Ol Witnes Bilong Jehova

Stori: Ol i wanpela lain Kristen i stap long olgeta hap na ol i tokaut long God Jehova na laik bilong em long ol man. Baibel tasol i as bilong ol bilip bilong ol.

Wanem ol bilip bilong ol Witnes Bilong Jehova i makim ol i narapela kain long ol narapela lotu?

(1) Baibel: Ol Witnes Bilong Jehova i bilip olsem spirit bilong God i bin kamapim olgeta tok bilong Baibel. Ol i no bihainim ol bilip ol man i bin kamapim; Baibel tasol i as bilong olgeta bilip bilong ol.

(2) God: Ol i lotu long Jehova, em wanpela tasol i God tru, na ol i no pret long tokim ol man long em na long ol gutpela samting em i laik mekim long ol man. Sapos wanpela man i autim tok bilong Jehova long ol man, ol narapela i save ting em i bilong dispela lain, olsem “Ol Witnes Bilong Jehova.”

(3) Krais Jisas: Ol i no bilip olsem Krais Jisas em i hap bilong wanpela God Triwan. Nogat. Ol i bilipim tok bilong Baibel i tok, em i Pikinini bilong God na em i namba wan samting God i bin wokim; em i bin stap long heven taim em i no kam daun yet long graun; God i kisim laip bilong em na putim long bel bilong wanpela meri singel, em Maria; Jisas i kamap man long graun na givim gutpela laip bilong em olsem ofa bilong opim rot bambai ol man i bilip ol i ken kisim laip oltaim; long 1914 God i bin givim namba long Jisas na em i kirap long mekim wok king na bosim olgeta hap bilong graun.

(4) Kingdom bilong God: Ol i bilip olsem Kingdom bilong God tasol inap helpim ol man; em wanpela gavman tru; klostu nau bai em i pinisim dispela taim nogut na olgeta gavman bilong graun, na nupela taim i gat stretpela pasin tasol bai kamap.

(5) Laip long heven: Ol i bilip olsem 144,000 Kristen, em God i makim ol long spirit holi, ol bai mekim wok king wantaim Krais long Kingdom bilong heven. Ol Witnes i no ting laip long heven em i pe olgeta “gutpela” man i kisim. Nogat.

(6) Graun: Ol i bilip olsem laik bilong God long pastaim bai kamap tru long graun; ol man i lotu long Jehova bai pulap long graun na i stap gutpela olgeta inap oltaim oltaim; na ol man i dai pinis bai kirap bek na ol tu inap kisim ol dispela blesing.

(7) Dai: Ol i bilip olsem ol man i dai pinis i no save long wanpela samting; ol i no pilim pen o amamas long wanpela ples spirit; ol i no i stap moa. Ol i stap tasol long tingting bilong God, na God i mas kirapim bek ol bambai ol i ken i stap laip gen.

(8) Taim bilong las de: Ol i bilip olsem kirap long yia 1914 yumi bin stap long taim bilong las de bilong pasin nogut bilong nau; na sampela man i bin lukim ol samting i kamap long 1914 bai ol i stap yet na lukim dispela taim nogut bilong nau i pinis olgeta; na ol man i laikim tumas stretpela pasin bai ol i abrusim bagarap na i stap long graun i kamap gutpela gen.

(9) Klia long pasin bilong graun: Ol i wok strong long klia long pasin bilong dispela graun, olsem Jisas i tok ol disaipel bilong em bai mekim. Ol i mekim pasin sori Kristen long ol narapela man; ol i no insait liklik long wok politik o ol pait bilong ol lain man. Ol i save lukautim famili bilong ol long ol samting bilong skin, tasol ol i sakim pasin bilong ol manmeri bilong dispela graun, em ol i laik tumas long kisim planti mani samting na biknem na amamas.

(10) Bihainim tok bilong Baibel: Ol i bilip olsem i bikpela samting long ol i mas bihainim tok bilong Baibel long ol samting ol i mekim long olgeta de​—⁠long haus, long skul, long ples wok, long kongrigesen. Maski bipo man i bin bihainim wanem kain pasin, sapos em i lusim ol pasin Baibel i tambuim na bihainim ol gutpela tok bilong God em Baibel i kamapim, em inap kamap wanpela Witnes Bilong Jehova. Tasol sapos bihain em i kirap bihainim pasin bilong bagarapim marit, pamuk, sodom, kisim nating drak, spak, giaman, stil, orait ol bai rausim em long lain bilong Jehova.

