Wanpela Bung Bilong Marit i Narapela Kain Tru

LONG hap not bilong Mosambik i gat wanpela gutpela ples daun na i gat ol naispela maunten i stap arere long en​—⁠sampela maunten i gat ol ston, na sampela i gat gutpela gras na diwai samting. Long dispela hap, ples Fíngoè i stap. Long taim bilong kol, taim skai i klin tru long nait, planti sta i lait gut tru antap, na mun i lait bikpela tru na i mekim ol haus ol i bin wokim long kunai long dispela ples i lait moa yet. Long kain nait olsem dispela ol i bin mekim wanpela bung bilong marit i narapela kain tru.

Planti handet manmeri i wokabaut inap planti aua, o sampela de, bilong i go long dispela bikpela bung. Sampela i wokabaut long ol rot nogut tru na i gat ol animal inap bagarapim man, olsem ol haiena, na ol laion, na ol elefan. Ol man i kam long dispela bung i karim ol kago bilong ol, na tu ol i kisim ol kakaruk, meme, na ol kumu sayor samting i kam wantaim ol. Taim ol i kamap long ples, ol i go long hap ples ol i save mekim ol kibung Kristen long en. Maski ol i wokabaut long longwe rot na skin i les tru, ol i amamas na pes bilong ol i lait na dispela i soim olsem ol i wet long lukim ol samting bai kamap.

Husat ol bai marit? Planti! Yes, planti man na meri bai marit. I no olsem bel bilong ol dispela manmeri i kirap nating na kwiktaim olgeta i laik kirap marit, nogat. Ol dispela man na meri i gat gutpela bel, na stretpela tingting i kirapim ol. Bipo ol i no bin stretim marit bilong ol long gavman, long wanem, ol i stap longwe tru insait long bus na ol i stap longwe long hap em ofis bilong stretim marit i stap long en. Olgeta dispela man na meri i kisim save long lo bilong God long marit taim ol i stadi long Baibel wantaim ol Witnes Bilong Jehova. Ol i lain olsem ol i mas marit olsem ol lo bilong dispela ples i makim bambai Man bilong wokim yumi, em As bilong marit, em i ken amamas long marit bilong ol, olsem Josep na Maria i bin mekim bilong rejistaim nem bilong ol long taim Maria i karim Jisas.​—⁠Luk 2:​1-5.

Ol i Redim Ol Samting Bilong Dispela Bung

Brens-ofis bilong ol Witnes Bilong Jehova long Mosambik i helpim ol. Pastaim ol i askim wanpela dipatmen bilong gavman (Ministries of Justice and Interior) long Maputo, em biktaun bilong kantri, bilong save long ol samting ol i ken mekim i stret wantaim lo. Bihain ol misineri long biktaun bilong provins Tete ol i go lukim ol lain i bosim dispela hap bambai ol i ken stretim ol samting. Ol i makim wanpela de na bai ol misineri na sampela lain bilong gavman (Notary) na (Civil Identification Department) i ken go long dispela ples Fíngoè. Tasol pastaim, brens-ofis i salim wanpela pas i toksave long ol samting olgeta kongrigesen i insait long dispela bung ol i ken mekim. Ol Witnes na ol lain bilong gavman long dispela hap i amamas long dispela narapela kain bung bai kamap.

Long Sande, Me 18, 1997, 3-pela misineri na ol ofisa bilong gavman i kam kamap long Fíngoè. Ol lain bilong gavman long dispela hap i redim gutpela ples slip bilong ol lain ofisa klostu long ofis bilong gavman. Ol ofisa i kirap nogut long gutpela pasin ol Witnes Bilong Jehova i mekim long ol na ol i laik slip long ol liklik haus wantaim ol misineri. Ol i kirap nogut long save olsem wanpela bilong ol man i kukim kaikai em wanpela elda bilong kongrigesen long dispela hap na wanpela sekit wasman i mekim ol wok i no gat nem bilong redim dispela bung bilong marit. Na ol i lukim tu gutpela pasin bilong ol, na ol i no toktok planti na ol i slip long wanpela liklik haus nating, na taim ol i laik waswas ol i mekim wok long liklik tin bilong kapsaitim wara long skin bilong ol. Long bipo ol dispela lain bilong gavman i no bin lukim ol man bilong narapela narapela ples i pas gut wantaim olsem. Tasol bikpela samting moa i mekim na ol i kirap nogut em olsem, ol i lukim ol Witnes i kamapim bilip bilong ol na mekim ol samting i stret wantaim lo bilong dispela ples na i stret long lo bilong God maski ol i gat bikpela hatwok tru long mekim.

