Long nau, ol man i save tingting planti, long wanem, ‘taim nogut i kamap na dispela i givim hatwok long ol.’ (2 Timoti 3:1) Planti i karim hevi bilong mani, woa, ol bikpela sik, famili i bruk na ol bikpela disasta samting. Na tu, ol man i gat ol hevi bilong ol yet. Sampela i tingting planti olsem: ‘Sua i kamap long skin bilong mi i makim olsem mi gat sik kensa?’ ‘Wanem samting bai painim ol tumbuna bilong mi?’

I nogat rong long tingting planti. Sampela taim yumi tingting planti na dispela i helpim yumi long mekim gut ol samting. Olsem, yumi save tingting planti paslain long wanpela eksem, danis samting, o long taim bilong intaviu long wok. Tasol pasin bilong tingting planti long olgeta taim inap nogutim helt bilong yu. Wanpela sevei long winim 68 tausen man i soim olsem pasin bilong tingting planti inap sotim laip bilong man. Dispela i stret wantaim tok bilong Jisas olsem: “Husat bilong yupela, long rot bilong tingting planti, inap skruim liklik haptaim moa long laip bilong en?” Tru tumas, pasin bilong tingting planti i no inap mekim yu i stap laip longpela taim, nogat. Olsem na Jisas i tok: “Lusim pasin bilong tingting planti.” (Matyu 6:25, 27) Tasol olsem wanem yumi inap mekim olsem?

Yumi ken bihainim ol gutpela stiatok, bilip strong long God, na wetim ol gutpela samting bai kamap. Maski yumi no bungim ol bikpela hevi long nau, ol kain hevi olsem inap painim yumi long bihain. Olsem na i gutpela yumi skelim hau Paul, Janet, na Alona i daunim pasin bilong tingting planti.

Paul em man marit i gat 2-pela pikinini i tok: “Hevi bilong mani i kamap long kantri, olsem na pe bilong kaikai i go antap, na kaikai i sot. Mipela i save sanap long lain inap planti aua, tasol klostu olgeta taim kaikai i pinis. Ol man i stap hangre na ol i bun nating tru, olsem na sampela i nogat strong i pundaun long rot. Pe bilong kaikai na wara samting i go antap inap sampela milion dola, na bihain i go antap tru inap olsem planti bilion dola. Na i no longtaim na strong bilong mani i go daun. Olsem na mi no inap long kisim mani long benk akaun, insurens, na pensen mani bilong mi.”

Paul i luksave olsem famili bilong em bai i stap laip sapos em i bihainim “gutpela tingting.” (Sindaun 3:21) Em i tok: “Mi save mekim kontrak wok long ol samting i wok long pawa, tasol mi mekim ol narapela wok na kisim liklik pe. Sampela taim ol man i givim kaikai na ol samting mi nidim olsem pe. Sapos ol i givim mi 4-pela sop, mipela i yusim 2-pela na salim narapela 2-pela. Bihain mi lukautim 40 bebi kakaruk, na taim ol i go bikpela, mi salim na baim 300 bebi kakaruk. Bihain, mi givim 50 kakaruk long sampela lain na ol i givim mi 2-pela 50 kilogram beg wit. Dispela i helpim mipela na ol narapela famili long i gat kaikai inap longpela taim.”

Paul i save olsem em i bikpela samting long bilip long God. Taim yumi bihainim tok bilong God, em bai helpim yumi. Jisas i tokim yumi long olsem wanem yumi inap kisim ol samting yumi nidim. Em i tok: “Lusim pasin bilong tingting planti . . . Papa bilong yupela i save olsem yupela i nidim ol dispela samting.”—Luk 12:29-31.

Tasol Satan em nambawan birua bilong God i trikim ol man olsem ol i mas i gat planti mani kago samting bilong i stap gut. Ol man i tingting planti long kisim olkain samting, na sampela taim ol i strong long kisim ol samting ol i no nidim. Na planti i bungim hevi bilong dinau, na “ol i stap olsem wokboi nating bilong ol man i givim dinau.”—Sindaun 22:7.

Sampela i mekim ol disisen em bihain ol i kisim hevi long en. Paul i tok: “Planti man long ples bilong mi i lusim famili bilong ol na i go long ol narapela ples bilong kisim gutpela sindaun. Sampela i no bin kisim pepa bilong i go sindaun long narapela ples, na i hatwok long ol i painim wok. Planti taim ol i save ranawe long polis na slip long ol strit. Ol i no bilip long God i ken helpim ol. Tasol mipela i bilip olsem God bai helpim mipela long karim hevi bilong mani.”

