Planti Buk Tru!

Saveman bilong bipo em King Solomon, em i tok: “Ol man i save raitim planti buk, na dispela kain wok i no gat pinis bilong en.” (Saveman 12:12) Long 1995, long olgeta 580 580 manmeri long Briten, ol i wokim wanpela nupela buk, na dispela i mekim na kantri Briten i kamap namba wan long wokim ol nupela buk. Saina, em kantri i gat planti manmeri tru, em i kamap namba 2; em i wokim 92,972 buk, tasol Briten i wokim 95,015. Jemani i kamap namba tri (67,206 buk), na bihain long en em Yunaitet Stets (49,276), na bihain Frans (41,234). Wanpela niuspepa bilong Landon i tok: “Briten i kamap namba wan na i winim ol narapela, long wanem, planti man i save mekim tok Inglis.”​—⁠The Daily Telegraph.

Ol ripot i makim olsem inap sampela yia pinis, ol man i no baim planti buk olsem bipo ol i bin mekim, na long nau inap 80 pesen tasol bilong ol bikpela manmeri long Briten i save baim wanpela o sampela buk long wanpela yia. Tasol yu ting ol man i save kaunim olgeta buk ol i baim?

Wanpela buk em ol i save salim na ol man i kaunim yet long olgeta hap, em Baibel. Ol inap kisim Baibel olgeta o sampela hap bilong en long 2,120 tok ples. Sapos yu no kisim yet wanpela, orait raitim pas long brens-ofis bilong ol Witnes Bilong Jehova na kisim wanpela. Sapos yu gat Baibel, orait kisim na lukim ol tok bilong Baibel i stap long dispela nius. Sapos yu mekim olsem, bai yu kisim save bilong Baibel i givim laip long man.

Askim

Ol Witnes Bilong Jehova i save strong long bihainim pasin i stret na i no giaman, na narapela i save bilip long narapela. Olsem na bilong wanem ol i pilim olsem em i bikpela samting long tupela Witnes i mas raitim wanpela kontrak taim tupela i wokim bisnis wantaim?

Pasin bilong mekim olsem i stret wantaim tok bilong Baibel, na i gutpela long mekim olsem, na em i pasin bilong laikim tru narapela. Olsem wanem yumi ken tok olsem? Orait, nau yumi ken toktok long ol dispela pasin i save kamap taim man i wokim kontrak bilong bisnis.

Ol i bin raitim wanpela stori long Baibel long ol samting God i bin mekim long lain bilong em, em ol Israel. Baibel i stori long pasin bilong wokim bisnis namel long ol man i lotu tru long God. Stat sapta 23 i kamapim wanpela stori i gutpela yumi ken skelim. Taim Sara, em gutpela meri bilong Abraham, i dai, Abraham i laik baim wanpela hap graun bilong planim Sara. Em i go toktok wantaim ol Kenan i sindaun klostu long Hebron. Ves 7 i go 9 i soim yumi olsem Abraham i makim pe stret em i laik givim bilong baim hap graun em i laikim. Ves 10 i kamapim klia olsem em i kolim dispela pe long ai bilong ol man, na ol narapela i stap long dua bilong banis bilong taun ol i harim. Ves 13 i stori olsem papa bilong graun i laik givim nating dispela graun long Abraham, tasol Abraham i tok sapos em i givim mani bilong baim graun, em bai kisim. Na ves 17, 18, na 20 i stori olsem Abraham i kisim dispela graun, na “olgeta man bilong lain Hit i stap long dispela ples ol i toktok i stap long en, ol i save, dispela graun i bilong Abraham nau.”

Tasol sapos tupela man i wok bisnis wantaim na tupela wantaim i save lotu tru long God, ating dispela i narapela kain o olsem wanem? Jeremaia sapta 32 i bekim dispela askim. Kirap long ves 6 na i go, em i stori long Jeremaia i mas baim graun long kasen brata bilong em. Ves 9 i soim yumi olsem ol i pasim tok long wanpela pe i stret long dispela graun. Kaunim ves 10​-⁠12: “Mi [Jeremaia, i] raitim kontrak bilong baim graun na mi pasim na putim mak bilong mi long en, long ai bilong ol sampela man. Na mi skelim silva inap 200 gram na mi givim long Hanamel olsem pe bilong dispela hap graun. Mi bin raitim tupela pepa bilong kontrak bilong baim graun na tupela pepa i gat ol tok bilong ol samting mitupela i promis long mekim. Wanpela pepa mi pasim na narapela mi no pasim. Na mi kisim dispela tupela pepa na mi givim long Baruk, pikinini man bilong Neria, na tumbuna pikinini bilong Masea. Na planti man i lukim mi mekim ol dispela samting bilong baim graun. Brata bilong mi, Hanamel, na ol man i bin raitim nem bilong ol long kontrak, na ol arapela Juda i sindaun i stap long dispela hap, olgeta i lukim dispela samting mi mekim.”

