Planti man i gat wankain tingting olsem Christopher, Hannah, na Gina. Ol i bilip olsem God i stap pren bilong ol. Olsem wanem? Yu ting yu inap i go klostu long God? O yu laik i go klostu moa long God? Ating yu laik save: ‘Yumi ol man nating inap i go klostu long God i Gat Olgeta Strong? Na olsem wanem yumi inap go klostu long God?’

YU INAP I GO KLOSTU LONG GOD

Baibel i kamapim klia olsem yumi inap i go klostu long God. Na tu, Baibel i tok God i kolim Abraham em wanpela bilipman bilong lain Hibru olsem “pren bilong mi.” (Aisaia 41:8) Na tingim dispela gutpela tok i stap long Jems 4:​8, em i tok: “Yupela i mas i go klostu long God, na em bai kam klostu long yupela.” Dispela i kamapim klia olsem ol man inap stap pren bilong God. Tasol yumi no inap lukim God, olsem na hau bai yumi inap “i go klostu” long em?

Bilong bekim dispela askim, tingim samting i save kamap taim ol man i laik stap pren bilong narapela. Pastaim ol i mas save long nem bilong narapela narapela. Orait bihain taim ol i toktok long olgeta taim na kamapim tingting na laik bilong ol long narapela narapela, dispela i strongim pasin pren bilong ol. Na tu, taim ol i mekim ol samting bilong helpim narapela narapela, pasin pren bilong ol i kamap strong moa. Dispela i wankain long pasin bilong stap gutpela pren bilong God. Yumi ken stori long olsem wanem yumi inap mekim olsem.

Tingim dispela, yumi olgeta i save long nem bilong ol gutpela pren bilong yumi. Wanpela meri bilong Balgeria i luksave long dispela na em i tok: “Yu no inap i stap pren bilong God sapos yu no save long nem bilong em.” Olsem yumi stori pinis long fes atikol, God i laik bai yu mas i go klostu long em. Olsem na long rot bilong Baibel, em i kamapim nem bilong em long yu. Em i tok: “Mi Jehova. Dispela em nem bilong mi.”—Aisaia 42:8, NW.

Yu ting em bikpela samting long Jehova olsem yu save long nem bilong em na yu kolim? Tingim dispela, ol i raitim nem bilong God long 4-pela leta Hibru em ol i kolim Tetragramaton. Dispela nem i stap long Ol Skripsa Hibru bilong pastaim tru klostu 7,000 taim. Nem bilong God i stap planti taim tru winim olgeta narapela nem long Baibel. Dispela i kamapim klia olsem Jehova i laik bai yumi mas save long nem bilong en na kolim.a

Tasol sampela man i pilim olsem God em i holi na em i gat olgeta strong, olsem na em i no pasin rispek long kolim nem bilong Em. Tru em i no stret long kolim nating nem bilong God, wankain olsem yu no inap kolim nating nem bilong pren bilong yu. Tasol Jehova i laik bai ol man husat i laikim em i mas litimapim nem bilong em na tokim ol narapela long dispela nem. (Song 69:30, 31; 96:2, 8) Na tu, Jisas i bin skulim ol disaipel bilong en long beten olsem: “Papa bilong mipela long heven, nem bilong yu i mas i stap holi.” Yumi inap mekim holi nem bilong God taim yumi tokim ol arapela long dispela nem. Na dispela bai helpim yumi long go klostu long em.—Matyu 6:9.

Baibel i kamapim klia olsem God i laikim tru ol man husat i save “tingting long em oltaim.” (Malakai 3:16) Jehova i tok promis long ol kain man olsem: “Bai mi lukautim gut ol man i save tru long mi. Taim ol i prea long mi bai mi harim prea bilong ol. Na sapos hevi i kamap long ol bai mi stap wantaim ol.” (Song 91:14, 15) Olsem na sapos yumi laik i stap pren bilong Jehova, em i bikpela samting long yumi save long nem bilong em na kolim dispela nem.

Ol gutpela pren i save bung na toktok wantaim narapela narapela, o ol inap toktok long rot bilong fon, salim e-meil, na raitim pas. Dispela i save strongim pasin pren bilong ol. Olsem tasol, bilong i go klostu long God yumi mas toktok wantaim em long olgeta taim. Tasol olsem wanem yumi inap mekim olsem?

Yumi inap toktok long God long rot bilong beten. Ol beten yumi mekim long God i no wankain long taim yumi stori wantaim wanpela wanlain o pren. Yumi mas tingim olsem taim yumi beten, yumi toktok wantaim Krieta bilong yumi, em God Antap Tru. Dispela i mas kirapim yumi long beten long pasin rispek na bai God i ken harim beten bilong yumi. Na tu, God bai harim beten bilong yumi sapos yumi bihainim ol samting em i laik yumi mas mekim. Nau yumi laik stori long 3-pela samting yumi mas mekim na bai God i harim beten bilong yumi.

Namba 1, yumi mas beten long God Jehova wanpela tasol, na i no long Jisas, wanpela santu, o long wanpela imis. (Kisim Bek 20:4, 5) Baibel i tok: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God.” (Filipai 4:6) Namba 2, yumi mas salim beten long nem bilong Pikinini Bilong God, em Krais Jisas. Jisas i tok: “I no gat man inap kam long Papa long narapela rot, nogat, long rot bilong mi tasol.” (Jon 14:6) Namba 3, ol beten bilong yumi i mas stret wantaim laik bilong God. Baibel i tok: “Maski wanem wanem samting yumi askim em long en na i stret wantaim laik bilong em, em bai harim yumi.”a—1 Jon 5:14.

