Wokman Bilong Jehova—‘Long Sin Bilong Yumi Em i Kisim Bagarap’
“Long asua bilong sin bilong yumi tasol em i bin kisim bagarap. Ol i bin paitim em nogut . . . na long dispela pen em i karim em i mekim yumi i kamap orait gen, na yumi stap gut tru.”—AIS. 53:5.
1. Yumi mas tingim wanem samting taim yumi mekim Memorial? Wanem tok profet bai helpim yumi long tingim dispela?
YUMI save mekim Memorial bilong tingim i dai bilong Krais na bilong tingim olgeta samting em dai na kirap bek bilong em i bin mekim. Memorial i helpim yumi long tingim olsem i stret Jehova i stap King, nem bilong em i stap holi, ol samting em i tingting pinis long mekim i kamap tru, na wok bilong kisim bek ol manmeri i insait long dispela. Tok profet bilong Aisaia 53:3-12 i kamapim gut tok long ofa bilong Krais na ol samting dispela ofa i bin mekim, ating i no gat narapela tok profet long Baibel i stori gut olsem. Aisaia i tok profet long pen na hevi bilong Wokman na em i kamapim gut sampela tok long i dai bilong Krais na ol gutpela samting i dai bilong em bai mekim long ol brata bilong Krais em God i bin makim na long “ol arapela sipsip.”—Jo. 10:16.
2. Tok profet bilong Aisaia i kamapim ples klia wanem samting? Dispela bai mekim wanem long yumi?
2 Inap 700 yia paslain long Jisas i kamap long graun, Jehova i kirapim Aisaia long tok profet olsem Wokman Em i bin makim bai stap gut long em maski ol bikpela traim bai painim em. Dispela i kamapim ples klia olsem Jehova i bilip tru olsem Pikinini bilong em bai stap gut long em. Taim yumi skelim dispela tok profet, bel bilong yumi bai amamas na bilip bilong yumi bai kamap strong moa.
“Givim Baksait Long Em” na “Lukim Em Olsem Man Nating”
3. Bilong wanem ol Juda i mas amamas long Jisas i kam? Tasol ol i mekim wanem long em?
3 Ritim Aisaia 53:3. Tingim bikpela samting em namba wan Pikinini Bilong God i bin mekim, olsem em i bin redi long lusim amamas em i save kisim long mekim wok wantaim Papa bilong em long heven na em i kam daun long graun bilong givim laip bilong em bilong baim bek ol man long sin na i dai! (Fl. 2:5-8) Ofa bilong em i bilong lusim ol sin bilong ol manmeri, em ol samting ol ofa bilong ol animal aninit long Lo Bilong Moses i bin makim. (Hi. 10:1-4) Ol Juda i bin wetim Mesaia, em dispela man God i bin promis long salim i kam, olsem na i stret ol i amamas long em i kam na givim biknem long em, a? (Jo. 6:14) Tasol ol i no mekim olsem. Ol i “givim baksait long em,” na ol i “lukim em olsem man nating,” olsem Aisaia i bin tok profet long en. Aposel Jon i tok: “Em i go long as ples bilong em yet, tasol ol lain bilong en ol i no kisim em.” (Jo. 1:11) Aposel Pita i tokim ol Juda: “God bilong ol tumbuna bilong yumi, em i bin givim biknem tru bilong wokman bilong en Jisas. Em dispela man tasol yupela i bin putim long han bilong ol birua. Na taim Pailat i laik lusim em i go, yupela i bin givim baksait long em na tok olsem Pailat i no ken larim em i go fri. Dispela man i save aninit tru long God. Em i holi na i save mekim stretpela pasin olgeta, tasol yupela i bin givim baksait long em.”—Ap. 3:13, 14.
4. Olsem wanem Jisas i pulap long sori na ol kain kain hevi?
4 Na tu, Aisaia i tok profet olsem Jisas bai “pulap long sori na ol kain kain hevi.” Tru, long taim Jisas i mekim wok bilong em, sampela taim em i bin tait, tasol i no gat sampela stori i kamapim olsem em i bin kisim sik. (Jo. 4:6) Tasol em i bin kisim save long ol sik bilong ol man em i autim tok long ol. Em i sori long ol na i oraitim planti. (Mk. 1:32-34) Olsem na Jisas i truim tok profet i tok: “Dispela wokman i bin karim ol hevi na pen bilong yumi.”—Ais. 53:4b; Mt. 8:16, 17.
I Olsem “God i Laik Mekim Save Long En”
5. Planti Juda i ting olsem wanem long indai bilong Jisas? Bilong wanem dispela i mekim na hevi bilong em i go bikpela moa?
