Sapta 18
Yumi Mas Bihainim Pasin Bilong God Insait Long Famili
TAIM yumi kirap lainim tok bilong Baibel, yumi bin kisim save long sampela gutpela tok i tru bilong marit na famili. Yumi kisim save olsem Jehova em i As bilong marit, na em i putim ol gutpela tok long Baibel bilong soim rot long ol famili. Planti manmeri, bipo ol i no marit tru, ol i sindaun nating wantaim, olsem mekim pasin pamuk, tasol nau ol i bihainim tok bilong Baibel na ol i lusim dispela pasin nogut na ol i rejistaim marit bilong ol long gavman. Tasol i no dispela samting tasol—i gat planti samting moa famili Kristen i mas mekim. Yumi mas save, taim yumi marit dispela i bilong oltaim, na yumi mas mekim ol wok bilong yumi insait long famili, na mekim stretpela pasin long ol narapela insait long famili.—Ef. 5:33–6:4.
2 Planti milion manmeri ol i save long ol dispela tok bilong Baibel, tasol taim hevi i kamap insait long famili bilong ol yet, ol i no bihainim. Olsem wanem long yumi? Jisas i krosim sampela man ol i ting ol inap lotuim God long maus tasol na ol i kalapim lo bilong God i tok pikinini i mas bihainim tok bilong papamama. Yumi no laik bihainim pasin bilong ol. (Mt. 15:4-9) Yumi no laik kamap man bilong bihainim pasin bilong God long skin tasol na yumi no bihainim ol lo bilong God insait long famili. Nogat. Yumi laik bihainim tru pasin bilong God na bai yumi “gat planti gutpela samting.”—1 Ti. 5:4; 6:6; 2 Ti. 3:5.
Marit Em i Bilong i Stap Hamas Yia?
3 Long nau planti manmeri i brukim marit. Sampela man na meri ol i marit longtaim, olsem 20 o 30 o 40 yia samting, ol i brukim marit na maritim nupela poroman. Na planti yangpela ol i marit inap sampela mun tasol na ol i katim marit. Tasol maski ol narapela man i mekim pasin olsem, yumi ol manmeri i lotuim Jehova, yumi mas bihainim pasin em i laikim. Orait, Baibel i tok wanem long marit?
Taim man na meri i marit, tupela i mas ting long i stap wantaim inap long wanem taim? (Rom 7:2, 3; Mak 10:6-9)
Long ai bilong God i gat wanem as tasol bilong katim marit? (Mt. 19:3-9; 5:31, 32)
Man i katim nating marit na i no stret wantaim Baibel, Jehova i ting olsem wanem long dispela? (Mal. 2:13-16)
Sapos hevi i kamap insait long marit, Baibel i tok narapela i ken lusim narapela bilong stretim dispela hevi o olsem wanem? (1 Ko. 7:10-13)
4 Olsem wanem na marit bilong sampela i wok gut, na marit bilong sampela—insait long lain Kristen tu—i bruk? Sapos man na meri i wet pastaim na tupela i marit taim tupela i bikpela pinis na i gat gutpela tingting, orait dispela inap helpim tupela long pas gut wantaim. Narapela bikpela samting, em olsem: Yu mas painim wanpela poroman i gat wankain tingting na laik, na yu inap toktok gut wantaim em long olgeta samting. Tasol bikpela samting tru i olsem: Tupela wantaim i mas givim bel tru long Jehova na bihainim pasin bilong em. Sapos tupela i laikim tumas Jehova na ol i bilip olsem pasin bilong Jehova i stret, bai i gat gutpela as bilong stretim ol hevi i kamap insait long marit bilong tupela. (Sam 119:97, 104; Pro. 22:19) Kain man na meri olsem i no ting sapos hevi i kamap em i ken lusim poroman o katim marit. Nogat. Em i no sutim tok long ol liklik pasin kranki bilong poroman bambai em i ken abrusim wok bilong em yet insait long marit. Nogat. Bai em i lain long skelim gut ol hevi i kamap na painim rot bilong stretim.
