Welkam Long Skul Tiokratik Bilong Autim Tok

LONG olgeta hap bilong graun, insait long 200 kantri, planti milion sumatin i wok long kisim helpim long olgeta wik long rot bilong Skul Tiokratik Bilong Autim Tok. Sampela ol i nupela sumatin na sampela ol i bin insait long skul inap planti yia pinis. Dispela skul i save kamap long planti tausen hap. Maski yu sindaun we long dispela graun, yu inap kisim wankain skul. Olgeta kain manmeri ol i kisim skul tiokratik, no gat pe, maski ol i gat hamas krismas, o ol i bilong wanem lain, o ol i bin kisim bikpela skul, o ol i no bin skul.

Taim ol i kirapim dispela skul insait long ol kongrigesen bilong ol Witnes Bilong Jehova long 1943, ol i tok wok bilong en i olsem: ‘Bilong redim “ol man,” em ol i harim pinis Tok Bilong God na ol i stap strong long bilip bilong ol, na bai ol inap “long skulim ol arapela” na mekim gutpela wok moa long autim bilip bilong ol.’ (Course in Theocratic Ministry, p. 4) Wok bilong dispela skul i wankain long nau tu.

Wanem nambawan samting yumi inap mekim long maus God i givim long yumi? Baibel i tok: “Olgeta samting i gat laip—litimapim nem bilong Ja!” (Sng. 150:6, NW) Taim yumi mekim olsem, Papa bilong yumi long heven i belgut tru. Dispela i soim em olsem bel bilong yumi i amamas long gutpela pasin na pasin sori bilong em. Olsem na Baibel i tokim ol Kristen olsem ‘oltaim maus bilong yumi i mas litimapim nem bilong God na dispela pasin i mas i stap olsem ofa yumi save givim long God’! (Hi. 13:15) Bilong helpim yu long mekim gut wok bilong yu long litimapim nem bilong Jehova, mipela i amamas long yu i kamap sumatin bilong Skul Tiokratik Bilong Autim Tok.

Tru, Skul Tiokratik Bilong Autim Tok i stori planti long pasin bilong mekim tok na skulim man, tasol em inap helpim yumi long planti samting moa. Taim yu insait long skul em bai helpim yu long mekim gut ol dispela samting: Pasin bilong rit, putim gut yau, holim tok long tingting, stadi, painim save insait long ol buk, skelim na stretim gut ol save yu kisim, toktok wantaim narapela, bekim ol askim, skulim man, na raitim long pepa ol tingting bilong yu. Baibel yet na ol buk i stori long Baibel i as bilong ol samting yu bai stadi long en, na bekim tok long en, na mekim ol tok long en insait long skul. Taim yu wok long putim ol tok i tru bilong Baibel long tingting, bai yu lain long kisim tingting bilong God. Dispela inap helpim yu long olgeta samting yu laik mekim! Wanpela tisa bilong yunivesiti, em William Lyon Phelps, i tok: “Ol man i gat gutpela save long Baibel, yumi ken tok ol i olsem man i bin kisim bikpela skul. . . . Mi ting sapos yu no bin go long skul koles tasol yu save gut long Baibel, dispela i winim pasin bilong i go long yunivesiti tasol yu no gat save long Baibel.”

Rot Bilong Helpim Yu Gut Tru

Tasol bilong Skul Tiokratik i ken helpim yu gut tru, yu mas wok strong long lain. Aposel Pol i strongim poroman Kristen bilong em Timoti olsem: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.” (1 Ti. 4:15) Yu yet yu ken mekim wanem?

Sapos yu inap, kam long Skul Tiokratik long olgeta wik. Mekim gutpela wok long dispela skul-buk, Kisim Helpim Long Skul Tiokratik Bilong Autim Tok. Raitim nem bilong yu long hap ol i makim bilong mekim olsem. Olgeta taim bringim dispela buk wantaim yu long dispela skul. Dispela skul-buk em i olsem wanpela eksasais-buk tu. Taim yu ritim sampela bikpela tok yu pilim em inap helpim yu, orait, katim dispela tok. Yusim spes i stap arere long ol paragraf bilong raitim ol gutpela tok yu lainim long taim bilong skul.