Pasin pren namel long tupela man bai i pinis sapos oltaim wanpela man tasol i save toktok. Wankain olsem tupela pren i toktok gut wantaim, yumi mas larim God i toktok long yumi na yumi mas putim gut yau long em. Olsem wanem God i save toktok long yumi?

Long nau, God i save toktok long yumi long rot bilong Baibel. (2 Timoti 3:16, 17) Bilong wanem yumi tok olsem? Tingim: Bihain long yu kisim wanpela pas i kam long gutpela pren bilong yu, ating bai yu amamas na tokim ol narapela. Bai yu mekim kain tok olsem, “Mi kisim wanpela pas long pren bilong mi!” Tru pren bilong yu i no stap na yutupela i toktok i go i kam, tasol yupela i toktok long rot bilong pas. Olsem tasol, taim yumi ritim Baibel, yumi larim Jehova i toktok long yumi. Gina em yumi stori pinis long en long kirap bilong dispela atikol i tok: “Sapos mi laik bai God i tingim mi olsem pren bilong em, orait mi mas ritim pas em i givim long mi, em Baibel.” Em i tok moa olsem: “Pasin bilong ritim Baibel long olgeta de i helpim mi long go klostu moa long God.” Yu larim Jehova i toktok long yu long olgeta de long rot bilong ritim Baibel? Sapos yu mekim olsem, bai yu go klostu moa long God.

“Tokim mi long wanem samting yu laik mi mekim na bai mi mekim.” Yu no inap mekim kain tok olsem long man em yu no save gut long en o yu save long em long sotpela haptaim. Tasol yu inap mekim kain tok olsem long wanpela gutpela pren. Ol gutpela pren i save amamas long helpim narapela narapela.

Baibel i kamapim klia olsem oltaim Jehova i save long ol samting em bai mekim bilong amamasim ol man i lotuim em. Tingim, King Devit i bin pas gut wantaim God, olsem na em i tok: “God, Bikpela bilong mi, yu bin mekim planti gutpela wok bilong helpim mipela. . . . Mi no inap kaunim ol samting yu bin mekim bilong helpim mipela.” (Song 40:5) Na tu, Jehova i save lukautim ol man i no save long em, na em i ‘mekim planti gutpela kaikai i kamap na mekim bel bilong ol i amamas.’​—Aposel 14:17.

Jehova i save amamas long givim ol samting long ol man na bai ol inap long stap belgut, olsem na i stret long ting olsem ol man husat i laik stap pren bilong God i mas mekim ol samting na bai God i “belgut tru.” (Sindaun 27:11) Tasol yu inap mekim wanem samting bilong amamasim God? Baibel i tok: “No ken lusim tingting long mekim gutpela pasin na serim ol samting wantaim ol arapela. Long wanem, God i save amamas long ol kain sakrifais olsem.” (Hibru 13:16) Yu ting dispela i makim olsem taim yu mekim gutpela pasin na givim ol samting long narapela, dispela bai mekim Jehova i amamas long yu?

Baibel i tok: “Man i no gat bilip em i no inap mekim God i amamas long em.” (Hibru 11:6) Olsem, “Abraham i bilip long Jehova, olsem na . . . Abraham i kisim nem olsem ‘pren bilong Jehova.’” (Jems 2:23) Na tu, Krais Jisas i kamapim klia olsem em i bikpela samting long “bilip long God” sapos yumi laik bai God i givim ol blesing long yumi. (Jon 14:1) Olsem wanem yu inap kisim pasin bilong bilip long God na stap pren bilong em? Namba 1 samting yu ken mekim em long stadi oltaim long ol tok i stap long Baibel. Taim yu mekim olsem, bai yu kisim “stretpela save long ol laik bilong [God],” na long dispela rot yu “bai amamasim em.” Na taim yu kisim stretpela save long Jehova na yu bihainim ol stretpela lo bilong em, bilip bilong yu bai kamap strong na bai yu go klostu moa long God.​—Kolosi 1:​9, 10.

Yu inap mekim wanem bilong i go klostu long God? Yumi stori pinis long sampela rot bilong helpim yu long mekim olsem. Ol dispela rot em:

1. Kisim save long nem bilong God, em Jehova na kolim dispela nem.

2. Oltaim toktok wantaim God long rot bilong beten na stadi long Tok bilong em long Baibel.

3. Oltaim mekim ol samting bilong amamasim Jehova.

Olsem wanem? Yu mekim ol dispela samting bilong i go klostu long God? I gat sampela samting moa yu mas mekim? Tru i hatwok long mekim olsem, tasol tingim ol gutpela blesing bai yu kisim.

Wanpela meri long Amerika, Jennifer i tok: “Pasin bilong stap pren bilong God i bringim planti blesing. Olsem, yu inap trastim God, kliagut long ol pasin bilong em, na tu, bai yu kisim pasin bilong laikim tru God. Dispela em gutpela samting tru yu inap mekim!”

Sapos yu laik i stap pren bilong God, ol Witnes Bilong Jehova bai amamas long helpim yu long mekim olsem. Ol inap mekim fri Baibel stadi kos wantaim yu. Mipela i laik singautim yu long go long ol miting bilong Baibel long Haus Kingdom i stap klostu long yu na bai yu amamas long bung wantaim ol man em ol i stap gutpela pren bilong God.a Taim yu bung wantaim ol, yu tu bai amamas olsem man bilong raitim song, em i tok: “Mi stap klostu long [God] na dispela i gutpela tru.”​—Song 73:28.