O yu ken bekim tok olsem (sapos man i tok long Jon 1:⁠1): ‘Mi save long dispela tok. Long dispela ves, sampela Baibel i tok, Jisas em i “God,” na sampela i tok, Jisas em i “wanpela god.” Bilong wanem i olsem?’ (1) ‘Ating as bilong dispela em tok bilong ves 2 i tok, em i stap “wantaim God,” a?’ (2) ‘Na ating tok bilong Jon 1:18 tu i as bilong dispela. Em i tok . . . ’ (3) ‘Olsem wanem long Jisas? Yu ting em i save lotuim wanpela olsem God bilong em? (Jo 20:17)’

‘Yu bilip olsem Jisas em i God?’

Yu ken tok: ‘Mi bilip olsem Jisas em i wanpela god.’ Na ating yu ken tok moa olsem: (1) ‘Mi bilip olsem, long wanem, Aisaia 9:6 i kolim Jisas olsem “God i gat bikpela strong.” Tasol Baibel i kolim Papa bilong em tasol olsem God i Gat Olgeta Strong.’ (2) ‘Na long Jon 17:3 Jisas i tok long Papa bilong em, olsem: “Yu wanpela tasol yu God tru.” Olsem na Jisas em i no God; em i wankain tasol olsem God​—⁠em i kamapim ol gutpela pasin bilong God.’ (3) ‘Yumi mas mekim wanem na bai God i amamas long yumi? (Jo 4:​23, 24)’

Graun

Stori: Long Baibel dispela tok “graun” i makim dispela graun Jehova i wokim na putim olgeta samting long en bilong yumi ol man i ken i stap laip na i stap amamas. Tasol sampela taim Baibel i kolim dispela tok bilong makim ol manmeri bilong graun, o bilong makim pasin bilong ol manmeri bilong graun.

Yu ting ol man bai tromoi ol bom nogut na bagarapim graun?

Baibel i tok God i gat wanem laik long dispela graun?

Mt 6:10: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”

Sng 37:29: “Ol stretpela man bai i kisim graun God i givim ol, na bai ol i stap oltaim long en.”

Lukim tu Saveman 1:4; Song 104:⁠5.

Ol man i no save tingim laik bilong God, olsem na ating ol bai bagarapim dispela graun na bai yumi no inap i stap moa long en?

Ais 55:​8-11: “Bikpela i tok olsem, ‘Ol . . . pasin bilong mi na tingting bilong mi i winim tru ol pasin . . . na tingting bilong yupela. . . . Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.’ ”

Ais 40:​15, 26: “Bikpela i lukim ol manmeri bilong graun i olsem samting nating. Ol i olsem das bilong graun na i olsem liklik wara i pundaun. . . . Yupela lukluk i go antap long skai na lukim ol sta [na san na mun] i stap antap. Husat tru i bin wokim ol? Em Bikpela tasol. . . . Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.” (Yumi save pret long bikpela strong bilong ol bom nogut ol man i wokim, tasol i gat bikpela strong moa yet i mekim na ol bilion bilion sta i stap antap ol i wok. Husat i wokim na bosim olgeta sta samting i stap antap? Em i no ken larim ol man i mekim wok long ol bom nogut bilong ol na pasim laik bilong em, a? Yumi save God i no ken larim ol i mekim olsem, long wanem, em i bin bagarapim king bilong Isip na ami bilong em taim king i laik pasim em long kisim bek ol Israel.​—⁠Kis 14:​5-31.)

KTH 11:​17, 18: “Bikpela, yu God I Gat Olgeta Strong. . . . Yu kisim pinis bikpela strong bilong yu, na yu kamap king tru. Olsem na mipela i tenkyu long yu. Ol [lain man] i belhat tru, tasol taim bilong yu long belhat em i kamap pinis. Nau em i taim bilong . . . bagarapim ol man i bin bagarapim graun.”

Yu ting God yet bai bagarapim graun long paia?

