Askim

Sampela Witnes Bilong Jehova i bin kisim wok mani na ol i mas mekim ol wok long wanpela haus lotu o banis bilong wanpela lotu. Baibel i tok wanem long kain wok olsem?

Dispela samting inap painim ol Kristen i laik bihainim tru tok bilong 1 Timoti 5:​8, em i kamapim olsem em bikpela samting long lukautim famili long ol samting bilong skin. Ol Kristen i mas bihainim dispela tok, tasol dispela i no makim olsem ol i mas orait long mekim olgeta kain wok. Ol Kristen i pilim tru olsem ol i gat wok long tingim gut ol narapela laik bilong God. Olsem: Man i mas lukautim famili bilong em, tasol dispela i no givim rot long em long kalapim lo bilong Baibel long pasin pamuk na kilim man i dai. (Skelim wantaim Stat 39:​4-9; Aisaia 2:4; Jon 17:​14, 16.) Na tu, i bikpela samting long Kristen i bihainim tok bilong Baibel long yumi mas lusim Bikpela Babilon, em olgeta lotu giaman bilong dispela graun.​—⁠KTH 18:​4, 5.

Long olgeta hap, ol wokboi bilong God i save kisim kain kain hevi long painim wok mani. I no gat wok long yumi wokim lista na lo bilong ol samting ol Kristen i mas bihainim na i no stret long mekim olsem. (2 Korin 1:​24) Tasol yumi ken kamapim sampela tok em bai helpim ol Kristen long tingim wanem kain wok mani ol i ken kisim. Taim Wastaua bilong Mas 1, 1983 i stori long olsem wanem maus bilong bel God i givim yumi em inap helpim yumi, em i stori liklik long ol dispela samting. Blok long Wastaua i kamapim tupela bikpela askim na bihain em i kamapim sampela narapela samting bilong helpim yumi.

Namba wan bikpela askim em dispela: Olsem wanem? Baibel i makim dispela wok em i wok nogut? Taim Wastaua i stori long dispela, em i tok pasin stil, na mekim wok long blut, na pasin bilong lotuim god giaman ol i wok nogut. Olsem na Kristen i no ken holim wanpela wok i litimapim ol samting God i no orait long en, kain olsem ol dispela samting mipela i kamapim.

Namba tu askim i olsem: Taim wanpela i mekim dispela wok, em i insait long dispela rong o nogat? Tru tumas, taim wanpela man i kisim wok long haus bilong pilai laki, o wanpela klinik bilong rausim bel, o wanpela haus pamuk, em i insait long ol dispela pasin nogut. Maski wok bilong em long olgeta de i bilong brumim plua tasol o bekim tok long telefon, em i mekim wok bilong helpim pasin em Baibel i tambuim.

Planti Kristen, taim ol i skelim dispela tupela askim, dispela i bin helpim ol long tingim wanem kain wok ol bai kisim.

Olsem: Taim man i skelim dispela tupela askim, em i ken save bilong wanem Kristen tru i no ken wok mani long wanpela lotu giaman o mekim wok insait long haus lotu bilong ol. Kamapim Tok Hait 18:​4 i tok: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim.” Sapos wanpela man i save wok mani oltaim long wanpela lotu i save skulim ol man long ol bilip i no stret long tok i tru, em i insait long ol wok na sin bilong Bikpela Babilon. Maski dispela man i mekim wok long gaden, o man bilong klinim ol ofis samting, o wanpela man i save stretim ol samting i bagarap, o man i save mekim wok long ol akaun, dispela wok em i mekim i helpim lotu em bilip bilong en i save pait wantaim lotu i tru. Na tu, taim ol manmeri i lukim em i mekim ol wok bilong lukautim banis bilong haus lotu, o stretim ol samting bilong en i bagarap, o mekim wok bilong dispela lotu, ol bai ting olsem em i bilong dispela lotu.

Olsem wanem long wanpela man em i no save wok mani oltaim long wanpela misin o lain lotu? Ating ol i singautim em long kam stretim wanpela paip wara i bruk long haus lotu. Dispela i narapela kain long pasin bilong winim wanpela kontrak samting bilong stretim ol samting long rup bilong haus lotu, a?

