Painim Rot Bilong i Stap Amamas​—⁠Painim We?

JISAS i tok: “Ol man i save, ol i stap rabis tru long ol samting bilong God, em ol i ken amamas.” (Matyu 5:⁠3) Wanpela yangpela meri long hap bilong Midel-Is em i pilim olsem em i sot long ol samting bilong God, tasol em i laik mekim ol pasin God i laikim. Bihain em i painim pinis rot bilong i stap amamas. Em i painim we? Orait, em yet em i ken stori:

“Papamama bilong mi i strongpela Katolik bilong lain Maron. Ol i lainim mipela ol pikinini long mekim beten long olgeta apinun long ai bilong ol piksa bilong ol santu samting. Taim mi liklik yet mi gat laik long mekim wok bilong God.

“Taim mi gat 17 krismas mi insait long wanpela haus sister bambai mi ken kamap wanpela sister Katolik. Mi ting dispela em i rot bilong inapim laik bilong mi long mekim wok bilong God. Tasol mi lukim planti pasin ol sister i mekim na i no stret, na mi tingting planti. Narapela i save tok baksait long narapela. Ol sumatin i lain long kamap sister ol i no kisim kaikai inap long ol na ol i hangre, tasol ol sister i kisim ol gutpela gutpela kaikai. Na ol sister i save pamuk wantaim pris. Mi bel hevi tru long ol dispela pasin na mi stap inap 9-pela mun tasol long haus sister na bihain mi lusim na mi go bek long haus bilong papamama.

“Tasol i gat planti askim mi no painim yet bekim bilong en. Mi no inap painim gutpela bekim bilong ol dispela askim, olsem na bihain mi les na mi no givim bel moa long lotu. Tasol long yia 1982, taim mi gat 22 krismas, brata na susa wanblut bilong mi i kirap long stadi wantaim ol Witnes Bilong Jehova na ol i lainim ol tok bilong Baibel. Mi wantaim papamama mipela i birua tru long tupela. Brata bilong mi i kirap bihainim dispela lotu na long dispela rot em i karim planti pen na hevi​—⁠ol man i mekim nogut long em na paitim em na em i go kalabus tu. Tasol em i senisim tru pasin bilong em na dispela samting i kirapim tru tingting bilong mi. Na tu em inap kamapim ol tok bilong Baibel na bekim stret ol askim inap longtaim mi wok long painim bekim bilong en. Olsem na long nait, long pasin hait, mi kirap long kaunim ol tok bilong Baibel.

“Wanpela taim mi go long wanpela kibung bilong ol Witnes Bilong Jehova bilong lukluk tasol. Mi lukim pasin sori i stap namel long ol na mi pilim tru. Ol i mekim wankain pasin tasol long olgeta man, maski ol i maniman o rabisman. Ol Witnes i bihainim tru ol tok ol i lainim ol narapela man long en. Nau mi bilip tru olsem tok bilong ol i stret.

“Kibung i pinis na mi tokim wanpela Witnes long stadi wantaim mi. Mi tokim dispela Witnes meri mi laik stadi tasol, mi no laik go long ol miting o i go autim tok. Tasol i no longtaim na mi save ol dispela tok mi lainim em tok i tru. Mi beten na mi pasim tok long bel long mekim wok bilong Jehova. Long Oktoba 28, 1983 mi wantaim brata na susa bilong mi, mitripela i kisim baptais wantaim. Mi painim pinis rot bilong inapim laik bilong mi long mekim wok bilong God, em dispela laik i bin kamap long bel bilong mi taim mi pikinini yet.

“Mi baptais pinis na tupela mun bihain mi kirap mekim wok painia haptaim, na 8-pela mun bihain long dispela, mi kirap long mekim wok painia oltaim. Na wanpela yia na hap moa ol i singautim mi i go wok long brens-ofis bilong ol Witnes Bilong Jehova, em ol i kolim Betel. Mi go wok bilong liklik taim tasol na mi wok olsem inap tupela yia. Mi pilim tru gutpela pasin daun bilong olgeta brata sista i wok long Betel. Ol brata i gat bikpela wok ol tu i save wasim plet taim ol brata sista i kaikai pinis long apinun.

“Kirap long Mas 14, 1988 mi insait tru long lain bilong Betel. Mi amamas tru! Mi painim pinis rot bilong i stap amamas. Mi painim we? Namel long ol Witnes Bilong Jehova i dediket long God! Nau mi laik mekim tok wankain olsem man bilong raitim song long Baibel long bipo, em i tok: ‘Sapos mi stap wanpela de tasol long haus bilong yu, em i winim tru 1000 de long narapela ples.’ ”​—⁠Buk Song 84:⁠10.

Insait Bilong Ol Tok i Kam Long Olgeta Hap

Ol i Gat Baibel, Tasol Em i No Inap

Ol i bin givim askim long planti manmeri i gat Baibel, olsem: ‘Yu save kaunim?’ Na bikpela hap lain (inap 50 pesen) i tok ol i no save kaunim. Na long dispela lain i no save kaunim Baibel, planti ol i tok ol i Kristen na ol i kisim pinis spirit na ol i kamap nupela gen. Ol i givim narapela askim tu long ol dispela manmeri i gat Baibel na ol i tok ol i Kristen, olsem: ‘Mama i karim Jisas we?’ Planti (inap 30 pesen) ol i no save mama i bin karim Jisas long Betlehem. Wanpela nius (The Detroit News) i stori long dispela samting na i tok, inap 18 pesen i tok mama i bin karim Jisas long Jerusalem, na 8 pesen i tok, Nasaret. Man i bosim lain bilong skelim dispela samting, em George Barna, em i tok: “Sapos ol i no save long ol dispela liklik samting, orait olsem wanem bai ol inap toktok wantaim man i no bilip na kamapim gut ol tok bilong Baibel? Na olsem wanem bai ol inap bihainim pasin i stret wantaim ol lo bilong Baibel? Ol i no inap mekim.”

