Olsem wanem? Ating yu laik ritim Baibel, tasol yu gat wankain tingting olsem bilong ol dispela lain i stap long kirap bilong atikol? Planti man i pilim olsem i hatwok long ritim Baibel. Tasol olsem wanem sapos yu kisim save olsem tok bilong Baibel inap helpim yu long stap amamas tru? Na olsem wanem sapos yu save long sampela rot yu inap bihainim na bai yu amamas long ritim Baibel? Bai yu redi long kisim helpim i kam long Baibel?

Yumi ken ritim tok bilong sampela man husat i kisim helpim long taim ol i kirap long ritim Baibel.

Ezekiel i gat 22 krismas samting i tok: “Pastaim i kain olsem mi draivim kar na mi no save long ples mi go long en. Tasol pasin bilong ritim Baibel i helpim mi long save long as na mi stap laip. Baibel i kamapim ol gutpela skultok we i stiaim ol samting mi mekim long olgeta de.”

Frieda husat i gat 20 krismas samting, em i tok: “Mi meri bilong kirap hariap long toktok na mekim ol samting. Tasol taim mi ritim Baibel, dispela i helpim mi long senisim pasin bilong mi. Na nau planti i amamas long pas gut wantaim mi na mi gat planti pren.”

Eunice i gat 50 krismas samting i tok long Baibel olsem: “Tok bilong en i helpim mi long senisim sampela pasin bilong mi, na mi kisim ol gutpela pasin.”

Ol lain em yumi stori long en na planti milion manmeri moa i painimaut olsem, pasin bilong ritim Baibel inap helpim yu long stap amamas tru. (Aisaia 48:17, 18) Na tu, Baibel inap helpim yu long (1) mekim ol gutpela disisen, (2) kisim ol gutpela pren, (3) daunim presa, na (4) bikpela samting moa, yu inap kisim save long tok i tru bilong God. Ol tok bilong Baibel i kam long God na ol i bilong helpim yu, olsem na sapos yu bihainim ol tok bilong en, bai yu stap gut.

Bikpela samting em yu mas kirap long ritim Baibel. Yu inap bihainim wanem ol gutpela rot na bai yu amamas long ritim ol tok bilong en?

Yu inap bihainim wanem ol rot bambai yu amamas long ritim Baibel na ol tok bilong en inap helpim yu? Yumi ken stori long 5-pela rot em planti man i bihainim.

Makim gutpela ples. Painim wanpela hap we i no gat nois. Long dispela rot, yu inap putim tingting olgeta long tok yu ritim. Na dispela hap i mas i gat lait i strong liklik na bai yu no hatwok long ritim ol tok, na tu, i mas i gat gutpela win.

Holim stretpela tingting. Baibel em buk i kam long Papa bilong yumi long heven. Olsem na taim yu ritim Baibel, i gutpela long kisim pasin bilong pikinini husat i redi long kisim skul long papamama bilong en. Sapos yu holim sampela tingting kranki long tok bilong Baibel, mobeta yu sakim ol dispela tingting na larim God i skulim yu.—Song 25:4.

Beten paslain long yu rit. Tingting bilong God i stap long Baibel, olsem na yumi mas kisim helpim long Em na bai yumi kliagut long tok bilong en. God i tok promis long givim “holi spirit long ol man i askim em.” (Luk 11:13) Holi spirit bilong God inap helpim yu long save long tingting bilong em. Na bai yu kliagut long “ol bikpela tok hait bilong God.”—1 Korin 2:10.

Kliagut long ol tok yu ritim. Taim yu wok long rit, traim long tingim tingim ol tok yu ritim. Askim yu yet olsem: ‘Wanem ol gutpela pasin bilong dispela man o meri em mi ritim stori bilong en? Olsem wanem mi inap bihainim pasin bilong em?’

Putim ol mak yu laik winim. Bilong yu ken amamas long ritim Baibel, putim mak long lainim wanpela samting we inap tru long helpim i stap bilong yu. Ating yu ken putim ol mak olsem: ‘Mi laik kisim sampela save moa long God.’ ‘Mi laik kisim ol gutpela pasin, stap gutpela man marit o meri marit.’ Orait nau yu ken ritim ol hap bilong Baibel we inap helpim yu long winim ol dispela mak.a

Dispela 5-pela rot yumi stori long en bai helpim yu long ritim Baibel. Tasol yu inap mekim wanem na bai yu amamas long rit? Neks atikol bai stori long hau yu inap mekim olsem.

Olsem wanem? Yu amamas long ritim Baibel, o yu pilim olsem i hatwok? Yumi ken stori long sampela samting yu inap mekim na bai yu amamas long ritim Baibel.

Ritim Baibel i yusim tokples bilong nau na ol tok i klia. Sapos yu ritim ol buk na nius samting i kolim ol tok bilong bipo em yu no klia long en, yu no inap amamas long rit. Olsem na painim wanpela Baibel i kolim ol tok i isi moa long kliagut long en na bai yu pilim tru ol tok bilong en. Tasol ol tok bilong en i mas stret na tru.a

Yusim nupela teknoloji. Long nau, ol man inap ritim Baibel long kain kain rot. Yu ken ritim Baibel long Intenet, o yu ken daunlodim long kompiuta, teblet, o mobail fon. Sampela Baibel em yu daunlodim, ol i gat ol tul bilong helpim yu long lukim ol narapela Baibel ves i stori long wankain topik, na tu, yu ken skelim tok bilong ol narapela Baibel. Na sapos yu laik, yu inap harim odio rekoding bilong Baibel. Planti man i amamas long harim long taim ol i kalap long bas, wasim klos, o mekim ol narapela wok. Olsem wanem? Yu inap traim wanpela rot i stret long yu?

