Yu Ting Baibel i Tok God i Makim Pinis Ol Samting i Mas Painim Yu?

BAGARAPIM nem bilong man! Taim man i gat biknem em i ting sampela man i bin sutim tok giaman long em na bagarapim nem bilong em, ating em i gat strongpela laik long stretim bek gutnem bilong em. Na ating em bai kotim ol man i bin mekim kain tok olsem.

Orait, dispela tok olsem God i makim pinis ol samting i mas painim yumi, dispela tok i save bagarapim nem bilong God i Gat Olgeta Strong. Dispela bilip i olsem: God yet em i as bilong olgeta bagarap na hevi i save painim ol man. Sapos yu bilip long dispela samting, long tingting bilong yu ating yu ting olsem i gat wanpela lista em King bilong heven na graun i bin wokim bilong ol samting i mas kamap, olsem: ‘Nau, Jon bai kisim bagarap long ka, Fatou bai kisim sik malaria, bikpela win na ren bai bagarapim haus bilong Mamadou’! Olsem wanem? Bel i kirapim yu long mekim wok bilong kain God olsem?

Tasol ol man i bilip olsem God i makim pinis ol samting i mas painim yumi na i no gat rot bilong abrusim, ating ol i laik save, ‘sapos God i no gat asua long ol hevi bilong yumi ol man, orait, husat i gat asua?’ Long stori i kamap pastaim, yangpela man Ousmane em tu i bin tingim dispela askim. Tasol em i no bin tingting nabaut na bai em inap save long tok i tru, nogat. Long rot bilong Tok Bilong God, em Baibel, em i kisim save olsem God i bin mekim gut nem bilong Em na kamapim klia olsem dispela tok ol man i bin sutim long em, em i giaman. (2 Timoti 3:​16) Orait, nau yumi ken tingim Baibel i tok wanem long dispela samting.

Husat i Gat Asua?

Ol man i save tok, bikpela tait, bikpela win na ren, guria​—⁠kain bagarap olsem em wok bilong God. Tasol Baibel i no tok God em i as bilong ol dispela bagarap. Tingim wanpela bagarap i bin kamap planti handet yia i go pinis long hap bilong Midel-Is. Baibel i tok, wanpela man tasol i bin abrusim dispela bagarap na em i bin toksave olsem: “Klaut i pairap bikpela moa na i kilim ol sipsip na wasman, na olgeta i dai pinis.”​—⁠Jop 1:​16.

Dispela man em i pret nogut tru na ating em i ting olsem God yet i bin kamapim dispela klaut, tasol Baibel i soim olsem, God i no gat asua long en. Sapos yu kaunim Jop 1:​7-​12, bai yu kisim save olsem dispela klaut i no wok bilong God, nogat; em wok bilong Birua bilong God​—⁠Satan! Tru, i no olsem olgeta bagarap em wok bilong Satan, nogat. Tasol i no gat as na yumi ken tok God i gat asua.

Taim ol hevi i kamap, planti taim ol man yet i gat asua. Sapos man i bin lus long mekim sampela wok long skul o long ples wok, o em i no sindaun gut wantaim ol narapela man, ating as bilong dispela i olsem: man i no bin wok strong long mekim wok, o em i no bin skul gut, o em i no bin tingim gut ol narapela. Na i wankain tu taim sik o bagarap o indai i painim man; ating as bilong dispela i olsem man i no bin was gut. Olsem na sapos man i pasim let bilong sia insait long ka, ating dispela inap lukautim skin bilong em na sapos ka i bam, em inap abrusim bagarap. Tasol sapos em “laik” bilong God na man i mas i dai long dispela taim, ating let bilong sia i no inap helpim em. Na sapos man i gat gutpela marasin na gutpela toilet, ating dispela samting tu bai helpim man long abrusim i dai taim em i no lapun yet. Na sampela bagarap, em ol man i tok em “wok bilong God,” i no wok bilong em, nogat; em wok bilong man, long wanem, man i no bin lukautim gut graun.​—⁠Skelim wantaim KTH 11:⁠18.