Yu ting tok bilong 2 Pita 3:​7, 10 i makim olsem? “Skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta. . . . De bilong Bikpela bai i kamap wantu tasol olsem ol stilman i save kam. Long dispela De skai bai i pairap bikpela na i pinis olgeta. Na olgeta liklik samting God i bin wokim graun long en, paia bai i kukim ol na ol bai i pinis [“bai i kamap ples klia,” NW].” (Harim: Tupela olpela rait bilong yia 350 samting, em Codex Sinaiticus na Vatican MS 1209, i tok “i kamap ples klia.” Ol rait i kamap bihain long dispela, olsem Codex Alexandrinus bilong yia 450 samting na Vulgate bilong Klementin bilong yia 1550 samting, i tok “paia bai i kukim ol na ol bai i pinis.”)

Yu ting tok bilong Kamapim Tok Hait 21:1 i makim olsem graun bai bagarap? “Mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa.”

Sapos tru ol dispela tok i makim olsem, orait em i mas stret wantaim tok bilong ol ves klostu na ol narapela tok bilong Baibel

Sapos tok bilong ol dispela ves (2 Pi 3:​7, 10; KTH 21:⁠1) i makim olsem graun tru bai paia na bagarap, orait ol i makim olsem skai tu (olsem ol sta na san na mun) i mas paia na bagarap. Tasol dispela i no stret wantaim tok promis bilong Matyu 6:​10; Song 37:29; 104:​5; Sindaun 2:​21, 22. Na yu tingim: San na ol sta i olsem paia na i hat nogut tru, olsem na sapos paia i kukim, dispela i no inap mekim wanpela samting long ol, a? Olsem na long ol dispela ves, dispela tok “graun” i no makim graun tru; em i makim narapela samting.

Long 1 Stori 16:​31, na Song 97:​1, na long sampela ves moa, Baibel i kolim dispela tok “graun” olsem tok piksa bilong makim ol manmeri bilong graun. Orait, em inap mekim olsem tu long 2 Pita 3:​7, 10 na Kamapim Tok Hait 21:1, a?

Lukim ol ves klostu long 2 Pita 3:​7, 10, olsem 2Pe 3 ves 5 na 6 (na 2Pe 2:​5, 9). Pita i stori olsem dispela taim bai i wankain olsem taim bilong Bikpela Tait. Tait i bagarapim ol man nogut, tasol Noa wantaim lain bilong em na graun tru i no bagarap. Na 2 Pita 3:7 tu i tok ol man i bagarap em “ol man i bin givim baksait long God.” Dispela tingting, olsem “graun” long dispela ves i makim ol man nogut, em i stret wantaim ol narapela tok bilong Baibel, olsem yumi kolim pinis. “Graun,” olsem ol man nogut, bai “i kamap ples klia” (NW), long wanem, olgeta pasin giaman i haitim pasin nogut bilong ol man i givim baksait long God, Jehova bai pinisim, olsem long paia, na bai pasin nogut bilong ol i kamap ples klia. Em bai kamapim klia olsem i stret ol i mas bagarap olgeta. Long Kamapim Tok Hait 21:1, dispela tok “namba wan graun,” em tu i makim ol man nogut.

Bilong kisim gut tok bilong Jisas long Luk 21:33 (“skai wantaim graun bai i pinis, tasol . . . ”), yumi ken lukim tok i stap long Luk 16:​17 (“skai wantaim graun bai inap lus. Tasol . . . ”). Jisas i mekim dispela tupela tok bilong makim olsem dispela tupela samting em i stori long en i no inap tru long kamap.​—⁠Lukim tu Matyu 5:⁠18.

Yu ting God bai kisim ol stretpela man i go long heven na salim ol i kam bek long graun taim ol man nogut i bagarap pinis?

Yu ting Kamapim Tok Hait 21:​2, 3 i makim olsem? Em i tok: “Mi lukim dispela taun bilong God, em nupela Jerusalem. Mi lukim em i stap wantaim God, na i lusim heven na i kam daun. Em i gat gutpela bilas, olsem meri i laik marit na i putim gutpela bilas na i redi long maritim man bilong en. Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol.’ ” (Dispela tok, God bai “stap wantaim” ol manmeri, yu ting dispela i makim olsem God bai tanim i kamap man bilong graun? Em i no ken mekim olsem, a? Long wanem, em i bin tokim Moses: “Sapos wanpela man i lukim pes bilong mi bai em i dai.” [Kis 33:20] Olsem na ol lain bilong Nupela Jerusalem tu i no ken kam bek gen long graun olsem man. Orait, olsem wanem God bai “stap wantaim” ol manmeri? Na olsem wanem Nupela Jerusalem bai “lusim heven na i kam daun”? Long Stat 50:​25, Josep i tok God bai “kam” bilong helpim ol Israel, na long Luk 7:​16 Baibel i tok, long rot bilong wok bilong Jisas, God i “kam pinis” bilong helpim ol manmeri bilong em. Sampela Baibel i tanim dispela tok “kam” olsem “tingim” [NW]. Olsem na tok bilong Kamapim Tok Hait 21:​2, 3 i mas makim olsem God bai “kam” i stap wantaim ol manmeri long rot bilong Nupela Jerusalem long heven, na long rot bilong Nupela Jerusalem ol manmeri i bihainim tok ol bai kisim ol blesing.)

