Olsem wanem? Yu save tingting long ol kain askim olsem? Planti man long olgeta hap bilong graun i laik save long bekim bilong ol bikpela askim bilong laip. Yu ting yu inap painim bekim bilong ol dispela askim?

Planti milion man bai tok, “Yes!” Bilong wanem ol i tok olsem? Long wanem, long rot bilong Baibel ol i painim ol gutpela bekim bilong ol askim bilong ol. Olsem wanem? Yu laik kisim sampela save long tok bilong Baibel? Ol Witnes Bilong Jehova bai amamas long mekim fri Baibel stadi kos wantaim yu.a

Planti man i tok ol i no ritim Baibel bikos ol i bisi. Na sampela i ting i hatwok long kliagut long ol tok bilong Baibel. Tasol i gat sampela man i amamas long kisim save long tok bilong Baibel. Yumi laik stori long sampela bilong ol dispela man:

• “Mi bin go long yunivesiti na kisim save long planti lotu. Na tu, mi go long lotu Katolik na Protestan na haus lotu bilong ol Sik na ol Buda. Tasol mi no kisim bekim bilong ol askim bilong mi long God. Bihain wanpela Witnes Bilong Jehova i kam long haus bilong mi. Mi amamas long em i yusim Baibel long bekim ol askim bilong mi. Olsem na mi orait long em i ken mekim Baibel stadi wantaim mi.”—Gill, Inglan.

• “Mi gat planti askim long i stap bilong yumi ol man, tasol pasto i no inap long bekim ol dispela askim. Bihain mi bungim wanpela Witnes Bilong Jehova na em i yusim Baibel long bekim ol askim bilong mi. Olsem na taim em i askim mi long stadi long Baibel wantaim em mi amamas long mekim olsem.”—Koffi, Benin.

• “Mi tingting planti long samting i painim ol man i dai pinis. Mi bilip olsem ol man i dai pinis i save mekim nogut long ol man i stap laip, tasol mi laik kisim save long tok bilong Baibel. Olsem na mi kirap stadi wantaim pren bilong mi, em wanpela Witnes Bilong Jehova.”—José, Brasil.

• “Mi ritim ol tok bilong Baibel, tasol mi no kliagut long ol dispela tok. Bihain ol Witnes Bilong Jehova i bungim mi na ol i kamapim gut insait bilong sampela tok profet bilong Baibel. Dispela i kirapim mi long kisim sampela save moa.”—Dennize, Meksiko.

• “Sampela taim mi tingting olsem tru tru God i save tingim mi o nogat. Olsem na mi beten long God em Man i as bilong ol tok bilong Baibel. Neks de ol Witnes i kam long haus bilong mi na mi orait long ol i stadi wantaim mi long Baibel.”—Anju, Nepal.

Ol dispela ekspiriens i helpim yumi long tingim tok bilong Jisas. Em i tok: “Ol man i hangre long kisim save long God, ol i ken amamas.” (Matyu 5:3) Tru tumas ol man i gat laik long kisim save long God. Na long rot bilong Baibel God i inapim dispela laik bilong ol man.

Ol Witnes i bihainim wanem pasin long mekim Baibel stadi? Na taim yu stadi long Baibel, dispela i helpim yu olsem wanem? Neks atikol bai bekim ol dispela askim.

Klostu olgeta man i save olsem ol Witnes Bilong Jehova i save autim tok long ol pablik ples. Tasol yu save olsem ol i save mekim ol Baibel stadi kos tu?

Long 2014, winim 8 milion Witnes long 240 kantri i mekim klostu 9 milion na 500 tausen Baibel stadi kos long olgeta wan wan mun.a Tingim, namba bilong ol man i stadi long Baibel wantaim ol Witnes i winim populesen bilong klostu 140 kantri!

Bilong skulim ol man long tok bilong Baibel, long olgeta yia ol Witnes Bilong Jehova i prinim klostu 1.5 bilion Baibel na ol buk na nius. Na ol i wokim ol dispela buk na nius samting long klostu 700 tokples! Dispela wok bilong tanim ol buk na nius long ol narapela tokples i helpim planti man long stadi long Baibel long tokples bilong ol yet.

OL ASKIM PLANTI MAN I GAT LONG BAIBEL STADI KOS BILONG MIPELA

Yupela i bihainim wanem pasin long mekim ol stadi?

Mipela i save makim ol bikpela tok bilong Baibel, na skelim ol skripsa i stret wantaim dispela tok. Baibel i bekim ol kain askim olsem: God em i husat? Em i gat wanem ol pasin? God i gat nem? Em i stap long we? Yumi inap i go klostu long God? Bilong kisim bekim bilong ol dispela askim, em i bikpela samting long save long ol skripsa bilong Baibel.

Bilong helpim ol man long painim ol bekim, planti taim mipela i yusim buk Tru Tru Baibel i Tok Wanem?b Dispela buk i gat 224 pes, na ol i bin wokim bilong helpim ol man long kisim save long ol bikpela tok bilong Baibel. Dispela buk i stori long God, Jisas Krais, pasin bilong beten, as na ol man i karim pen na hevi, kirap bek, na planti arapela samting.

Yupela i save mekim stadi long wanem taim na ples?

Mipela i save stadi wantaim ol man long taim na ples i stret long ol.

Yupela i stadi wantaim ol man inap hamas aua?

Planti man i makim wanpela aua long olgeta wik bilong stadi long Baibel. Tasol dispela i no makim olsem mipela i stadi wantaim olgeta man inap wanpela aua, nogat. Sampela man i makim inap olsem 10 o 15 minit long olgeta wik bilong stadi.

I gat pe bilong Baibel stadi kos?

Nogat. Dispela Baibel stadi kos na ol buk na nius i fri. Na dispela i stret wantaim stiatok bilong Jisas long ol disaipel bilong em. Em i tok: “Yupela i kisim fri, olsem na yupela i mas givim fri.”—Matyu 10:8.

Dispela stadi kos bai pinis long wanem taim?

Yu yet i ken makim hamas haptaim yu laik stadi. Buk Tru Tru Baibel i Tok Wanem? i gat 19 sapta. Yu ken makim sampela sapta yu laikim na mekim stadi inap long mak bilong yu.

Sapos mi stadi, dispela i makim olsem mi mas kamap wanpela Witnes Bilong Jehova?

Nogat. Mipela i rispektim tingting bilong olgeta man. Bihain long ol man i stadi long Baibel, ol yet i ken makim olsem ol i laik kamap Witnes Bilong Jehova o nogat.

Mi inap kisim sampela save moa long we?

Web-sait bilong mipela em jw.org/tpi i stori gut long ol wok na bilip bilong ol Witnes Bilong Jehova.

Olsem wanem mi inap askim long Baibel stadi kos?

• 

  Yu ken pulimapim fom long www.jw.org/tpi.

• Yu ken raitim pas i go long atres i stret long yu. Ol atres i stap long pes 2 bilong dispela nius.

• Sapos yu laik bungim ol Witnes Bilong Jehova long ples yu stap long en, lukim telefon buk na kisim ol fon namba aninit long nem “Jehovah’s Witnesses.”