5 Ritim Aisaia 53:4a. Planti manmeri long taim bilong Jisas i no bin kliagut long as bilong ol pen na hevi na indai bilong Jisas. Ol i ting God i bin mekim save long em, i olsem God i givim wanpela sik nogut long em. (Mt. 27:38-44) Ol Juda i tok Jisas i bin tok bilas long God. (Mk. 14:61-64; Jo. 10:33) Tasol Jisas i no man bilong mekim sin na i no man bilong tok bilas long God. Em i laikim tumas Papa bilong em, olsem na dispela tok ol i sutim long em olsem em i man bilong tok bilas long God em wanpela bilong ol hevi em i mas karim olsem Wokman bilong Jehova. Tasol em i redi long daun long laik bilong Jehova.—Mt. 26:39.
6, 7. Long wanem rot Jehova i “daunim” gutpela Wokman bilong em? Olsem wanem yumi ken tok God i “amamas” long daunim em?
6 Yumi kliagut long as na tok profet bilong Aisaia long ol man i tok “God i laik mekim save” long Krais, tasol ating yumi kirap nogut olsem tok profet i tok: “Bikpela yet i bin [“amamas long,” NW] daunim wokman bilong en.” (Ais. 53:10) Na tu, Jehova i bin tok: “Dispela em i wokman bilong mi. . . . Mi yet mi bin makim em, na oltaim mi amamas moa yet long em,” olsem na olsem wanem yumi ken tok Jehova i ‘amamas long daunim’ em? (Ais. 42:1) Wanem mining bilong dispela tok olsem Jehova i amamas long daunim em?
7 Bilong kliagut long dispela hap bilong tok profet, yumi mas tingim olsem taim Satan i sutim tok long wok bos bilong Jehova, em i tok olsem olgeta man long heven na graun i no inap i stap gut long God. (Jop 1:9-11; 2:3-5) Jisas i stap gut long God i go inap long em i dai, na long dispela rot Jehova i bekim tok Satan i sutim long em. Tru, Jehova i bin larim ol birua i kilim i dai Krais, tasol yumi ken save olsem Jehova i bin pilim pen taim em i lukim ol birua i kilim i dai Wokman bilong em. Tasol taim Jehova i lukim olsem Pikinini bilong em i stap gut long em, dispela i mekim Jehova i amamas tru. (Snd. 27:11) Na tu, Jehova i save long ol gutpela samting indai bilong Pikinini bai mekim long ol man i tanim bel, na dispela tu i mekim Jehova i amamas tru.—Lu. 15:7.
‘Long Sin Bilong Yumi Em i Kisim Bagarap’
8, 9. (a) Olsem wanem Jisas i ‘kisim bagarap long asua bilong sin bilong yumi’? (b) Olsem wanem Pita i strongim dispela tok?
8 Ritim Aisaia 53:6. Olsem ol sipsip i lus, ol man i gat sin i raun nabaut na ol i laik painim rot bilong lusim sik na dai ol i bin kisim long Adam. (1 Pi. 2:25) Olgeta manmeri i gat sin, olsem na i no gat wanpela tumbuna pikinini bilong Adam em inap baim bek ol samting Adam i bin lusim. (Sng. 49:7) Tasol long rot bilong bikpela pasin laikim bilong em, Jehova i “bekim asua bilong ol sin bilong yumi” na em i “mekim wokman bilong en i karim ol dispela pen.” Jisas i orait long ‘kisim bagarap long asua bilong sin bilong yumi,’ na long dispela rot Krais i karim ol sin bilong yumi na i dai long diwai bilong helpim yumi.
9 Aposel Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. Krais i bin hangamap long diwai . . . na i karim sin bilong yumi long bodi bilong em yet. Em i mekim olsem bai yumi ken lusim pasin bilong sin olgeta, na yumi ken i stap laip na bihainim ol pasin i stret olgeta.” Orait nau Pita i kamapim tok bilong tok profet bilong Aisaia, na em i tok: “Ol i bin paitim em nogut, na long dispela pen em i karim em i mekim yupela i kamap orait gen.” (1 Pi. 2:21, 24; Ais. 53:5) Dispela i opim rot na ol sinman i ken kamap wanbel gen wantaim God, olsem Pita i bin tok: “Yupela tingim Krais tu. Em i stretpela man, tasol em i kisim ples bilong ol manmeri nogut, na em i dai bilong rausim sin bilong ol manmeri, na bilong bringim yupela i kam long God.”—1 Pi. 3:18.
“Olsem Pikinini Sipsip Ol i Kisim i Go Bilong Kilim”
10. (a) Jon Bilong Baptais i tok wanem long Jisas? (b) Bilong wanem tok bilong Jon i stret?
10 Ritim Aisaia 53:7, 8. Taim Jon Bilong Baptais i lukim Jisas i kam, em i tok: “Lukim. Em i Pikinini Sipsip Bilong God. Em i kam bilong rausim sin bilong olgeta manmeri bilong graun.” (Jo. 1:29) Taim Jon i toktok long Jisas olsem em i Pikinini Sipsip, ating em i tingim tok bilong Aisaia: “Olsem pikinini sipsip ol i kisim [em] i go bilong kilim.” (Ais. 53:7) Aisaia i tok profet: “Em i bin givim laip bilong em yet.” (Ais. 53:12) Long nait Jisas i kirapim bung bilong tingim i dai bilong em, em i givim wanpela kap wain long ol 11-pela gutpela aposel na em i tok: “Dispela em i blut bilong mi bilong mekim kontrak. Mi kapsaitim bilong lusim sin bilong planti manmeri.”—Mt. 26:28.
