Wanpela Sande apinun, Kenneth na Filomena em ol i stap long Kuraso, i go lukim tupela marit em ol i save stadi wantaim ol long Baibel.

Kenneth i tok: “Taim mipela i kamap, dua bilong haus i lok na kar i no stap, olsem na mi tingting strong olsem mi mas ringim fon bilong meri bilong dispela man.”

Meri i bekim tok olsem man bilong em i go long wok. Tasol bihain em i luksave olsem Kenneth na Filomena i kam bilong lukim em, olsem na em i opim dua na tokim ol long go insait long haus.

Kwiktaim tupela i luksave olsem em i bin krai i stap. Kenneth i beten bilong kirapim stadi, na meri i krai gen. Long gutpela pasin Kenneth na Filomena i askim em sapos em i gat sampela hevi.

Dispela meri i stori olsem em i plen long kilim em yet long dispela apinun, na em i wok long raitim liklik pas bilong man bilong em, tasol fon i ring na dispela i pasim em long mekim olsem. Em i tokim ol olsem em i karim hevi bilong sik dipresen, olsem na ol i kamapim sampela gutpela tok bilong Baibel bilong mekim gut bel bilong em. Dispela tok bilong ol i helpim em na em i no mekim samting em i bin tingting long mekim.

Kenneth i tok: “Mipela i tenkyu long Jehova i stiaim mipela long helpim dispela meri i gat bikpela hevi, na moa yet mipela inap ringim dispela meri! Ating God i mekim olsem long rot bilong wanpela ensel o holi spirit bilong em.”a

Yu ting i stret long Kenneth na Filomena i ting olsem God i stiaim ol, ating long rot bilong wanpela ensel o holi spirit bilong Em? O ating Kenneth i ring long taim stret na em samting bilong amamas nating long en?

Yumi no save long bekim stret bilong en. Tasol yumi save olsem God i save yusim ol ensel bilong em long helpim ol man long kisim save long tok i tru. Baibel i tok, God i yusim wanpela ensel long stiaim wanpela Kristen em Filip, long helpim bikman bilong Itiopia long kisim save long God.—Aposel 8:26-31.

Ol narapela narapela lotu i skulim ol man olsem i gat ol strongpela spirit i stap, na sampela bilong ol dispela spirit i save mekim wok bilong God o ol i stap bilong was long wan wan man. Planti man i bilip olsem ol ensel i stap, na ol i helpim ol long sampela kain rot. Tasol sampela i no gat stretpela save long wok ol ensel i mekim.

Baibel i tok wanem long ol ensel? Ol i kamap olsem wanem? Ol ensel inap long helpim yu? Yumi laik painim bekim bilong ol dispela askim.

• God em i spirit, na ol ensel tu i spirit, olsem na yumi no inap lukim ol bikos ol “i no gat mit na ol bun.” Ol gutpela ensel i stap long heven na ol i save stap long ai bilong God.—Luk 24:39; Matyu 18:10; Jon 4:24.

• Sampela taim ol ensel i kamap olsem ol man na bai ol inap mekim ol wok God i givim long ol long graun, na taim ol i pinisim ol wok bilong ol, ol i kamap olsem ol spirit gen.—Hetman 6:11-23; 13:15-20.

• Baibel i no stori olsem ol ensel em ol man o meri, nogat. Tasol taim ol i kisim bodi bilong graun, planti taim ol i kamap olsem ol man. Ol i no save marit na kamapim ol pikinini. Na tu, ol ensel i no bin stap long graun olsem ol bebi, pikinini, o man o meri i bikpela pinis na bihain ol i dai na go stap long heven olsem ol ensel. Jehova i wokim ol ensel, olsem na Baibel i kolim ol olsem “ol pikinini man bilong God.”—Stat 6:2; Song 148:2, 5.

• Baibel i stori long “tokples bilong ol man [na] tokples bilong ol ensel,” na dispela i makim olsem ol ensel inap toktok na ol i gat tokples bilong ol yet. Maski God i yusim ol ensel long toktok wantaim ol man, em i no orait long yumi long lotuim ol ensel na beten long ol.—1 Korin 13:1; Revelesen 22:8, 9.

• Planti 10 tausen taims planti 10 tausen ensel, ating namba bilong ol em inap planti bilion.a—Daniel 7:10; Revelesen 5:11.

• Ol ensel i gat “bikpela strong”—winim tru ol man—na ol i gat bikpela save. Ol ensel inap spit tru, na spit bilong ol i winim ol man na ol arapela samting long graun.—Song 103:20; Daniel 9:20-23.

• Maski ol ensel i gat bikpela save na strong, dispela i no makim olsem ol i winim God, ol i no save long olgeta samting.—Matyu 24:36; 1 Pita 1:12.