5 Yumi save, Seten i tok taim pen na hevi i painim yumi bai yumi sakim pasin bilong Jehova na bihainim pasin yumi yet i ting em i gutpela. Tasol ol manmeri i stap gut long Jehova ol i no save mekim olsem. (Jop 2:4, 5; Pro. 27:11) Planti Witnes Bilong Jehova, em poroman bilong ol i no bilip na i mekim nogut long ol, tasol ol i no lusim poroman bilong ol. (Mt. 5:37) Sampela ol i karim dispela hevi inap planti yia na bihain poroman bilong ol i tanim bel na i kirap mekim wok bilong Jehova wantaim ol na ol i amamas. (1 Ko. 7:16; 1 Pi. 3:1, 2) Tasol sampela ol i bin bihainim ol lo bilong Jehova na poroman bilong ol i no tanim bel, o poroman i lusim ol long wanem ol i holimpas bilip, tasol ol i save ol i bin kisim planti blesing. Olsem wanem ol i bin kisim blesing? Long wanem ol samting i bin painim ol i lainim ol long putim hevi bilong ol long Jehova na bilip moa yet long Em. Ol i lain long bihainim pasin bilong Jehova long olgeta taim—long taim bilong hevi tu. Wokabaut
bilong ol dispela manmeri i kamapim ples klia strong bilong pasin bilong givim bel long God.—Sam 55:22; Jems 1:2-4; 2 Pi. 1:5, 6.
Olgeta Wan Wan i Mekim Wok Bilong Em
6 Taim man na meri i marit, tupela i sindaun wantaim, tasol i gat planti samting moa tupela i mas mekim bambai marit bilong ol i ken wok gut. Olgeta long famili i mas save, God i givim wok long man long i stap het bilong famili. Sapos ol i tingim gut dispela samting, bai ol inap sindaun gut wantaim na i stap bel isi.—1 Ko. 11:3; Ta. 2:4, 5; Pro. 1:8, 9; 31:10, 28.
7 Man i mas mekim dispela wok bos bilong em olsem wanem? Em i mas bihainim pasin bilong Krais. Krais i strong long bihainim pasin bilong Jehova; em i laikim tumas stretpela pasin na i nolaik tru long pasin bilong sakim lo. (Hi. 1:8, 9) Krais i laikim tumas kongrigesen o lain bilong em; em i soim rot long ol na lukautim ol. Em i no gat pasin antap; em i save tingim gut ol narapela man. Em i save “mekim pasin isi long ol man” na daunim em yet. Ol man i stap aninit long em ol i stap gutpela, olsem ol i ‘kisim malolo.’ (Mt. 11:28, 29; Ef. 5:25-33) Taim papa i mekim kain pasin olsem long meri pikinini bilong em, em i daun long Krais na bihainim pasin bilong God olsem Krais i bin mekim. Ol mama Kristen tu i mas bihainim ol dispela gutpela pasin long ol wok ol i mekim bilong lukautim pikinini bilong ol.
8 Tasol yumi olgeta i gat pekato na sampela taim hevi i kamap. Ating taim famili i no kirap yet long bihainim ol lo bilong Baibel, ol i bin lain long pasin bikhet na ol i no laik bai narapela man i givim tok long ol o bosim ol. Taim papa i tokim famili long mekim wanpela wok samting, maski em i mekim gutpela tok isi, tasol ol i no laik harim. Yumi save Baibel i tok, yumi mas “rausim olgeta pasin bilong bel nogut, na kros, na belhat, na bikmaus.” (Ef. 4:31) Tasol olsem wanem sapos sampela i no laik harim tok? Ating yumi mas kros na bikmaus? Nogat. Taim ol man i putim bikpela hevi long Jisas, em i mekim wanem? Em i no bihainim pasin bilong ol man i toknogutim em na tok long kilim em i dai. Em i givim em yet long han bilong Papa bilong em; em i wetim Papa i helpim em. (1 Pi. 2:22, 23) Yumi tu, taim hevi i kamap insait long famili, sapos yumi beten askim Jehova long helpim yumi na yumi no bihainim pasin bilong graun, orait, yumi kamapim bel bilong yumi, yumi givim bel long God na bihainim pasin bilong em.—Pro. 3:5-7.
