ASKIM 7
Baibel i tok profet long wanem ol samting bai kamap long nau?
“Wanpela kantri bai pait long narapela kantri na wanpela kingdom bai pait long narapela kingdom. . . . Ol dispela samting i olsem stat tasol bilong ol hevi, kain olsem pen i save kamap paslain long meri i laik karim pikinini.”
“Planti giaman profet bai kamap na giamanim planti manmeri. Pasin bilong brukim lo bai i go bikpela, olsem na pasin laikim bilong planti manmeri bai i no strong olsem long bipo.”
“Taim yupela i harim tok long ol woa i kamap klostu na ol woa i kamap longwe, yupela i no ken pret. Ol dispela samting i mas kamap, tasol pinis i no yet.”
“Bai i gat ol bikpela guria, na long narapela narapela hap bai i gat ol bikpela sik na bikpela hangre. Na ol manmeri bai lukim ol samting i mekim ol i pret na ol bai lukim ol bikpela sain i kam long skai.”
“Long taim bilong las de, taim nogut bai kamap na dispela bai givim hatwok long ol man. Ol man bai laikim ol yet tasol, ol bai laikim tumas mani, ol bai litimapim nem bilong ol yet, ol bai i gat pasin antap, ol bai tok nogut long ol arapela, ol bai sakim tok bilong papamama, ol bai i no tok tenkyu, ol bai i no stap gut long narapela, ol bai i no gat pasin bilong laikim ol wanfamili, ol bai i no laik kamap wanbel, ol bai i gat pasin bilong bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, ol bai birua long ol pren bilong ol, ol bai i gat strongpela het, ol bai pulap long pasin antap, ol bai i no laikim God, nogat, ol bai laikim kain kain amamas, bai i luk olsem ol i gat pasin bilong givim bel tru long God, tasol ol i no larim strong bilong dispela pasin i bosim wokabaut bilong ol.”