Em nau, maski Jeremaia i baim dispela graun long wanlotu bilong em, em wanblut bilong em, Jeremaia i mekim ol samting i stret long lo bilong kantri. Em i raitim tupela pepa bilong kontrak​—⁠wanpela pepa em i no pasim na bai em inap lukim sapos em i gat wok long en, na namba 2 pepa em i pasim, na bai em inap soim ol man long rait bilong en sapos sampela man i ting pepa em i no bin pasim, i no stret. Jeremaia i mekim olgeta dispela wok taim “ol dispela man i lukluk yet,” olsem ves 13 i tok. Olsem na tupela i wokim kontrak bilong dispela bisnis long ples ol man i bung long en, na i gat ol man, olsem witnes, i lukim dispela samting. Em nau, Baibel i makim pasin ol man i lotu tru long God ol i ken bihainim taim ol i mekim wanpela wok bisnis wantaim​—⁠olsem ol tok tupela i pasim ol i ken raitim long pepa olsem kontrak.

Na i gutpela yumi mekim olsem, long wanem, i gat wanpela tok i save kamap tru, olsem “taim nogut i save painim yumi olgeta.” (Saveman 9:11) Taim nogut inap painim ol strongpela Kristen tu em ol i givim bel long Jehova. Jems 4:​13, 14 i tok: “Mi gat tok long yupela ol man i save tok olsem, ‘Ating nau o tumora mi bai go long wanpela taun na mi bai mekim wok bisnis inap long wanpela yia. Na long dispela pasin mi bai kisim planti mani.’ Yupela i save mekim dispela kain tok, tasol yupela i no save wanem samting bai i kamap long tumora.” Olsem na yumi inap kirapim wanpela wok, olsem baim wanpela samting, o pasim tok wantaim narapela long mekim wanpela wok, o wokim wanpela samting bilong wanpela man, tasol wanem samting bai painim yumi tumora​—⁠o long mun antap​—⁠o long yia antap? Sapos yumi o dispela man yumi mekim wanpela wok bisnis wantaim em i kisim bagarap, ating yumi i no inap mekim dispela wok yumi bin tok long mekim. Olsem wanem sapos yumi no inap mekim dispela wok yumi bin tok long mekim, o em i pilim olsem em i no inap tru long bekim dinau o mekim ol samting em i bin tok promis long mekim? Sapos yumi no bin raitim wanpela pepa bilong kontrak, sampela bikpela hevi inap kamap, em ol hevi yumi inap stretim o abrusim sapos yumi bin raitim wanpela pepa bilong kontrak.

Na yumi mas tingting tu olsem ol samting long i stap bilong yumi inap senis, na nau narapela man i mas mekim wok bilong stretim hevi bilong wok bisnis bilong yumi (o bilong wanbisnis bilong yumi). Jems i tok moa long ves 14 olsem: “Laip bilong yupela i olsem smok i save kamap na i stap liklik taim tasol na i pinis olgeta.” Tru tumas, yumi no save wanem taim i dai bai painim yumi. Sapos yumi bin raitim wanpela pepa bilong kontrak, dispela bai larim narapela man i stretim ol samting bilong dispela wok bisnis sapos wanpela samting i painim yumi o dispela wanbisnis bilong yumi.

Orait nau yumi ken tingim namba 3 samting​—⁠olsem taim yumi raitim pepa bilong kontrak, dispela i makim olsem yumi laikim tru narapela. Sapos yumi o dispela wanbisnis bilong yumi i dai o i kisim wanpela bikpela bagarap na i no inap wok moa, em i pasin Kristen bilong laikim tru narapela sapos brata o wanbisnis bilong em i bin raitim pepa bilong dispela kontrak i toktok long ol wok tupela i mas mekim na hamas mani tupela i ting ol inap putim o bekim long narapela. Taim yumi raitim wanpela pepa bilong kontrak i tokaut klia long ol samting dispela brata i mas mekim o mani em bai i kisim, dispela i no makim olsem narapela i no bilip long narapela​—⁠em i makim olsem yumi laikim tru dispela brata yumi mekim wok bisnis wantaim em. Dispela pasin sori bai daunim sampela bel hevi o pasin bilong bel nogut sapos wanpela insait long kontrak i lusim tingting long sampela samting em i gat wok long mekim olsem em i promis pinis long kontrak. Yumi olgeta i no gutpela tumas, na yumi save lusim tingting long ol samting, o sampela taim yumi no klia gut na yumi ting brata i bin mekim narapela tok o em i gat narapela laik.​—⁠Matyu 16:⁠5.

I gat ol narapela samting i makim olsem taim yumi raitim pepa bilong kontrak, yumi kamapim klia olsem yumi laikim tru brata bilong yumi, na famili bilong yumi, na ol narapela insait long kongrigesen. Yumi mas save olsem taim yumi raitim pepa bilong kontrak na kolim klia ol tok, dispela inap helpim yumi na dispela narapela brata, na em i stret wantaim tok bilong Baibel.