Olsem Wanem Yu Ken Abrusim Bagarap Long Ples Nogut?

MARIA, wanpela meri bilong Brasil, em i tok: “Mi save pret long olgeta taim. Taim mi stap long lift, mi pret. Taim mi stap long ka, mi pret. Taim mi stap long haus, mi pret. Pasin raskol i kamap long olgeta hap. Oltaim ol i save hansapim ol man.” Yu olsem dispela meri Brasil? Yu stap long ples nogut i gat planti raskol? Yu pret oltaim, na yu save pret tru long taim bilong tudak?

Sampela man i amamas long kaunim stori nating long polis i painimaut husat i mekim rong na ol i holim em. Tasol i no planti taim ol samting i save kamap tru olsem. Planti taim polis i no inap painimaut husat i mekim rong, o husat i kilim man i dai; na ol famili bilong man i dai, olsem meri bilong em, o pikinini, o papa, o mama, ol i bel hevi i stap na i no inap mekim wanpela samting. Olsem wanem? Pasin bilong stil na bagarapim man i kamap bikpela long hap yu sindaun long en? Yu laik tru bai yu wantaim famili bilong yu inap i stap isi long ples i no gat samting bilong bagarapim yupela? Sapos yu sindaun long ples i gat planti raskol na yu no inap lusim, yu ken mekim wanem bambai yu wantaim ol pikinini inap i stap gut?

Tru, i gat sampela biktaun i no gat planti raskol long en. Na long planti kantri, ol man long ol liklik ples ol i sindaun isi. Tasol long olgeta hap senis i kamap kwiktaim, na long ol hap bipo i no gat planti pasin raskol tu. Tingim kantri Brasil: Bipo bikpela hap lain (70 pesen) bilong kantri ol i sindaun long ol liklik ples, tasol nau ol i sindaun long ol biktaun. I gat planti wok long ol biktaun, tasol i gat planti pasin nogut tu, olsem stil na bagarapim man. Maski yu stap long hap i no gat planti raskol, yu mas lusim dispela hap bilong taun bilong i go long wok o long skul o mekim ol narapela samting, a?

Wanpela hetman bilong polis long biktaun Rio de Janero em i save planti man i pret, na em i tok sampela as bilong dispela em olsem: Long nau planti man i stap rabis na ol i no gat rot bilong helpim sindaun bilong ol, na tu, ol raskol i wok wantaim long mekim ol pasin nogut. Na em i tok, ol nius na televisen i stori tumas long ol samting nogut i kamap na dispela i mekim na ‘bel bilong ol man i no strong moa.’ Sampela samting moa i mekim na pasin nogut i kamap bikpela, em olsem: Planti man i kisim ol drak, na planti famili i bruk, na ol lotu i skulim kranki ol man. Orait, olsem wanem long bihain? Pasin bilong ol man long kaunim na lukim planti buk na piksa wokabaut i stori long pasin pait olsem em i samting nating bilong amamas tasol, yu ting dispela bai mekim long bel bilong ol na ol i no sori moa long narapela man? Ol ples nau i no gat planti raskol, yu ting pasin bilong stil na bagarapim man bai kamap long ol dispela ples tu?

Yumi no laik bai wanpela man i paitim yumi o bagarapim yumi; yumi laik tru bai yumi inap i stap gut. Olsem na planti man i singaut long gavman i mas putim planti polis moa long ol rot, na givim bikpela strafe moa long ol man i mekim pasin nogut, o kilim ol i dai. Sampela i kisim gan bilong lukautim ol, maski ol yet inap kisim bagarap long dispela rot. Na sampela i laik bai gavman i tambuim ol man long kisim gan. Tru, pasin nogut i go bikpela, tasol yumi no ken ting yumi no gat rot bilong abrusim. I gat planti manmeri i stap long ol biktaun olsem Johanisbek, Meksiko Siti, Nu Yok, Rio de Janero, Sau Paulo, na i no gat wanpela taim ol man nogut i bin hansapim ol o stilim samting bilong ol. Orait, nau yumi ken skelim sampela samting ol man i save mekim bilong lukautim skin bilong ol long ples i gat planti raskol.

Bihainim Stretpela Tingting

Wanpela man bilong raitim ol buk em i stori long ol planti tausen manmeri bilong Brasil i sindaun long wanpela ples i gat planti raskol na em i tok, “ol i wok strong long painim rot na ol i sindaun gut na i stap gutpela, maski em i ples nogut.” Wanpela man (Jorge) i sindaun long biktaun Rio de Janero inap 38 yia na em i tok, “Mi save abrusim sampela rot na sampela hap bilong biktaun, na sapos sampela samting i kamap long rot, mi no save go klostu bilong save wanem samting i kamap. Mi no save raun long rot long biknait, na mi no save mekim olsem mi pret tumas. Mi save was gut, tasol mi save mekim gut long ol man olsem ol i stretpela man na ol i gat nem.”

