klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet, o nogat. . . . Olgeta gutpela diwai i save karim gutpela kaikai. Na diwai nogut i save karim kaikai nogut. . . . Olsem na yupela i mas lukim pasin bilong ol yet na bai yupela i save long ol giaman profet.”

Ol i bihainim wanem kain pasin? “Pasin bilong olpela bel.” Olsem ‘pasin pamuk, pasin doti, bel i kirap long mekim ol pasin nogut, lotu long ol giaman god, mekim olkain posin, pasin birua, belhat, kros, bel nogut, mangal, pasin bilong tingim ol yet tasol, tok pait, brukim lain, bel kaskas, na spak samting.’ “Olgeta man i mekim ol dispela kain pasin, ol bai i no inap i go insait long kingdom bilong God.” Tasol spirit holi i kirapim yumi long mekim pasin olsem: ‘Pasin sori, amamas, bel isi, i no belhat kwik, helpim ol man, mekim gutpela pasin, [bilip], stap isi, bosim gut skin.’​—⁠Ga 5:​19-23; lukim tu 2 Pita 2:​1-3.

Ating ol Witnes Bilong Jehova i bin kranki long sampela tok bilong ol?

Ol Witnes Bilong Jehova i no tok ol i profet na God i givim tok long ol. Nogat. Ol i bin kranki long sampela samting. Olsem ol aposel bilong Jisas, bipo sampela tingting bilong ol long samting ol i wetim i kamap em i kranki.​—⁠Lu 19:11; Ap 1:⁠6.

Baibel i stori long sampela samting bilong makim taim bilong Krais i kam bek olsem king. Ol Witnes Bilong Jehova i wetim dispela taim na ol i bin skelim gut ol dispela tok. (Lu 21:24; Dan 4:​10-17) Na Jisas i bin kolim planti samting i mas kamap olsem mak bilong dispela taim, na bai yumi ken save long dispela lain ol bai stap yet na lukim dispela graun nogut bilong Satan i pinis. (Lu 21:​7-36) Ol Witnes Bilong Jehova i bin tokaut long ol samting i kamap na i truim ol tok profet bilong dispela mak. Tru, ol i bin popaia long samting ol i ting bai kamap long pinis bilong sampela hap taim, tasol ol i no bin lusim bilip o lusim pasin bilong was i stap na wetim ol samting i kamap tru olsem Jehova i tok em i laik mekim. Ol i bin holim strong long tingting tok bilong Jisas, olsem: “Yupela i mas was gut. Yupela i no save wanem de Bikpela bilong yupela bai i kam.”​—⁠Mt 24:⁠42.

Ol samting ol i mas stretim tingting long en i liklik tru sapos yumi skelim wantaim ol bikpela tok i tru bilong Baibel ol i bin kisim save long en na autim long ol man. Sampela bilong ol dispela tok i tru i olsem: Jehova tasol em i God tru; Krais Jisas i no hap bilong wanpela God Triwan​—⁠em i dispela wanpela Pikinini bilong God em God yet i bin kamapim. Yumi mas bilip long ofa bilong Krais​—⁠dispela tasol inap baim bek yumi na tekewe sin bilong yumi. Spirit holi i no wanpela man, em strong bilong Jehova bilong mekim wok, na em i kirapim ol man i lotu tru long God long bihainim ol gutpela pasin. Yumi no gat tewel olsem ol haiden bilong bipo i tok; taim yumi dai yumi dai tru na yumi mas wetim God i kirapim bek yumi bambai yumi ken i stap laip gen. God i bin larim pasin nogut i stap bilong stretim bikpela tok i bin kamap long wok king bilong em. Kingdom bilong God tasol inap helpim ol man. Nau yumi stap long taim bilong las de bilong pasin nogut bilong dispela graun, em dispela taim i bin kirap long yia 1914. Inap 144,000 gutpela Kristen tasol bai mekim wok king na wok pris wantaim Krais long heven, na olgeta narapela manmeri i bihainim tok ol bai kisim laip oltaim long Paradais long graun.

Narapela samting yu mas tingim long ol tok ol Witnes Bilong Jehova i lainim ol man long en, em olsem: Ol dispela tok i bin helpim tru ol man long bihainim stretpela pasin o nogat? Na ol man i bihainim ol dispela tok, ol i kisim gutnem long wokabaut stret o olsem wanem? Na taim ol i bihainim ol dispela tok, dispela i helpim i stap bilong famili? Jisas i tok wanpela mak bilong ol disaipel tru bilong em i olsem: Bai narapela i laikim tru narapela. (Jo 13:35) Yu lukim dispela pasin i stap tru namel long ol Witnes Bilong Jehova? Orait, yu yet yu mas skelim na bai yu ken save.

Sapos Man i Tok​—⁠

‘Pasto i tok ol Witnes Bilong Jehova i profet giaman’

Yu ken tok: ‘Olsem wanem? Em i soim sampela tok bilong Baibel long yu long sampela bilip o pasin bilong mipela i makim olsem mipela i profet giaman? . . . Mi laik soim sampela tok bilong Baibel long yu i stori long ol profet giaman. (Kamapim sampela tok i stap long pes 375-378.)’

O yu ken tok: ‘Kain strongpela tok olsem, i no stret sapos man i mekim nating, a? Olsem wanem? Pasto i kolim sampela tok o pasin bilong mipela i makim olsem mipela i profet giaman? (Sapos man bilong haus i kolim wanpela “tok profet” ol i tok yumi bin mekim na i no kamap tru, orait kamapim sampela tok bilong pes 376, 377, na laspela hap bilong pes 377 i go inap pes 379.)’

O yu ken tok: ‘Mi save, sapos wanpela man i sutim kain tok olsem long yu, bai yu amamas sapos em i larim yu i bekim tok, a? . . . Olsem na mi laik soim sampela tok bilong Baibel long yu bilong bekim dispela tok.’

Rausim Bel

Stori: Rausim bel, em pasin bilong rausim pikinini i no redi yet long lusim bel bilong mama na kam ausait, na em i no inap i stap laip ausait long bel bilong mama. Taim meri i gat bel, sampela taim pikinini yet i lus long bel, long wanem, skin bilong meri i gat sik samting, o samting i paitim bel bilong em, o em i pundaun. Tasol sapos meri i no laik karim pikinini na em i mekim wanpela samting na rausim bel, dispela em pasin bilong kilim man i dai.

God em i As bilong laip, olsem na yumi mas ting olsem wanem long rausim bel?

Ap 17:28: “Yumi save kisim laip long [God] na em wanpela tasol i givim strong long yumi na yumi save wokabaut.”

Sng 36:9: “Yu [God Jehova] as tru bilong laip bilong olgeta samting.”

Ro 14:12: “Yumi olgeta wan wan bai yumi mas tokim God long as bilong olgeta pasin yumi bin mekim.”

Taim pikinini i stap blut yet long bel bilong mama, Jehova i ting laip bilong en i bikpela samting o nogat?

Sng 139:​13-16, NW: “Yu [Jehova] bin haitim mi gut insait