tingting bilong em. Bilong wanem em i mekim olsem? Rogelio i tok: “Mi kisim wanpela Baibel long namba 1 taim, na mi kisim save olsem Satan em man i stap tru. Dispela save mi kisim i helpim mi long sakim ol traim bilong em.”

Olsem wanem? Yu laik tru long lukim wanpela taim i kamap we Satan bai i no stap moa? Baibel i tok profet long Satan, em man i save giamanim ol man, olsem ol bai “tromoi em i go daun long raunwara i gat bikpela paia i lait long ston salfa.” (Revelesen 20:10) Yumi save olsem paia tru na ston salfa i no inap bagarapim ol spirit. Olsem na dispela raunwara i gat bikpela paia i makim olsem Satan bai bagarap na pinis olgeta. Long dispela taim, ol man husat i laikim God bai i stap amamas tru!

Olsem na i gutpela long yu kisim save long Jehova na ol pasin bilong em.b Piksaim long tingting olsem bihain bai i gat wanpela taim we yu inap tok, “Satan i no stap moa!”