Ol “Arapela Sipsip” na Kaikai Bilong Bikpela

“[Jisas] yet i mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.”—1 JON 2:2.

1. Ol i autim “dispela gutnius bilong kingdom” na wanem gutpela samting i kamap?

JISAS i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Sampela manmeri i stap long 1914 ol i stap yet na ol inap tokim ol man ol Witnes Bilong Jehova i bihainim gut dispela tok bilong Jisas na ol i bin autim tok long olgeta hap. Na wanem samting i bin kamap? Planti handet tausen manmeri i gat gutpela bel na ol i les long ol wok nogut bilong dispela graun, ol i harim dispela “gutnius” na ol i bilip. Ol i dediket long God Jehova, na givim bel long Kingdom bilong em, na ol i kisim baptais bilong makim dispela dediket bilong ol. Long 1984 inap olsem 179,421 manmeri i bin bihainim gutpela tingting olsem na ol i kisim baptais. I olsem ol i tokim dispela lain i holim nem bilong God, olsem: “Mipela bai go wantaim yupela, long wanem, mipela harim ol i tok God i stap wantaim yupela.”—Sekaraia 8:23, NW.

2. Jisas i mekim wanem pastaim na bihain em i bungim ol “arapela Sipsip”?

² Dispela ‘bikpela lain’ manmeri ol i lotuim Jehova, long olgeta taim lain bilong ol i wok long i go bikpela. Jisas i kolim ol dispela manmeri olsem ol “arapela sipsip” bilong em. (Revelesen 7:9, 15; Jon 10:16) Ol i wetim gutpela samting i kamap bihain—ol i wet long kisim laip i stap oltaim long paradais long graun. (Sam 37:29) Jisas i tok, em i mas bungim “liklik lain sipsip” bilong em pastaim, em i wokim nupela kontrak wantaim ol, na bihain bai em i bungim ol “arapela sipsip” bilong em. (Luk 12:32; Hibru 9:15) Em i laik bungim dispela tupela lain ol i olsem sipsip na bai ol i kamap “wanpela lain sipsip tasol.” Yumi tingim dispela samting na yumi inap kisim gut tok bilong aposel Jon, em i tok: “[Jisas] yet i mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.”—1 Jon 2:1, 2.

Ol i Stretim Tingting

3, 4. (a) Planti ol i bin stretim tingting bilong ol olsem wanem long Kaikai Bilong Bikpela? (b) Wanem insait Bilong tok Bilong Pol, em i tok: “Olgeta taim yupela i kaikai ․․․ na dring”?

³ Planti manmeri nau tasol ol i kam insait long lain “arapela sipsip” bilong Jisas, taim ol i stap long olpela misin bilong ol, ol i bin mekim Misa o kisim komunio planti taim, olsem long olgeta de o olgeta wik o olgeta mun. Tasol nau ol i save, ol Kristen i mas mekim Kaikai Bilong Bikpela wanpela taim tasol long olgeta yia. Bilong wanem yumi mas mekim wanpela taim tasol long olgeta yia? Ol Juda i bin mekim kaikai bilong Pasova wanpela taim tasol long olgeta yia na Jisas i kirapim kaikai bilong Bikpela long apinun long de Pasova, em Naisan 14. Em i tokim ol disaipel: “Yupela i mas mekim olsem bilong tingting long mi.” Na Pol i tok: “Olgeta taim yupela i kaikai dispela bret na dring long dispela kap, yupela i save autim tok long Bikpela i dai pinis. Yupela i mekim olsem, i go inap long taim em i kam bek.” (1 Korin 11:24-26) Insait bilong dispela tok i olsem: Jisas i laik bai ol i mekim kaikai bilong tingim i dai bilong em. Em i laik bai ol i mekim long dispela wanpela de, em De Pasova, long olgeta yia. Olsem bai ol i mekim “olgeta taim.” Ol i mas mekim olsem long olgeta taim kongrigesen Kristen i stap long graun. Ol i mekim planti taim pinis, inap olsem 1,952 taim.

