rot bilong tingim pasin laikim em Jehova na Pikinini bilong em i kamapim, na tu, yumi tingim olsem ol man i nidim tru ol gutpela tok bilong Baibel. (Mak 6:34; 1 Jon 4:​10, 11) Pasin bilong yumi long laikim tok i tru bilong Baibel bai kamap strong moa taim yumi mekim stadi bilong yumi yet long olgeta taim na tingim tingim long bel ol tok yumi lainim. Pasin laikim em i wanpela pasin bilong holi spirit. (Gal. 5:22) Olsem na yumi ken beten askim Jehova long givim holi spirit long yumi na helpim yumi long kamapim moa yet pasin laikim. (Luk 11:13; 1 Jon 5:14) Maski yumi kisim bikpela skul, o hamas yia yumi stap long tok i tru, o yumi gat save, yumi inap mekim gutpela wok tisa sapos yumi soim pasin laikim long ol man.

Rot Bilong Yusim Fom Plis Go Lukim (S-43-MP)

Yu ken pulimapim dispela fom taim yu bungim man i laik harim tok bilong Baibel tasol em i no stap long teritori bilong yu o em i gat narapela tokples. Long pastaim yumi save pulimapim dispela fom taim yumi bungim ol man i gat narapela tokples, maski ol i gat laik long harim tok o nogat. Tasol long nau i no olsem, yumi pulimapim tasol long taim man bilong narapela tokples i gat laik long harim tok. Tasol long ol yaupas tasol yumi ken pulimapim dispela fom S-43⁠-⁠MP, maski ol i gat laik long harim tok o nogat.

Taim yumi pulimapim pinis dispela fom, yumi mas mekim wanem? Yumi mas givim long kuskus bilong kongrigesen. Sapos em i save long wanem kongrigesen long salim dispela fom long en, em i ken salim i go long ol elda bilong dispela kongrigesen, na bai ol i stretim rot long wanpela i go lukim dispela man i laik harim tok. Sapos em i no save long wanem kongrigesen em bai salim fom long en, orait em bai salim i go long brens ofis.

Sapos dispela man bilong narapela tokples i gat laik long harim tok na em i stap long teritori bilong yu, orait yu ken go yet na lukim em inap long taim wanpela pablisa husat i stap long kongrigesen i save mekim tokples bilong em i kam lukim em.​—⁠Lukim Wok Kingdom bilong Septemba 2011, p. 4.

Askim​—⁠2

◼ I stret long beten taim yumi mekim stadi long man long dua bilong haus?

I gutpela long mekim beten long kirap bilong stadi na long pinis bilong en. Long rot bilong beten, yumi askim Jehova long givim holi spirit bilong em long yumi taim yumi mekim Baibel stadi. (Luk 11:13) Pasin bilong beten i soim sumatin olsem stadi bilong em long Baibel i bikpela samting na i skulim em tu long pasin bilong beten. (Luk 6:40) Olsem na taim yumi kirapim wanpela nupela Baibel stadi, i gutpela long kirap hariap long mekim beten. Tasol sindaun bilong olgeta man i no wankain, olsem na pablisa i mas bihainim savepasin, olsem em bai beten taim em i stadi wantaim man long dua bilong haus o nogat.

Wanpela bikpela samting em yumi mas tingim em hap we yumi mekim stadi long en. Sapos yumi stadi long hap we ol man i no go i kam, orait yumi ken mekim sotpela beten bilong kirapim na pinisim stadi. Tasol sapos dispela i pulim ai bilong ol man, o i mekim na sumatin i sem, ating i gutpela yumi wet inap yumi painim wanpela hap we i no gat planti man i go i kam na yumi ken beten taim yumi stadi. Maski yumi mekim stadi long wanem wanem hap, yumi mas bihainim savepasin na skelim gut wanem taim i gutpela long kirap mekim beten.​—⁠Lukim Wok Kingdom bilong Mas 2005, pes 3.

Gutpela Ripot Bilong Autim Tok

Long Kaveing, wanpela brata na meri bilong em, em ol i save stretim ol haus misineri, ol i stap long ai bilong haus misineri na wok long kisim piksa bilong san i go daun. Tupela mangi i kam na askim ol long kisim piksa bilong tupela. Tupela marit i kirap stori wantaim tupela mangi na wanpela bilong tupela i tok em i gat sampela askim long Baibel em pasto i no inap long bekim. Brata i tokim tupela long taim bilong ol miting na singautim ol long kam long miting. Em i kirap nogut long lukim wanpela bilong tupela i kam paslain tru long taim bilong miting. Em i givim buk Baibel i Tok long em na kirapim stadi wantaim em. Taim mangi i go bek long haus, em i salim teks mesis long brata na tok tenkyu long ol samting em i lainim.