“Sapos man i mekim gutpela wok, orait em bai i kamap wokman bilong king. Dispela kain man i no inap kamap wokman bilong man i no gat nem.”

Sindaun 22:29

“Stilman i no ken stil moa, mobeta em i wok hat na mekim ol gutpela wok long han bilong en bai em i gat ol samting bilong tilim long ol man i sot.”

Efesus 4:28

“Yumi mas kaikai na dring na amamas long olgeta samting yumi mekim. Dispela i olsem presen God i givim yumi.”

Saveman 3:13

“Sapos man i laikim tumas gutpela kaikai na dring na pasin bilong amamas, orait mani bilong en bai i pinis na em bai i sot long ol samting.”

Sindaun 21:17

“Ol man i gat dinau, ol i stap olsem wokboi nating bilong ol man i givim dinau.”

Sindaun 22:7

“Sapos wanpela bilong yupela i laik wokim wanpela taua, orait husat bilong yupela bai i no sindaun pastaim na skelim gut pe bilong dispela samting, na bai em i ken save olsem em i gat ol samting inap long pinisim dispela wok o nogat? Nogut em i wokim as bilong taua na em i no inap pinisim, na olgeta manmeri i lukim, ol bai kirap tok bilas long em na tok: ‘Dispela man i kirap wokim taua, tasol em i no inap pinisim.’”

Luk 14:28-30

“Taim ol i kaikai inap pinis em i tokim ol disaipel bilong en: ‘Bungim ol hap kaikai i stap yet na bai yumi no westim wanpela hap kaikai.’”

Jon 6:12

“Pasin bilong laikim man, em i nambawan pasin. Olsem na sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.”

Sindaun 15:17

“Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”

Aisaia 48:17

“Ol man i hangre long kisim save long God, ol i ken amamas, long wanem, Kingdom bilong heven em i bilong ol.”

Matyu 5:3

“Yu mas laikim ol arapela man olsem yu laikim yu yet.”

Matyu 22:39

“Ol pasin yupela i laik bai ol man i mekim long yupela, yupela i mas mekim wankain pasin long ol.”

Luk 6:31

“Ol man i harim tok bilong God na bihainim, ol i ken amamas!”

Luk 11:28

“Maski man i gat planti samting, em i no kisim laip long ol dispela samting em i holim.”

Luk 12:15

“Sapos yumi gat kaikai na laplap na haus samting, orait yumi ken ting ol dispela samting em inap long yumi.”

1 Timoti 6:8

“Amamas bilong givim samting i winim amamas bilong kisim samting.”

Aposel 20:35

“Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”

Song 55:22

“Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting. Tasol sapos ol man i hariap tumas long mekim wok, bai wok bilong ol i no kamap gutpela na ol bai i sot long ol samting.”

Sindaun 21:5

“Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”

Aisaia 41:10

“Husat bilong yupela, long rot bilong tingting planti, inap skruim liklik haptaim moa long laip bilong en?”

Matyu 6:27

“No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.”

Matyu 6:34

“Skelim gut wanem ol samting i bikpela samting moa.”

Filipai 1:10

“Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.”

Filipai 4:6, 7

MARITMAN/PAPA

“Ol maritman i mas laikim meri bilong ol olsem ol i laikim bodi bilong ol yet. Man i laikim meri bilong en, em i laikim em yet. Long wanem, i no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas . . . Yupela olgeta wan wan i mas laikim ol meri bilong yupela olsem yupela i save laikim yupela yet.”

Efesus 5:28, 29, 33

“Yupela ol papa, yupela i no ken sikirapim bel bilong ol pikinini bilong yupela, nogat. Oltaim yupela i mas mekim bikpela long ol na trenim ol olsem Jehova i makim, na putim tingting bilong em long bel bilong ol.”

Efesus 6:4

MARITMERI

“Maritmeri i mas i gat bikpela rispek long man bilong en.”

Efesus 5:33

“Yupela ol maritmeri, yupela i mas daun long man bilong yupela, dispela pasin i stret long ai bilong Bikpela.”

Kolosi 3:18

PIKININI

“Ol pikinini, yupela i mas bihainim tok bilong papamama bilong yupela olsem God i laikim, dispela em i stretpela pasin. ‘Onarim papa bilong yu na mama bilong yu.’ Dispela em i namba 1 lo i gat promis long en olsem: ‘Yu ken i stap gut na stap longpela taim long dispela graun.’”

Efesus 6:1-3

“Yupela ol pikinini, yupela i mas bihainim tok bilong papamama bilong yupela long olgeta samting. Bikpela i save laikim dispela kain pasin.”

Kolosi 3:20