⁴ Na ol “arapela sipsip” i stretim tingting bilong ol long narapela samting tu. Bipo planti ol i save kaikai bret na dring wain long misin bilong ol, tasol nau ol i save ol i bilong lukluk tasol. Bilong wanem ol i no save kaikai na dring? I gat sampela tok bilong Baibel na i stret sampela i kaikai na dring na sampela i lukluk tasol?—2 Korin 13:11; 2 Timoti 3:16, 17.

5. (a) Stori long ol samting man i mas mekim pastaim bambai ofa bilong Krais i ken helpim em. (b) Bilong wanem God i mekim narapela kain wok bilong helpim ol 144,000?

⁵ Maski man i ting em i bilong kisim laip long heven, o em i ting em i bilong kisim laip long Paradais long graun, tasol i gat sampela samting em i mas mekim bambai ofa bilong Krais bilong “tekewe sin” em i ken helpim em. Ol dispela samting em i mas mekim pastaim i olsem: (1) Em i mas kisim stretpela save long Baibel, em tok bilong God (Rom 10:13-15); (2) em i mas bilip (Hibru 11:6); (3) em i mas tanim bel (Matyu 4:17); (4) em i mas senisim tingting (Aposel 3:19); (5) em i mas dediket (Luk 9:23); (6) em i mas kisim baptais (Matyu 28:19). Taim man i mekim pinis ol dispela samting, sapos God i makim em bilong kamap wanpela bilong lain 144,000, dispela “liklik lain,” orait, nau bai God i kirap mekim narapela kain wok bilong helpim dispela man. Bilong wanem God i mas mekim olsem? Bambai dispela man i ken kamap wanpela pikinini spirit bilong God na mekim wok pris na wok king wantaim Krais Jisas. (Revelesen 20:4, 6) Liklik lain tasol bilong ol dispela pikinini spirit bilong God ol i stap yet long graun, olsem lain remnan. I stret ol dispela manmeri i ken kaikai bret na dring wain long Memorial. Ol i liklik lain tasol na ol narapela planti planti Witnes Bilong Jehova ol i save bung long taim bilong Memorial ol i no save kaikai na dring, ol i lukluk tasol.

Pasova na Memorial

6. Olsem wanem na sampela i ting ol “arapela sipsip” tu i mas kaikai bret na dring wain long Memorial? Tasol dispela tingting i kamapim wanem bikpela askim?

⁶ Sampela i tok ol “arapela sipsip” tu i mas kaikai bret na dring wain long Memorial. As bilong dispela tingting bilong ol em olsem: Lo bilong Moses em i piksa o ‘tewel bilong ol gutpela samting i laik kamap bihain,’ na Lo i tok, ol Isrel na ol man bilong narapela ples tu, em ol i stap wantaim ol Isrel na ol i bin katim skin, olgeta i mas mekim kaikai bilong Pasova. Olsem na yupela lain wantaim insait long dispela “wanpela lain sipsip” bilong “wanpela wasman,” olgeta i mas kisim bret na wain long kaikai bilong Bikpela. Em, sampela ol i ting olsem. (Hibru 10:1; Jon 10:16; Nambas 9:14) Tasol dispela tingting i kamapim wanpela bikpela askim, olsem: Pasova em i piksa bilong Memorial o nogat?

7. Long wanem ol samting Pasova i olsem ‘tewel bilong ol gutpela samting i laik kamap bihain’?

⁷ Tru, sampela samting bilong Pasova i olsem piksa na i makim Jisas. Pol i tok, Jisas em i olsem sipsip bilong Pasova. Em i tok: “Long wanem sipsip bilong Pasova bilong yumi, em ol i ofaim pinis. Em Krais.” (1 Korin 5:7) Blut bilong sipsip bilong Pasova, em ol i penim long ol pos bilong dua, dispela blut i baim bek ol namba wan pikinini bilong Isrel na ol i no i dai. Na olsem tasol, blut bilong Krais ol i tromoi long “ol namba wan pikinini bilong God,” em God i raitim nem bilong ol long heven, dispela blut i “baim bek” ol. (Hibru 12:23, 24; Efesas 1:3, 7) Ol i no brukim bun bilong sipsip bilong Pasova, na i no gat wanpela bun bilong Jisas i bruk. (Eksodas 12:46; Sam 34:20; Jon 19:36) Pasova i wanpela samting bilong ol planti samting bilong Lo i olsem piksa o ‘tewel bilong ol gutpela samting i laik kamap bihain.’ Dispela olgeta planti samting na sampela samting bilong Pasova i makim Krais Jisas, em “Pikinini Sipsip Bilong God.”—Jon 1:29.

