“Taim Yu Bin i Stap Liklik Pikinini Yet, Yu Stat Long Kisim Save”
NAU tasol ol saveman i kisim save olsem, taim yumi toktok long ol bebi dispela i save mekim na kru bilong ol i lain long mekim wok bilong en na bihain bai ol inap tingting, skelim ol samting, na stretim ol hevi. Dispela samting i save kamap moa yet long namba wan yia bilong ol pikinini. Wanpela nius (International Herald Tribune) i ripot olsem sampela saveman long nau ol i bilip olsem “taim bebi i harim ol tok long ol wan wan de dispela i bikpela samting bilong helpim em na bai tingting bilong em i ken wok gut na em inap kisim bikpela save bihain, na winim skul na wok gut wantaim ol narapela man.”
Tasol ol dispela toktok, em man yet i mas mekim. Redio o televisen i no ken kisim ples bilong man.
Wanpela saientis long Yunivesiti Bilong Wosington long Seatel, Yunaitet Stets, i tok: “Nau mipela i save olsem ol hap bilong kru i gat wok long kisim save, kain olsem rop wailis samting, ol i save kirap mekim wok taim bebi i liklik yet na kru bilong em i wet long ol toktok na ol samting i mas kamap na bai ol dispela toktok samting i ken i go insait long dispela hap bilong kisim save. Mipela i no bin save long dispela, tasol i no longtaim i go pinis na mipela i kisim save olsem dispela samting i save kamap taim bebi i liklik tru. Olsem: Bebi i lain pinis long harim krai bilong tok ples bilong ples bilong em taim em i gat 6-pela mun.”
Dispela save ol i kisim i daunim tingting bilong planti man em ol i tok ol bebi inap kisim gutpela save sapos ol papamama i mekim gut long ol long olgeta taim. Dispela save i kamapim klia tu wanpela bikpela samting, olsem ol papamama i gat bikpela wok long helpim pikinini long lain long wokim tingting na kisim save.
Dispela i kirapim yumi long tingim tok aposel Pol i bin raitim long Timoti: “Taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.” Yumi save olsem ol tok bilong Baibel em mama na tumbuna bilong Timoti ol i bin givim long em taim em i bebi yet i bin helpim tru Timoti long kamap wanpela gutpela wokman bilong God.—2 Timoti 1:5; 3:15.