9 Ating pasin bilong famili i no ken senis kwiktaim, tasol sapos yumi bihainim ol tok bilong Baibel, bai senis i kamap. Planti man marit, pastaim ol i save sutim tok long ol liklik pasin kranki bilong meri bilong ol, tasol taim ol i save gut long pasin sori Krais i bin mekim long kongrigesen, orait ol i kirap senisim pasin bilong ol. Kongrigesen o lain bilong Krais ol i no nambawan olgeta. Tasol Krais i laikim tumas ol na i stap olsem gutpela piksa bilong ol, na em i lusim laip bilong em bilong helpim ol, na em i skulim ol long tok bilong Baibel bambai ol i ken stretim pasin bilong ol na bai em i ken amamas long olgeta pasin bilong ol. (Ef. 5:25-27; 1 Pi. 2:21) Pasin em i mekim i kirapim planti man marit long lain Kristen na ol i stap olsem gutpela piksa bilong famili bilong ol, na long pasin sori ol i helpim famili long stretim pasin bilong ol. Kain gutpela pasin olsem i winim pasin bilong kros kros na toktok planti o pasin bilong pasim maus tasol na i no laik toktok.
10 Tasol ating sampela pasin kranki bilong papa yet i kamapim hevi insait long famili. Olsem wanem sapos em i no pilim ol samting em i mas mekim bambai ol i ken i stap belgut na amamas? O sapos em i no strong long bungim famili bilong toktok wantaim long tok bilong Baibel o bilong mekim ol narapela wok? Sampela famili ol i bin toktok gut wantaim long dispela hevi na bihain papa i kirap mekim gut ol dispela wok bilong em. (Pro. 15:22; 16:23; 31:26) Tasol sapos gutpela samting olsem i no kamap, olgeta wan wan i ken wok long bihainim ol gutpela pasin em spirit bilong God i save kamapim na tingim gut ol narapela long famili, na dispela samting bai helpim famili long i stap wanbel. Yumi no ken wetim ol narapela i kirap mekim gut wok bilong ol insait long famili. Nogat. Yumi yet i mas kirap long mekim, na bai yumi kamapim ples klia olsem yumi bihainim pasin bilong God insait long famili.—Kl. 3:18-20, 23, 24.
Rot Bilong Painim Bekim
11 Ol man i bihainim kain kain rot bilong kisim tingting long ol samting ol i mas mekim insait long famili. Tasol gutpela tok tru bilong helpim yumi em ol tok bilong God long Baibel. Na yumi tenkyu long God, long wanem long rot bilong oganaisesen bilong em long graun em i helpim yumi long bihainim ol dispela gutpela tok. Yu bihainim ol dispela tok bilong helpim yu?—Sam 119:129, 130; Mai. 4:2.
12 Yu save go long ol miting bilong kongrigesen, tasol yu makim taim tu bilong famili i ken stadi wantaim na lainim tok bilong Baibel? Ol famili i mekim olsem long olgeta wik ol i wanbel long lotuim God. Na sindaun bilong famili i kamap gutpela, long wanem ol i save toktok wantaim long ol samting ol yet i ken mekim bilong bihainim tok bilong God.—Lukim Diuteronomi 11:18-21.