8-10. (a) Olsem wanem Pasova na Memorial i narapela narapela kain long blut? (b) Olsem wanem ol kontrak bilong Memorial i soim yumi, Pasova na Memorial i narapela narapela kain? (c) Olsem na yumi save long wanem samting?

⁸ Tasol kaikai bilong Pasova em i no piksa tru bilong Kaikai Bilong Bikpela. Olsem wanem na em i no piksa tru? Long Isip, taim ol i kirapim kaikai bilong Pasova, ol i save kaikai bodi o mit tasol bilong sipsip bilong Pasova, ol i no kaikai blut bilong en. Tasol taim Jisas i kirapim kaikai bilong tingim i dai bilong em, olsem Memorial, em i tokim ol disaipel i stap wantaim em long dispela taim, ol i mas kaikai bodi bilong em na dring blut bilong em, em bret na wain i makim dispela tupela samting. (Eksodas 12:7, 8; Matyu 26:27, 28) Long dispela bikpela samting—long blut—Pasova i no piksa bilong Kaikai Bilong Bikpela.

⁹ Na i gat narapela samting yumi mas tingim. Long Kaikai Bilong Bikpela, Jisas i toktok wantaim ol disaipel long tupela kontrak, em “nupela kontrak” na ‘kontrak bilong kingdom.’ (Luk 22:20, 28-30) Dispela tupela kontrak wantaim i samting bilong wok pris na wok king bilong ol manmeri i kaikai bret na dring wain. Bai ol i kamap pris na king na wok wantaim Krais. Tasol long Isrel, ol man bilong narapela ples, em ol i katim skin, ol i no inap kamap pris o king. Long dispela samting tu kaikai bilong Pasova long Isrel i narapela kain long Kaikai Bilong Bikpela.

¹⁰ Orait, nau yumi save long wanem samting? Yumi save, long Isrel, man bilong narapela ples em i katim skin, em i kaikai bret i no gat yis na kumu i pait na sipsip bilong Pasova, tasol dispela i no makim olsem ol “arapela sipsip” bilong Bikpela long nau ol i mas kaikai bret na dring wain long Memorial.

Yumi Mas i Go long Memorial

—Em Bikpela Samting

11. I gat wanem ol bikpela samting na ol “arapela sipsip” i mas i go long Memorial?

¹¹ Olsem na ating i no bikpela samting ol “arapela sipsip” i go long Memorial? Nogat tru! Olgeta sipsip bilong Jisas ol i mas bung long dispela taim, em bikpela samting. Ol “arapela sipsip” i mas tingim ol samting ol i kisim pinis long wanem ol i bilip long blut bilong Jisas, olsem nau ol i stap klinpela long ai bilong Jehova. “Ol i bin wasim klos bilong ol long blut bilong Pikinini Sipsip, na klos i kamap waitpela.” Olsem na ol inap lotu long Jehova long haus holi bilong em “long san na long nait.” (Revelesen 7:14, 15) Na ol i mas tingim dispela samting, olsem: Oltaim ol i mas ‘painim Jehova, na stretpela pasin, na pasin daun’ bambai ol i no ken bagarap long ‘de bilong kros bilong Jehova,’ na bihain bai ol i amamas, long wanem ol i kamap gutpela olgeta. Na taim Jisas i putim Kingdom long han bilong Papa bilong em, bai Jehova i kolim ol stretpela man, bai ol i kamap stretpela man tru.—Sefanaia 2:2, 3; 1 Korin 15:24; Revelesen 20:5.

