Ol God Meri Bilong Kamapim Pikinini na Pait

OL SAVEMAN bilong digim graun na painim ol samting bilong bipo, ol i bin wok long Ebla, long Siria, na ol i painim wanpela piksa holi bilong Ista. Em piksa bilong wanpela god bilong ol Babilon, em god meri bilong kamapim pikinini na pait. Saveman Paolo Matthiae i stori long dispela samting olsem: ‘Em wanpela botol graun i gat piksa bilong wanpela pris meri, em laplap i karamapim het bilong em, na em i brukim skru na lotuim wanpela god. Het bilong god i pas long wanpela longpela samting olsem stik.’

Dispela samting ol i painim i bikpela samting, long wanem, em i bilong bipo tru​—⁠yia 1700 samting paslain long Krais. Matthiae i tok, dispela i mekim na nau yumi “save tru” ol man i bin lotuim Ista inap 2,000 yia.

Pasin bilong lotuim Ista i bin kirap long Babilon na planti handet yia bihain em i go nabaut long ol kantri Rom i bosim. Jehova i bin tokim lain Israel long pinisim tru lotu giaman long Graun Bilong Promis. Tasol ol i no mekim olsem na bihain ol i pundaun na lotuim Astarte (em wankain god olsem Ista, tasol em god meri bilong ol Kenan).​—⁠Lo 7:​2, 5; Hetman 10:⁠6.

Ista na Astarte i no stap moa, tasol ol pasin tupela god i bin makim​—⁠em pamuk, pait na bagarapim man​—⁠i stap na i bikpela moa. Ating yumi ken askim olsem: Pasin bilong ol man long nau i narapela kain long pasin bilong ol man long bipo, em ol man i bin lotuim ol god meri bilong kamapim pikinini na pait?

[Piksa long pes 20]

Ol i givim pikinini tu olsem ofa long Tanit

[Kredit Lain]

Ralph Crane/Bardo Museum