(Lista antap hia i kolim sampela bikpela bilip bilong ol Witnes Bilong Jehova, tasol i no kolim olgeta bilip bilong ol i narapela kain long bilip bilong ol narapela lotu. Bilong save long ol tok bilong Baibel i as bilong ol bilip antap hia, yu ken lukim Lista Bilong Ol Bikpela Tok long baksait bilong dispela buk.)

Yu ting ol Witnes Bilong Jehova i wanpela lotu bilong Amerika?

Ol i man bilong tokaut long Kingdom bilong God; ol i no save tokaut long wok gavman o wok bisnis o pasin bilong wanpela kantri bilong dispela graun.

Tru, wok bilong ol Witnes Bilong Jehova long nau i bin kirap long Amerika. Nambawan ofis bilong ol i stap long dispela hap na dispela i bin helpim ol long wokim ol buk na nius bilong Baibel na salim i go long planti hap bilong graun. Tasol ol Witnes i no laikim wanpela kantri, winim ol narapela. Nogat. Ol i stap long planti kantri tru, na ol i gat ofis long planti kantri bilong lukautim wok bilong ol long ol dispela kantri.

Yu tingim: Jisas em i wanpela Juda; mama i karim em long Palestain. Tasol lotu Kristen i no wanpela lotu bilong kantri Palestain, a? Ples mama i bin karim Jisas i no bikpela samting; bikpela samting em ol tok Jisas i bin kisim long Papa bilong em Jehova na em i lainim ol man long en. God Jehova i save mekim wankain pasin long ol man bilong olgeta lain.​—⁠Jo 14:10; Ap 10:​34, 35.

Ol Witnes Bilong Jehova i kisim we mani bilong mekim wok bilong ol?

Ol man i givim mani long laik bilong ol yet bilong helpim dispela wok, olsem ol Kristen bilong pastaim i bin mekim. (2 Ko 8:12; 9:⁠7) Long miting ol i no save singaut long mani; na ol i no save raun askim ol man long givim mani. Sampela man i laik harim tok ol i givim kontribusen, na ol Witnes i mekim wok long dispela mani bilong helpim ol man long olgeta hap long kisim save long Baibel.

Taim ol Witnes i go long haus bilong ol man o tilim ol buk na nius bilong Baibel long rot, ol i no save kisim pe. Ol i laikim tumas God na ol man na dispela i kirapim ol long toktok wantaim ol man long ol gutpela samting God i mekim bilong helpim yumi.

Ol Witnes Bilong Jehova i mekim wok long rot bilong Sosaiti Was Taua Bilong Pensilvenia. Ol i bihainim Lo Bilong Komonwel Bilong Pensilvenia Long Ol Sosaiti i No Kisim Winmani, na ol i kamapim Sosaiti Was Taua long 1884. Lo i tok, kain sosaiti olsem i no ken mekim wok bisnis na kisim winmani, na dispela Sosaiti yet i no mekim olsem, na ol wan wan man insait long en ol tu i no mekim wok bisnis long rot bilong dispela Sosaiti na kisim winmani. Lo bilong Sosaiti Was Taua i tok: “[Sosaiti] i no tingting long ol memba o dairekta o ofisa bilong dispela Sosaiti bai kisim winmani long rot bilong en.”

Yu ting ol Witnes Bilong Jehova i nupela lotu?

Sampela man i laik daunim ol Witnes na ol i tok, ol Witnes i nupela lotu i bin bruk long wanpela olpela lotu, o ol i bihainim wanpela man na kamapim nupela lotu. Tasol dispela tok i no stret. Ol Witnes i no hap lain bilong wanpela lotu na ol i lusim. Nogat. Ol manmeri long lain Witnes ol i bilong kain kain lain na sindaun, na bipo ol i bilong planti kain kain lotu. Na ol i no bihainim wanpela man bilong graun; Krais Jisas em i hetman bilong ol.

