Tasol bilong wanem Satan na ol spirit nogut i wok strong olsem long giamanim ol man? Long wanem ol i laik kirapim yumi tu long bikhet long God. Ol i laik bai yumi mekim wok bilong ol. Ol i laik bai yumi bilipim ol tok giaman bilong ol na bihainim sampela pasin Jehova i no laikim. Planti pasin olsem em ol man i save mekim long taim man i dai.

Taim wanpela man o meri yumi laikim tumas, em i dai, yumi save bel hevi na yumi krai. No gat rong long dispela. Taim pren bilong Jisas, em Lasarus, i dai, “Jisas i krai.”—Jon 11:35.

Ol man bilong narapela narapela hap ol i save mekim kain kain pasin taim man i dai. Planti pasin olsem i no pait wantaim lo bilong Baibel, tasol as bilong sampela em dispela tingting olsem ol man i dai ol i stap laip yet na ol inap lukim yumi. Ol man i save bung na was long bodi, na ol i save krai nogut tru, na ol i mekim kain kain pasin long taim bilong planim bodi, na as bilong olgeta dispela samting i olsem: Ol i pret, nogut tewel bilong man i dai i kros long ol. Tasol ol man i dai pinis “i no inap save long wanpela samting,” olsem na ol dispela pasin ol man i mekim i helpim tasol tok giaman bilong Satan.—Saveman 9:5.

Na i gat sampela pasin ol man i ting ol i mas mekim bilong helpim man i dai pinis, nogut em i kros na mekim nogut long ol. Long sampela kantri, inap olsem 40 de o wanpela yia bihain long taim man i dai, ol i save wokim bikpela kaikai na mekim ol ofa bilong helpim em long ‘i go kamap’ long ples spirit. Na planti man i save putim kaikai na dring bilong ol man i dai pinis.

Ol dispela pasin i gat rong, long wanem ol tok giaman bilong Satan i as bilong en. Sapos yu insait long kain pasin olsem, yu ting Jehova bai amamas long yu? Nogat tru!—2 Korin 6:14-18.

Ol wokboi bilong God tru i no save insait long ol pasin i helpim tok giaman bilong Satan. Ol i save wok long helpim na mekim isi bel bilong ol man i stap laip yet. Ol i save, taim man i dai pinis, Jehova tasol inap helpim em.—Jop 14:14, 15.

God i Tambuim

Sampela man i save toktok stret long ol spirit nogut o toktok wantaim ol long rot bilong wanpela wailis. Ol kain pasin bilong glasman na posin marila samting na askim long ol man i dai pinis, olgeta dispela pasin i samting bilong ol spirit nogut.

Baibel i tambuim ol dispela pasin. Em i tok: “Yupela i no ken . . . mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim . . . ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.”—Lo 18:10-12.

Bilong wanem Jehova i tambuim ol dispela pasin?

Bilong lukautim yumi, Jehova i tambuim olgeta pasin ol spirit nogut i as bilong en. Em i laikim tru ol manmeri, na em i save ol man i insait long samting bilong ol spirit nogut bai ol i karim bikpela hevi.

Kain bikpela hevi olsem i bin painim wanpela meri bilong Brasil em i wailis bilong ol spirit, em Nilda. Em i stori olsem: “Ol spirit . . . i stap long mi na bosim mi olgeta. Sampela taim tingting i klia na sampela taim tingting i dai. Mi kamap olsem longlong na ol i kalabusim mi long wanpela kain haus sik. Ol spirit nogut i mekim nogut tru long mi na tingting bilong mi i bagarap. Mi save kisim marasin bilong mekim tingting na bel i stap isi na mi kirap long dring planti na smok oltaim.”

Tasol bihain Jehova na ol Witnes bilong em long graun i helpim Nilda na em i no larim ol spirit nogut i bosim em moa. Nau em i stap gutpela. Em i tok: “Mi laik tokim olgeta manmeri: Yu no ken tru insait liklik long samting bilong ol spirit [nogut].”

Yumi olgeta yumi inap tingting: Yumi laik mekim wok bilong Jehova, o bilong Satan na ol spirit nogut? Yumi no inap mekim wok bilong tupela wantaim. Sapos yumi gat gutpela tingting bai yumi mekim wok bilong Jehova!

Jehova i Gutpela

Yumi save pinis, ol spirit nogut i save amamas long mekim nogut long ol man na giamanim ol. Jehova i no save mekim olsem. Em i laikim tumas ol manmeri olsem papa i laikim tumas pikinini. Em i save givim “olgeta gutpela samting” long yumi, maski em i samting i dia tumas long em.—Jems 1:17; Efesus 2:4-7.

Tingim ol samting Jisas, em Pikinini bilong God, i bin mekim long graun. Em i mekim na ol mauspas i toktok na aipas i lukluk. Em i oraitim ol lepraman na ol lek nogut. Em i rausim ol spirit nogut na oraitim olgeta kain sik. Long strong bilong God, em i kirapim bek man i dai pinis.—Matyu 9:32-35; 15:30, 31; Luk 7:11-15.

God i no save mekim ol tok giaman bilong giamanim yumi; em i save mekim tok i tru tasol. God i no save giaman.—Namba 23:19.

Klia long Ol Pasin Nogut

Umben bilong binatang spaida i save kalabusim lang, na olsem tasol ol bilip giaman na tok giaman i save kalabusim planti milion man. Ol i pret long ol man i dai pinis. Ol i pret long ol spirit nogut. Ol i save tingting planti long tok bilong bagarapim ol, na long ol mak bilong samting i stap hait, na ol i tingting planti long sakim masalai. Ol bilip na pasin em tok giaman bilong Satan i as bilong en i kalabusim ol, tasol ol wokboi bilong Jehova, nogat.

Jehova i gat bikpela strong, winim tru Satan. Sapos yu mekim wok bilong Jehova bai em i lukautim yu, na ol spirit nogut i no inap bagarapim yu. (Jems 4:7) Ol kain posin na marila i no inap mekim wanpela samting long yu. Long Naijiria 3-pela strongpela posinman i laik kilim i dai wanpela Witnes Bilong Jehova i no laik lusim taun. Tasol posin bilong ol i no gat strong, olsem na wanpela bilong ol em i pret na i go askim Witnes long marimari long em.

Sapos ol spirit nogut i mekim nogut long yu, yu ken singaut na kolim nem bilong Jehova na em bai lukautim yu. (Sindaun 18:10) Tasol yu mas lusim olgeta wok bilong ol spirit nogut bambai Jehova i ken lukautim yu. Ol Efesus i lotuim God long bipo ol i bin mekim olsem. Ol i kukim olgeta buk bilong ol i stori long marila posin samting. (Aposel 19:19, 20) Ol man i laik i stap wokman bilong God long nau, ol tu i mas rausim olgeta samting i bilong wokim marila o posin o sakim masalai samting. No ken spetim kawarwar o holim skin diwai o pasim salat long bilum bilong “lukautim” yu o pikinini, o mekim narapela pasin olsem em i wok bilong ol spirit nogut.