“Em Gutpela Samting Tru”

Taim em i kaunim pinis buk Nambawan Man Tru i Winim Olgeta Narapela Man, em buk i stori long olgeta samting Jisas i bin mekim taim em i stap long graun, olsem fopela Gutnius i stori long en, wanpela meri i gat 70 krismas na em i sindaun long Mosko, Rasia, em i tok: “Bipo mi no bin kaunim kain buk olsem. Mi laik kisim sampela save moa long God na long Krais Jisas, na stadi long Baibel tu.”

Planti taim brens-ofis bilong ol Witnes Bilong Jehova long Rasia i save kisim kain pas olsem taim ol man i kisim pinis ol buk samting bilong Baibel. Wankain pas i kam long wanpela meri bilong Kelyabinsk, em wanpela biktaun i gat wan milion samting manmeri long en na i stap inap 1,500 kilomita saut-is long Mosko.

Meri i stori long buk Nambawan Man Tru i Winim Olgeta Narapela Man olsem: “Dispela buk em gutpela samting tru. Em i givim tingting long ol man olsem ol i ken amamas long gutpela sindaun bai kamap bihain, na i helpim ol long save long ol stori bilong bipo. Taim mi no kisim dispela buk yet, mi no save tingim God na mi no gat laik tru long lotu, tasol nau mi laik kisim baptais. Mi gat laik long stadi long ol buk samting bilong yupela. Ol samting mi bin kaunim, mi laik toktok long en wantaim ol poroman, na ol man mi save long ol, na ol wanblut bilong mi.”

Yu tu inap kisim buk o nius samting em inap helpim yu long kisim sampela save moa long Jisas, na long gutpela sindaun long nupela graun em Baibel i as bilong en. Sapos yu laik kisim wanpela bilong dispela buk Nambawan Man Tru i Winim Olgeta Narapela Man, o yu laik bai wanpela i kam long haus bilong yu na stadi wantaim yu long Baibel, no gat pe, orait raitim pas long IBSA, Box 636, Boroko, NCD 111, Papua New Guinea, o lukim atres i stap long pes 5 i stret long yu.