Yu gat wanem tingting? Yu ting God i orait long ol pait? Sapos em i orait long pasin bilong pait, orait em i save helpim wanem lain long winim pait? Taim yu kisim save long bekim bilong ol dispela askim, dispela bai stiaim tingting yu holim long pasin bilong pait. Olsem, sapos yu save olsem God i orait long pasin bilong pait, na tu, em i sapotim lain em yu laik bai ol i winim pait, ating bai yu amamas olsem God i sapotim ol na ol bai win. Tasol bai yu gat wanem tingting sapos yu save olsem God i birua long ol lain yu sapotim? Ating bai yu gat tupela tingting long bung wantaim dispela lain.

Tasol i gat bikpela samting em yu mas save long en. Taim yu kisim save long tingting bilong God long pasin bilong pait, dispela bai helpim yu long save long God. Sapos yu wanpela bilong planti milion man husat i bungim ol hevi em woa i kamapim, i gutpela yu kisim save long bekim bilong dispela askim, Yu ting God i kirapim ol man long pait long narapela narapela, na em i no laik helpim ol man em hevi i daunim ol?

Bai yu kirap nogut long save olsem bekim bilong Baibel i no wankain long tingting ol man i gat. Kirap long bipo yet na i kam inap long nau, God i holim wankain tingting long pasin bilong pait. Yumi ken skelim tok Baibel i mekim long tingting God i gat long pasin bilong pait long taim ol man i raitim Baibel na long taim bilong ol aposel, em taim Jisas i stap long graun. Dispela bai helpim yumi long save long tingting God i gat long pasin bilong pait long nau, na tu, sapos pasin bilong pait bai pinis long bihain.

God yet i pait long lain Isip na dispela i soim olsem em inap long pait na daunim ol birua bilong en. Na sampela taim, em i tokim lain Israel long pait. Olsem, em i bin tokim ol long pait long lain Kenan, em ol manmeri bilong mekim pasin nogut tru. (Lo 9:5; 20:17, 18) Na tu, God i bin stiaim King Devit bilong lain Israel long pait long bikhetlain Filistia. Na em i tokim Devit long olsem wanem ol inap winim dispela pait.—2 Samuel 5:17-25.

Ol dispela stori bilong Baibel i kamapim olsem taim ol man i mekim nogut na daunim lain Israel, God i save orait long lain bilong em long pait long ol bilong lukautim ol yet na lotu i tru. Tasol yumi laik stori long 3-pela samting em God i mekim taim em i laik pait long ol man i birua long lain bilong en:

1. GOD YET I MAKIM OL MAN LONG INSAIT LONG PAIT. Wanpela taim God i tokim lain Israel olsem: “Bai yupela yet i no inap pait. Nogat tru.” Bilong wanem em i tok olsem? Long wanem, em yet bai helpim ol long winim pait. (2 Stori 20:17; 32:7, 8) Olsem yumi stori pinis long kirap bilong atikol, planti taim God i helpim lain Israel bilong bipo long winim ol pait. Na long ol narapela taim, God i tok orait long ol i ken pait bilong lukautim Graun Bilong Promis.—Lo 7:1, 2; Josua 10:40.

2. GOD YET I MAKIM TAIM BILONG PAIT LONG OL BIRUA. Ol wokman bilong God i mas wet inap long taim God i makim bilong pait long ol man i daunim na mekim nogut long ol. Na ol yet i no ken pait long ol birua bilong ol. Sapos ol i mekim olsem, God bai i no orait long ol. Baibel i tok, planti taim lain Israel i bungim hevi taim ol i bihainim laik bilong ol yet na mekim pait em God i no orait long en.a

3. 

   GOD I NO AMAMAS TAIM OL MAN I DAI, DISPELA I MAKIM TU OL MAN NOGUT. God Jehova em i As bilong laip na em i Krieta bilong yumi. (Song 36:9) Olsem na God i no amamas long lukim ol man i dai. Tasol sori tru, sampela man i save mekim nogut long ol arapela na kilim ol i dai. (Song 37:12, 14) Bilong pinisim kain hevi olsem, insait long sampela yia God i makim lain Israel long insait long ol pait. Maski i olsem, em i gat pasin “sori na marimari” na em i “no save kros kwiktaim” long ol man i daunim lain Israel. (Song 86:15) Olsem, paslain long lain Israel i pait long wanpela taun, God i tok long ol i mas “tokim ol manmeri bilong taun olsem, ‘Mobeta yupela i no pait. Yupela i mas givim nating dispela taun long mipela.’” Na sapos dispela lain i bihainim tok, lain Israel bai i no pait long ol. (Lo 20:10-13) Olkain stori olsem long Baibel i kamapim olsem God i ‘no save amamas long taim ol man bilong mekim sin i dai. Em i save amamas long ol dispela man i givim baksait long pasin bilong sin na ol i stap gut.’—Esekiel 33:11, 14-16.b

Taim yumi tingim ol samting i kamap bipo, yumi kisim save olsem God i save kamapim ol pait bilong pinisim pasin bilong bagarapim na daunim ol man nogut. God yet i save makim ol man bilong mekim pait, na wanem taim ol bai mekim dispela pait. Olsem wanem? Yu ting God i amamas long lukim ol man i pait na kilim ol narapela i dai? Nogat tru. God i no laikim tru pasin bilong pait na bagarapim man. (Song 11:5) Yu ting God i senisim tingting bilong en long pasin bilong pait taim Pikinini bilong em, Jisas Krais i kirap long autim tok long taim bilong ol aposel?