12. Ol tok yumi harim long Memorial i helpim yumi olsem wanem?

¹² 1 gat narapela bikpela samting tu na yumi mas i go long Memorial, em olsem: Ol tok i tru yumi harim long tok bilong Memorial i olsem sampela hap bilong “olgeta tingting na pasin bilong God i hait pinis long yumi,” na em i olsem “strongpela kaikai em i bilong ol man i kamap bikpela pinis,” i no olsem “susu.” (1 Korin 2:10; Hibru 5:13-6:1) Ol dispela gutpela tok bilong Baibel bai helpim yumi long pilim tru sori bilong Jehova na gutpela wok em i mekim bilong kamapim Kingdom na blesim ol man. Na em i gutpela taim bilong ‘lukluk i go moa yet long Jisas, em i as bilong bilip bilong yumi.’ Yumi no ken ting ol samting Jisas i bin mekim bilong helpim yumi na bikpela pen em i karim i samting nating. Yumi mas pilim tru sori bilong Krais. (Hibru 12:2, 3) Na yumi save, ol gutpela tingting Jisas i toktok wantaim ol aposel long en taim em i kirapim Memorial—olsem ol tingting long pasin bilong i stap wanbel, na pasin bilong sori na bilong litimapim nem bilong Jehova—yumi olgeta i mas tingim dispela, ol “arapela sipsip” na “liklik lain” tu wantaim.

Tingim Gut Olgeta Wan Wan

13. Bilong wanem i bikpela samting yumi mas salim bret na wain i go long olgeta manmeri i kam bung?

¹³ Olgeta manmeri i go long Kaikai Bilong Bikpela ol i mas tingim ol samting Jisas i bin mekim taim em i kirapim dispela Kaikai. Taim narapela i givim bret na wain i go long narapela, dispela samting i helpim ol long pilim tru ol samting holi ol i bin toktok long en long dispela bung. Na olgeta wan wan inap holim na ol i ken kisim dispela bret na wain o lukluk tasol long en na makim olsem ol i bilong lain bilong heven o lain bilong graun.a Sapos kongrigesen i bihainim pasin i stret olsem, bai ol i mekim pasin wankain olsem bilong ol narapela kongrigesen long olgeta hap bilong graun long dispela apinun.—1 Korin 14:40.

14. Sapos wanpela bilong lain remnan em i sik long taim bilong Memorial, ol elda i ken mekim wanem na bai ol i mekim gutpela pasin sori?

¹⁴ Olsem wanem sapos wanpela bilong lain remnan long kongrigesen em i sik na em i no inap i go long Memorial? Ol i mas wok strong long stretim rot bambai wanpela elda i ken kisim bret na wain i go long dispela Kristen i gat sik, na sapos inap, orait, elda i ken mekim sampela liklik tok na bihain em i ken givim bret na wain na bihain em i ken beten. Dispela bai strongim tru sikman! Kain pasin sori olsem i save kirapim olgeta long kongrigesen long mekim pasin sori. (Lukim pes 30 tu.)—Sam 133:1.

15. Stori long sampela samting moa yumi ken mekim bilong mekim gut Kaikai Bilong Bikpela.

¹⁵ 1 gat sampela askim moa tu long pasin bilong mekim Memorial na wanem kain bret na wain yumi mas mekim wok long en. Yu ken lukim pes 20 long hap “Mekim Gut Kaikai Bilong Bikpela,” na bai yu painim bekim bilong ol dispela askim. Ol elda i gat wok long lukautim bung bilong Memorial, ol i mas bihainim gut ol dispela tok.

Skelim Yu Yet

16, 17. (a) Sampela i gat wanem askim long kisim bret na wain bilong Memorial? Husat tasol inap bekim dispela askim? (b) Ol manmeri God i bin makim ol, God i mekim wanem na ol inap save em i bin makim ol?

¹⁶ Tasol sampela ol i tingting planti, long wanem ol i no save i stret ol i kaikai bret na dring wain long taim bilong Memorial o nogat. Ol i gat tupela tingting. Sampela wik paslain long taim bilong Memorial ol i save askim askim long dispela samting. Ol manmeri i gat askim olsem, planti ol i nupela man, nau tasol ol i bung wantaim ol Witnes Bilong Jehova. Olsem wanem? Yu gat askim long dispela samting? Yu no save yu mas kisim bret na wain o nogat? Orait, olsem wanem yu ken save long stretpela pasin yu mas bihainim?

