Ating yu bin lukim ol i autim tok long ol haus na long ol pablik ples, ol i tilim ol buk na nius bilong Baibel, na mekim ol fri Baibel stadi kos. Ating yu bin kisim dispela nius long wanpela Witnes. Tasol ating yu laik save ol Witnes Bilong Jehova i husat. Na ating yu gat wankain tingting olsem bilong ol dispela man em yumi stori pinis long ol.

Sapos yu gat ol wankain tingting na askim, hau bai yu kisim ol bekim bilong yu? Olsem wanem yu inap kisim save long bilip bilong ol Witnes Bilong Jehova? Bilong wanem ol i save go toktok wantaim ol man long ol haus bilong ol na long ol pablik ples? Na hau ol i kisim mani bilong sapotim wok bilong autim tok na wokim ol haus lotu bilong ol?

Cecilie, em yumi bin stori pinis long en i tok: “Mi ritim planti stori bilong ol Witnes Bilong Jehova long Intenet. Mi harim ol man i mekim kain kain stori, na planti taim ol i mekim ol tok bilong daunim ol Witnes. Olsem na mi gat tingting kranki long ol Witnes Bilong Jehova.” Bihain, Cecilie i bungim ol Witnes Bilong Jehova na ol i bekim ol askim bilong em.

Yu laik kisim stretpela save long ol askim bilong yu long ol Witnes Bilong Jehova? Mipela i laik kirapim yu long toktok wantaim ol Witnes Bilong Jehova, em ol lain i wokim dispela nius. (Sindaun 14:15) Mipela i bilip olsem ol atikol i kamap bihain bai helpim yu long kisim save long mipela i husat, ol bilip bilong mipela, na tu, bai yu inap kliagut long ol wok mipela i save mekim.

Mipela i wanpela oganaisesen i stap long olgeta hap bilong graun, tasol mipela i no wok bung wantaim ol narapela lotu. Wol hetkota bilong mipela i stap long Amerika, tasol bikpela lain Witnes Bilong Jehova i stap long ol narapela kantri. Klostu 8 milion Witnes i skulim ol man long tok bilong Baibel long winim 230 kantri. Mipela i bihainim tok bilong Jisas, em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Matyu 24:14.

Mipela i bihainim lo bilong gavman long ol hap mipela i stap long en, tasol mipela i no insait long ol wok politik. Na dispela i soim olsem mipela i bihainim tok bilong Jisas olsem ol Kristen “i no bilong dispela graun.” Olsem na mipela i no insait long ol pait na ol wok politik. (Jon 15:19; 17:16) Long Wol Woa 2, ol man i mekim nogut long ol Witnes Bilong Jehova na kalabusim ol. Ol i mekim olsem, long wanem, ol Witnes i no laik insait long ol pait. Wanpela bisop bilong Jemani long bipo i tok: “I stret ol [Witnes] i tok ol tasol i no bin insait long ol wok bilong sapotim Gavman Bilong Hitler.”

Maski i olsem, mipela i save tingim na helpim ol narapela. Jisas i beten long God bilong helpim ol disaipel bilong em. Em i tok: “Mi no askim yu long tekewe ol long dispela graun, nogat.” (Jon 17:15) Olsem na bai yu lukim ol Witnes i mekim wok mani, go long ol stua, na ol pikinini bilong ol i go long skul long hap yu stap long en.

Ol Witnes Bilong Jehova i bilip olsem “God em i as bilong olgeta tok i stap long Rait Holi, na ol i gutpela.” (2 Timoti 3:16) Long rot bilong Baibel mipela i kisim save long Krieta, na tu, dispela i helpim i stap bilong mipela.

Baibel i tok: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (Song 83:18, NW) Olsem na mipela i lotuim God Jehova wanpela tasol, na olsem ol Witnes bilong em, mipela i givim bel long tokim ol narapela long nem bilong em.—Aisaia 43:10-12.

Olsem wanpela lain Kristen, mipela i bilip olsem Jisas “em i Pikinini bilong God,”a na em i bin kam long graun na kamap Mesaia. (Jon 1:34, 41; 4:25, 26) Bihain long em i dai, em i kirap bek na i go long heven. (1 Korin 15:3, 4) Na em i kamap King long Kingdom Bilong God. (Revelesen 11:15) Dispela Kingdom em wanpela gavman tru, na em bai kamapim gen Paradais long graun. (Daniel 2:44) Baibel i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11, 29.