Lotu bilong ol Witnes Bilong Jehova i kirap long wanem taim?

Baibel i stori olsem Abel em i namba wan witnes bilong Jehova. Hibru 11:​4–12:​1 i tok: “Abel i bilip long God, na i mekim ofa long em. Na God i laikim ofa bilong Abel . . . Noa i bilip long God, na God i toksave long em long samting bai i kamap bihain, . . . em i bilipim tok bilong God . . . Abraham i bilip long God, na . . . bihainim tok bilong God. Em i lusim ples bilong en, na i go long wanpela graun God i laik givim em . . . Moses i bilip long God, na . . . em i no laik bai ol i kolim em pikinini bilong pikinini meri bilong king . . . Em i no laik bihainim pasin bilong sin na kisim amamas bilong sotpela taim tasol. . . . Ol dispela manmeri [“witnes,” NW] bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na . . . yumi mas strongim bel na ran strong.”

Na Baibel i stori long Krais Jisas i bin tok: “Mi man bilong tok ‘I tru’ long olgeta tok na promis bilong God, na mi save autim stret olgeta tok bilong God.” Man i autim tok em i wanpela witnes. Krais i autim tok bilong God na kamapim nem bilong Papa, olsem na em i nambawan witnes bilong Jehova.​—⁠KTH 3:14; Jo 17:⁠6.

Sampela Juda i tingim wok bilong Krais Jisas na ol i tok: “Dispela man i autim wanpela nupela tok.” (Mk 1:27) Bihain sampela Grik i ting aposel Pol i kisim “nupela tok” i kam. (Ap 17:​19, 20) Em nupela tok long ol man i harim, tasol bikpela samting em olsem: Em tok i tru, na i stret wantaim ol tok bilong God long Baibel.

Stori bilong ol Witnes Bilong Jehova long nau i kirap long yia 1870 samting long taim sampela manmeri bilong Alegeni, long Pensilvenia, long Amerika, ol i kirap long bung wantaim bilong stadi long Baibel. Pastaim ol i gat nem olsem ol Sumatin Bilong Baibel, tasol long yia 1931 ol i kisim nem i stap long Baibel, em ol Witnes Bilong Jehova. (Ais 43:​10-12) Ol bilip na pasin lotu bilong ol i no nupela; ol i kirapim bek ol bilip na pasin olsem bilong ol Kristen bilong pastaim.

Ol Witnes Bilong Jehova i ting lotu bilong ol tasol i stret, a?

Baibel i no wanbel wantaim ol man bilong nau i ting i gat kain kain pasin bilong lotu tru long God. Efesus 4:5 i tok: “I gat wanpela Bikpela tasol, na wanpela pasin bilong bilip.” Jisas i tok: “[Rot] i go long ples bilong kisim laip, em i liklik tru, na . . . i hat tru long bihainim. Na wanpela wanpela manmeri tasol i save lukim na bihainim dispela rot. Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait.”​—⁠Mt 7:​13, 14, 21; lukim tu 1 Korin 1:⁠10.

Planti taim Baibel i kolim olgeta tok ol Kristen tru i lainim ol man long en olsem “tok tru,” na Baibel i kolim lotu Kristen olsem “Rot bilong pasin i tru.” (1 Ti 3:15; 2 Jo 1; 2 Pi 2:⁠2) Baibel tasol em i as bilong olgeta bilip na lo bilong ol Witnes Bilong Jehova, na ol pasin ol i bihainim bilong bosim oganaisesen bilong ol; ol i bilip olsem Baibel em i Tok Bilong God, olsem na i gat as tru na ol i ting, ol tok na pasin ol i bihainim bilong lotu long God em tok i tru na pasin i tru. Ol i no hambak na ol i ting olsem. Nogat. Dispela i kamapim klia bilip bilong ol olsem Baibel em i “meta” tru bilong skelim lotu bilong yumi. Ol i no tingim ol yet tasol; ol i laik helpim ol narapela, olsem na ol i save autim bilip bilong ol long ol man.

Tasol ol narapela lotu tu i save bihainim Baibel, a?