I gat planti narapela narapela samting yumi ken tingim. Olsem na yumi ken skelim faipela samting moa em Wastaua i stori long en:

1. Olsem wanem? Dispela wok em wok bilong helpim ol man na Baibel i no tambuim? Tingim wok bilong man i save bringim ol pas i go long haus bilong ol man i stap long wanpela hap. Sapos em i kisim wanpela pas i go long wanpela haus lotu o wanpela klinik bilong helpim ol meri long rausim bel, dispela i no makim olsem em i helpim dispela wok nogut. God i save mekim na san i save lait antap long olgeta haus, ol haus lotu na ol klinik bilong helpim ol meri long rausim bel tu. (Aposel 14:​16, 17) Wanpela Kristen, wok bilong em i bilong kisim ol pas i go long haus bilong ol man, ating em inap tingim wok bilong em long olgeta wan wan de i bilong helpim olgeta man. Dispela i wankain long wanpela Kristen em ol i tokim em long mekim wok long taim bilong wanpela hevi​—⁠em i wanpela plama na em i mas i go long wanpela haus lotu bilong stretim wanpela paip wara i bruk na wara i wok long karamapim olgeta hap; o em wanpela man bilong wok long ambulens na em i mas helpim man i airaun na pundaun long taim bilong lotu. Ating em inap tingim ol dispela wok i olsem wok bilong helpim ol man long taim bilong hevi.

2. Olsem wanem? Dispela man i wanpela papa bilong kampani, o em i wanpela wokman tasol? Sapos wanpela Kristen i papa bilong stua, em bai i no inap putim oda bilong ol imis, ol paspas bilong mekim wok bilong spirit nogut, smok, o sosis ol i wokim long blut na salim long stua. Em i papa bilong stua na em i bosim olgeta samting bilong dispela stua. Ol man inap strong long em i salim smok o ol imis na kisim winmani, tasol em i mas bihainim ol lo bilong Baibel long olgeta taim. Tasol ating wanpela Kristen i wok long wanpela bikpela stua bilong salim ol kain kain samting, na wok bilong em i bilong kisim mani taim ol man i baim ol samting, o klinim plua, o mekim wok long ofis samting. Em i no bosim wok bilong putim oda long ol samting bilong salim long stua, maski sampela samting i no stret long lo bilong Baibel, kain olsem smok na sampela samting bilong Krismas o Ista samting.a (Skelim wantaim Luk 7:8; 17:​7, 8.) Namba 3 askim i stori long dispela samting.

3. Olsem wanem? Man i insait tru long dispela wok? Yumi ken tingim gen man i wok long wanpela stua. Ating wok bilong em i bilong kisim mani taim ol man i baim ol samting, o em i putim ol nupela samting long ples bilong ol na wan wan taim em i save holim ol smok na sampela samting bilong lotu; dispela em liklik hap tasol bilong wok em i save mekim. Dispela i narapela kain tru long wanpela wokman i save wok long hap bilong salim ol smok! Dispela em wok bilong em, na long olgeta de em i wok long dispela samting i no stret wantaim bilip Kristen. (2 Korin 7:⁠1) Dispela i kamapim klia bilong wanem yumi mas skelim hamas taim yumi lusim bilong mekim wanpela wok, na dispela i ken helpim yumi long skelim wanem kain wok yumi mas kisim.

4. Husat i save baim ol wokman o wanem hap dispela wok i kamap? Yumi ken skelim tupela kain wok. Bilong kisim gutnem, wanpela klinik bilong helpim ol meri long rausim bel i tingting long baim wanpela man long klinim ol strit long hap bilong ol. Lain long klinik i save baim em long fotnait, tasol em i no save wok long dispela klinik, na olgeta de i no gat wanpela man i save lukim em long klinik. Ol manmeri i save lukim em i mekim dispela wok em Baibel i no tambuim, maski wanem lain i baim em long fotnait. Orait nau yumi ken tingim narapela kain wok. Long ol kantri em lo bilong gavman i orait long wok pamuk, dipatmen bilong helt i save baim wanpela nes long wok long haus pamuk, na em i save sekim ol meri pamuk na givim marasin samting long ol bambai sik bilong pamuk i no ken i go bikpela. Maski dipatmen bilong helt i baim em, em i save wok olgeta de long ol haus pamuk, na em i mekim wok bilong helpim pasin pamuk. Dispela tupela kain wok i kamapim klia bilong wanem yumi mas skelim wanem lain i save baim ol wokman na skelim ples bilong mekim dispela wok.