“Taim Nogut”

Tru, i gat planti hevi i save kamap na yumi no save long as bilong en. Tasol tingim tok bilong Baibel long Saveman 9:​11: “Mi bin lukim wanpela samting moa long dispela graun. Ol man i save ran strong tumas i no save winim resis. Ol strongpela soldia i no save winim pait. Ol man i gat gutpela tingting o bikpela save, ol i no save kisim planti mani samting. Na ol hapman bilong kain kain wok, ol i no save kisim ol bikpela wok. Taim nogut i save painim yumi olgeta.” Olsem na i no gat as bilong yumi ken ting Man bilong wokim heven na graun em i save kamapim ol bagarap, o taim man i kisim bagarap dispela i olsem strafe God i givim long em, nogat.

Krais Jisas i kamapim klia olsem God i no makim pinis ol samting i mas painim yumi ol man. Em i stori long wanpela bagarap i bin kamap na ol man i harim tok bilong em ol i save long en. Jisas i tok: “Dispela 18 man, bipo longpela haus long Siloam i bin pundaun antap long ol na i kilim ol i dai, em yupela i ting rong bilong ol i winim rong bilong ol arapela man i stap long Jerusalem, a? Nogat tru.” (Luk 13:​4, 5) Jisas i no tok God yet i mekim na dispela samting nogut i bin painim ol, nogat; dispela samting i kamap nating tasol, long wanem, “taim nogut” i save painim olgeta man.

Ol Samting Nogut Sin i Kamapim

Tasol olsem wanem taim dai o sik i kisim man na i olsem i no gat as tru bilong en? Baibel i tok stret olsem: “Olgeta man bilong lain bilong Adam ol i save dai.” (1 Korin 15:22) Kirap long taim Adam i sakim tok bilong God, dai i bin kisim olgeta manmeri. Olsem God i toksave pinis, Adam i dai na em i givim dai long olgeta pikinini bilong em. (Stat 2:​17; Rom 5:​12) Olsem na namba wan tumbuna bilong yumi, Adam, em i as bilong olgeta sik. Yumi kisim ol pasin kranki long Adam, na dispela tu em i as na yumi save bel hevi o sampela wok bilong yumi i no kamap gutpela.​—⁠Song 51:⁠5.

Tingim ol man i stap rabis. Sapos ol i bilip olsem God i makim ol long i stap rabis, ating i no gat wanpela samting ol inap mekim bilong helpim ol yet, a? Ol i bilip olsem, ‘Em samting God i makim pinis bilong mipela.’ Tasol Baibel i kamapim klia olsem, ol dispela samting i bin kamap long rot bilong ol pasin kranki i stap long skin bilong man​—⁠God i no bin makim olsem ol i mas i stap rabis, nogat. Sampela man i kamap rabisman, long wanem, ol i lesman o ol i no bin bosim gut ol samting bilong ol​—⁠i olsem samting ol i planim, dispela samting tasol ol i kamautim. (Galesia 6:7; Sindaun 6:​10, 11) Na planti milion man i stap rabis, long wanem, sampela bikman i laikim tumas mani ol i bin nogutim tru ol. (Skelim wantaim Jems 2:⁠6.) Baibel i tok: “Sampela bikman i wok long daunim ol arapela manmeri na mekim nogut long ol.” (Saveman 8:⁠9) I no gat wanpela samting i makim olsem God i gat asua na ol man i stap rabis o God i makim sampela bilong i stap rabis, nogat.

Dispela Bilip i Kamapim Ol Samting Nogut

Na i gat narapela samting tu na yumi ken save God i no bin makim ol samting i mas painim ol man: Dispela bilip inap nogutim ol man. Krais Jisas i tok: “Olgeta gutpela diwai i save karim gutpela kaikai. Na diwai nogut i save karim kaikai nogut.” (Matyu 7:​17) Orait nau yumi ken tingim wanpela “kaikai” bilong dispela bilip, olsem: Man i no pilim olsem i gat sampela samting em wok bilong em yet long mekim.

Bikpela samting em man i mas pilim i gat sampela samting em wok bilong em yet long mekim. Dispela em i wanpela samting i save kirapim ol papamama long lukautim pikinini bilong ol, na i kirapim ol wokman long mekim gut wok bilong ol, na ol kampani long wokim ol gutpela samting. Sapos man i bilip olsem God i makim pinis ol samting i mas kamap, ating dispela inap mekim na man i no tingim olsem em wok bilong em yet long mekim gut dispela wok. Olsem: Sapos stia bilong ka i bagarap liklik, na papa bilong ka i save tingim ol man, orait, em bai stretim dispela stia, long wanem, em i save tingim laip bilong em yet na ol pasindia. Tasol sapos man i bilip olsem God i makim pinis ol samting i mas kamap, orait, ating bai em i no mekim wanpela samting bilong stretim ka; bai em i ting olsem, sapos i no ‘laik bilong God,’ orait, ka i no ken bam na bagarap!