Planti ol i mekim sampela wok long Baibel. Tasol yu ting ol i lainim tru ol man long Baibel na bihainim tru? Orait, yu tingim: (1) Nem tru bilong God i stap planti tausen taim long Baibel, tasol ol i rausim dispela nem olgeta long planti Baibel bilong ol. (2) Ol i bilip long God Triwan, em ol haiden i as bilong dispela bilip na i bin kamap planti handet yia bihain long taim ol man i raitim pinis Baibel. (3) Ol i bilip olsem yumi gat tewel i no save dai, tasol Baibel i no as bilong dispela bilip; Babilon bilong bipo i as bilong en. (4) Bikpela tok Jisas i autim em tok bilong Kingdom bilong God, na em i bin salim ol disaipel i go toktok wantaim ol man long Kingdom; tasol long nau ol misin i stori long Kingdom wan wan taim tasol, na lain bilong ol i no autim “dispela gutnius bilong kingdom.” (Mt 24:14) (5) Jisas i tok, wanpela mak bilong ol disaipel tru bilong em i olsem: Narapela i mas laikim tru narapela. Tasol yu ting ol misin i mekim olsem long taim ol lain i pait? (6) Baibel i tok, ol disaipel tru bilong Jisas i no bilong dispela graun, na man i laikim pasin bilong graun em bai kamap birua bilong God; tasol ol misin wantaim lain bilong ol i insait tru long ol wok politik bilong dispela graun. (Je 4:⁠4) Orait, yu ting yumi ken tok, ol i bihainim tru Baibel?

Ol Witnes Bilong Jehova i kisim we save na ol i autim as bilong tok bilong Baibel?

Wanpela bikpela samting em olsem: Ol i bilip tru olsem Baibel em i tok bilong God na ol dispela tok i bilong skulim yumi. (2 Ti 3:​16, 17; Ro 15:4; 1 Ko 10:11) Olsem na ol i no save kamapim tingting bilong ol man bilong abrusim ol tok i tru Baibel i kamapim klia, o bilong helpim pasin bilong ol man i lusim pinis ol lo bilong Baibel.

Taim ol i stori long as bilong ol tok bokis bilong Baibel, ol i larim Baibel yet i kamapim as bilong en; ol i no kamapim tingting bilong ol yet. (1 Ko 2:13) Taim Baibel i mekim tok bokis, i gat narapela hap bilong Baibel i helpim yumi long save long as bilong en. (Olsem: Lukim Kamapim Tok Hait 21:1 na bilong save “solwara” i makim wanem samting, lukim Aisaia 57:20. Bilong save long “Pikinini Sipsip” long Kamapim Tok Hait 14:​1, lukim Jon 1:29 na 1 Pita 1:19.)

Ol Witnes i bihainim tok bilong Jisas na was i stap, na long dispela rot ol i lukim ol samting i kamap olsem tok profet i makim na ol inap save long truim bilong ol tok profet. (Lu 21:​29-31; skelim wantaim 2 Pita 1:​16-19.) Ol Witnes i wok strong long tokim ol man long ol samting i kamap na skelim wantaim tok bilong Baibel i kamapim as bilong en.

Jisas i tok bai em i gat wanpela lain olsem ‘gutpela wokboi’ i stap long graun (em ol disaipel God i makim long spirit holi, em ol i wanpela lain), na long rot bilong ol bai Jisas i givim kaikai bilong spirit long ol bilipman. (Mt 24:​45-47) Ol Witnes Bilong Jehova i save long dispela samting. Olsem na ol i bihainim pasin bilong ol Kristen bilong pastaim na taim i gat bikpela askim long samting bilong bilip, ol i wetim lain bilong bosim ol Witnes, em ol i bilong lain ‘gutpela wokboi,’ ol i stretim tok. Dispela lain bilong bosim ol Witnes ol i no bihainim save bilong ol man; ol i mekim wok long save ol i kisim long Baibel, na ol i tingim pasin God i bin mekim long ol wokboi bilong em, na ol i beten strong na askim God long givim spirit bilong em long ol bilong helpim ol, na long dispela rot ol i stretim tok.​—⁠Ap 15:​1-29; 16:​4, 5.

Bilong wanem sampela taim ol Witnes Bilong Jehova i bin senisim sampela tok bilong ol?

