Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • Lukaut Long Pasin Bilong Tingting Nogut Nating Long Man
    Wastaua—1997 | Me 15
    • Lukaut Long Pasin Bilong Tingting Nogut Nating Long Man

      WANPELA man i gat nem long autim tok long televisen, em i bin mekim ol strongpela tok long wanpela wanlain bilong em, long wanem, em i bagarapim marit bilong em. Tasol insait long wanpela yia tasol, ol i painim dispela man yet wantaim wanpela pamukmeri.

      Narapela stori i olsem: Wanpela bikpela gavman i salim sampela mausman i go bilong helpim ol lain i pait long kamap wanbel. Tasol long wankain taim, long pasin hait dispela gavman i salim ol man i go long sampela kantri bilong salim ol gan samting bilong pait i gat bikpela pe inap planti bilion dola.

      Long nau planti man i no sem liklik long mekim pasin giaman, olsem na yumi no kirap nogut long planti man em bipo ol i save bilip long ol narapela, nau ol i no bilip tumas long ol man. Ol i save skelim skelim ol samting ol narapela i mekim na tingting kranki long ol.

      Yumi ol Kristen i mas was gut bambai dispela kain tingting i no ken bagarapim pasin wanbel bilong yumi wantaim ol gutpela brata bilong yumi. Krais Jisas i tok yumi mas “bihainim pasin bilong ol snek, na tingim gut pastaim ol samting [yumi] laik mekim,” tasol em i no tok yumi mas tingting kranki long ol disaipel tru bilong em. (Matyu 10:16) Orait, i gat wanem ol samting nogut bilong dispela pasin bilong tingting nogut nating long man? Yumi mas was gut moa yet long no ken mekim dispela pasin long husat? Na olsem wanem yumi ken lukautim gutpela pasin wanbel bilong yumi wantaim ol wanlotu Kristen?

      Kisim Save Long Samting i Kamap Bipo

      Sapos yumi tingting nogut nating long ol narapela na i no gat as tru bilong en, dispela i wankain olsem yumi skelim pasin bilong ol. I olsem kwiktaim yumi tingting kranki long pasin o toktok bilong ol na yumi ting ol i giaman bilong haitim sampela pasin nogut bilong ol. Planti taim as tru bilong dispela hevi em yumi popaia long skelim ol samting, olsem i bin kamap long wanpela stori i stap long Baibel long Josua sapta 22.

      Ol Israel i bin daunim olgeta birua bilong ol long Graun Bilong Promis, na nau ol i kisim ol hap graun bilong ol. Ol lain bilong Ruben na lain bilong Gat na hap lain bilong Manase, ol i sanapim wanpela “bikpela” alta klostu long wara Jordan. Ol narapela lain i tingting kranki olsem ol i givim baksait long lotu i tru. Ol i ting dispela tripela lain i laik mekim ol ofa long dispela bikpela alta na ol i no laik go long haus sel i stap long Silo, em ples God i makim bilong lotuim em. Ol lain i sutim tok i kirap wantu tasol long redim ol samting bilong i go pait wantaim ol.​—⁠Josua 22:​10-12.

      Gutpela tru na ol i bin salim tok i go long ol brata Israel bilong ol long rot bilong Finias na sampela ol hetman i go wantaim em. Taim ol dispela lain i harim pinis ol rong ol i tok ol i bin mekim, olsem ol i no stap gut long Jehova, na ol i bikhet, na ol i givim baksait long Jehova, ol i kamapim gut as na ol i bin sanapim dispela bikpela alta. Ol i no sanapim bilong mekim ol ofa long en, tasol em bilong stap olsem “wanpela mak” bilong kamapim klia olsem ol lain Israel i wanbel long lotuim Jehova. (Josua 22:​26, 27) Ol hetman i go bek long ples na ol i amamas, long wanem, ol i save ol brata bilong ol i no bin mekim rong. Olsem na bikpela pait i no bin kamap insait long lain Israel na blut bilong ol man i no bin kapsait.