BIHAINIM STIATOK BILONG JISAS

Paul i tok moa olsem: “Jisas i tok: ‘No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.’ Olsem na long olgeta de, mi save beten long God i ken ‘givim bret long mipela inap long dispela de,’ na bai mipela i ken i stap laip. Na tru tumas, God i helpim mipela olsem Jisas i bin tok promis. Tasol i no olgeta taim mipela i kisim olgeta samting mipela i laikim. Wanpela taim mi sanap long lain bilong baim kaikai, tasol mi no save ol i salim wanem kain kaikai. Bihain, mi luksave olsem ol i salim yoget tasol. Maski mi no save laikim yoget, mi baim na long dispela nait mipela i kaikai. Mi tenkyu long God i lukautim mi long taim mipela i gat hevi, na i nogat wanpela taim famili bilong mi i stap hangre.”a

“Long nau, mipela i nogat hevi bilong mani. Tasol ol samting i kamap i skulim mipela olsem taim hevi i kamap, em i bikpela samting long trastim God. Oltaim Jehovab bai helpim yumi sapos yumi bihainim laik bilong en. Mipela i lukim truim bilong Song 34:8, olsem: ‘Bikpela i save mekim gutpela pasin long yumi. Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.’ Mipela i no inap long pret sapos mipela i bungim hevi bilong mani long bihain.

“Nau mipela i save olsem ol man i nidim kaikai bilong i stap laip, na i no wok o mani samting. Mipela i wet long taim God bai truim tok promis bilong en, olsem: ‘Planti rais na wit samting i ken kamap long ol gaden bilong ol manmeri.’ Tasol long nau, ‘sapos yumi gat kaikai na laplap na haus samting, orait yumi ken ting ol dispela samting em inap long yumi.’ Ol tok bilong Baibel i strongim yumi, olsem: ‘Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela. Long wanem, God i tok: “Mi no inap tru long lusim yu o givim baksait long yu long wanpela samting.” Olsem na yumi gat strongpela bel na tok: “Jehova em i helpim bilong mi. Mi no inap pret.”’”c

Yumi mas i gat strongpela bilip bilong ‘wokabaut wantaim God,’ olsem Paul na famili bilong em i mekim. (Stat 6:9, 10) Maski long nau yumi gat hevi bilong mani o bihain dispela hevi bai kamap, pasin bilong Paul long bilip na bihainim gutpela tingting i skulim yumi long planti samting.

Tasol olsem wanem sapos hevi i kamap long famili?

Janet i tok: “Bihain long papa bilong mi i dai, man bilong mi i tokim mi olsem em i prenim wanpela meri. I no longtaim na em i kisim olgeta samting bilong en na lusim mi wantaim tupela pikinini.” Janet i painim wok mani, tasol pe bilong em i no inap long sapotim ol. Na i gat ol narapela hevi tu i painim em. Janet i tok: “Mi tingting planti olsem mi yet bai mekim olgeta wok bilong lukautim famili. Mi bel hevi olsem mi no inap long givim planti samting long ol pikinini bilong mi olsem ol narapela papamama i save mekim. Na tu, mi tingting planti olsem ol narapela i gat wanem tingting long mi na ol pikinini. Ating ol i gat askim olsem, mi bin wok strong long lukautim marit bilong mi?”

Pasin bilong beten i helpim Janet long stap bel isi na tingim pasin bilong em long stap gut long God. Janet i tok: “Long nait, taim olgeta wok bilong de i pinis na mi wanpela i stap, nau mi save tingting planti. Tasol pasin bilong beten na ritim Baibel i save mekim isi bel bilong mi. Mi laikim tok bilong Baibel long Filipai 4:6, 7, em i tok: ‘Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela.’ Planti taim mi save beten long nait, na Jehova i givim bel isi long mi.”

Tok Jisas i mekim long Bikpela Tok Long Maunten long pasin bilong beten inap mekim gut bel bilong ol man, maski ol i karim wanem ol hevi. Em i tok: “Papa bilong yupela, em i save long ol samting yupela i nidim paslain long yupela i askim em.” (Matyu 6:8) I stret yumi askim God long helpim yumi. Beten em nambawan rot bilong “go klostu long God.” Wanem gutpela samting inap kamap long pasin bilong beten? Baibel i tok: “Em [God] bai kam klostu long yupela.”—Jems 4:8.

Taim yumi beten na kamapim ol hevi bilong yumi long God, dispela i mekim yumi stap bel isi. Na tu, Jehova em Man bilong “harim beten” i save mekim ol samting bilong helpim ol man i bilip long em. (Song 65:2) Olsem na Jisas i skulim ol disaipel bilong em long “beten oltaim na no ken givap.” (Luk 18:1) Oltaim yumi mas bilip na askim God long stiaim na helpim yumi, na em bai givim yumi ol samting yumi nidim. Yumi no ken kisim tupela tingting long ol samting God i tingting pinis long mekim na ol samting em inap long mekim. Taim yumi “beten oltaim,” yumi kamapim klia olsem yumi gat strongpela bilip.—1 Tesalonaika 5:17.