Yusim ol tul bilong Baibel. Ol tul bilong Baibel inap helpim yu long kliagut long ol tok bilong en. Sampela buk na nius bilong Baibel i gat ol mep bilong ol ples em Baibel i stori long en, dispela bai helpim yu long save gut long stori yu ritim. Na tu, yu ken ritim ol atikol bilong helpim yu long klia long mining bilong planti tok bilong Baibel. Ol kain atikol i stap long dispela nius na long Web-sait jw.org, aninit long het tok “Bible Teachings.”

Bihainim kain kain rot. Sapos yu pilim olsem i hatwok long ritim Baibel olgeta, orait makim wanpela hap bilong Baibel em yu laikim, dispela bai kirapim laik bilong yu long rit. Sapos yu laik kisim save long ol manmeri em planti taim Baibel i stori long ol, orait ritim tasol ol skripsa i stori long ol. Blok “Ritim Stori Bilong Ol Bilipman na Meri” i soim wanpela rot yu inap bihainim. O ating yu laik ritim ol bikpela tok bilong Baibel, o bihainim stori bilong Baibel long ol samting i kamap paslain na ol samting i kamap bihain. Olsem wanem? Yu laik traim wanpela bilong ol dispela rot?

Baibel i no wanpela buk nating. Em i kamapim ol skultok bilong Man Bilong Wokim yumi. (2 Timoti 3:16) Ol tok bilong en inap tru long helpim yumi. Baibel i tok: “Tok bilong God i gat laip na i wok strong i stap.” (Hibru 4:12) Baibel i gat strong long senisim i stap bilong yumi long tupela bikpela rot, em i kamapim ol tok bilong helpim yumi long olgeta de, na tu, em i helpim yumi long save long ol tok promis bilong God na yumi pas gut wantaim em.—1 Timoti 4:8; Jems 4:8.

Laip bilong yu i kamap gutpela moa. Baibel i kamapim ol tok bilong helpim yu yet. Em i kolim ol gutpela tok yu inap bihainim long ol dispela samting.

• Pasin pren bilong yu wantaim ol narapela.—Efesus 4:31, 32; 5:22, 25, 28, 33.

• Tingting na helt bilong yu. —Song 37:8; Sindaun 17:22.

• Stretpela pasin.—1 Korin 6:9, 10.

• Mani na wok samting.—Sindaun 10:4; 28:19; Efesus 4:28.a

Tupela yangpela marit long Esia i amamas tru long kisim gutpela helpim i kam long Baibel. Olsem planti nupela marit, i hatwok long ol i lain long pasin bilong narapela narapela na toktok gut wantaim. Tasol tupela i kirap long bihainim ol tok ol i ritim long Baibel. Wanem samting i kamap? Vicent em man marit i tok: “Tok mi lainim long Baibel i helpim mi, na long pasin laikim mi inap stretim ol hevi insait long marit bilong mi. Taim mitupela i bihainim ol tok bilong Baibel, nau mipela i stap amamas tru.” Annalou em meri bilong Vicent i wanbel na i tok: “Mitupela i ritim ol eksampel bilong Baibel, na dispela i helpim mipela. Nau mi amamas long ol mak mipela i putim na mipela i stap amamas tru.”

Kisim save long God. Vicent i tok: “Taim mi ritim Baibel, mi pilim olsem mi stap klostu moa long Jehova winim long bipo.” Ol tok bilong Vicent i kamapim wanpela bikpela poin, Baibel i ken helpim yu long save gut long God. Taim yu mekim olsem, bai yu kisim helpim i kam long ol tok bilong em, na yu inap save long God olsem wanpela pren tru. Na bai yu kisim save long ol gutpela samting em bai mekim long bihain. Long dispela taim bai yu amamas long “laip tru,” em laip oltaim. (1 Timoti 6:19) I no gat narapela buk i mekim kain tok olsem.

Sapos yu putim mak long ritim Baibel na yu wok long mekim olsem, dispela inap helpim yu na bai yu save gut long God. Tasol taim yu ritim Baibel, ating yu bai gat planti askim. Sapos olsem, tingim gutpela eksampel bilong man Itiopia husat i stap inap 2,000 yia i go pinis. Em i gat planti askim long Baibel. Taim ol i askim em sapos em i kliagut long ol tok em i ritim, em i tok: “Hau bai mi save sapos i no gat man i skulim mi?”b Na kwiktaim em i redi long kisim helpim long Filip, em man i save gut long tok bilong Baibel na em i bin stap olsem wanpela disaipel bilong Jisas. (Aposel 8:30, 31, 34) Long wankain pasin, sapos yu laik kisim sampela save moa long tok bilong Baibel, i gutpela yu pulimapim fom long Web-sait www.jw.org/tpi, o yu ken salim pas long wanpela atres i stap long dispela nius. Na tu, yu ken toktok wantaim wanpela Witnes Bilong Jehova i stap long ples klostu long yu o yu ken go long wanpela Haus Kingdom, em ples lotu bilong mipela. Mipela i laik kirapim yu long kisim wanpela Baibel na ritim, na larim ol tok bilong en i stiaim na helpim yu long stap amamas tru.