Em nau, yu mas abrusim ol samting inap givim hevi long yu. No ken insait long samting bilong narapela man. Yu mas save, sapos yu pret pret oltaim, dispela inap bagarapim tingting bilong yu na bai yu mekim pasin kranki, maski yu man bilong bihainim gutpela pasin. Wanpela man (Odair) i save go mekim wok long sampela narapela hap bilong biktaun i gat planti pasin raskol long en, na em i tok: “Mi wok long tingim ol gutpela samting; mi no tingim ol samting nogut inap painim mi na mi pret pret. Nogat. Dispela inap mekim na bai mi longlong nabaut. Mi wok long mekim gut long olgeta man olsem ol i gat nem.” Em i tok, em i save was gut, na klia long ol man em i ting ol i man nogut; na em i kolim narapela samting em inap helpim man long daunim pret, em i tok: “Mi save bilip long God Jehova. Mi save em i lukim olgeta samting, na olgeta samting i kamap, em yet i larim i kamap.”

No gat wanpela man i laik pret pret oltaim, a? Pret i save bagarapim bel na tingting bilong man na givim sik long em. Wanem samting inap helpim ol man i pret oltaim long wanpela man i paitim ol o bagarapim ol? Planti man i ting bai pasin nogut i kamap bikpela moa yet, olsem na yu ting pasin bilong pait na bagarapim man inap pinis? Mipela laik bai yu kaunim stori i kamap bihain long dispela, het-tok bilong en, “Wanem Taim Bai Ol Man i No Pret Moa?”

Wanem Taim Bai Ol Man i No Pret Moa?

ATING bai yu kirap nogut long save, pasin bilong i stap gut tru em samting bilong wanpela man i bin i stap 2,000 yia bipo. Krais Jisas i bin mekim wanpela gutpela tok piksa tru bilong kamapim klia olsem yumi mas mekim pasin sori. Em i tok, wanpela man i lusim Jerusalem na i go long taun Jeriko, na “ol stilman i hait i stap long rot, na ol i kisim olgeta samting bilong em, na ol i paitim em nogut tru. Ol i mekim olsem, na ol i wokabaut i go. Na em i slip i stap long rot, na klostu em i laik i dai.” Tupela man i kam abrusim em, tasol wanpela gutpela man bilong Samaria i sori long em na helpim em. Husat i sori long ol man i kisim bagarap long han bilong ol man nogut long nau? Yu ting bihain bai yumi no ken pret moa?​—⁠Luk 10:​30-37.

Planti man i bilip long God, tasol ol i ting ol man yet i mas strong long ol manmeri i mas bihainim lo na bai ol i sindaun gut. Tasol sapos ol i putim lo na givim planti yia kalabus moa long ol man, o kisim planti polis moa na givim hap pe moa long ol, yu ting dispela bai pinisim pasin nogut bilong stil na bagarapim man? Yu ting gutpela wok ol polis i mekim bilong pinisim ol pasin nogut em inap pinisim pasin bilong mekim nabaut long ol drak, na pinisim pasin raskol ol man i wok wantaim na mekim, na helpim ol rabisman bai ol i no stap rabis moa? Yumi laik tru bai i gat stretpela pasin na dispela laik bilong yumi i no ken lus nating.​—⁠Matyu 5:⁠6.

Song 46:1 i tok: “God em i ples hait bilong yumi, na em i save strongim yumi oltaim.” Bihain bai yumi save, dispela gutpela tok em i no tok nating.

Yu save pinis, long olgeta de ol nius i stori long ol wankantri i pait na kilim i dai nating planti man, na ol paitman i mekim pasin birua na bagarapim ol man. Long sampela kantri ol i kilim i dai ol yangpela i stap nating, em ol i no gat ples slip, o sapos wanpela i lukim ol man i mekim pasin nogut na em inap kamapim ol, ol i save kilim em i dai. Olsem wanem na nau ol man i ting laip bilong man i samting nating? I gat kain kain as bilong ol dispela pasin bilong pait na bagarapim man, tasol i gat wanpela as yumi mas tingim gut.

Baibel i tok, “dispela graun olgeta em i stap aninit long strong bilong Satan.” (1 Jon 5:19) Krais Jisas i tok, Satan em i man bilong giaman na “man bilong kilim ol man i dai.” (Jon 8:44) Long kain kain rot dispela strongpela spirit i paulim tingting bilong ol man na mekim pasin bilong pait na bagarapim man i kamap bikpela moa long nau. Kamapim Tok Hait 12:12 i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Tasol gutpela tru taim nogut bilong nau bai pinis, na bai i gat “nupela skai na nupela graun, na stretpela pasin tasol bai i stap long en.”​—⁠2 Pita 3:13.

Yumi wetim dispela gutpela nupela taim, tasol i gat wanem samting bilong helpim yumi long nau?