BILIP I MAKIM WANEM SAMTING?

Pasin bilong bilip i makim olsem man i mas “kisim save” long God na bilip olsem em Man i stap tru. (Jon 17:3) Long rot bilong Baibel yumi kisim save olsem God i tingim yumi olgeta wan wan na em i laik helpim yumi. Tasol yumi no kisim save long God na em tasol, nogat, yumi mas mekim sampela samting. Yumi mas stap pren bilong God na rispektim em. Wankain olsem yu gat gutpela pren, pasin pren bilong yupela i no kamap wantu tasol. Pasin bilong bilip bai “kamap bikpela moa” sapos yumi wok long kisim sampela save moa long God. Na taim yumi “mekim ol samting em i laikim,” bai yumi luksave long olsem wanem Em i helpim yumi. (2 Korin 10:15; Jon 8:29) Janet i gat dispela kain bilip, olsem na em i daunim pasin bilong tingting planti.

Janet i tok: “Pasin bilong mi long bilip i stap strong, long wanem, mi luksave olsem Jehova i save helpim mi oltaim. Planti taim ol man i no bihainim stretpela pasin na dispela i mekim mi bel hevi. Tasol taim mi beten, oltaim Jehova i save helpim mipela long ol samting em mi pilim olsem ol i bikpela hevi tumas. Pasin bilong tok tenkyu i helpim mi long tingim ol samting God i mekim, moa yet long taim mipela i nidim helpim. Na tu, em i givim mi ol gutpela pren, em ol manmeri husat i bihainim pasin Kristen tru. Oltaim ol i save helpim mi na ol i stap gutpela eksampel long ol pikinini bilong mi i ken bihainim.”a

“Nau mi save long as na long Malakai 2:16, Jehova i tok: ‘Mi no laikim tru pasin bilong brukim marit.’ Taim poroman marit i lusim narapela, dispela bai givim bikpela bel hevi long em. Man bilong mi i lusim mipela inap sampela yia pinis, tasol sampela taim mi pilim olsem mi stap wanpis na mi no gutpela moa. Long kain taim olsem, mi save helpim ol narapela na dispela i mekim isi bel bilong mi.” Janet i bihainim stiatok bilong Baibel long no ken stap wanpis, na dispela i helpim em long daunim pasin bilong tingting planti.b—Sindaun 18:1.

Janet i tok: “Mi kisim bikpela bel isi taim mi save olsem God i ‘lukautim ol pikinini, papa bilong ol i dai pinis. Na em i save helpim ol meri, man bilong ol i dai pinis.’” (Song 68:5) Janet i save olsem God i no save traim yumi long “ol samting nogut,” nogat. Em i “amamas long givim planti samting long ol man,” olsem savetingting na “strong i winim strong bilong yumi.” Na bai yumi inap karim ol hevi na daunim pasin bilong tingting planti.—Jems 1:5, 13; 2 Korin 4:7.

Tasol olsem wanem sapos wanpela bikpela hevi i painim yumi?

Alona i tok: “Taim mi harim krai bilong sairen, mi pret nogut tru na mi ran i go bilong painim ples hait. Tasol taim i no gat ples bilong hait, mi save pret moa. Wanpela taim, mi wokabaut long rot na mi krai na i hatwok long mi pulim win. Bihain long sampela aua, bel bilong mi i stap isi. Tasol i no longtaim na mi harim gen krai bilong sairen.”

Woa i save kamapim ol hevi, tasol i gat ol narapela samting tu. Tingim, sapos yu painimaut olsem yu yet o wanpela yu laikim i gat bikpela sik we planti i save dai long en, ating bai yu tingting planti. Na sampela i tingting planti long ol samting bai painim ol long bihain. Ol i gat askim olsem, ‘Ol pikinini bilong mipela na ol tumbuna pikinini bai stap long graun i gat woa, pasin raskol, polusen, na ol bikpela sik samting?’ Hau yumi inap daunim pasin bilong tingting planti?

