JORDAN i holim wanpela liklik tul bilong sapim pensil long han bilong em. Em i save lukautim gut dispela tul, na em i tok: “Russell em wanpela gutpela pren bilong famili i givim mi dispela tul olsem presen long taim mi liklik yet.” Bihain long Russell i dai, Jordan i kisim save olsem Russell i mekim bikpela wok bilong helpim bubu man na papamama bilong em, em i strongim ol long taim bilong hevi. Jordan i tok: “Taim mi kisim save long samting Russell i mekim bilong helpim famili bilong mi, dispela liklik presen i kamap samting i dia tumas long mi.”

Stori bilong Jordan i kamapim klia olsem taim yu kisim wanpela presen, ating ol narapela bai i no ting em i bikpela samting. Tasol yu bai tingim dispela presen olsem samting i dia tumas. Baibel i stori long nambawan gutpela presen yumi kisim: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”—Jon 3:16.

God i givim laip oltaim long yu, em nambawan gutpela presen! Yu inap kisim wanpela presen i winim dispela? Ol Kristen tru i save olsem em presen “i dia tumas,” tasol sampela man i no tingim tumas dispela. (Song 49:8, 9; 1 Pita 1:18, 19) Bilong wanem God i givim Pikinini bilong em olsem presen bilong helpim yumi?

Aposel Pol i stori long as na God i mekim olsem, em i tok: “Olsem na long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri.” (Rom 5:12) Namba wan man Adam i sakim tok bilong God na em i mekim sin, olsem na em i kisim pe bilong sin em dai. Yumi olgeta tumbuna pikinini bilong Adam tu i gat sin na yumi save dai.

“Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.” (Rom 6:23) Bilong helpim ol man long lusim kalabus bilong sin na dai, God i salim Pikinini bilong em Jisas Krais i kam long graun bilong givim gutpela laip bilong em olsem ofa bilong baim bek yumi. Jisas i givim laip bilong em olsem “pe bilong baim bek man,” olsem na olgeta man i bilip long em ol bai kisim laip oltaim.—Rom 3:24.

God i givim planti blesing long ol man i lotu long em long rot bilong ofa bilong Jisas Krais, olsem na Pol i tok: “Yumi tenkyu long God long dispela presen em i givim nating, em presen i gutpela tumas.” (2 Korin 9:15) Yes, pe bilong baim bek ol man em wanpela gutpela presen yumi kisim. Tasol olsem wanem dispela presen i gutpela tumas winim olgeta narapela presen God i givim long yumi?a Na yumi mas mekim wanem bilong soim tenkyu bilong yumi long God? Long tupela atikol i kamap bihain, mipela bai amamas long helpim yu long kisim save long ol bekim bilong Baibel long ol dispela askim.

HUSAT I GIVIM PRESEN?

Sampela presen i dia tumas, long wanem, wanpela bikman o wanpela yu laikim tru i givim long yu. Maski sampela presen i gat liklik pe, ol i dia tumas taim wanpela long famili o pren yu trastim i givim long yu. Jordan i bin kisim kain presen long Russell, olsem stori i stap long fes atikol. Olsem wanem dispela i wankain long presen God i givim long pe bilong baim bek man?

Namba 1, Baibel i tok: “God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em.” (1 Jon 4:9) Dispela em i gutpela presen tru. I no gat wanpela man i gat bikpela namba winim God. Wanpela man Hibru i raitim song i stori long biknem bilong God olsem: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (Song 83:18, NW) Tru tumas, God em bos bilong heven na graun i givim yumi gutpela presen tru.

Namba 2, God em i ‘Papa bilong yumi.’ (Aisaia 63:16) Olsem wanem em i Papa bilong yumi? Em i givim yumi laip, na tu, em i save lukautim yumi wankain olsem wanpela papa i lukautim ol pikinini bilong em. Tingim pasin bilong God long toktok wantaim lain bilong em long bipo, olsem lain Efraim. Em i tokim ol: “Mi Bikpela, mi tok, mi laikim tumas Efraim, em pikinini man bilong mi . . . Mi save givim bel bilong mi moa yet long em. Olsem na bai mi sori long em na marimari long em.” (Jeremaia 31:20) God i gat wankain tingting long ol lain i lotuim em long nau. Em i Krieta i gat olgeta strong, gutpela Papa, na Pren bilong yumi. Olsem na yumi mas tingim tru ol gutpela presen em i givim long yumi.

