Ol Samting i Painim Boskru Bilong Sip i Lainim Yumi
TAIM boskru bilong sip i raun em yet long biksolwara, em inap sotwin tru. Taim skin i no strong moa na i olsem skin i dai, dispela inap mekim na tingting bilong em i paul, na nau em bai popaia na i no tingting stret long ol samting em i mas mekim. Olsem na em i save olsem anka bilong sip i bikpela samting bilong helpim em. Anka inap holim sip na sip i no trip nabaut i go long ples nogut, na boskru em inap malolo na kisim strong gen. Na anka i save mekim na nus bilong sip i stap long hap em win na si i bruk long en na dispela bai mekim na sip i sanap stret.
Planti birua i save painim ol boskru bilong sip long solwara, na olsem tasol planti hevi bilong dispela graun i save painim ol Kristen na ol i pilim olsem ol i mas malolo. Wanpela taim Jisas i bin tokim ol disaipel bilong em: “Goan, yumi tasol i go long wanpela hap i no gat man, na bai yupela i ken malolo liklik.” (Mak 6:31) Long nau sampela i save raun inap sampela wik o ol i save go malolo wantaim famili bilong ol long Sarere Sande. Taim ol i malolo, dispela inap givim nupela strong long ol. Orait olsem wanem yumi ken save olsem yumi stap gut long ol samting bilong spirit long kain taim olsem? Wanem samting i olsem anka long samting bilong spirit na em inap helpim yumi na yumi sanap strong na i no trip nabaut?
Jehova i tingim yumi na em i givim wanpela samting long yumi. Em Baibel tasol. Taim yumi kaunim long olgeta de, bai yumi stap klostu long em na yumi no trip i go lusim em. Ol tok bilong em inap mekim na yumi sanap strong, na em i helpim yumi long winim ol traim bilong Satan na ol manmeri bilong em. Taim yumi kaunim Baibel long olgeta de, maski em i no taim yumi bin makim bilong kaunim, dispela bai stap olsem anka na i helpim yumi long sanap strong long ol samting bilong spirit.—Josua 1:7, 8; Kolosi 2:7.
Man bilong raitim Song i toksave long yumi olsem “man i save laikim tumas lo bilong God, na em i save tingting long dispela lo long san na long nait,” em i ken amamas. (Song 1:1, 2) Taim yumi kaunim Baibel long olgeta de, dispela bai mekim yumi “amamas,” long wanem, em i givim nupela strong long yumi, na yumi redi long bihainim yet rot Kristen bilong yumi.