      Tru tumas, dispela stori i skulim gut yumi long yumi no ken hariap long tingting nogut nating long ol narapela! Yumi inap lukim sampela samting na kisim wanpela tingting long en em yumi ting i stret, tasol taim yumi skelim gut dispela samting yumi kisim save olsem tingting bilong yumi i no stret na dispela samting i narapela kain olgeta. Long planti narapela narapela samting bilong i stap bilong yumi ol Kristen, dispela tok em i tru.

      Tingting Bilong Yumi Long Ol Elda

      Taim ol elda i mekim wok bilong ol olsem ol ‘wasman bilong ol sipsip bilong God,’ sampela taim ol i mas givim tok long sampela brata long kongrigesen bilong stretim ol. (Aposel 20:28) Olsem: Sapos wanpela elda i kam tokim yu long sampela pasin bilong pikinini bilong yu, olsem em i save bung wantaim ol poroman nogut, o em i bin mekim pasin i no stret wantaim boipren o gelpren bilong em, bai yu mekim wanem? Bai yu ting elda i gat tingting nogut na yu tokim yu yet olsem, ‘Em i no save laikim famili bilong mipela’? Sapos yu larim ol dispela kain tingting i stiaim yu, ating bihain bai yu bel hevi. Ating pikinini bilong yu inap kisim bagarap long ol samting bilong spirit, na yu mas amamas long ol tok bilong Baibel elda i givim bilong helpim yu.​—⁠Sindaun 12:15.

      Taim wanpela elda long kongrigesen i givim sampela tok bilong stretim yumi, yumi no ken ting em i gat sampela tingting nogut long yumi. Mobeta yumi askim yumi yet olsem wanem dispela tok em i kamapim long Baibel em inap helpim yumi. Aposel Pol i tok: “Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.” (Hibru 12:11) Olsem na yumi mas amamas long tok bilong ol elda na kisim stretpela tingting long en. Tingim dispela samting: I hatwok long yumi kisim ol tok ol elda i givim bilong stretim yumi, na olsem tasol i hatwok long ol elda i givim dispela tok long yumi.

      Tingting Bilong Yu Long Papamama

      Sampela yangpela, taim papamama i pasim ol long mekim sampela samting, ol i save tingting nogut long ol. Ating ol bai tok: ‘Bilong wanem papamama bilong mi i save putim planti lo olsem? Ating ol i no laik bai mi stap amamas.’ Tasol ol yangpela i no ken kisim kain tingting olsem; i gutpela sapos ol i kisim stretpela tingting long samting papamama i mekim.

      Ol papamama i bin lusim planti yia long lukautim ol pikinini bilong ol. Ol i bin lusim planti samting bilong skin na sampela samting moa bambai ol i ken mekim olsem. Yu ting i gat as na ol yangpela i ken ting olsem nau papamama i no laik ol i stap amamas? O ating i stret moa long ting olsem pasin sori i kirapim papamama long was gut long ol pikinini na lukautim ol? Na ating em dispela pasin sori yet i kirapim ol long putim sampela tambu long ol pikinini em ol nupela traim i wok long painim ol long nau, a? Sapos ol pikinini i tingting nogut long gutpela papamama bilong ol, ol i no sori na tenkyu long papamama, nogat tru!​—⁠Efesus 6:​1-3.

      Tingting Bilong Yumi Long Ol Wanlotu

      Planti man i save skelim hariap pasin bilong man, maski ol i no save gut long em, na ol i ting olgeta dispela kain man ol i mas i gat wankain pasin tasol. Olsem wanem sapos bipo yumi bin bihainim dispela kain pasin na yumi bin tingting kranki long sampela kain man? Nogut tingting bilong ol man bilong dispela graun i stiaim yumi long dispela samting, a?