WAI NA EM I GIVIM PRESEN?

Sampela presen i dia tumas, long wanem, pasin laikim i kirapim man long givim, na i no olsem em samting em i mas mekim, nogat. Man i gat pasin bilong tingim ol narapela i save givim presen long ol narapela, na em i no tingting long ol i mas mekim wankain pasin long em.

God i givim Pikinini bilong em long yumi bikos em i laikim yumi. Baibel i tok: “Pasin laikim bilong God i kamap ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em.” (1 Jon 4:9) Yu ting em samting God i mas mekim? Nogat tru! Krais Jisas i givim “pe bilong baim bek man” na dispela i kamapim klia “bikpela pasin helpim” bilong God.—Rom 3:24.

Wai na dispela presen God i givim i kamapim klia “bikpela pasin helpim” bilong em? Baibel i tok: “God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.” (Rom 5:8) Pasin laikim bilong God i kirapim em long helpim yumi, em bikpela pasin laikim tru. Yumi ol sinman i no gat strong bilong helpim yumi yet. Na tu, yumi no inap tru long bekim dispela presen.

EM I MEKIM WANEM BILONG GIVIM PRESEN?

Sampela presen i dia tumas bikos man i mekim sampela samting bilong givim dispela presen. Yumi amamas tru long presen man i givim taim dispela presen em samting i dia tumas long em.

God “i givim dispela Pikinini tru bilong en.” (Jon 3:16) Em i givim dispela pikinini em i laikim tru long yumi ol man. Jisas i wok wantaim God inap planti milion yia long wokim ol samting long heven na graun, na God i “amamas” long em. (Sindaun 8:30, 31) Jisas em “Pikinini em [God] i laikim tumas” na “em i piksa tru bilong dispela God ol man i no inap lukim.” (Kolosi 1:13-15) Tru tumas, maski tupela i gat bikpela save na strong ol i pas gut wantaim.

Maski i olsem, God “i larim Pikinini bilong em yet i karim pen na hevi na em i larim ol man i kilim em i dai.” (Rom 8:32) Jehova i givim yumi nambawan gutpela presen, em samting i dia tumas long em.

YU NIDIM TRU DISPELA PRESEN

Sampela presen i dia tumas, long wanem, em samting yumi nidim, moa yet sapos yumi mas kisim hariap. Olsem, ating yu sik na yu no inap long baim haus sik, tasol wanpela i givim mani bilong helpim yu long baim. Bai yu pilim olsem dispela em i gutpela presen, bikos em samting yu nidim tru!

“Long rot bilong Adam ol man i save dai, olsem tasol long rot bilong Krais ol man bai kisim laip.” (1 Korin 15:22) Yumi ol tumbuna pikinini bilong Adam “i save dai,” yumi no inap abrusim sik na dai, na olsem ol sinman yumi no inap go klostu long God. Na tu, yumi no gat strong bilong helpim ol man long “kisim laip.” Baibel i tok: “Yumi save, i no gat wanpela man i ken baim bek em yet long mani. Na em i no inap givim mani long God inap long baim laip bilong en. . . . Pe bilong baim bek man, em i antap tumas.” (Song 49:7-9) Olsem na yumi nidim wanpela man long baim bek yumi.