Baibel i tok: “Man i gat gutpela tingting, em i save olsem, hevi i laik kamap long em, na em i abrusim.” (Sindaun 27:12) Yumi save mekim ol samting bilong lukautim helt bilong yumi, olsem tasol yumi mas lukautim bel na tingting bilong yumi. Em i bikpela samting long luksave long ol hevi i kamap. Tasol yumi no ken lusim bikpela haptaim long lukim ol muvi o harim musik i stori long pasin bilong pait na kilim man. Long wanem, God i no wokim yumi bilong tingting planti long ol samting nogut, nogat. Em i wokim yumi bilong ‘tingim ol samting i tru, ol samting i stretpela, ol samting i klin, na ol samting i kirapim pasin laikim.’ Sapos yumi mekim olsem, “God bilong bel isi” bai givim bel isi long yumi.—Filipai 4:8, 9.

BETEN EM I BIKPELA SAMTING

Sapos yumi gat strongpela bilip, yumi inap daunim pasin bilong tingting planti. Baibel i kirapim yumi long “redi oltaim long beten.” (1 Pita 4:7) Yumi ken beten long God i givim savetingting na strongim yumi, na “yumi save olsem em i harim yumi long wanem wanem samting yumi askim em long en.”—1 Jon 5:15.

Baibel i tok Satan em i “hetman bilong dispela graun,” na “graun olgeta i stap long han bilong Satan.” (Jon 12:31; 1 Jon 5:19) Jisas i save olsem Satan i stap tru na Jehova bai kisim bek yumi long han bilong em. Olsem na Jisas i skulim yumi long beten olsem: “Kisim bek mipela long han bilong Satan.” (Matyu 6:13) Alona i tok: “Taim mi harim krai bilong sairen, mi save beten long Jehova i ken givim mi bel isi. Na tu, man bilong mi i save ringim mi na beten wantaim mi. Pasin bilong beten i helpim mi tru.” Dispela i truim tok bilong Baibel olsem: “Wanem ol manmeri i save bel tru na i singaut long em [Jehova], em i save stap klostu long ol.”—Song 145:18.

BILIP NA WETIM OL GUTPELA SAMTING

Long Bikpela Tok Long Maunten, Jisas i skulim ol disaipel bilong em long beten olsem: “Kingdom bilong yu i mas i kam.” (Matyu 6:10) Kingdom Bilong God bai pinisim olgeta pen na hevi, long dispela taim ol man bai i no tingting planti moa. Long rot bilong Jisas, em “King bilong kamapim gutpela sindaun na bel isi,” God bai “mekim i dai pait long olgeta hap graun.” (Aisaia 9:6; Song 46:9) Baibel i tok: “Bikpela bai i stretim tok bilong olgeta lain manmeri na bai ol i sindaun gut wantaim. . . . Na olgeta lain manmeri bai i no pait moa, na bai ol i no skul moa long pait. . . . Na i no gat wanpela man bai i mekim ol i pret.” (Maika 4:3, 4) Ol famili bai i stap amamas na “wokim ol haus na stap long ol. Na bai ol i planim ol gaden wain na wokim wain na dring.” (Aisaia 65:21) “Na long dispela taim, i no gat man . . . bai i tok olsem, ‘Mi gat sik.’”—Aisaia 33:24.

Long nau, “taim nogut i save painim yumi olgeta,” maski yumi mekim olgeta samting bilong lukautim yumi yet. (Saveman 9:11) Inap planti handret yia, ol gutpela man i dai long ol woa, ol bikpela sik, na pasin bilong pait na bagarapim man. Tasol wanem gutpela samting i wetim ol man i nogat asua em ol i dai pinis?

Planti milion man i dai, tasol God i save long olgeta wan wan bilong ol na em bai kirapim bek ol. Maski ol i slip long matmat, God i no lusim tingting long ol. Olsem na yumi wet long taim we “olgeta man i stap long matmat ol bai . . . kam ausait.” (Jon 5:28, 29) Tok bilong Baibel i strongim bilip bilong yumi long kirap bek, em i tok: “Dispela samting yumi bilip na wet long en i stap olsem anka bilong laip bilong yumi. Em i stap strong na i no inap surik liklik.” (Hibru 6:19) Na tu, God “i bin kirapim bek dispela man [Jisas] long dai na bai olgeta manmeri i ken save olsem tru tru dispela samting bai kamap.”—Aposel 17:31.

Long nau, ol man i laik stap gut long God, ol tu bai bungim ol hevi. Tasol tingim Paul, Janet, na Alona. Maski ol i bungim ol hevi, ol i bihainim gutpela tingting na stap klostu long God long rot bilong beten, na ol i bilip long tok bilong Baibel long ol gutpela samting bai kamap. Dispela i helpim ol long daunim pasin bilong tingting planti. Olsem tasol, “God em i as bilong ol gutpela samting yumi bilip na wetim na em i ken mekim amamas na bel isi i pulap long yupela, long wanem, yupela i bilip long em.”—Rom 15:13.