Bipo Moses i beten na em i tok: “Yu skulim mipela gut bai mipela . . . i gat gutpela save tru.” (Sam 90:12) Mitupela Mildred i wok long i go lapun na nau mipela i save tru, yumi no ken ting save bilong yumi yet inap helpim yumi. Yumi mas larim gutpela save bilong Jehova i soim rot long yumi bambai yumi inap mekim ol wok i kamapim long ples klia olsem yumi laikim tru Jehova na ol brata. Sapos yumi stap klostu long oganaisesen bilong Jehova, bai Jehova i soim dispela rot long yumi.

Askim

◼ Taim Jisas i laik i dai, em i tok: “God bilong mi, God bilong mi, bilong wanem yu lusim mi?” Ating em i no gat bilip na em i ting God i lusim em o olsem wanem?

Sampela man i kaunim dispela tok long Matyu 27:46 na Mak 15:34 na ol i ting olsem taim Jisas i karim bikpela pen na em i laik i dai, em i lusim bilip. Na sampela i tok, long dispela taim Jisas i stap man bilong graun na yumi mas tingim dispela samting. Ol i tok, sapos wanpela man bilong graun i pilim bikpela pen long skin olsem Jisas i pilim, bai em i krai na singaut olsem. Tasol yumi no ken bihainim tingting bilong ol man long dispela samting; yumi mas save long as tru bilong dispela tok Jisas i mekim. Tru, yumi no inap save long olgeta tingting i kirapim em long singaut na tok olsem, tasol yumi inap save long tupela samting em i tingim na ating dispela i kirapim em long mekim dispela tok.

Jisas i save em i “mas i go long Jerusalem, na em i mas karim planti pen . . . Na bai ol i kilim em i dai, na bihain long tripela de bai em i kirap bek.” (Matyu 16:21) Taim dispela Pikinini bilong God i stap yet long heven em i bin lukim sampela man nating bilong graun ol i holimpas bilip na ol i karim bikpela pen na ol i dai. (Hibru 11:36-38) Tasol taim Jisas−i stap man long graun em i gutpela olgeta,−olsem na yumi save em i no pret long karim pen na i dai; na em i no ting olsem Papa i lusim em, long wanem em i dai long pos pen. Nogat. Taim dispela samting i no painim yet em, em i save “em bai i dai olsem wanem,” olsem ol bai nilim em long pos na kilim em i dai. (Jon 12:32, 33) Na em i bilip tru olsem God bai kirapim bek em long namba tri de. Olsem na yumi save, em i no ting olsem God i lusim em.

Ating em i mekim dispela tok, long wanem em i save God i no lukautim em moa−God i larim em i karim bikpela pen na i dai olsem wanpela man nogut. Em i save God i mekim olsem bilong kamapim long ples klia olsem Pikinini i stap gut olgeta long God−maski wanem wanem traim i painim em, em i stap gut long God. Tasol taim God i larim Seten i stiaim ol birua long mekim nogut long Jisas, i no olsem God i lusim Jisas olgeta. Nogat. Jehova i mekim yet pasin sori long Jisas, olsem na long namba tri de em i kirapim bek Jisas, olsem Jisas i save Em bai mekim.−Aposel 2:31-36; 10:40; 17:31.

Na namba tu samting i kirapim Jisas long mekim dispela tok taim em i laik i dai, em olsem: Ating em i tingting long truim wanpela tok profet Baibel i mekim long Mesaia o Krais. Sampela aua bipo Jisas i bin tokim ol aposel, ol samting i mas painim em “olsem Baibel i tok pinis long em.” (Matyu 26:24; Mak 14:21) Em i laik truim ol tok profet Baibel i mekim long em, ol tok bilong Sam 22 tu. Bilong helpim yu long save gut long dispela samting, yu ken skelim Sam 22:7, 8 wantaim Matyu 27:39, 43; na Sam 22:15 wantaim Jon 19:28, 29; na Sam 22:16 wantaim Mak 15:25 na Jon 20:27; na Sam 22:18 wantaim Matyu 27:35. Sam 22 i olsem wanpela tok profet na i makim planti samting i mas painim Mesaia o Krais, na namba wan tok bilong dispela Sam i olsem: “God bilong mi, God bilong mi! Bilong wanem yu givim baksait long mi?” Olsem na taim Jisas i laik i dai na em i kolim dispela tok, i olsem em i truim narapela tok profet Baibel i bin mekim long em.−Luk 24:44.

Taim Devit i raitim dispela tok long Sam 22, Devit i no ting olsem God bilong em i lusim em. Nogat. Long wanem long ves 22 na 23 em i tok, em bai ‘autim tok long ol brata bilong em na litimapim nem bilong God namel long ol,’ na em i kirapim ol narapela man long litimapim nem bilong Jehova. (Sam 22:22, 23) Na i olsem tasol long Jisas. Jisas i save gut long ol tok bilong Sam 22 na em i bilip tru long God olsem Devit. Em i bilip tru olsem Papa bilong em i orait yet long em na laikim tumas em maski God i larim em i dai long pos pen.