Pasin laikim bilong Jehova i kirapim em long givim pe bilong baim bek man, olsem na long rot bilong Jisas “ol man bai kisim laip.” Olsem wanem dispela pe inap helpim yumi? “Blut bilong Jisas, Pikinini bilong em, i rausim olgeta sin bilong yumi na mekim yumi i kamap klin.” Taim yumi bilip long blut bilong Jisas, dispela i opim rot long God i fogivim ol sin bilong yumi na yumi inap kisim laip oltaim. (1 Jon 1:7; 5:13) Na olsem wanem pe bilong baim bek man inap helpim ol man yumi laikim tumas em ol i dai? “Long rot bilong wanpela man, dai i kamap, olsem tasol long rot bilong wanpela man [Jisas], ol man bai kirap bek long dai.”—1 Korin 15:21.a

God em bos bilong heven na graun i soim bikpela pasin laikim long yumi taim em i salim Jisas i kam olsem ofa bilong baim bek yumi. God Jehova i givim yumi Pikinini bilong em, em samting i dia tumas long em. Na dispela presen God i givim em samting yumi nidim bilong helpim yumi long lusim kalabus bilong sin na dai. Yes, God i givim pe bilong baim bek man na dispela i winim olgeta narapela presen.

YUMI MAS soim tenkyu bilong yumi long nambawan gutpela presen. Jisas i kamapim klia dispela samting taim em i oraitim 10-pela lepraman em i no gat man inap long helpim ol. Wanpela bilong ol i “tanim i go bek na singaut bikmaus na litimapim nem bilong God.” Jisas i tok: “10-pela man i bin kamap klin, a? We stap ol arapela 9-pela?” (Luk 17:12-17) Yumi kisim wanem skul long dispela? Em isi tru long yumi lusim tingting long ol gutpela pasin ol narapela i mekim bilong helpim yumi.

Pe bilong baim bek man i winim olgeta narapela presen. Em nambawan gutpela presen yumi kisim. Olsem na yu mas mekim wanem bilong soim tenkyu bilong yu long God?

• Kisim save long Man i givim presen. God i givim pe bilong baim bek man, tasol ol man i mas mekim sampela samting bilong kisim laip oltaim. Jisas i beten long God na i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Sapos wanpela man i tokim yu olsem wanpela i bin seivim laip bilong yu long taim yu liklik yet, ating bai yu laik kisim sampela save moa long dispela man na risen na em i seivim yu. God Jehova i givim pe bilong baim bek man olsem presen bilong helpim yumi long kisim laip, na em i laik bai yu kisim save long em na go klostu long em. Baibel i tok: “Yupela i mas i go klostu long God, na em bai kam klostu long yupela.”—Jems 4:8.

• 

  Bilip long pe bilong baim bek man: “Man i bilip long Pikinini, em i gat laip i stap oltaim.” (Jon 3:36) Wanem insait bilong dispela tok bilip? Dispela tok bilip i makim olsem yumi mas mekim ol gutpela wok. (Jems 2:17) Yu mas mekim sampela wok bilong kisim wanpela presen. Olsem tasol, yu mas mekim ol gutpela wok bilong soim olsem yu bilip long pe bilong baim bek man. Yu inap mekim wanem ol gutpela wok? Yu mas kisim save long laik bilong God na bihainim.a Beten long God i ken fogivim yu na bai maus bilong bel i stap klin. Yumi mas bilip tru olsem pe bilong baim bek man em God i givim i opim rot long olgeta man i bilip inap kisim laip oltaim we i gat bel isi, gutpela sindaun, na ol man bai stap gut!—Hibru 11:1.

• 

  Go long bung bilong tingim dai bilong Jisas. Jisas i kamapim wanpela bung em yumi save mekim long olgeta yia, na bai yumi inap tingim olsem wanem pe bilong baim bek man i helpim yumi. Jisas i tok: “Yupela i mas mekim olsem yet bilong tingim mi.” (Luk 22:19) Ol Witnes Bilong Jehova bai mekim bung bilong tingim dai bilong Jisas long Tunde, Epril 11, 2017, long taim san i go daun. Dispela bung bai kamap insait long 1-pela aua samting, bai i gat wanpela tok i stori gut long olsem wanem dai bilong Jisas i bikpela samting, na olsem wanem dispela i helpim yumi long nau na long bihain. Long las yia, klostu 20 milion manmeri long olgeta hap bilong graun i kam long bung bilong tingim dai bilong Jisas. Mipela i laik singautim yu long kam bung wantaim mipela na soim tenkyu bilong yu long dispela nambawan gutpela presen God i givim.