Ol Witnes Bilong Jehova i bilip olsem ol stiatok bilong Baibel inap helpim ol manmeri long nau. (Aisaia 48:17, 18) Olsem na mipela i save bihainim ol dispela stiatok. Baibel i givim stiatok long yumi mas abrusim ol pasin na ol samting we inap bagarapim bodi na tingting bilong yumi, olsem na mipela i no save smok na kisim drak. (2 Korin 7:1) Na tu, mipela i abrusim ol pasin em Baibel i tambuim olsem, pasin bilong dring spak, pasin pamuk, na pasin bilong stil.—1 Korin 6:9-11.

Long olgeta yia, mipela i save prinim na tilim planti handret milion Baibel, na ol buk na nius bilong Baibel. Long olgeta hap bilong graun, mipela i wokim ol brens ofis na ol faktori bilong prinim ol buk na nius. Planti tausen kongrigesen i bung long ol naispela ples bilong mekim lotu em mipela i save kolim Haus Kingdom. Hau mipela i kisim mani bilong mekim olgeta dispela wok?

Mipela i mekim olgeta dispela wok long rot bilong ol kontribusen ol man i givim long laik bilong ol yet. (2 Korin 9:7) Long 1879, namba 2 Wastaua mipela i wokim i tok: “Mipela i bilip olsem JEHOVA i sambai long ‘Zion’s Watch Tower,’ [pastaim ol i kolim dispela nius long dispela nem] na taim em i wok yet long helpim wok bilong en, orait [dispela nius] i no ken krai o singaut long ol man na askim ol long givim mani long en.” Mipela i bihainim yet dispela pasin.

Ol man i save salim ol kontribusen bilong ol i go long wanpela bilong ol brens ofis bilong mipela, o ol i save putim mani long ol kontribusen boks long ol Haus Kingdom. Mipela i no save salim plet, makim hamas mani stret man i mas givim long ol buk na nius bilong mipela, na makim pe long ol wok mipela i mekim. Na tu, mipela i no save kisim pe long mekim wok autim tok, skulim ol man long kongrigesen, na long wokim ol ples bung bilong mekim lotu. Na dispela i stret wantaim tok bilong Jisas olsem: “Yupela i kisim fri, olsem na yupela i mas givim fri.” (Matyu 10:8) Olgeta man i wok long ol brens ofis na wol hetkota bilong mipela i no save kisim pe long ol wok ol i mekim. Na dispela i makim tu lain Gavening Bodi Bilong Ol Witnes Bilong Jehova.

Mipela i yusim tu ol kontribusen ol man i givim bilong helpim ol man long taim bilong disasta. Ol Kristen long taim bilong ol aposel i bin amamas long helpim ol man i bungim hevi. (Rom 15:26) Olsem tasol, mipela i helpim ol man i bungim hevi long rot bilong wokim na stretim ol haus bilong ol, givim klos na kaikai na marasin samting long ol.

Klostu olgeta man i save olsem ol Witnes Bilong Jehova tasol i save mekim wok autim tok. Mipela i save autim tok long ol haus, ol pablik ples, na long ol hap ol man i stap long en. Bilong wanem mipela i save autim tok?

Ol Witnes Bilong Jehova i autim tok, long wanem, ol i laik givim biknem long God na tokim ol man long nem bilong em. (Hibru 13:15) Na tu, ol i bihainim tok bilong Jisas Krais, em i tok: “Olsem na yupela i mas i go na kamapim ol disaipel long olgeta lain man, . . . Skulim ol long bihainim olgeta samting mi tokim yupela long mekim.”—Matyu 28:19, 20.

Na tu, mipela i autim tok bikos mipela i laikim tru ol arapela man. (Matyu 22:39) Mipela i save olsem planti man i gat lotu na bilip bilong ol, na mipela i luksave olsem i no olgeta man bai amamas long harim tok mipela i autim. Maski i olsem, mipela i autim tok bilong Baibel long ol man na bai ol i ken kisim laip. Mipela i bihainim pasin bilong ol Kristen long taim bilong ol aposel, na mipela “i no lusim pasin bilong skulim ol manmeri na autim gutnius long Krais.”—Aposel 5:41, 42.

Planti man em ol i no Witnes Bilong Jehova i save ritim ol buk na nius bilong mipela. Na planti milion man husat i stadi long Baibel wantaim mipela i bilong ol narapela lotu. Tasol ol i amamas taim ol Witnes Bilong Jehova i bungim ol na toktok wantaim ol.

Mipela i bilip olsem yu gat planti askim long ol Witnes Bilong Jehova. Mipela i singautim yu long kisim save long bekim bilong ol askim bilong yu long rot bilong

• Toktok wantaim wanpela Witnes Bilong Jehova.

• Go long Web-sait bilong mipela, em www.jw.org.

• Go long ol miting bilong mipela. Mipela i singautim olgeta long kam long dispela miting i no gat pe long en.