5. Dispela wok bai mekim wanem; dispela bai mekim na bel bilong man yet bai i gat tok, o em bai pundaunim ol narapela? Yumi mas tingim maus bilong bel​—⁠bilong yumi yet na bilong ol narapela. Maski sapos wanpela wok (na ples bilong wok na wanem lain i baim em) i orait long ai bilong planti Kristen, wanpela inap pilim olsem bel bilong em yet i gat tok long dispela wok. Aposel Pol, em i bin stap olsem gutpela piksa, em i tok: “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.” (Hibru 13:18) Yumi no ken mekim ol wok yumi bai tingting planti long en; na tu, yumi no ken skelim ol narapela em maus bilong bel i narapela narapela. Ating Kristen i pilim olsem Baibel i no tambuim wanpela wok em i mekim, tasol em i save dispela bai givim hevi long planti insait long kongrigesen na ol manmeri bilong dispela hap olsem ol bai tingting planti long en. Pol i kamapim gutpela tingting olsem: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.”​—⁠2 Korin 6:​3, 4.

Nau yumi ken tingim bek bikpela samting yumi laik save long en, em wok long wanpela haus lotu, olsem putim ol nupela windo, klinim plua, o stretim ples bilong wokim paia. Ol tok yumi kamapim hia inap helpim yumi olsem wanem long skelim dispela bikpela samting?

Tingim gen ol samting yumi stori long en long husat i papa bilong kampani. Olsem wanem? Kristen em papa o maneja na em i mas skelim olsem em inap mekim kain wok olsem long haus lotu o nogat? Sapos wanpela Kristen em i bos, em i laik pas wantaim Bikpela Babilon na winim wanpela kontrak bilong mekim wok bilong helpim sampela lotu i kamapim ol bilip giaman? Dispela i wankain long Kristen i pasim tok long salim smok o ol imis samting long stua bilong em yet, a?​—⁠2 Korin 6:​14-​16.

Sapos Kristen i wanpela wokman nating na em i no gat wok long tingim wanem wanem wok kampani i mas mekim, i gat ol narapela samting em i mas skelim. Olsem: Wanem ples na hamas taim em bai lusim bilong mekim dispela wok. Olsem wanem? Ol i tokim wokman long bringim tasol ol sia i go o mekim wanpela wok bilong helpim ol man, olsem wanpela paiaman i kilim i dai paia long haus lotu na bai paia i no kisim olgeta hap? Planti bai tingim dispela i narapela kain long wanpela wokman bilong wanpela kampani i lusim bikpela hap taim bilong penim haus lotu o oltaim em i stretim ol plaua samting long gaden bilong mekim ples i luk gutpela. Taim man i mekim wok oltaim o longpela taim olsem, planti man inap ting olsem dispela Kristen i insait long wanpela lotu em tok em i no orait long en, na dispela inap pundaunim ol.​—⁠Matyu 13:41; 18:​6, 7.

Mipela i bin kamapim sampela bikpela samting bilong helpim ol Kristen taim ol i painim wok mani. Mipela i kamapim tasol ol tok i stret bilong bekim askim long ol lotu giaman. Tasol Kristen i ken bihainim tu ol dispela tok taim yumi painim ol narapela wok. Long olgeta dispela samting, em i mas beten na skelim gut ol samting, na tingim ol wan wan samting bilong dispela wok yet. Ol tok mipela i kamapim i helpim pinis planti Kristen long tingim wanem kain wok mani ol i laik kisim na dispela i kamapim klia laik bilong ol olsem ol i laik wokabaut stret long ai bilong Jehova.​—⁠Sindaun 3:​5, 6; Aisaia 2:3; Hibru 12:​12-​14.

[Futnot]

Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim, yu tingim yet o nogat:

◻ Tok bilong Pol olsem, “mipela i kisim maus bilong Krais na autim tok bilong en,” bilong wanem dispela tok i stret long ol Kristen God i bin makim ol long spirit holi? (2 Korin 5:​20)

Long bipo, long taim wanpela pait i laik kamap ol i bin salim ol man i olsem mausman bilong stretim dispela hevi na bai pait i no ken kamap. Ol manmeri bilong dispela graun ol i stap longwe long God, olsem na God i salim ol man em i bin makim olsem mausman bilong tokim ol manmeri long ol lo bilong kamap wanbel wantaim em.​—⁠12/15, pes 18.

◻ Wanem ol fopela samting i bin strongim bilip bilong Abraham?

Namba wan samting: Taim Jehova i givim tok long Abraham, em i putim gut yau long ol dispela tok, na long dispela pasin em i kamapim klia bilip bilong em (Hibru 11:⁠8); namba 2 samting: Em i bilip na wet long ol samting God i promis long en (Rom 4:​18); namba 3 samting: Planti taim Abraham i save toktok wantaim Jehova; na namba 4 samting: Jehova i sambai long Abraham taim em i bihainim tok bilong Jehova bilong stiaim em. Ol dispela fopela samting inap strongim bilip bilong yumi tu long nau.​—⁠1/1, pes 17, 18.