Snd 2:​21, 22: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut.” (Em nau, Baibel i no tok ol gutpela stretpela man bai kam bek long graun, nogat; em i tok ol bai “stap gut oltaim long graun.”)

Yu ting God i senisim laik bilong em bilong pastaim long graun?

Stt 1:​27, 28: “Orait God i wokim [man na meri] na ol i kamap olsem God yet. . . . Em i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.’ ” (Long dispela tok God i makim olsem em i laik bai ol lain bilong Adam na Iv i pulap long graun na lukautim Paradais long olgeta hap. God i wokim gut tru dispela graun bilong ol man i ken i stap long en​—⁠long rot bilong ol kompas bilong lukluk i go longwe na ol roket, ol man i no bin lukim wanpela gutpela samting olsem dispela graun. Olsem na taim Adam i mekim sin, yu ting God i senisim tingting na em i no ken kamapim laik bilong em long graun?)

Ais 45:⁠18: “[God] i no wokim graun bilong i stap nating. Nogat. Em i bin wokim bilong olgeta samting i ken i stap long en. Em i save tok olsem, ‘Mi wanpela tasol mi Bikpela, na i no gat narapela god moa i stap.’ ” (Lukim tu Aisaia 55:​10, 11.)

Long Nupela Taim, sapos i no gat wanpela bai i dai, ating bai i no gat spes bilong olgeta long graun?

Long Iden God i tokaut long laik bilong em long graun, na bihain long Bikpela Tait, em i kolim gen. Em i tokim Noa na ol pikinini bilong em: “Karim planti pikinini, bai ol lain bilong yupela i pulapim olgeta hap bilong graun.” (Stt 9:⁠1; 1:28) God i wokim ol man na meri bilong kamapim ol pikinini, na taim graun i pulap pinis, em inap pinisim dispela strong bilong ol.

God bai larim wanem kain man i stap oltaim long graun?

Sef 2:⁠3: “Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat . . . yupela bai i no inap bagarap.”

Sng 37:​9, 11: “Ol manmeri i bilip na wetim Bikpela i helpim ol, bai ol i stap gut long graun bilong ol. . . . Ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.”

Hel

Stori: Dispela tok “hel” i stap long planti Baibel, tasol long sampela Baibel ol i raitim olsem “matmat” o “ples bilong ol man i dai pinis” o narapela tok olsem. Sampela Baibel i raitim olsem i stap long tok Hibru (she’ohlʹ) na tok Grik (haiʹdes) long pastaim, em dispela tupela tok i makim ples ol man i dai pinis ol i go long en, em matmat​—⁠tasol em i no makim matmat bilong olgeta wan wan man. I gat narapela hap tok Grik (geʹen·na), em sampela Baibel i tanim olsem “hel,” tasol em i makim man i bagarap na pinis olgeta. Tasol ol misin i gat nem Kristen na ol lotu haiden tu i save lainim ol man olsem “hel” o “bikpaia” em i ples ol spirit nogut i stap long en, na ol man nogut i go long en bilong kisim strafe taim ol i dai (sampela i ting, ol i kisim pen tu).

Baibel i makim olsem ol man i dai pinis inap pilim pen, o nogat?

Sav 9:​5, 10: “Ol man i dai pinis, ol i no inap save long wanpela samting. . . . Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis,* dispela ples bai yu go long en.” (Sapos ol i no inap save long wanpela samting, ol i no inap pilim pen, a?) (*Long sampela Baibel ol i raitim “Sheol,” NW, AS, RS, NE, JB; “matmat,” KJ, Kx; “hel,” Dy.)

Sng 146:4: “Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”* (*Ol i raitim olsem long sampela Baibel