Baibel i makim olsem Jehova i helpim ol wokboi bilong em long kisim save isi isi long laik bilong em. (Snd 4:18; Jo 16:12) Olsem na ol profet em God i givim spirit long ol bilong raitim sampela hap bilong Baibel, ol i no save long as bilong sampela tok ol i raitim. (Dan 12:​8, 9; 1 Pi 1:​10-12) Ol aposel bilong Krais Jisas i save, long taim bilong ol, i gat planti samting ol i no save long en. (Ap 1:​6, 7; 1 Ko 13:​9-12) Baibel i makim olsem “long taim bilong las de” bai ol wokboi bilong God i kisim bikpela save moa long ol tok i tru. (Dan 12:⁠4) Taim yumi kisim sampela save moa long wanpela samting, planti taim yumi mas stretim tingting bilong yumi long dispela samting. Ol Witnes Bilong Jehova i redi long bihainim pasin daun na stretim tingting bilong ol.

Bilong wanem ol Witnes Bilong Jehova i go long haus bilong ol man na autim tok?

Jisas i tok, dispela wok i mas kamap long taim bilong yumi: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Na em i tokim ol disaipel: “Go mekim olgeta lain manmeri i kamap disaipel bilong mi.”​—⁠Mt 24:14; 28:⁠19.

Taim Jisas i salim ol disaipel i go autim tok long pastaim, em i tok ol i mas i go long haus bilong ol man. (Mt 10:​7, 11-13) Aposel Pol i stori long wok em i bin mekim na em i tok: “Long ol bung bilong ol manmeri na long olgeta haus bilong yupela tu, mi bin skulim yupela.”​—⁠Ap 20:​20, 21; lukim tu Aposel 5:⁠42.

Tok ol Witnes i autim i bilong helpim ol man long kisim laip, olsem na ol i no laik abrusim wanpela man. (Sef 2:​2, 3) Ol i laikim tumas God na ol man, na dispela i kirapim ol long autim tok.

Sampela bikpela man bilong lotu i bin bung long Spen na ol i tok: “Ating [ol misin] i slek olgeta long mekim dispela wok ol Witnes i givim bel long mekim​—⁠em wok bilong i go lukim ol man long haus bilong ol, olsem ol aposel i bin mekim long pastaim. Ol misin i save wok long sanapim planti haus lotu, na paitim belo bilong singautim ol man i kam, na ol i autim tok insait long ol haus lotu bilong ol, tasol [ol Witnes] i bihainim pasin bilong ol aposel na ol i go long haus bilong ol man na autim tok long olgeta taim rot i op long ol.”​—⁠Nius El Catolicismo, Bogota, Kalombia, Septemba 14, 1975, p. 14.

Tasol bilong wanem ol Witnes i go planti taim long haus bilong ol man i gat narapela lotu?

Ol i no subim ol man long harim tok bilong ol. Tasol ol i save, sampela taim nupela man i kam sindaun long haus, o man bilong haus i senisim tingting. Sapos nau man i gat planti wok na em i no gat taim bilong harim, ating narapela taim bai em i amamas long harim. Sapos wanpela man long haus i no laik harim, ating ol narapela i laik. Ol man i save senisim tingting. Sampela taim bikpela hevi i kamap long wanpela man na nau em i tingim God na em i laik harim.​—⁠Lukim tu Aisaia 6:​8, 11, 12.

Bilong wanem ol man i mekim nogut na tok nogut long ol Witnes?

Jisas i tok: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. Sapos yupela i stap olsem ol man bilong dispela graun, orait ol manmeri bilong graun ol inap laikim yupela . . . Tasol yupela i no man bilong dispela graun. . . . Olsem na ol . . . i save birua long yupela.” (Jo 15:​18, 19; lukim tu 1 Pita 4:​3, 4.) Baibel i tok, dispela graun olgeta i stap aninit long Satan; em yet i as bilong dispela pasin birua.​—⁠1 Jo 5:19; KTH 12:⁠17.

Na Jisas i bin tokim ol disaipel: “Olgeta man bai i bel nogut tru long yupela, long wanem, nem bilong mi em i stap long yupela.” (Mk 13:13) Dispela tok “nem” i makim bikpela namba Jisas i holim, olsem King. Ol man i save mekim nogut long ol Witnes Bilong Jehova, long wanem, ol Witnes i tingim tok bilong dispela King i namba wan, na tok bilong ol bikman bilong graun i namba tu tasol.