Bilong wanem God i no helpim ol Juda olsem em i bin mekim long bipo? Na bilong wanem God i no tokim ol long pait long ol Rom na bai ol i stap fri? Yu ting tingting bilong God long pasin bilong pait i senis? Nogat tru. Tasol tingting bilong ol Juda i senis. Ol i no bilip olsem Jisas em Pikinini Bilong God i Mesaia. (Aposel 2:36) Olsem na ol i no stap moa olsem lain bilong God.—Matyu 23:37, 38.

Nau lain Juda na Graun Bilong Promis i no stap aninit long lukaut bilong God, na tu, taim ol Juda i pait God i no helpim ol long winim ol pait. Olsem Jisas i bin tok profet, God i no orait long lain Israel na em i makim nupela lain bilong em yet. Baibel i kolim ol olsem “lain Israel bilong God.” (Galesia 6:16; Matyu 21:43) Dispela lain Israel bilong God em ol Kristen God i bin makim long holi spirit. Olsem na long taim bilong ol aposel, ol i tok “nau yupela i lain manmeri bilong [God].”—1 Pita 2:9, 10.

Ol Kristen long taim bilong ol aposel i kamap ‘lain manmeri bilong God,’ olsem na yu ting God i helpim ol na lain Rom i no daunim ol moa? O yu ting God i orait long ol Juda i pait long ol Rom? Nogat, em i no tokim ol long mekim olsem. Bilong wanem? Olsem yumi stori long atikol i kamap paslain, God yet i save makim taim we ol lain bilong em bai pait. God i no helpim ol Kristen long pait long taim bilong ol aposel, na tu, em i no orait long ol i mekim olsem. Dispela i soim olsem long taim bilong ol aposel, God i no makim yet taim bilong pait long ol man i daunim na mekim nogut long lain bilong em.

Wankain olsem ol man i lotuim God long taim bilong ol man i raitim Baibel, ol Kristen long taim bilong ol aposel i wet inap long taim God i makim bilong bagarapim ol man i daunim na mekim nogut long ol. Ol i save olsem i no stret long ol long pait long ol birua bilong ol sapos God i no tokim ol long mekim olsem. Jisas Krais i bin stori long dispela taim em i skulim ol man. Em i skulim ol disaipel bilong en long no ken insait long ol pait. Em i tok: “Yupela i mas laikim yet ol birua bilong yupela na beten long ol man i save mekim nogut long yupela.” (Matyu 5:44) Jisas i tok profet olsem long taim bilong ol aposel, lain ami bilong Rom bai bagarapim Jerusalem. Olsem na em i tokim ol disaipel bilong em long ranawe, na ol i no ken pait long ol Rom.—Luk 21:20, 21.

Holi spirit i stiaim aposel Pol long tok: “Yupela i no ken bekim rong man i mekim long yupela, nogat. . . . Rait Holi i tok: ‘Jehova i tok, bekim rong, em wok bilong mi. Bai mi bekim.’” (Rom 12:19) Pol i tokaut long lo em God i kamapim long Baibel inap planti handret yia i go pinis. Em tok i stap long Wok Pris 19:18 na Lo 32:35. Olsem yumi stori long atikol i kamap paslain, wanpela rot God i lukautim lain bilong em long bipo em long taim em i pait na daunim ol birua bilong ol. Tok bilong Pol i helpim yumi long save olsem God i no senisim tingting bilong em long pasin bilong pait. Long taim bilong ol aposel, God i pait long ol man i daunim na mekim nogut long lain bilong em. Tasol olsem long bipo, God yet i save makim ol man husat bai insait long pait, na taim stret ol bai mekim pait.

I klia tru olsem God i no orait long ol Kristen long taim bilong ol aposel long insait long ol pait. Tasol olsem wanem long nau? God i orait long sampela lain long pait long ol narapela? O yu ting nau em taim bilong God long helpim ol wokman bilong em long pait long ol birua bilong em? Long nau God i gat wanem tingting long pait? Neks atikol bai bekim ol dispela askim.

Yumi laik kisim save long wanpela tok i tru na dispela bai mekim isi bel bilong yumi: God i lukim ol pen na hevi bilong ol manmeri, na em i laik pinisim ol dispela hevi. (Song 72:13, 14) Baibel i tok ol man “husat i karim pen na hevi, God bai givim malolo long [ol].” Wanem taim em bai mekim olsem? “Long taim Bikpela Jisas i kamap ples klia long heven wantaim ol strongpela ensel bilong en. . . . Taim em i bekim rong long ol lain husat i no save long God na long ol lain husat i no bihainim tok bilong gutnius i stori long Bikpela bilong yumi, Jisas.” (2 Tesalonaika 1:7, 8) Dispela samting bai kamap taim Jisas i mekim pait long bihain. Baibel i kolim dispela pait olsem Armagedon, em “pait long dispela bikpela de bilong God i Gat Olgeta Strong.”—Revelesen 16:14, 16.