Bihain bai yumi save long gutpela bekim bilong dispela askim, tasol pastaim yumi mas save, pasin nogut na pasin raskol inap bagarapim tu ol Kristen tru. Aposel Pol i stori long sampela samting i laik bagarapim em. Em i tok, “mi laik lus long wara, na mi laik bagarap long han bilong ol stilman i save pulim samting bilong ol man i wokabaut long rot. Ol wantok bilong mi yet ol i laik bagarapim mi, na ol man bilong ol arapela lain tu ol i laik bagarapim mi. Klostu mi laik bagarap long taim mi stap long ol taun, na long taim mi stap long graun i no gat man. Klostu mi laik lus long solwara.” (2 Korin 11:26) Tasol Pol i abrusim bagarap. Na i wankain long nau tu; sapos yumi was gut, yumi inap abrusim bagarap na mekim ol wok bilong yumi bilong olgeta de. Orait, nau yumi ken tingim sampela samting em inap helpim yumi.

Sapos yu stap long ples i gat planti raskol, gutpela pasin bilong yu inap lukautim yu, long wanem, ol man i save lukim gut pasin bilong ol narapela. Ol stilman i save tingim rot bilong stil na ol i mekim, tasol planti ol i ting ol i wankain tasol olsem ol narapela man, na ol i no man nogut. No ken daunim ol, o wok long kisim save long ol samting ol i mekim. Olsem bai i no gat as na ol i laik bekim nogut long yu. Yu mas save, ol stilman i laik save husat i baim nupela samting, na husat ol bai i go lip na bai haus bilong ol i stap nating, olsem na was gut long samting yu tokim narapela man long en.

Ol Witnes Bilong Jehova i gat gutnem long mekim wok bilong God na dispela i bin lukautim planti. Planti man nogut i kamapim klia olsem ol i laikim ol dispela Kristen ol i wok strong long helpim olgeta kain man long hap bilong ol. Ol Witnes yet i no save kilim man i dai o stil, na ol i no “paulim wok bilong ol arapela,” olsem na ol man i no pret long ol.​—⁠1 Pita 4:15.

Long Nupela Taim God i Kamapim Bai Yumi Stap Gut

Yumi nolaik tru long ol dispela ‘pasin nogut i kamap bikpela’ olsem Krais Jisas i tok profet long en, tasol yumi no ken pret na tingting planti; yumi ken bilip tru olsem klostu nau bai God i pinisim dispela taim nogut. Jisas i tok, bai ol man i autim “dispela gutnius bilong kingdom” long olgeta hap, tasol em i tok tu: “Ol manmeri i stap strong inap long las de, God bai i kisim bek ol.”​—⁠Matyu 24:​12-14.

Yumi ken save tru, ol man i mekim nogut long ol narapela, na sampela i mekim pasin nogut tru long ol man, ol bai pinis. Sindaun 22:​22, 23 i tok: “Yu no ken ting ol rabisman, ol i man nating tasol, na yu pulim nating ol samting bilong ol. Na sapos ol i kamap long kot, orait yu no ken mekim kot i daunim ol, long wanem, Bikpela bai i sambai long ol na helpim ol. Na sapos man i mekim nogut long ol rabisman, orait Bikpela bai i mekim nogut long em.” Jehova bai pinisim tru ol man i mekim pasin nogut, olsem ol stilman, na ol kilman, na ol man i laikim pasin sem. Na em i no ken givim baksait long ol man i bin kisim nogut long han bilong ol dispela man. Ol samting bilong ol i lus na skin bilong ol i bagarap, tasol Jehova bai stretim dispela.

Tru tumas, ol man “i givim baksait long olgeta pasin nogut na mekim gutpela pasin tasol” ol bai kisim laip oltaim​—⁠ol bai abrusim bagarap long taim bilong bikpela hevi tru, o sapos ol i dai ol bai kirap bek. “Ol stretpela man bai i kisim graun God i givim ol, na bai ol i stap oltaim long en.” (Song 37:​27-29) Yumi inap kisim ol dispela gutpela samting long rot bilong ofa bilong Jisas. (Jon 3:16) Tasol i stap bilong yumi bai i olsem wanem long Paradais i kamap bek long graun?

I stap bilong yumi aninit long Kingdom bilong God bai gutpela tru. Jehova i tok profet olsem: “Ol manmeri bilong [mi] bai i gat gutpela sindaun na bai ol i stap gut na malolo long ol ples bilong ol. Na bai ol i no pret long wanpela samting.” (Aisaia 32:18) Olgeta man i kisim laip oltaim, ol i stretim pinis pasin bilong ol. Bai i no gat man i mekim pasin nogut o pasin i no stret, na i no gat wanpela man bai kisim nogut long han bilong kain man olsem. Profet Maika i tok: “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:4; Esekiel 34:28) Em bai narapela kain tru long ol ples bilong nau i gat planti raskol!