13 Ating yu gat askim long sampela samting bilong marit o famili? Olsem: Ating yu laik save, i stret Kristen i ken mekim sampela samting bilong pasim bel bambai ol i no ken kamapim planti tumas pikinini? I stret Kristen i katim rop samting long bel bambai em i no inap kamapim moa pikinini o nogat? Sapos mama i gat bel na dokta i tok, pikinini bai kamap nogut, i orait mama i rausim bel o nogat? I gat sampela tambu long pasin tupela marit i mekim taim ol i slip wantaim? Sapos wanpela yangpela i gat 15, 16 krismas samting na em i no tingim tumas ol samting bilong God, papamama i mas strong long em i lotu wantaim famili o nogat? Ating yu gat sampela tingting long ol dispela askim. Tasol yu save long tok bilong Baibel long ol dispela samting? Wastaua i bin stori long ol dispela askim. Gutpela sapos yu lain long lukim Indeks long Wastaua na painim bekim bilong ol kain askim olsem. Sapos yu no gat ol olpela Wastaua, yu ken lukim long Haus Kingdom. Yu no ken ting bai yu painim bekim olsem “I stret” o “I no stret” long olgeta askim. I gat sampela samting yu yet yu mas skelim, o yutupela marit yet i mas skelim. Tasol taim yu tingim ol samting yu laik mekim, yu mas tingting long mekim ol samting i kamapim bel bilong yu, yu laikim tumas Jehova na famili bilong yu, na yu laik mekim pasin God i laikim. Sapos yu mekim olsem bai Jehova na ol man i save gut long yu ol i ken save, yu bihainim tru pasin bilong God taim yu stap long ai bilong ol man na insait long famili tu.—Ef. 5:10; Rom 14:19.
Stori Gen Long Ol Dispela Tok
● Taim yumi stap gut long marit bilong yumi, olsem wanem yumi stap gut long Jehova tu?
● Taim sampela hevi i kamap insait long famili na dispela i givim hevi long yumi, wanem samting inap helpim yumi long bihainim pasin God i laikim?
● Sapos ol narapela long famili i no mekim gutpela pasin, yumi ken mekim wanem bilong helpim famili long i stap amamas?
[Askim Bilong Stadi]
1. (a) Planti man i kisim save long ol lo bilong Jehova long marit na bihain ol i mekim wanem? (b) Tasol i gat wanem samting moa famili Kristen i mas mekim?
2. (a) Ol man i save long tok bilong Baibel, olgeta i bihainim insait long famili o nogat? (b) Jisas na Pol i tok wanem na yumi save em i bikpela samting yumi mas bihainim tok bilong Baibel insait long famili?
3. (a) Wanem samting i kamap long planti marit long nau? Tasol yumi mas mekim wanem? (b) Lukim ol tok bilong Baibel na bekim ol askim long dispela paragraf, olsem marit i bilong sampela mun o yia tasol o olsem wanem.
4. Planti marit long nau i bruk, tasol olsem wanem na sampela marit i wok gut na i no bruk?
5. (a) Pasin bilong i stap gut long Jehova, dispela inap helpim marit bilong yumi olsem wanem? (b) Maski poroman i mekim nogut tru long yumi, tasol sapos yumi holimpas ol lo bilong God, olsem wanem dispela inap helpim yumi?
6. Yumi mas tingim gut wanem samting na bai marit bilong yumi inap wok gut?
7. Papa i mas mekim wok bos bilong em olsem wanem?
8. (a) Olsem wanem na long sampela famili i olsem pasin Kristen i no helpim ol long bihainim tok? (b) Sapos kain samting olsem i kamap insait long famili bilong yumi, yumi mas mekim wanem?
9. Planti man marit long lain Kristen ol i lusim pasin bilong kros kros long ol liklik pasin kranki bilong poroman bilong ol na ol i lain long mekim wanem?
10. (a) Sampela papa bilong famili—na sampela papa i tok ol i Kristen—ating ol i mekim wanem na ol i putim hevi long famili? (b) Famili i ken mekim wanem bilong stretim dispela hevi?
11, 12. (a) Jehova i givim wanem samting long yumi bilong helpim yumi long stretim ol hevi i save kamap insait long famili? (b) Yumi mas mekim wanem na bai ol dispela samting inap helpim tru yumi?
13. (a) Sapos yumi gat askim long sampela samting bilong marit o famili, planti taim yumi ken painim bekim we? (b) Taim yumi tingim ol samting yumi laik mekim, dispela i mas kamapim wanem tingting bilong yumi?