Ol Inap Helpim Yu?

DISPELA nius nau yu holim, wok bilong en i bilong strongim bel bilong yu na bai yu ken tingim ol tok bilong Baibel long strongim ol famili na long helpim ol man long holimpas bilip. Na dispela nius i kamapim klia olsem Baibel i tok profet long dispela taim nogut nau yumi stap long en, na nius i tokaut long samting bai stretim tru ol dispela hevi​—⁠em Kingdom o gavman bilong God. Olsem wanem? Wastaua na Kirap! inap helpim yu?

Wanpela meri long Filipin, em Vilma, em i raitim pas olsem: ‘Mi laik tokim yupela, ol nius samting bilong yupela i gutpela tru. Namba wan taim bilong mi long lukim na kaunim Kirap! na Wastaua, em taim mi kisim bas long Manila na go bek long ples. Taim mi raun, mi save karim sampela nius bilong kaunim, tasol long dispela taim mi no karim sampela.

‘Wanpela man i lapun liklik em i sindaun wantaim mi long bas na em i holim sampela nius bilong yupela. Taim em i kaunim pinis Kirap! em i kamautim narapela nius, em Wastaua. Em nau, mi tokim em, mi laik kisim dispela Kirap! na kaunim. Man! Mi amamas tru long kaunim ol dispela nius, long wanem, ol i pulim tru tingting bilong mi na ol tok bilong en i sutim stret taim bilong yumi, na ol i strongim bel bilong yumi.’

Na meri i tok: ‘Mi laik kisim ol nius bilong yupela. Plis yupela i mas toksave long mi long rot bilong kisim.’ Brens-ofis bilong ol Witnes Bilong Jehova long Filipin i amamas long salim nius i go long dispela meri.