Sapos Man i Tok​—⁠

‘Bilong wanem yupela i no save insait long ol wok bilong helpim olgeta man (o ol man long dispela hap)?’

Yu ken tok: ‘Yu tingim hevi bilong ol man long dispela hap na mi tu mi tingim. Mi laik askim yu, Yu ting yumi mas stretim wanem hevi pastaim?’ Na ating yu ken tok moa olsem: ‘Olsem wanem na yu ting dispela hevi em i bikpela hevi tru? . . . Sapos yumi inap kirap wantu na stretim liklik, em gutpela, a? Tasol mi save, yu laik bai dispela hevi na ol narapela hevi tu i ken pinis olgeta. Em nau, mipela ol Witnes Bilong Jehova i gat wankain laik. (Stori long ol samting yumi mekim bilong kirapim ol manmeri long bihainim ol lo bilong Baibel bambai ol inap stretim as bilong ol hevi bilong ol; na stori long ol samting Kingdom bilong God bai mekim, na olsem wanem dispela bai stretim ol hevi inap oltaim.)’

O yu ken tok: ‘(Taim yu kamapim pinis sampela tok antap hia . . . ) Sampela man i givim mani, na sampela i mekim sampela wok bilong helpim ol man na ol i no kisim pe. Ol Witnes Bilong Jehova i mekim dispela tupela wok wantaim. Mi laik stori.’ Na ating yu ken tok moa olsem: (1) ‘Ol man i laik i stap Witnes Bilong Jehova, ol i mas baim stret takis; gavman i kisim takis na mekim ol wok bilong helpim ol man.’ (2) ‘Na mipela i mekim samting moa bilong helpim ol man​—⁠mipela i go long haus bilong ol na tokim ol, sapos ol i laik, mipela i ken lainim ol long Baibel, no gat pe. Taim ol i kisim save long ol tok bilong Baibel, ol i lain long bihainim ol lo bilong en na dispela i helpim ol long karim ol hevi bilong ol.’

Narapela tok yu ken mekim, em olsem: ‘Mi amamas yu kamapim dispela askim. Sampela ol i no askim, olsem na ol i no save long ol wok ol Witnes i mekim bilong helpim ol man. I gat planti samting yumi ken mekim bilong helpim ol man.’ Na ating yu ken tok moa olsem: (1) ‘Sampela lain i laik helpim ol man na ol i putim haus sik, o haus bilong ol lapun, o haus bilong helpim ol man long lusim drak. Sampela ol i save go long haus bilong ol man bilong helpim ol. Ol Witnes Bilong Jehova i save mekim olsem.’ (2) ‘Mipela lukim olsem i gat wanpela samting em inap senisim tru tingting bilong ol man, em ol tok bilong Baibel i tokaut klia long as tru bilong i stap bilong yumi na ol samting bai kamap long bihain.’

Sampela tok moa yu ken mekim: ‘Mi amamas yu bin kamapim dispela askim. Yumi olgeta i laik lukim ol hevi i pinis, a? Mi laik askim yu, Yu ting olsem wanem long ol wok Krais Jisas i bin mekim? Yu ting ol wok em i mekim i helpim tru ol man? . . . Mipela i wok long bihainim pasin bilong em.’

‘Ol Kristen i mas i stap witnes bilong Jisas, i no bilong Jehova’

Yu ken tok: ‘Tru, yumi gat wok long i stap witnes bilong Jisas. Olsem na ol buk na nius bilong mipela i save kamapim klia bikpela wok bilong Jisas long ol samting God i laik mekim. (Ating yu ken soim wanpela buk o nius long em i stori olsem.) Tasol lukim dispela tok, ating yu no bin tingim bipo. (KTH 1:⁠5) . . . Jisas i autim tok bilong husat? Olsem na em i witnes bilong husat? (Jo 5:43; 17:⁠6) . . . Jisas i makim pasin yumi mas bihainim, a? . . . Bilong wanem i bikpela samting long yumi mas kisim save long Jisas na Papa bilong em tu wantaim? (Jo 17:⁠3)’