      Olsem: Sapos wanpela brata spirit bilong yumi em i gat gutpela haus na wanpela ka i gat bikpela pe tru, i stret yumi ting em wanpela man bilong laikim tumas ol mani kago samting na em i no painim Kingdom pastaim? Sampela Kristen i gat rot long baim ol samting i gat bikpela pe, tasol dispela i no makim olsem ol i no gat gutpela bel o ol i no “wok pastaim long painim kingdom bilong God.” Ating ol i wok strong tru long mekim ol wok bilong spirit, na ol i save givim bikpela mani samting bilong helpim ol wok bilong Kingdom, tasol ol i no mekim long ai bilong ol brata.​—⁠Matyu 6:​1-4, 33, Nupela Testamen na Ol Sam.

      Long kongrigesen Kristen bilong pastaim, i gat kain kain manmeri​—⁠ol maniman na ol rabisman. (Aposel 17:34; 1 Timoti 2:​3, 4; 6:17; Jems 2:⁠5) God i no save skelim man long mani samting bilong em, nogat. Yumi tu i no ken mekim olsem. Yumi mas laikim tumas ol gutpela wanlotu bilong yumi em ol i bin sanap strong long ol traim na hevi, na yumi no ken mekim gutpela pasin long sampela tasol.​—⁠1 Timoti 5:21.

      Dispela graun i stap aninit long strong bilong Satan, na pasin bilong skelim man long bilas o mani samting bilong em, na pasin bilong tingting nogut long man, em i wok long kamap long kain kain rot. Olsem: Sampela inap ting wanpela man em man bilong kros na pait o man bilong laikim tumas mani kago, long wanem, ol i tingim famili, o skin, o ples bilong em tasol. Tasol yumi ol Kristen i no ken holim kain tingting olsem. Pasin bilong bel nogut long man i narapela kain long yumi, na pasin bilong tingting nogut long man, dispela i no ken stap insait long oganaisesen bilong Jehova. Olgeta Kristen tru i mas bihainim pasin bilong God Jehova, em i “no laikim tru . . . pasin bilong helpim ol wantok tasol.”​—⁠2 Stori 19:7; Aposel 10:​34, 35.

      Pasin Sori i Mas Kirapim Yumi

      Baibel i tokaut klia olsem, “Yumi olgeta man yumi bin mekim sin, na yumi no inap i stap wantaim God.” (Rom 3:23) Olsem na yumi mas tingim ol wanlotu bilong yumi olsem ol man i wok strong wantaim yumi long mekim wok bilong Jehova long pasin em i laikim. Sapos yumi no stap wanbel moa wantaim wanpela brata o sista spirit bilong yumi, long wanem, yumi tingting kranki long ol o bel nogut long ol, gutpela sapos yumi beten askim God long helpim yumi long daunim kain tingting olsem bambai Satan i no ken pundaunim yumi. (Matyu 6:13) Satan i giamanim Iv long ting olsem sampela tingting nogut i stap long bel bilong Jehova na em i no laik bai Iv i stap gut, olsem na em i pasim Iv long mekim sampela samting em bai helpim em long stap fri na stap amamas tru. (Stat 3:​1-5) Taim yumi tingting nogut nating long ol brata bilong yumi, yumi helpim wok bilong Satan.​—⁠2 Korin 2:11; 1 Pita 5:⁠8.

      Sapos yumi gat dispela pasin kranki, yumi mas tingim pasin bilong Krais Jisas. Maski em i Pikinini bilong God i gutpela olgeta, em i no wok long painim sampela tingting nogut long ol disaipel bilong em, nogat. Jisas i bin wok long painim ol gutpela samting long ol. Taim ol disaipel i resis wantaim long stap namba wan, em i no ting olsem ol i gat sampela tingting nogut long bel bilong ol na em i mas makim 12-pela nupela aposel olsem senis bilong ol. (Mak 9:​34, 35) Ol i sinman, olsem na ating pasin bilong ol Juda em ol i bin givim baksait long bilip tru i paulim ol liklik. Ol Juda i save hambak na tingim tumas nem na namba bilong man. Jisas i save olsem ol disaipel bilong em i laikim tumas Jehova, na dispela i bikpela samting i kirapim ol. Pasin bilong ol long givim bel long Jehova na long stap gut long Jisas em i as na ol i bin kisim gutpela pe tru.​—⁠Luk 22:​28-30.

