‘Planti Manmeri Bilong God Ol i Kirap’
“GRAUN i guria, na ol bikpela ston i bruk. Na ol ples matmat i op, na planti manmeri bilong God, bipo ol i dai pinis, nau ol i kirap. Ol i lusim matmat, na bihain long Jisas i kirap bek pinis, ol i go insait long taun bilong God. Na planti man i lukim ol.” (Matyu 27:51-53) Wanpela saveman bilong lotu Katolik, em Karl Staab, em i stori long dispela samting i bin kamap taim Jisas i dai na em i tok, dispela samting i “narapela kain tru.” Wanem samting tru i bin kamap?
Sampela tisa bilong Misin long bipo, olsem Epifanias, ol i tok, long dispela taim ol manmeri bilong God i bin kirap bek tru long matmat na i stap laip gen na ol i go wantaim Jisas long heven taim em i kirap bek. Sampela tisa, olsem Ogastin na Tioflaktas na Sigabenas, ol i ting olsem ol dispela manmeri i bin kirap bek inap liklik taim tasol na bihain ol i dai na go bek gen long matmat bilong ol. Tasol wanpela saveman (em Erich Fascher) i tok, i no planti man i bihainim dispela tingting. Long planti Baibel long nau, tok bilong Matyu 27:52, 53 i makim olsem ol dispela manmeri i dai pinis ol i bin kirap bek. Tasol Baibel New World Translation i tanim tok bilong dispela tupela ves olsem: “Na ol matmat i op na bodi bilong planti manmeri bilong God, bipo ol i dai pinis, ol i kirap, (na ol man, em ol i lusim ples matmat bihain long Jisas i kirap bek na ol i go insait long taun bilong God) planti ol i lukim ol.” Long dispela Baibel, dispela tok i kamapim klia ol samting guria i bin mekim. Bilong wanem ol i raitim olsem long dispela Baibel?
Long wanem, maski ol dispela “manmeri bilong God” i husat, Matyu i no tok ol dispela manmeri i kirap; em i tok bodi bilong ol i kirap. Na tu, em i no tok ol dispela bodi i kirap bek na i stap laip gen. Nogat. Hap tok Grik (e·geiʹro) em ol man i tanim olsem “i kirap,” sampela taim dispela tok i no makim man i kirap bek long matmat; em i makim olsem samting i stap insait long hul na ol i “pulim i kam antap,” o i makim man i “kirap” sanap. (Matyu 12:11; 17:7) Guria i kamap long taim Jisas i dai na dispela guria i opim ol matmat na tromoi skin bilong ol man i dai pinis i kam antap. Wanpela man bilong raitim buk (Aelius Aristides), em i bilong lain Grik na em i bin i stap long yia 150 samting bihain long Krais, em i stori long kain samting olsem i save kamap long taim bilong guria. Na long taim bilong yumi, i gat guria long kantri Kolombia long yia 1962 na kain samting olsem i bin kamap.
Olsem na yumi save, dispela tupela ves i stori long ol samting guria i bin mekim taim Jisas i dai, na i no stori long sampela man i dai pinis ol i kirap bek. Na dispela i stret wantaim ol narapela tok bilong Baibel. Long 1 Korin sapta 15, aposel Pol i stori long ol samting i kamapim klia olsem ol man i dai pinis bai ol i kirap bek, tasol Pol i no stori liklik long tok bilong Matyu 27:52, 53 bilong helpim dispela tok. Nogat tru. Ol narapela man bilong raitim Baibel tu, taim ol i stori long samting bilong kirap bek, ol i no stori liklik long tok bilong dispela tupela ves. (Aposel 2:32, 34) Taim Jisas i dai na skin bilong ol man i dai pinis “i kirap,” dispela i no makim olsem ol i kirap bek na i stap laip gen olsem Epifanias i ting, long wanem long namba 3 de bihain long dispela, Jisas i kirap bek na Baibel i tok em i “namba wan man i bin kirap bek.” (Kolosi 1:18) God i makim sampela Kristen long spirit holi bilong kisim laip long heven, em Baibel i kolim ol olsem ‘ol manmeri bilong God’ o ‘ol manmeri bilong Krais,’ na God i tok promis long kirapim bek ol long taim Jisas i kam bek na i stap king; God i no tok long kirapim bek ol long taim bilong ol aposel.—1 Tesalonaika 3:13; 4:14-17.
Planti saveman bilong Baibel i hatwok long kamapim insait bilong tok bilong Matyu 27:53, tasol sampela i tok ol i ting olsem tok bilong Mt 27 ves 52 i stori long guria i bin opim ol matmat na tromoi skin bilong ol man i dai pinis i kam antap, na nau skin bilong ol dispela man nau tasol ol man i bin planim, ol i stap ples klia. Wanpela saveman olsem em bilong Jemani (Theobald Daechsel) em i tanim tok bilong Mt 27 ves 52 olsem: “Na ol matmat i op, na skin bilong planti manmeri bilong God, em ol i slip i stap long matmat, ol i kam antap.”
Orait, ol manmeri “i go insait long taun bilong God” bihain long taim Jisas i kirap bek, ol i husat? Olsem yumi stori pinis, ol dispela skin bilong ol manmeri i dai pinis ol i no kirap bek, olsem na yumi save, Matyu i stori long sampela manmeri i bin i go long dispela ples matmat na ol i lukim ol samting i bin kamap na ol i kisim stori bilong en i go long Jerusalem. Baibel New World Translation i tanim gut tok bilong Matyu 27:52, 53 na ol man i kaunim dispela tok ol inap save, ol dispela man i dai pinis ol i no kirap bek; nogat; guria i tromoi skin bilong ol i lusim matmat na i kam antap. Dispela Baibel i helpim ol man long kisim gut as bilong dispela tok bilong Baibel.