Aposel Pol i bin lukim wankain pasin i stap namel long sampela man long bipo, em “ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” Pol i stori tu long sampela man ol i bihainim ol lo “i luk olsem ol bai i kirapim yumi long lotu, na long daunim bel bilong yumi na hatim tru bodi bilong yumi,” tasol nogat. Na em i tok long “taim bilong las de” bai sampela manmeri i bihainim pasin bilong God long skin tasol na ol bai i no save liklik long bikpela strong i stap long pasin tru bilong God.” (Rom 10:2; Kolosi 2:23; 2 Timoti 3:​1-5) Tasol ol Kristen tru i save laikim tumas Tok bilong God, em Baibel. Ol i save, sapos ol i gat Baibel, dispela tasol i no inap. Olsem na ol i save givim bel olgeta long bihainim tok bilong Baibel i tok ol i mas “laikim tumas” long kisim save long ol tok bilong Baibel, olsem nupela pikinini em i save laikim tumas susu.”​—⁠1 Pita 2:⁠2.

Ol i Laikim Tumas Pasin Bilong Sakim Lo

Jisas i kolim planti samting bai kamap olsem “mak” bilong las taim, na wanpela samting em i kolim i olsem: “Pasin nogut bai i kamap bikpela.” (Matyu 24:​3, 12) Long nau planti manmeri i kirap kisim ol drak na dispela samting i mekim na pasin nogut i wok long kamap bikpela. Wanpela nius bilong Australia (The Sydney Morning Herald) i tok, long provins Nu Saut Wels, long olgeta 10-pela bikpela rong i kamap, pasin bilong kisim drak i as bilong 7-pela. Na long dispela provins, ol man i save holim gan o naip samting na stil, planti tru (inap 85 pesen) ol i man bilong kisim drak heroin. Na dispela hevi bai wok long i go bikpela, long wanem planti manmeri moa long nau ol i kirap long kisim ol drak.

Wanpela nius (U.S. News & World Report) i tok, “dispela hevi i kamap long olgeta hap bilong Yurop.” Ol i tok, long hap bilong Rasia tu planti milion manmeri i save kisim ol drak. Bilong pasim dispela samting, gavman bilong Rasia i kirap long wok wantaim ol lain bilong 25 kantri, em ol i gat wok long pasim drak. Tasol ating bai ol i no inap pasim, long wanem ol man bilong wok bisnis long ol drak ol i mekim wok long bikpela profit mani ol i kisim bilong grisim ol polis na majistret na ol jas tu. Wanpela bikman bilong gavman i bel hevi long dispela samting na em i tok: “Lain polis bilong olgeta kantri ol i bin pasim liklik tasol ol drak, olsem na ol man inap baim yet planti drak long rot.” Na em i tok: “Mi bel hevi, long wanem ol man i no tingim sampela rot bilong stretim dispela hevi.”

Dispela tok i kirapim yumi long tingim tok profet Jisas i bin mekim long ol samting i mas kamap long las taim. Em i tok, long dispela taim bai ol man i pret na tingting planti,’ long wanem ol i no save long rot ol i mas bihainim.​—⁠Luk 21:​25, 26.

Jisas na Wok Politik

Wanpela nius bilong Saut Afrika (The Star bilong Johanesbek) i putim wanpela het-tok olsem: “Misin Katolik i Tokaut long Wok Ol i Laik Mekim Bilong Helpim Lain Bilong Ol long Saut Afrika.” Em ol i laik pinisim pasin birua i stap namel long ol man bilong narapela narapela skin, na long dispela rot bai ol i “kamapim kingdom bilong God” long Saut Afrika. Sekreteri-jenaral bilong lain bisop Katolik long Saut Afrika (Catholic Bishops Conference), em Jude Pieterse, i tok misin i laik bai ol narapela misin “na olgeta manmeri long Saut Afrika” i helpim dispela wok. Tasol sampela Katolik i pilim olsem dispela em i wanpela “tingting bilong ol Bisop bilong kirapim ol Katolik long kamap man bilong wok strong long wok politik.” Em bisop bilong biktaun Johanesbek, em Reginald Orsmond, i tok olsem. Pieterse i tok, tru dispela tingting em i samting bilong wok politik, tasol Orsmond i tok, ‘dispela tingting em i samting bilong wok politik, tasol Orsmond i tok, ‘dispela i no nupela samting; bipo yet Jisas i bin mekim kain wok olsem.’

Tasol Jisas i no ken kirapim ol disaipel bilong em long kamap man bilong wok strong long wok politik. Nogat tru. Taim Pailat i givim askim long Jisas, Jisas i bekim tok strong long Pailat, olsem: “Kingdom bilong mi em i no bilong dispela graun.” (Jon 18:36) Na long nau ol Witnes Bilong Jehova, em lain bilong ol i winim 3 milion, ol i stap wanbel, maski ol i bilong wanem kain skin, long wanem ol i bihainim nupela lo bilong Jisas i tok, narapela i mas laikim tru narapela olsem Jisas i bin laikim ol. Ol i bihainim dispela lo long hap bilong Saut Afrika na long olgeta hap bilong graun!​—⁠Jon 13:⁠34.