• God i wokim ol ensel na ol i gat ol gutpela pasin, na ol i stap fri long makim ol samting ol i laik mekim. Olsem ol man, ol inap mekim disisen olsem ol bai bihainim stretpela pasin o nogat. Tasol sampela ensel i bikhet long God.—Jut 6.

Baibel i no skulim yumi olsem olgeta wan wan man i gat was ensel. Jisas i tok: “Yupela i mas was gut, yupela i no ken tingim ol dispela man i no gat nem [ol disaipel bilong Krais] i olsem samting nating. Mi tokim yupela, oltaim ol ensel bilong ol long heven i save stap long ai bilong Papa bilong mi husat i stap long heven.” (Matyu 18:10) Tok bilong Jisas i no makim olsem wan wan man i gat was ensel, nogat, em i laik tok ol ensel i tingim tru ol wan wan disaipel bilong em. Ol man i lotu tru long God i no save mekim ol samting we inap kamapim bagarap, na ol i ting olsem ol ensel bilong God bai lukautim ol.

Yu ting dispela i makim olsem ol ensel i no save helpim ol man? Nogat. (Song 91:11) Sampela man i bilip tru olsem God i save lukautim na stiaim ol long rot bilong wanpela ensel. Kenneth em yumi stori long en long kirap bilong atikol, em tu i bin kisim wankain tingting. Yumi no inap tok olsem dispela tingting i kranki. Planti taim ol Witnes Bilong Jehova i luksave long olsem wanem ol ensel i stiaim ol taim ol i mekim wok bilong autim tok. Yumi no inap lukim ol ensel, olsem na yumi no inap save long hau God i yusim ol ensel na inap long wanem mak bilong helpim ol wan wan man long kain kain taim na ples. Maski i olsem, yumi mas tenkyu long God i Gat Olgeta Strong long olgeta helpim em i save givim long yumi.—Kolosi 3:15; Jems 1:17, 18.

Yes, i gat ol ensel nogut. Husat i wokim ol? God i wokim ol ensel na em i larim ol long i stap fri long makim rot ol i laik bihainim. Bihain liklik long God i wokim namba wan man na meri, Adam na Iv, wanpela gutpela ensel i no yusim gut presen bilong i stap fri na em i kirapim pasin bikhet long graun. Em i kirapim Adam na Iv long bikhet long God. (Stat 3:1-7; Revelesen 12:9) Paslain long dispela ensel i bikhet, Baibel i no kolim stret nem o namba em i gat long taim em i stap long heven. Bihain long em i bikhet, Baibel i kolim em Satan, mining bilong en, “Birua,” na Devil, mining bilong en “Man Bilong Krungutim Gutnem.” —Matyu 4:8-11.

Sori tru olsem pasin bikhet i no pinis long dispela taim. Long taim bilong Noa, sampela ensel husat i stap famili bilong God long heven “i lusim ples stret bilong ol” na kam daun long graun. Ol i kisim bodi bilong graun na bai ol inap mekim pasin pamuk wantaim ol meri, em samting God i no orait long ol long mekim.—Jut 6; Stat 6:1-4; 1 Pita 3:19, 20.

Wanem samting i painim ol dispela ensel nogut? Taim God i kamapim tait wara long olgeta hap bilong graun na pinisim ol man nogut, ol dispela bikhet ensel i kamap spirit na i go bek long heven. God i no inap larim ol dispela bikhet ensel i kisim bek “wok bilong ol,” nogat. Em i tromoi ol i go long “hul i tudak tru,” em ol i kolim olsem Tartarus. (Jut 6; 2 Pita 2:4) Ol dispela spirit nogut i aninit long Satan, “em hetman bilong ol spirit nogut” na em “i save giaman olsem em i ensel bilong lait.”—Matyu 12:24; 2 Korin 11:14.

Baibel i skulim yumi olsem Mesaia bai mekim wok king long Kingdom Bilong God, em wanpela gavman long heven, na em i kirap mekim wok long 1914.a Bihain long dispela, Jisas i rausim Satan na ol spirit nogut long heven na tromoi ol i kam daun long graun. Long nau pasin nogut na pasin pamuk i go bikpela long olgeta hap bilong graun, na dispela i soim klia olsem ol dispela spirit nogut i kirapim ol man long belhat na bagarapim ol narapela.—Revelesen 12:9-12.

Pasin nogut i wok long i go nogut moa long nau, na dispela i kamapim klia olsem wok nogut bilong ol bai pinis. Klostu nau, ol dispela bikhet ensel bai i no mekim ol dispela wok nogut bilong ol. Kingdom Bilong God bai bosim ol man long paradais long graun inap 1,000 yia, na bihain em bai larim ol dispela spirit nogut long i stap fri inap sotpela haptaim bilong traim ol manmeri. Bihain long dispela, God bai bagarapim ol olgeta.—Matyu 25:41; Revelesen 20:1-3, 7-10.