¹⁷ Pol i stori long Kaikai Bilong Bikpela na em i tok: “Man i mas skelim gut bel bilong em yet, na orait, em i ken kaikai dispela bret na dring long dispela kap.” (1 Korin 11:28, 29) Pol i tok, man i mas skelim bel bilong em yet. Olsem na yu yet yu mas skelim, i stret yu kaikai dispela bret na dring dispela wain o nogat. Tru, i no gat rong sapos yu toktok wantaim wanpela strongpela Kristen long dispela bikpela samting, tasol yu yet yu mas tingim yu stap olsem wanem long ai bilong Jehova na Pikinini bilong em, na yu mas skelim gut ol samting yu laik mekim. Ol 144,000 manmeri God i makim ol, ol i no gat tupela tingting. God yet i givim save long ol na ol i save ol i bilong dispela lain. Baibel i tok: “Holi Spirit yet i save helpim spirit bilong yumi na i tokaut ples klia long yumi stap pikinini bilong God.” Spirit bilong God i kirapim tingting long bel bilong ol dispela manmeri bilong lain bilong Krais na ol i save ol i kamap pikinini spirit bilong God. Ol man God i bin makim ol, ol i save God i bin makim ol na ol i no save askim askim long ol narapela man long kongrigesen bambai ol i ken save. Nogat.—Rom 8:15, 16.

18. Stori long sampela samting bilong ol “arapela sipsip” em yumi mas tingim.

¹⁸ Ol samting i bin kamap insait long lain Witnes Bilong Jehova long taim bilong yumi i soim yumi, kirap long 1931 ol i bin tingim moa ol “arapela sipsip.” Na long 31 Me 1935 ol i harim wanpela tok, nem bilong en: “Bikpela Lain Manmeri,”b na ol i kisim save olsem dispela ‘bikpela lain’ aposel Jon i lukim olsem long driman, em ol “arapela sipsip.” Nau ol i tingim gut ol “arapela sipsip,” olsem na yumi save, wok bilong bungim ol manmeri bilong “liklik lain” em i laik pinis. Nau em i taim bilong bungim ol “arapela sipsip.” Long rot bilong dispela lain ol i olsem ‘gutpela wokboi,’ Jisas i kirap mekim dispela wok.—Matyu 24:45-47.

19. Ol nupela man i tok ol i bilong lain bilong heven, gutpela sapos ol i mekim wanem?

¹⁹ Mipela tingim dispela samting, olsem na olgeta manmeri nau tasol ol i bung wantaim lain Witnes na ol i tok ol i bilong lain bilong heven, mipela laik tokim ol olsem: Skelim gut yu yet-yu stap olsem wanem long ai bilong Jehova. Askim yu yet: Mi gat dispela tingting long wanem bipo mi insait long wanpela misin i tok olgeta manmeri long misin bai go long heven? O ating mi laik litimapim nem bilong mi yet o bel bilong mi i kirap nating na mi gat dispela tingting? Pol i tok: “God i no inap giaman.” (Hibru 6:18) Na spirit holi i mekim man i kamap wanpela pikinini bilong God, dispela tu i no inap giaman. Olsem na sapos tru God i bin makim wanpela man na spirit bilong God i bin mekim em i kamap wanpela pikinini spirit bilong God, orait, dispela man i no ken askim askim. Bai em i no gat tupela tingting. Bai em i save tru em i wanpela pikinini bilong God.

Mekim Memorial long 1985

20. Memorial em i bikpela samting long ol Witnes Bilong Jehova?

²⁰ Long olgeta Kristen tru, Kaikai Bilong Bikpela em i nambawan bikpela bung bilong yia. No gat narapela bung i bikpela olsem dispela bung. Em i nambawan bikpela bung na i mekim bikpela wok na ol i wokim long narapela kain pasin. Olsem na taim san i go daun, long olgeta hap bilong graun olgeta kongrigesen bilong ol Witnes Bilong Jehova, ol bikpela kongrigesen na liklik kongrigesen na grup i stap longwe long kongrigesen, olgeta bai bung olsem Bikpela i tok ol i mas mekim.