Taim Bilong Bikpela Amamas

Taim ol man na meri i kam, ol i kirap hariap long mekim namba wan samting bilong stretim marit: Ol i kisim ol pepa bilong toksave long de mama i karim ol. Olgeta i stap long lain na wet isi tasol long pes bilong ol ofisa bilong gavman (Civil Registry) bilong stretim pepa bilong ol. Na ol i go stap long narapela lain gen na bai ol i ken kisim poto long ol, na bihain ol i go long narapela lain bilong gavman (Civil Identification Department) bilong kisim kat identity. Na ol i go bek gen long ol ofisa bilong gavman (Civil Registry) bilong stretim pepa bilong marit. Bihain long dispela, ol i sanap isi tasol na wet long harim nem bilong ol long masin bikmaus. Taim bilong givim pepa bilong marit long ol em taim bilong bikpela amamas tru. Bikpela amamas i kamap taim olgeta tupela tupela marit i litimapim pepa bilong ol bilong marit olsem wanpela gutpela prais tru.

Olgeta dispela samting i kamap long taim ol i sanap ausait long bikpela san. Tasol hat bilong san na das i no bin bagarapim amamas bilong dispela bung.

Ol man i bilas gut tru​—⁠planti ol i putim saket na nektai. Ol meri i bilas long pasin bilong ples, na ol i pasim longpela laplap long namel bilong ol, i gat kala kala ol i kolim kapulana. Sampela i karim ol pikinini long wankain laplap i gat kala kala.

Bung i kamap gut, tasol i gat planti tru i marit na ol i no inap mekim long wanpela de tasol. Taim tudak i kamap, ol ofisa bilong gavman i amamas long helpim yet ol marit. Ol i tok olsem “ol brata bilong yumi” i bin hatwok tru long i kam long bung na ol i no inap lusim ol dispela brata na larim ol i wet tasol. Bai olgeta i tingim yet dispela pasin bilong wok gut wantaim na pasin bilong ol long lusim planti samting bilong ol yet long mekim dispela wok.

Taim tudak i kamap, ples i kol nogut tru. Wan wan i go slip long ol liklik haus, tasol planti marit i stap ausait na sindaun arere long ol paia. Dispela i no bin bagarapim amamas bilong ol long dispela bung. Ol man i lap na singsing strong winim pairap bilong paia, na ol i mekim singsing long 4-pela kain nek. Planti ol i stori long ol samting i painim ol long rot taim ol i kam, na ol i holim strong nupela pepa bilong marit ol i kisim.

Long moningtaim sampela i go namel long ples na maketim kakaruk, meme, na ol kumu sayor samting bilong baim pe bilong rejistaim marit. Tru tumas planti ol i mekim olsem “ofa” long ol animal bilong ol, olsem ol i salim long pe i daunbilo tru na i no long pe tru em ol i save salim. Long ol man i stap rabis, wanpela meme i gutpela samting na i gat bikpela pe bilong en; tasol ol i mekim dispela samting bambai ol i ken marit na bai God i ken orait long ol.

Hevi Bilong Wokabaut Long Rot

Sampela marit i wokabaut longwe rot bambai ol i ken i go long dispela bung. Chamboko na meri bilong em, Nhakulira, ol i bin mekim olsem. Long namba tu nait bilong dispela bung, taim ol i hatim lek bilong ol long paia, ol i kamapim stori bilong ol. Maski em i gat 77 krismas, na wanpela ai bilong em i pas na em i no inap lukluk gut long narapela hap ai bilong em, Chamboko i wokabaut lek nating wantaim olgeta lain long kongrigesen bilong em inap 3-pela de, long wanem, em i strong tru long stretim marit bilong em wantaim dispela meri em i bin sindaun nating wantaim em inap 52 yia.

Anselmo Kembo i gat 72 krismas, na em i bin sindaun nating wantaim Neri inap 50 yia. Sampela de paslain long em i go long bung, wanpela bikpela nil bilong diwai i sutim nogut tru lek bilong em taim em i wok long plantesen bilong em. Ol i kisim em i go long wanpela haus sik klostu bambai em i ken kisim marasin. Tasol em i wokabaut long lek i go long Fíngoè, maski lek i pen. Em i wokabaut 3-pela de. Anselmo i no inap daunim amamas bilong em taim em i holim pepa bilong marit long han bilong em.

Narapela nupela marit, em Evans Sinóia, long bipo em i gat tupela meri. Taim em i lainim tok i tru bilong Baibel, em i laik stretim marit bilong em wantaim namba wan meri bilong em, tasol meri i no laik na i lusim em na i go kisim narapela man. Namba tu meri bilong em, em tu i wok long stadi long Baibel, em i orait long maritim em. Tupela wantaim i bin wokabaut long hap i nogut na i gat ol laion na ol narapela wel animal long en. Taim ol i wokabaut 3-pela de pinis na kamap long ples bung, ol tu i rejistaim marit bilong ol.

Long Fraide, taim ol misineri na ofisa i bin kam i stap 5-pela de pinis, ol i pinisim dispela wok. Ol i bin givim 468 kat identity na 374 setifiket long ol dispela marit i stori long de mama i karim ol. Na ol i givim 233 pepa bilong marit long ol manmeri i marit! Em taim bilong bikpela amamas. Maski skin bilong ol i les tru, olgeta i wanbel olsem ol i mekim gutpela samting tru. Ol man i bin insait long dispela bung bai tingim yet dispela bung. Tru tumas em i wanpela bung bilong marit i narapela kain tru!