Baibel i kamapim klia olsem, sampela taim ol ensel i save mekim ol samting bilong lukautim ol manmeri i lotuim God bambai laik bilong God i ken kamap. (Song 34:7) Olsem:

• Taim Jehova i bagarapim ol man nogut long taun Sodom na Gomora, ol ensel i helpim stretpela man Lot na famili bilong em long lusim taun.—Stat 19:1, 15-26.

• Long Babilon bilong bipo taim ol i tromoi 3-pela yangpela man Hibru long bikpela paia, God i “salim ensel bilong en na i helpim dispela tripela man i save lotu na bilip long em.”—Daniel 3:19-28.

• Stretpela man Daniel i stap long hul bilong ol laion inap wanpela nait, tasol ol laion i no kaikaim em. Daniel i tok em i stap laip bikos “God i bin salim ensel bilong en i kam na i pasim maus bilong ol laion.”—Daniel 6:16, 22.

OL ENSEL I SAPOTIM OL KRISTEN LONG TAIM BILONG OL APOSEL

Long taim bilong ol aposel, ol ensel bilong God i helpim ol Kristen long mekim ol wok bilong inapim samting Jehova i tingting pinis long mekim. Olsem:

• Wanpela ensel i opim ol dua bilong haus kalabus na bringim ol aposel i go ausait na tokim ol long autim tok long tempel.—Aposel 5:17-21.

• Wanpela ensel i tokim Filip long i go long wanpela rot i stap long ples wesan nating namel long Jerusalem na Gasa, na autim tok long man Itiopia husat i go long mekim lotu long Jerusalem.—Aposel 8:26-33.

• Taim God i makim ol man bilong narapela lain long kamap Kristen, long rot bilong visen wanpela ensel i kamap long kepten bilong ami bilong Rom em Kornilius. Ensel i tokim Kornilius long singautim aposel Pita i go long haus bilong em.—Aposel 10:3-5.

• Taim aposel Pita i stap kalabus, wanpela ensel i kamap long em na bringim em i go ausait long haus kalabus.—Aposel 12:1-11.

OL ENSEL INAP HELPIM YU

I no gat evidens olsem long nau God i yusim ol ensel long rot bilong mirakel long helpim ol man olsem Baibel i stori long en. Jisas i stori long taim bilong yumi, na em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Matyu 24:14) Olsem wanem? Yu save olsem ol ensel i wok long stiaim ol disaipel bilong Krais long autim gutnius?

Buk Revelesen i kamapim olsem ol ensel bai helpim tru olgeta manmeri long graun long kisim save long God Jehova na samting em i tingting pinis long mekim bilong helpim ol manmeri. Aposel Jon i tok: “Mi lukim narapela ensel i flai namel long skai, em i gat gutnius bilong i stap oltaim oltaim, na em i gat wok long autim dispela gutnius long ol manmeri i stap long graun, na long olgeta kantri, na olgeta lain, na olgeta tokples, na olgeta lain pipol. Na em i singaut strong na i tok: ‘Yupela i mas pret long God na givim glori long em, long wanem, taim bilong em long mekim wok jas i kamap pinis, olsem na yupela i mas lotuim dispela Man husat i wokim skai na graun na solwara na ol hulwara.’” (Revelesen 14:6, 7) Long nau ol gutpela ekspiriens i kamapim klia olsem ol ensel i sapotim wok bilong autim gutnius bilong Kingdom long olgeta hap. Taim wanpela sinman i tanim bel na kam bek long Jehova, “ol ensel bilong God i save amamas.”—Luk 15:10.

Wanem samting bai kamap taim wok autim tok i pinis? Ol ensel em “ol lain ami i stap long heven,” ol bai sapotim Jisas Krais, em King bilong ol king, na “pait long dispela bikpela de bilong God i Gat Olgeta Strong” em Armagedon. (Revelesen 16:14-16; 19:14-16) Ol strongpela ensel bai kamap jas bilong kotim ol manmeri long stretpela kot taim Bikpela Jisas i “bekim rong long ol lain husat . . . i no bihainim tok bilong gutnius i stori long Bikpela bilong yumi, Jisas.”—2 Tesalonaika 1:7, 8.

Ol ensel i gat bikpela laik tru long helpim yu. Ol i tingim tru ol manmeri husat i lotuim God. Olsem na Jehova i wok yet long yusim ol ensel long strongim na lukautim ol gutpela wokman bilong em long graun.—Hibru 1:14.

Yumi wan wan i mas mekim bikpela disisen. Yumi bai harim na bihainim dispela gutpela nius em ol i autim long graun olgeta? Ol Witnes Bilong Jehova long hap yu stap long en bai amamas long helpim yu long kisim save long olsem wanem ol strongpela ensel bilong God inap helpim yu.