Tru tumas, sapos man i bilip olsem God i makim pinis ol samting i mas painim ol man, ating dispela inap mekim na man i no was gut, na em i les, na taim em i mekim rong, em i save tok em i no gat asua, na dispela bilip i kamapim planti narapela pasin nogut.

I Pasim Yumi Long Go Klostu Long God?

Na wanpela bikpela samting tru i olsem: Sapos man i bilip olsem God i makim pinis ol samting i mas kamap, dispela inap mekim na em i no pilim olsem em i gat wok bilong bihainim tok bilong God. (Saveman 12:13) Man bilong raitim Song i kirapim olgeta man long ol i mas “traim na lukim na bai [ol] i save olsem Bikpela i gutpela tru.” (Song 34:⁠8) God i tokim yumi long ol samting yumi mas mekim na bai yumi ken kisim ol gutpela samting long em.​—⁠Song 15:​1-5.

Wanpela samting God i tokim yumi long mekim, em yumi mas hevi long ol rong bilong yumi na tanim bel. (Aposel 3:​19; 17:30) Olsem na yumi mas tokaut long ol rong bilong yumi na senisim sampela pasin. Yumi ol man i gat sin, olsem na yumi olgeta i bin mekim planti rong em yumi mas hevi long en na tanim bel. Tasol sapos man i bilip olsem God i bin makim em long mekim ol dispela rong, ating bai em i hatwok long pilim olsem em i mas tanim bel o tok em i gat asua, a?

Man bilong raitim Song em i stori long God olsem: “Laip bilong dispela graun i gutpela tasol marimari bilong yu i nambawan tru.” (Song 63:⁠3) Tasol dispela bilip olsem God i makim pinis ol samting i mas kamap, dispela i bin kirapim planti milion man long bilip olsem God yet em i as bilong ol samting nogut i bin painim ol. Dispela i mekim na ol i bel nogut long em, na dispela i pasim rot long ol inap go klostu long Man i bin wokim ol. Tru tumas, sapos man i pilim olsem God i bin kamapim ol hevi bilong em, olsem wanem em inap laikim God? Olsem na dispela bilip olsem God i makim pinis ol samting i mas painim ol man long bihain, i olsem wanpela banis i pasim man long i go klostu long God.

Em i Fri Long Dispela Bilip Nogut

Yangpela Ousmane, yumi stori pastaim long em, em i bin bilip olsem God i makim pinis ol samting i mas painim em. Tasol taim ol Witnes Bilong Jehova i helpim em long skelim tingting bilong em wantaim Baibel, dispela i kirapim Ousmane long lusim dispela bilip. Dispela i mekim na em i pilim olsem wanpela hevi i bin lusim em na em i kisim nupela na stretpela tingting long ol samting. Na bikpela samting moa, em i kisim save olsem Jehova em i God ‘bilong marimari na sori. Na em i no save belhat kwik. Em i save laikim tru olgeta manmeri, na em i save bihainim olgeta tok bilong em.’​—⁠Kisim Bek 34:⁠6.

Na Ousmane i kisim save olsem, tru, God i no makim olgeta liklik liklik samting i mas painim yumi, tasol God i gat wanpela laik em bai kamapim long bihain.a Namba Tu Pita 3:​13 i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” Ol Witnes Bilong Jehova i bin helpim planti milion manmeri long bilip olsem ol inap insait long lain bilong dispela “nupela graun” em God i tok promis pinis long kamapim, na bai ol i stap oltaim. Ol i laik helpim yu tu.

Taim yu wok long kisim stretpela save long Baibel, bai yu save olsem God i no bin makim ol samting i mas painim yu na yu no inap abrusim, nogat. Ol tok Moses i givim long ol Israel bilong bipo i stret olsem: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim.” (Lo 30:​19, 20) Tru tumas, yu yet inap tingim na makim wanem samting bai painim yu long bihain. God i no makim pinis ol samting i mas painim yu, nogat.

[Futnot]

[Ol Piksa long pes 6, 7]

Ol dispela bagarap i no ‘wok bilong God’

[Ol Kredit Lain]

U.S. Coast Guard photo

WHO

UN PHOTO 186208 /M. Grafman