Kirap long bipo yet, ol man i laik bai helt bilong ol i gutpela na ol i laik i stap yangpela inap oltaim. Tasol yumi save olsem yumi olgeta bai dai. Maski Jop i mekim tok i stap antap winim 3 tausen yia i go pinis, ol man long nau i gat wankain tingting.

Olgeta man long graun i gat laik long i stap oltaim. Baibel i tok God i putim laik bilong i stap oltaim long bel bilong yumi, na tu, yumi laik kisim save long ol samting bai kamap bihain. (Saveman 3:11) Tasol yu ting God i gat pasin laikim bai putim dispela laik long bel bilong yumi sapos em i no tingting long inapim dispela laik? Nogat tru. Baibel i tok dai i olsem birua na God i tok promis long “em bai pinisim olgeta.”—1 Korin 15:26.

Tru tumas, dai i olsem wanpela birua i save painim olgeta man. Tingim, taim hevi i laik kamap, yumi save mekim ol samting bilong abrusim dispela hevi. Na tu, taim yumi sik, yumi save mekim ol samting bilong kamap orait. Olsem tasol yumi mekim olgeta samting yumi inap mekim bilong i stap laip.

Yu ting i stret long bilip olsem dai em dispela birua bilong bipo yet bai pinis olgeta? Tru tumas, yumi ken bilip tru olsem dispela samting bai kamap. God Jehova em Krieta bilong yumi i wokim yumi bilong i stap oltaim, na i no bilong stap sotpela taim tasol na i dai. Dispela laik bilong God long ol man bai kamap tru, long wanem, Em i save truim ol tok promis bilong em.—Aisaia 55:11.

Olsem wanem God bai pinisim dai? Kirap long bipo yet, ol man i traim kain kain rot long pinisim dai, tasol ol i no inap mekim olsem. Ol saientis i wokim ol sut marasin bilong daunim sik, na tu, ol i mekim planti wok painimaut long ol samting i gat laip. Em tru olsem ol dispela wok bilong saiens i helpim ol man long i stap laip longpela taim winim ol man i stap laip inap 100 handret yia i go pinis. Maski i olsem dai i save painim olgeta man. Olsem Baibel i tok, olgeta man bai “kamap olsem graun gen.”—Saveman 3:20.

Maski ol man i laik i stap laip oltaim, ol i no inap long mekim olsem. Tasol yumi amamas long save olsem long rot bilong Jisas Krais, God Jehova i stretim rot bilong kisim bek yumi long dai.

God i wokim ol man bilong i stap oltaim

“Orait God, Bikpela i kisim dispela man em i bin wokim na i putim em long dispela gaden long Iden, bai man i ken i stap na lukautim dispela gaden. Na God i tokim man olsem, ‘Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.’”—Stat 2:15-17.

Taim God i wokim namba 1 man Adam, em i putim em long gaden Iden, em ples paradais we i gat kain kain animal na diwai samting. Adam inap long kaikai pikinini bilong olgeta diwai long dispela gaden. Tasol God Jehova i tokim em long no ken kaikai pikinini bilong wanpela diwai. Sapos Adam i kaikai pikinini bilong dispela diwai, em bai dai.

Yu ting Adam i kliagut long lo God i givim long em? Em i bin lukim ol animal i dai, olsem na em i save long samting i kamap taim man i dai. God i bin wokim Adam bilong stap oltaim, olsem na i stret Em i givim dispela lo long Adam. Na Adam i luksave olsem sapos em i bihainim tok bilong God na em i no kaikai pikinini bilong dispela diwai, orait em bai stap laip oltaim na em bai i no dai.

Sampela man i ting dispela diwai i makim olsem Adam na Iv i no ken mekim maritpasin. Tasol dispela tingting i no stret. Tingim, Jehova i tokim Adam na Iv long ol i “mas kamap planti na i go sindaun long olgeta hap bilong graun.” (Stat 1:28) Jehova i tokim Adam long no ken kaikai pikinini bilong “diwai bilong givim gutpela save long wanem samting i gutpela na wanem samting i nogut.” Dispela diwai em wanpela diwai tru na i makim olsem God i gat rait long bosim ol man. Long rot bilong bihainim dispela lo, Adam inap soim olsem em i daun long God, na tu, em i tenkyu long Man i wokim em na i givim planti gutpela samting long em.

Adam i dai, long wanem, em i sakim tok bilong God

“God i tokim Adam olsem, ‘. . . Yu bin kaikai pikinini bilong dispela diwai mi bin tambuim yu long kaikai. . . . Na bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.’”—Stat 3:17-19.

Adam i mekim bikpela rong taim em i sakim tok bilong God na kaikai pikinini bilong diwai tambu. Na dispela i soim olsem em i no amamas long olgeta samting Jehova i givim long em. Adam i sakim wok bos bilong Jehova, na em i makim rot em i laik bihainim. Samting Adam i mekim i kamapim bikpela hevi long olgeta man long nau.

Olsem Jehova i tok Adam i go lapun na em i dai. Taim Adam i dai, em i no kamap long narapela bodi o i go stap long narapela ples samting, nogat. Baibel i tok God i bin “kisim graun na em i wokim” Adam, olsem na taim em i dai, em bai “go bek long graun.”—Stat 2:7; Saveman 9:4, 5, 10.

Yumi tumbuna pikinini bilong Adam, olsem na yumi save dai

“Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”—Rom 5:12.

Adam i mekim sin taim em i kaikai pikinini bilong dispela diwai, olsem na yumi ol tumbuna pikinini bilong em tu i kisim sin. Sin i mekim na yumi save stap laip inap 70 o 80 yia tasol na bihain yumi dai.

