bilong em na em i kirap bung wantaim ol wanlotu bilong em, dispela i save helpim em long kamap strong gen long ol samting bilong spirit. Tru tumas, long rot bilong ofa bilong Krais, man i tanim bel em inap pilim “marimari bilong God.”​​—⁠Efesus 1:⁠7.

“Klinpela Bel” na “Nupela Spirit”

Taim Devit i autim rong pinis, em i no pilim olsem em i nogut tasol na em i no inap mekim wanpela gutpela wok, nogat. Ol tok em i raitim long Buk Song long pasin bilong autim rong, i makim olsem nau bel bilong em i stap isi na em i gat strongpela tingting long stap gut long wok bilong God. Lukim Song 32. Ves 1 i tok: “Sapos God i lusim pinis rong bilong wanpela man, na i rausim sin bilong em, dispela man i ken amamas.” Olsem na maski rong i bikpela, sapos man i tanim bel tru, orait em inap amamas gen. Wanpela samting man i ken mekim bilong kamapim olsem em i tanim bel tru, em i mas putim asua i go long em yet, wankain olsem Devit i bin mekim. (2 Samuel 12:13) Devit i no tokim Jehova olsem i gat as na em i mekim dispela rong, na em i no wok long putim asua i go long ol narapela, nogat. Ves 5 i tok: “Bihain mi bin autim sin bilong mi long yu. Mi no haitim pasin nogut bilong mi. Mi ting olsem, mi laik autim olgeta sin bilong mi long Bikpela. Mi autim pinis na yu lusim asua bilong mi na sin bilong mi tu.” Taim man i autim rong, dispela i mekim bel i stap isi, na nau asua bilong ol rong em i mekim bipo i no bagarapim moa bel bilong em.

Taim Devit i askim Jehova pinis long lusim rong bilong em, bihain em i tok: “God, yu ken wokim nupela klinpela bel insait long mi. Putim nupela spirit insait long mi na bai mi bihainim yu tasol.” (Song 51:10) Taim Devit i askim Jehova long givim “klinpela bel” na “nupela spirit” long em, dispela i makim olsem Devit i save em i gat pasin bilong sin na God i mas helpim em long stretim bel bilong em na mekim pasin i stret. Na tu, Devit i no wok long tingim tingim dispela hevi bilong em, nogat; em i tingting strong long mekim yet wok bilong God. Em i beten olsem: “Bikpela, yu ken helpim mi long tokaut stret, na long litimapim nem bilong yu.”​​—⁠Song 51:⁠15.

Taim Devit i tanim bel tru na tingting strong long mekim wok bilong God, Jehova i mekim wanem? Em i mekim gut bel bilong Devit, olsem: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Song 32:⁠8) Em nau, dispela i makim olsem Jehova i save pilim tru tingting na laik bilong man i tanim bel na Em i laik helpim em. Jehova i kirap helpim Devit long kisim gut pasin bilong skelim gut ol samting. Olsem na sapos bihain wanpela

Askim

Ofa bilong baim bek ol man, dispela i mekim na Jehova i orait long lusim rong bilong yumi. Olsem na bilong wanem ol Kristen i mas autim rong bilong ol long ol elda bilong kongrigesen?

Olsem yumi lukim long stori bilong Devit na Batseba, Jehova i bin lusim rong bilong Devit maski em i bikpela rong, long wanem, Devit i tanim bel tru. Taim profet Natan i kam long em, Devit i tokaut olsem: “Mi mekim sin long ai bilong Bikpela.”​—⁠2 Samuel 12:⁠13.

Tru, taim sinman i tanim bel tru na i tokaut long rong bilong em, Jehova i save harim na lusim rong bilong dispela man, tasol long sori bilong Em, Jehova i save mekim narapela samting tu​—⁠em i wokim rot bilong helpim dispela man i bin mekim rong bambai em i ken kamap gutpela gen long ol samting bilong spirit. Jehova i bin helpim Devit long rot bilong profet Natan. Long nau, insait long kongrigesen Kristen, i gat ol strongpela Kristen, olsem elda, i stap. Disaipel Jems i tok: “Ating wanpela bilong yupela i gat sik [bilong spirit]? Orait em i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”​—⁠Jems 5:​14, 15.

Ol elda i gat save pinis ol inap mekim planti samting bilong daunim bel hevi bilong man i bin mekim rong na em i pilim tru na i tanim bel. Ol i save wok strong long bihainim pasin bilong