Long dispela pait bai kamap bihain, God i makim Pikinini bilong em, Jisas Krais na ol strongpela ensel long pait long ol birua bilong Em. Lain ami long heven bai pinisim ol man nogut i save daunim na mekim nogut long ol arapela.—Aisaia 11:4; Revelesen 19:11-16.

Kirap long bipo yet na i kam inap long nau, tingting bilong God long pasin bilong pait i no senis. Em i tingim pait olsem rot bilong pinisim pasin bilong daunim na mekim nogut long ol arapela. Ol stori bilong Baibel i soim olsem God yet i save makim taim bilong pait, na ol man bilong mekim dispela pait. Yumi kisim save olsem God i makim pinis taim bilong pait long ol man nogut husat i save daunim ol arapela, na em i makim Pikinini bilong em, Jisas Krais long go pas long pait. Dispela i kamapim klia olsem God i no orait long ol pait i kamap long nau, maski ol man i laik tru long pinisim ol hevi.

Tingim dispela: Tupela pikinini man i pait, tasol papa i no stap. Orait tupela i stop long pait na ol i ringim papa. Wanpela pikinini i tok brata bilong en i kirapim pait, na narapela i tok em i no mekim gut long en. Tupela wantaim i kamapim bel hevi bilong ol long papa, na ol i laik bai papa i sapotim ol. Taim papa i harim stori bilong tupela, em i tokim ol long no ken pait moa. Ol i mas wet inap long em i kam long haus na bai em i stretim dispela hevi. Tupela i wet, tasol i no longtaim na ol i pait gen. Taim papa i kam bek, em i no amamas olsem ol pikinini i sakim tok bilong en, olsem na em i panisim tupela.

Olsem tasol, long nau ol kantri i pait long narapela narapela i save beten long God i ken helpim ol. Tasol God i no sapotim wanpela lain o kantri long pait, nogat. Long rot bilong Baibel, God i tok: “No ken bekim pasin nogut long man i mekim pasin nogut long yupela,” na “No ken bekim rong man i mekim long yupela, nogat.” (Rom 12:17, 19) God i laik bai ol man i “stap bel isi na wetim em i helpim” ol long taim bilong Armagedon. (Song 37:7) Taim ol gavman i sakim tok bilong God na mekim ol pait, God i no save amamas long ol, long wanem, ol i bihainim tingting bilong ol yet. Olsem na long taim bilong Armagedon, God bai kamapim belhat bilong en long ol gavman bilong graun, na em bai “mekim i dai pait long olgeta hap graun.” (Song 46:9; Aisaia 34:2) Tru tumas, pait bilong Armagedon bai pinisim olgeta kain pait.

Yumi amamas olsem long rot bilong Kingdom Bilong God em bai pinisim pasin bilong pait. Long beten bilong Jisas em planti man i save long en, em i tok long dispela gavman olsem: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) Kingdom Bilong God bai pinisim ol man nogut, long wanem, ol i kirapim ol man long pait na daunim narapela narapela.a (Song 37:9, 10, 14, 15) Olsem na ol disaipel bilong Jisas i amamas na wet long ol gutpela samting em Kingdom Bilong God bai kamapim.—2 Pita 3:13.

Wanem taim bai Kingdom Bilong God i pinisim olgeta pen na hevi, na pasin bilong daunim na mekim nogut long ol arapela? Yumi lukim truim bilong ol tok profet bilong Baibel, na dispela i soim olsem yumi stap “long taim bilong las de.” (2 Timoti 3:1-5)b Klostu nau Kingdom Bilong God bai mekim pait bilong Armagedon na pinisim olgeta man nogut.

Olsem yumi stori pinis, ol man i no “bihainim tok bilong gutnius i stori long Bikpela bilong yumi, Jisas,” ol bai dai long pait bilong Armagedon. (2 Tesalonaika 1:8) Tasol tingim, God i no amamas long lukim ol man i dai, dispela i makim tu ol man nogut. (Esekiel 33:11) Baibel i tok God “i no laik bai wanpela i kisim bagarap” long laspela pait bilong en. Olsem na paslain long taim bilong pinis, em i stretim rot na bai ol man i autim gutnius bilong Bikpela Jisas “long olgeta hap bilong graun na bai olgeta lain man i ken harim.” (2 Pita 3:8, 9; Matyu 24:14; 1 Timoti 2:3, 4) Long rot bilong wok bilong ol Witnes Bilong Jehova long autim tok long olgeta hap bilong graun, ol man inap long kisim save long God, bihainim gutnius bilong Jisas, na ol inap long stap long dispela taim we pasin bilong pait bai pinis olgeta.