      Sapos yumi tingting kranki long ol gutpela wanbilip bilong yumi, i kain olsem yumi wok long lukim ol long wanpela glas i no klia. Glas i paulim olgeta samting na samting yumi ting yumi lukim, em i no stap tru. Olsem na yumi mas wok long lukim ol brata long glas bilong pasin sori. I gat planti samting i kamapim klia olsem ol wanlotu Kristen i laikim tumas yumi na i stret yumi mas tingim ol na mekim gutpela pasin long ol. (1 Korin 13:​4-8) Yumi mas kamapim pasin sori long ol na lukaut long pasin bilong tingting nogut nating long ol.

      [Piksa long pes 26]

      Yu gat wanem tingting long ol narapela em ol i stap gut long lotuim God?

      [Piksa long pes 27]

      Pasin bilong bilip long narapela na tingim gut narapela i helpim ol Witnes Bilong Jehova long stap amamas olsem wanpela famili

  • ‘Ol i Bihainim Ol Tok Bilong Lotu Ol i Lainim’
    Wastaua—1997 | Me 15
    • ‘Ol i Bihainim Ol Tok Bilong Lotu Ol i Lainim’

      WANPELA meri bilong Maiami, long Florida, Yunaitet Stets, em i salim pas long wanpela nius bilong dispela ples, olsem: “Long Disemba 10, wanpela man i bin stilim paus mani i stap long poket bilong pikinini man bilong mi taim em i stap long maket. Paus i gat laisens bilong draivim ka, na kat bilong Sosel Sekyuriti, na 260 dola, na sampela samting moa.

      “Em i toksave long maneja bilong dispela maket na em i go bek long haus. Long apinun wanpela meri bilong tok ples Spen i ring long em, na wanpela man i save wok long ples bilong ol telefon i tanim tok bilong em, na meri i tok em i painim pinis paus bilong em.

      “Meri i givim atres bilong em long pikinini bilong mi. . . . Meri i givim paus long em, na olgeta samting i stap yet insait long paus, na dispela 260 dola tu.

      “Meri i bin lukim dispela stilman i kisim paus na em i singaut. Stilman i lusim paus na paus i pundaun long graun, na em i ranawe i go. Tasol pikinini bilong mi i go pinis na meri i no inap lukim em, olsem na em i kisim paus i go bek long haus bilong em na em i ring.

      “Em wantaim famili bilong em ol i Witnes Bilong Jehova. Mi lukim olsem ol i save bihainim ol tok bilong lotu ol i lainim.”

      Ol Witnes Bilong Jehova i no save bihainim stretpela pasin na bai ol man i ken litimapim nem bilong ol, nogat. (Efesus 6:⁠7) Ol i gat bikpela laik tru long litimapim nem bilong Papa bilong ol long heven, Jehova. (1 Korin 10:31) Ol i save laikim tumas God na ol narapela man, na dispela i kirapim ol long autim “gutnius” bilong Kingdom bilong God. (Matyu 24:14) Long rot bilong Kingdom, God i tok promis long mekim graun i kamap wanpela naispela paradais tru. Long dispela taim i no dispela naispela paradais tasol bai stap long graun​—⁠stretpela pasin olgeta bai stap long en inap oltaim oltaim.​—⁠Hibru 13:18; 2 Pita 3:​13.

Tok Pisin Pablikesen (1983-2025)
Log Aut
Log In
  • Tok Pisin
  • Serim
  • Preferens
  • Copyright © 2025 Watch Tower Bible and Tract Society of Pennsylvania
  • Ol Lo Bilong Yusim
  • Privacy Policy
  • Ol Praivesi Seting
  • JW.ORG
  • Log In
Serim