◻ Wanem insait bilong dispela hap tok “no ken larim ol traim i kamap long mipela”? (Matyu 6:​13)

Yumi askim God long helpim yumi bambai yumi no ken pundaun long traim i laik pulim yumi long sakim tok bilong em. Em inap stiaim yumi bambai yumi no ken pundaun na Satan i no ken giamanim yumi. (1 Korin 10:13)​—⁠1/15, pes 14.

◻ Yumi mas mekim wanem na bai God i ken lusim tingting long rong bilong yumi?

Yumi mas autim rong bilong yumi long em na tanim bel na mekim ol samting i “soim olsem [yumi] tanim bel pinis.” (Luk 3:⁠8) Na tu, taim yumi mekim pasin i makim olsem yumi tanim bel pinis na yumi laik stretim rong yumi bin mekim, dispela bai kirapim yumi long askim ol elda Kristen long helpim yumi long ol samting bilong spirit. (Jems 5:​13-​15)​—⁠1/15, pes 19.

◻ Bilong wanem yumi mas wok strong long mekim pasin daun?

Man i gat pasin daun em i save tingim tru ol narapela na em i no save tingting tumas long em yet. Pasin daun i save helpim yu long kisim ol pren tru i save laikim yu tru. Na bikpela samting moa, em Jehova bai mekim gut long yu. (Sindaun 22:⁠4)​—⁠2/1, pes 7.

◻ Olsem wanem dai bilong Jisas i narapela kain long dai bilong Adam?

I stret Adam i mas i dai, long wanem, long laik bilong em yet em i sakim tok bilong Man bilong wokim em. (Stat 2:​16, 17) Tasol Jisas i no gat asua na em i dai, long wanem, “em i no bin mekim sin.” (1 Pita 2:​22) Olsem na taim Jisas i dai, em i holim wanpela samting i gat bikpela pe tru bilong en, em samting Adam i no bin holim long taim em i dai​—⁠Jisas em inap tru long holim laip olsem wanpela man i gutpela olgeta. Olsem na dai bilong Jisas i gat bikpela pe inap tru olsem wanpela ofa bilong baim bek ol man.​—⁠2/15, pes 15, 16.

◻ Long driman bilong Esekiel, dispela taun i makim wanem samting?

Dispela taun i stap namel long graun nogut (samting i no holi), olsem na taun i mas makim wanpela samting bilong graun. Dispela taun i makim wanpela wok long graun em wanpela lain bai mekim bilong helpim ol stretpela manmeri ol bai stap long graun long nupela taim.​—⁠3/1, pes 18.

◻ Bilong wanem Jisas i bin wasim lek bilong ol disaipel bilong em taim ol i mekim kaikai bilong Pasova long yia 33 C.E.?

I no olsem Jisas i laik kirapim wanpela pasin bilong lotu olsem wasim lek bilong man. Nogat. Em i helpim ol aposel bilong em long kisim wanpela nupela pasin​—⁠em pasin daun na ol i mas i gat laik long mekim wok bilong helpim ol brata bilong ol maski, em i wanpela wok ol man nating i save mekim.​—⁠3/1, pes 30.

◻ Taim yumi skulim ol narapela, wanem samting i bikpela samting moa na i winim save bilong yumi long skulim ol man?

Em ol pasin bilong yumi na yumi wanem kain man na yumi mekim wanem ol wok bilong spirit ol sumatin i ken bihainim. (Luk 6:​40; 2 Pita 3:​11)​​—⁠3/15, pes 11, 12.

◻ Ol brata i mekim tok, olsem wanem ol inap kamap gutpela moa long pasin bilong kaunim gut ol skripsa?

Ol i mas mekim mekim planti taim. Ol i mas kaunim kaunim long maus inap long ol i ken kolim gut. Sapos i gat ol kaset bilong Baibel long tok ples bilong ol, i gutpela sapos ol i putim yau long pasin bilong man long kolim tok​—⁠em i kolim strong ol bikpela tok na em i senisim pasin bilong toktok. Na tingim pasin bilong em long kolim stret nem bilong ol samting.​—⁠3/15, pes 20.

◻ Taim man i dai, olsem wanem spirit i save “go bek long God”? (Saveman 12:⁠7)

Spirit em i strong bilong laip, na dispela tok olsem spirit i “go bek long God,” insait bilong en i olsem: God tasol inap givim laip gen long dispela man long bihain. God tasol inap bekim bek dispela spirit, o strong bilong laip, na man inap i stap laip gen. (Song 104:30)​—⁠4/1, pes 17.