Bilong Mekim Wok Long Buk “Toktok Gut Wantaim Ol Man Long Baibel”
Krais Jisas na ol aposel i makim pasin bilong helpim ol man long save long as bilong ol tok bilong Baibel. Taim Jisas i bekim tok long ol man, em i save kamapim tok bilong Baibel, na sampela taim em i mekim ol tok piksa bilong helpim ol man i gat gutpela bel na bai ol i laik long harim tok bilong Baibel. (Mt 12:1-12) Aposel Pol i save ‘toktok wantaim ol man long ol tok i stap long buk bilong God, na em i autim as bilong tok bilong God long ol.’ (Ap 17:2, 3) Dispela buk yu holim em inap helpim yu long mekim olsem.
Dispela buk Toktok Gut Wantaim Ol Man Long Baibel i stori gut long ol askim planti man i kamapim long nau, tasol buk i no mekim planti tok long ol wan wan stori.
Wok bilong dispela buk i no bilong helpim yu long tok pait wantaim ol man i no laik harim tok i tru, na bai yu winim tok. Nogat. Em bilong givim gutpela save long yu bilong helpim yu long toktok gut wantaim ol man i orait long yu mekim olsem. Ating sampela i kamapim sampela askim ol i laik save long bekim bilong en. Na sampela i kamapim bilip bilong ol na ol i tokaut strong long en. Tasol sapos ol i save isi long narapela man na larim em i kamapim tingting bilong em, maski i no wankain olsem bilong ol, orait yu ken toktok gut wantaim ol long ol tok bilong Baibel na yu ken save, ol man i laikim tumas tok i tru bai ol i harim.
Tasol olsem wanem yu inap painim ol tok i stret bilong helpim yu? Planti taim yu inap painim sapos yu opim buk long bikpela het-tok i olsem as bilong dispela tok yu toktok wantaim man long en. Aninit long ol bikpela het-tok yu inap lukim ol bikpela askim bilong en; ol i raitim klia long blakpela rait na i no hatwok long yu lukim. Sapos yu no lukim kwik tok yu laik save long en, orait opim buk long baksait na lukim Lista Bilong Ol Bikpela Tok.
Sapos yu laik toktok wantaim man na yu inap redi pastaim, em gutpela. Maski yu no save gut yet long sampela tok bilong dispela buk, yu ken mekim wok long en. Yu ken painim askim i wankain liklik long tok yu laik toktok wantaim man long en, na lukim ol liklik het-tok i stap aninit long dispela askim. Ol i raitim ol dispela liklik het-tok long narapela kain rait i blakpela. Sapos yu save pinis long sampela samting bilong dispela tok, orait lukim tasol ol liklik het-tok, na lukim kwik ol tok i stap aninit long het-tok, long wanem, ol dispela tok inap givim tingting long yu long olsem wanem yu inap toktok gut wantaim man long dispela tok. Gutpela sapos yu kamapim ol dispela tok long toktok bilong yu yet.
Tasol ating yu laik save long sampela tok bilong Baibel yu ken kamapim, na long rot bilong autim gut as bilong en long man, na sampela tok piksa yu ken mekim, a? Sapos olsem, orait yu ken soim dispela buk long man yu toktok wantaim em, na yutupela i ken lukim hap i stori long askim em i bin kamapim na yutupela i ken kaunim wantaim. Maski yu no bin redim ol dispela tok, yu ken mekim wok long en bilong bekim gut tok long man. Olgeta tok bilong helpim yu em i stap pinis long buk na ol i raitim long pasin i no hatwok long save long en.
Tasol yu mas save, dispela buk i olsem helpim tasol. Tok i gat strong tru em tok bilong Baibel. Em ol tok bilong God. Taim dispela buk i kamapim tok bilong Baibel bilong bekim askim bilong man, kirapim man long lukim olsem dispela tok em bilong Baibel. Sapos inap, tokim em long kisim Baibel bilong em yet na lukim dispela tok, na bai em i ken save, ol tok yu mekim i stap long Baibel bilong em yet. Long sampela Baibel em planti man i laikim, ol i tanim sampela bikpela tok long narapela narapela pasin; sapos olsem, orait buk i kamapim tok bilong ol dispela Baibel bambai man i ken skelim.
Taim aposel Pol i toktok wantaim ol Atens, em i stori long wanpela alta ol i bin raitim tok long en olsem, “Dispela alta em i bilong wanpela god mipela i no save long en,” na Pol i kolim sampela tok bilong ol saveman bilong ol. (Ap 17:22-28) Olsem na dispela buk i kamapim tu tok bilong ol buk i stori long ol samting bilong bipo, na ol buk i stori long lotu, na ol dikseneri samting. Olsem na taim buk i mekim sampela tok long as bilong sampela pasin bilong ol lotu giaman, o long as bilong sampela bilip, o buk i kolim insait bilong sampela hap tok Hibru na Grik, buk i no tok nating; em i kolim wanem ol buk ol i bin kisim ol dispela tok long en. Tasol buk i kirapim ol man long tingim Baibel, em as tru bilong ol tok i tru.
Long kirap bilong dispela buk i gat sampela samting moa bilong helpim yu long autim tok i tru bilong Baibel long ol man. I gat lista bilong sampela tok bilong helpim yu long “Kirapim Tok Taim Yu Autim Tok,” na bilong helpim yu long “Bekim Tok Long Man i Katim Tok.” Na bilong bekim tok long man i kamapim wanpela bilip na katim tok, yu ken lukim pinis bilong hap bilong buk i stori long dispela bilip. I no olsem yu mas lainim lainim ol dispela tok na kolim nating. Nogat. Tasol yu ken skelim bambai yu inap save olsem wanem ol dispela tok i bin helpim ol narapela. Na yu ken kolim long toktok bilong yu yet.
Sapos yu mekim wok long dispela buk, dispela inap helpim yu long toktok gut wantaim ol man long Baibel na bai ol inap kisim save long “ol strongpela wok bilong God.”—Ap 2:11.