21. Memorial bilong 1985 i mas mekim wanem long bel bilong lain bilong God?

²¹ Olgeta disaipel ol i olsem sipsip ol i amamas ol inap insait long narapela bung bilong Memorial. Long dispela yia Memorial i mas strongim tru bel bilong olgeta wokboi bilong Jehova. Em i mas kirapim ol long sanap strong, na bai ol inap mekim tok wankain olsem Bikpela bilong ol i bin mekim, em i tok: “Bel bilong yupela i ken i stap strong. Mi winim pinis pasin bilong dispela graun.”—Jon 16:33.

[Ol Futnot]

Yu Tingim—

◻ Olsem wanem Pasova i no piksa tru bilong Memorial?

◻ I gat wanem 6-pela samting man i mas mekim pastaim bambai ofa bilong Krais i ken helpim em?

◻ Bilong wanem i bikpela samting yu mas i go long Memorial?

◻ Bilong wanem i gutpela yu skelim yu yet paslain long taim bilong Memorial?

[Blok long pes 20]

Mekim Gut Kaikai Bilong Bikpela

Bret na Wain

Bret i no gat yis: Yupela yet i ken wokim dispela bret. Wokim olsem: Kisim wanpela kap hap plaua (braunpela plaua bilong wit) na tainim wantaim wanpela kap wara na nau wokim long han na bai em i strong, tasol em i mas malumalum liklik. (No ken putim sol o suga o bekpaura long en.) Tromoi liklik plaua long tebol na putim bret antap long en na krungutim bret long wanpela botol samting na bai i go braitpela nating. Kisim braitpela dis na putim bret long en. Sutim sutim bret long fok na bai planti liklik hul i kamap. Putim insait long aven na kukim olsem yu kukim bret, i go inap long taim bret i strong na braunpela liklik. Sapos yu no gat aven, putim bret antap long hap kapa na kukim long paia.

Wain:Kisim retpela wain i no gat suga samting long en, olsem Chianti o Burgundy o Claret.

Redim Haus Kingdom

Tebol bilong putim bret na wain: Putim klinpela laplap antap long tebol na putim plet na kap o glas long en inap long givim bret na wain long ol manmeri i kam bung. Taim miting i no kirap yet, yu ken brukirn bret na kapsaitim wain long kap o glas. Jisas i no tok yumi mas mekim dispela olsem wanpela pasin bilong lotu. Nogat. Sapos i gat planti binatang samting i stap, ating yu mas karamapim klinpela laplap antap long bret na wain.

Ol man bilong givim bret na wain i go long ol man: Tokim ol gut pastaim long ol samting ol i mas mekim, na bai ol i no ken isi isi tumas o longlong nabaut. Ol i mas givim bret na wain i go long han bilong olgeta, long brata i mekim tok tu na long ol man bilong givim bret na wain long ol man.

Ol atendan: I mas i gat planti atendan i stap long Haus Kingdom paslain long taim miting i kirap, olsem bai ol inap sekanim ol man na givim sia long ol.

Ol plaua: Sapos ol i laik putim sampela plaua, em i gutpela, tasol no ken putim planti tumas na mas putim gut.

Pasin Bilong Wokim Miting

Taim bilong kisim bret na wain: Tok i ken kirap paslain liklik, tasol ol i mas wetim san i go daun pastaim na bai ol i givim bret na wain i go long ol man. Yupela i mas save wanem taim san i go daun long hap bilong yupela long Epril 4.

Tok bilong Memorial: Brata bilong mekim dispela tok em i mas redi gut bambai em i no ken kalapim ol minit bilong en. Em i mas mekim klia dispela tok, na dispela tok i mas strongim olgeta manmeri i kam bung.

[Piksa long pes 18]

Memorial i kirapim ol manmeri long laikim moa yet Jehova wantaim Pikinini bilong em

[Rait long pes 22]

Yumi mas ‘lukluk i go moa yet long Jisas, em i as bilong bilip bilong yumi.’—Hibru 12:2, 3.