moa yet tingting bilong ol yangpela.

Wanpela profesa bilong Yunivesiti i stori long ol man i mekim ol pilai bilong video na em i tok, taim ol i pilai bel bilong ol i kirap na bihain gen ol i bel hevi, na sampela taim ol i kros na sampela taim ol i belhat na i laik paitim sampela man. Wanpela manki long Englan i givim bel olgeta long dispela pilai, na mama bilong em i tok, sapos em i no inap i go pilai long video, bel bilong em i kros tru olsem man bilong dring i mekim sapos em i no gat dring. Na dispela mama i tok, sapos pikinini hia i no inap i go pilai na em i mas i stap long haus, em i belhat na kros nabaut olsem wanpela animal i kalabus insait long banis.

Pasin bilong ol yangpela, ol i laik painim nabaut ol amamas, tasol ol yangpela Kristen i mas “tingting gut na wokabaut stret na bihainim pasin bilong God nau long dispela taim.” (Taitas 2:12) Olsem bai dispela Man Bilong Giaman i no inap pulim taim bilong ol na tingting bilong ol na strong bilong ol long dispela pilai bilong video.

Sampela eksasais na musik na pilai na piksa wokabaut i orait, tasol ol dispela samting em inap tu long mekim nogut long yumi. Olsem na yumi mas lukaut long ol dispela samting. Bikpela Man Bilong Giaman, em Seten, em i giaman long helpim yu long painim amamas, tasol em bai paulim yu. Yu no ken larim em i kam insait long haus bilong yu o long sindaun bilong yu. “Sakim Seten, na bai em i lusim [yu] na ranawe.”—Jems 4:7.

Askim

■ Sapos long ples wok wanpela brata i mas karim gan o narapela samting bilong sakim o paitim man nogut, dispela brata i no bihainim gutpela pasin. Orait, olsem wanem sapos wanpela Witnes Bilong Jehova i singautim polis o sekyuriti samting long lukautim em na dispela polis o sekyuriti i gat gan samting bilong sakim man nogut? Dispela pasin i stret?

Jisas i bin tok: “Olgeta man i pait long bainat, bai i lus long bainat.” (Matyu 26:52) Olsem na i gutpela sapos ol strongpela Kristen i no ken kisim wanpela wok sapos em i mas karim gan samting (i olsem em i karim “bainat”) Tasol i no olsem em i no ken singaut long polis o sekyuriti i lukautim em sapos man nogut i laik bagarapim em. Bilong wanem mipela i tok olsem?

Rom 13:1-4 i tok, yumi stap aninit long gavman, na God i larim gavman i stap nau long dispela taim, na Baibel i tok long gavman olsem: “Em i wokman bilong God, bilong helpim yu na yu stap gut. Tasol, sapos yu mekim pasin nogut, orait yu mas pret. Yu save em i holim bainat, na em i no holim nating. Em i wokman bilong God, bilong bekim pe nogut long man i mekim pasin nogut.” Olsem na God i orait long ol wokman bilong gavman, olsem polis samting, na bai ol i ken daunim pasin nogut. Tasol Krais em i “King Bilong Gutaim,” na bihain bai em i kamapim taim bilong bel isi long olgeta hap bilong graun, na i no gat wok moa long ol gan samting bilong kilim man i dai. Ol dispela samting bai pinis. Tasol long nau i orait long Kristen i ken singaut long gavman i lukautim skin bilong em na bai man nogut i no ken bagarapim em. Tasol ol Kristen yet i “mas wokim ol bainat bilong ol i kamap samting bilong wokim gaden,” na ol i stap na wetim Kingdom bilong God i kamap.—Aisaia 2:4; 9:6, 7.

Taim bilong yumi long nau i wankain liklik olsem taim bilong Jeremaia. Jehova i bin salim ami bilong Nebyukatnesa bilong pait long kingdom bilong Juda em ol i bin bikhet long Jehova. Nebyukatnesa em i King bilong Babilon, tasol Jehova i kolim em ‘wokman bilong mi.’ Long dispela taim Jeremaia na Baruk i no holim bainat samting bilong pait. Jehova i mekim Jeremaia “stap olsem wanpela strongpela taun na olsem wanpela pos ain na olsem banis ol i wokim long bras.” Tupela i no helpim ol Babilon long pait, tasol tupela i larim ol Babilon i helpim tupela na lukautim tupela bambai tupela í no ken bagarap taim Jerusalem i bagarap.—Jeremaia 1:17-19; 25:9; 39:11-14.

Olsem na long nau Ol Witnes Bilong Jehova i wok long i stap isi na ol i wok long autim tok bilong Kingdom namel long dispela taim nogut bilong pait na birua. Jehova i larim gavman i stap yet, na gavman i olsem “bainat” bilong pasim pasin nogut bilong pait na bagarapim man, olsem na i stret long Ol Witnes i ken larim gavman i lukautim ol.