Ol bai givim yumi wanpela sediul bilong bihainim insait long skul. Na tu, dispela sediul bai stori long pasin bilong mekim skul. Ating i gutpela yu putim dispela sediul insait long buk bilong yu na bai yu no hatwok long painim.

Taim yu wok long redim ol hap bilong skul long olgeta wik, tingim, Baibel em i namba wan buk yumi mekim wok long en bilong skulim yumi. Olsem na pastaim ritim ol hap bilong Baibel em sediul i makim bilong wik. Na tu, sapos yu inap ritim ol narapela hap em sediul i makim, dispela bai helpim yu gut tru.

Long taim bilong skul ating i gat sampela hap yu inap bekim tok long en. Givim bel long insait tru long ol dispela hap. Dispela inap helpim yu long putim gut long tingting ol samting yu bin harim na yusim dispela tok long i stap bilong yu yet.

Olgeta sumatin bai mekim ol tok o ol soim long ai bilong kongrigesen. Mekim gutpela wok taim yu mekim ol tok o soim. Givim bel tru long kamap gutpela moa long ol samting ol i makim yu long wok long en. Ol bai givim sampela tok kaunsel long yu bilong helpim tok na wok tisa bilong yu i kamap gutpela moa. Amamas long ol helpim yu kisim. Long buk bilong yu yet, raitim ol tok kaunsel ol i givim long yu na bai yu save long olsem wanem yu ken mekim tok bilong yu i kamap gutpela. Em i hatwok long skelim pasin bilong yumi yet long mekim tok, olsem na ol gutpela tok Baibel i as bilong en na ol tok kaunsel ol i givim yumi long pasin sori ol inap helpim yumi tru long mekim gutpela wok moa. Dispela tok i stret maski yumi bin insait long skul inap planti yia pinis.—Snd. 1:5.

Yu laik bai pasin bilong yu long mekim tok i ken kamap gutpela moa hariap? Sapos yu givim bel, yu inap mekim olsem. Stadi pastaim long ol tok ol sumatin bai mekim long skul. Sapos wanpela sumatin i no kam, orait bai yu redi long volantia, na dispela bai helpim yu long lain gut. Taim ol narapela i mekim ol tok, putim gut yau long pasin bilong ol long kamapim tok. Yumi ken kisim save long tok ol narapela i mekim.

Na tu, sapos yu mekim stadi bilong yu yet long ol tok insait long buk paslain long sediul i makim, dispela bai helpim na bai yu lain hariap long pasin bilong mekim gut tok. Bihain, taim yu save gut long ol tok i stap long stadi 2 i go inap long 16, orait kirap mekim ol samting insait long hap bilong buk i kirap long pes 78, ol i kolim “Program Bilong Lain Long Pasin Bilong Mekim Tok na Mekim Wok Tisa.” Pastaim, mekim olgeta wan wan stadi, na mekim samting ol i kolim eksasais em ol i stap wantaim ol dispela stadi. Bihainim tok yu lainim taim yu mekim wok autim tok. Dispela inap helpim yu long mekim gutpela wok tru long autim tok na skulim ol man long Baibel.

Skul yu kisim long Skul Tiokratik bai redim yu long mekim samting em i nambawan bikpela samting long i stap bilong yu. Yumi stap laip, long wanem, em i laik bilong God, olsem na wok bilong litimapim nem bilong em, em i as bilong i stap bilong yumi. I stret yumi mas litimapim tru nem bilong God Jehova. (KTH 4:11) Skul yumi kisim long dispela skul em i rot bilong mekim olsem, na em i helpim yumi long tingting gut, bihainim savepasin, na autim klia ol gutpela tok tru bilong Baibel.