Yumi olgeta i tumbuna pikinini bilong Adam, olsem na yumi no inap abrusim sin na dai. Pol i luksave long dispela hevi na em i tok: “Mi man bilong graun tasol, na mi stap wokboi bilong sin. Mi pilim nogut tru! Husat bai kisim bek mi long dispela bodi em bilong i dai. Mi tenkyu long God long rot bilong Jisas Krais, Bikpela bilong yumi!”—Rom 7:14, 24, 25.

Dai bilong Jisas i helpim yumi long kisim laip oltaim

“Papa i bin salim Pikinini bilong en i kam olsem Seivia bilong ol manmeri.”—1 Jon 4:14.

God Jehova i opim rot long yumi inap stap fri long pe bilong sin em dai na ol narapela hevi sin i kamapim. Olsem na God i salim dispela Pikinini em i laikim tru i kam long graun olsem man i gutpela olgeta. Baibel i tok Jisas “i no bin mekim sin.” (1 Pita 2:22) Jisas i nogat sin, olsem na em inap long stap laip oltaim.

Maski i olsem, Jehova i larim ol birua i kilim Jisas i dai. Tripela de bihain, Jehova i kirapim em bek olsem wanpela spirit na bihain em i go long heven. Long dispela rot, Jisas i givim pe long God long baim bek gutpela laip em Adam i lusim. Jehova i orait long dispela ofa, olsem na ol manmeri i bilip long Jisas inap long kisim laip oltaim.—Rom 3:23, 24; 1 Jon 2:2.

Taim Jisas i dai em i baim bek laip i gutpela olgeta em Adam i bin lusim, na dispela i helpim yumi long kisim laip oltaim. Baibel i tok: “Jisas i bin karim pen na i dai, na long dispela rot em i . . . kisim ples bilong olgeta manmeri na i dai. Dispela i kamap long rot bilong bikpela pasin helpim bilong God.”—Hibru 2:9.

Ol samting Jehova i mekim i helpim yumi long save long ol arapela pasin bilong em. God i bihainim ol stretpela lo bilong em, olsem na man i gutpela olgeta i mas dai bilong kisim bek ol sinman. Pasin laikim bilong God i kirapim em long salim Pikinini bilong em i kam dai bilong baim bek yumi. Na dispela i soim tu bikpela pasin sori bilong God.—Rom 5:6-8.

Jisas i kirap bek, olsem na ol arapela man tu bai kirap bek

“God i bin kirapim bek Krais long dai. Em i kirap bek paslain long ol arapela man i dai pinis, olsem namba 1 kaikai i redi long gaden. Long rot bilong wanpela man, dai i kamap, olsem tasol long rot bilong wanpela man, ol man bai kirap bek long dai. Long rot bilong Adam ol man i save dai, olsem tasol long rot bilong Krais ol man bai kisim laip.”—1 Korin 15:20-22.

Jisas i bin stap long graun na bihain em i dai, tasol olsem wanem yumi save olsem em i kirap bek? Taim Jisas i kirap bek, planti man i bin lukim em long narapela narapela taim na ples. Olsem, wanpela taim winim 500 man i bin lukim em. Aposel Pol i stori long pas em i raitim i go long ol Korin, na em i tokaut olsem sampela bilong ol dispela man i bin lukim Jisas i stap laip yet. Olsem na ol inap long tokaut long ol samting ol i lukim na harim.—1 Korin 15:3-8.

Taim Pol i tok Krais i “namba 1 kaikai” i kirap bek, dispela i makim olsem bihain ol arapela tu bai kirap bek. Jisas i tok wanpela taim bai kamap na “olgeta man i stap long matmat ol bai . . . kam ausait.”—Jon 5:28, 29.

Bilong kisim laip oltaim, yumi mas bilip long Jisas

“God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”—Jon 3:16.

Namba 1 buk bilong Baibel i stori long olsem wanem dai i kamap na ples paradais i lus. Na laspela buk bilong Baibel i stori olsem bihain ol man bai i no dai moa na God bai mekim graun i kamap ples paradais gen. Long dispela taim ol man bai stap amamas tru inap oltaim. Revelesen 21:4 i tok: “Bai i no gat dai moa.” Bilong strongim dispela tok promis, ves 5 bilong dispela sapta i tok: “Ol man inap bilip tru long ol dispela tok na ol dispela tok i tru olgeta.” Tru tumas, Jehova i save truim olgeta tok promis bilong em.

Yu ting olsem wanem long tok bilong Baibel olsem, “ol man inap bilip tru long ol dispela tok na ol dispela tok i tru olgeta”? Bilong save sapos ol dispela tok i tru, pastaim yu mas kisim save long Jisas Krais na bilip long em. Sapos yu mekim olsem, Jehova bai orait long yu. Na tu, yu inap bilip na wet long kisim laip oltaim long paradais long graun long bihain. Long dispela taim “bai i no gat dai moa, na ol bai i no bel hevi na krai moa, na ol bai i no inap pilim pen gen.”

Long nait paslain long Jisas i dai, em i tokim ol disaipel bilong em long mekim bung bilong tingim dai bilong em. Em i tok: “Yupela i mas mekim olsem yet bilong tingim mi.”—Luk 22:19.

Long dispela yia bung bilong tingim dai bilong Jisas bai kamap long Fraide, Epril 3, taim san i go daun pinis. Ol Witnes Bilong Jehova i laik singautim yu na famili bilong yu long kam na harim wanpela tok i kamapim klia olsem wanem dai bilong Jisas i helpim yu.