11, 12. (a) Aisak i orait long givim laip bilong em olsem ofa na dispela i makim wanem samting long ofa bilong Krais? (b) Yumi mas tingim wanem samting bilong Man i Winim Abraham, em Jehova, taim yumi mekim Memorial?
11 Olsem Aisak bilong bipo, Jisas i bin orait long givim laip bilong em olsem ofa long alta bilong laik bilong Jehova. (Stt. 22:1, 2, 9-13; Hi. 10:5-10) Aisak i bin orait long givim laip bilong em olsem ofa, tasol em Abraham husat i redi long givim dispela ofa. (Hi. 11:17) Na i wankain long Jisas, em i orait long i dai, tasol Jehova em Man i makim rot bilong givim dispela ofa. Ofa bilong Pikinini bilong em i kamapim olsem God i laikim tru ol manmeri.
12 Jisas yet i bin tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jo. 3:16) Aposel Pol i tok: “Tasol yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Ro. 5:8) Olsem na yumi givim biknem long Krais taim yumi tingim i dai bilong em, tasol yumi no ken lusim tingting olsem Man husat i bin makim rot bilong givim dispela ofa em Man i Winim Abraham, em Jehova. Yumi mekim Memorial bilong litimapim nem bilong em.
Wokman i Mekim na ‘Planti i Kamap Stretpela Manmeri’
13, 14. Long wanem rot wokman bilong Jehova i mekim na ‘planti i kamap stretpela manmeri’?
13 Ritim Aisaia 53:11, 12. Jehova i tok long dispela Wokman olsem: “Dispela stretpela wokman bilong mi . . . bai i mekim [planti] i kamap stretpela manmeri.” Long wanem rot ol bai kamap stretpela manmeri? Ves 12 i helpim yumi long bekim dispela askim. Ves hia i tok: “Em [Wokman] i bin prea bilong helpim ol manmeri bilong mekim sin.” Olgeta tumbuna pikinini bilong Adam i gat sin taim mama i karim ol, olsem ol i “manmeri bilong mekim sin,” olsem na “sin i save givim pe long ol,” em dai. (Ro. 5:12; 6:23) Ol man i gat sin i mas kamap wanbel gen wantaim Jehova. Sapta 53 bilong tok profet bilong Aisaia i kamapim gut ol samting Jisas i bin mekim bilong “helpim” ol man i gat sin, na i tok: “Ol i bin paitim em nogut na skin bilong en i bin bruk nabaut, na long dispela pen em i karim em i mekim yumi i kamap orait gen, na yumi stap gut tru.”—Ais. 53:5.
14 Krais i karim sin bilong yumi na i dai bilong helpim yumi, na long dispela rot ‘planti i kamap stretpela manmeri.’ Pol i tok: “God i laik bai olgeta laip na pasin bilong em yet i mas i stap long dispela Pikinini, olsem na God yet i pulap tru long em. Na God i laik mekim olgeta samting i kamap wanbel wantaim em, em ol samting bilong graun na ol samting bilong heven tu. Olsem na em i larim Krais i dai long diwai . . . na blut bilong en i kapsait, na long dispela pasin God i daunim pasin birua bilong yumi.”—Kl. 1:19, 20.
15. (a) “Ol samting bilong heven” em Pol i toktok long en i makim husat? (b) Husat tasol inap kisim bret na wain long taim bilong Memorial, na bilong wanem?
15 “Ol samting bilong heven” em ol Kristen God i bin makim na ol bai mekim wok king wantaim Krais long heven, ol i kamap wanbel wantaim Jehova long rot bilong blut bilong Krais. Ol Kristen em ‘God i singautim ol bilong i stap long heven,’ God i kolim ol “stretpela manmeri.” (Hi. 3:1; Ro. 5:1, 18) Jehova i kisim ol olsem ol pikinini bilong em long spirit. Holi spirit i save tokaut long ol olsem ol i ‘brata bilong Krais,’ na ol bai kamap king na pris long Kingdom bilong em long heven. (Ro. 8:15-17; KTH 5:9, 10) Ol bai insait long lain Israel bilong spirit, em “lain Israel tru bilong God,” na ol bai insait long “nupela kontrak.” (Jer. 31:31-34; Ga. 6:16) Ol i insait long nupela kontrak, olsem na ol inap kisim bret na wain long taim bilong Memorial, na Jisas i stori long retpela wain olsem: “Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.”—Lu. 22:20.
16. “Ol samting bilong graun” i makim wanem samting? Olsem wanem ol i stap olsem stretpela man long ai bilong Jehova?
16 “Ol samting bilong graun” em ol arapela sipsip bilong Krais, em ol i bilip na wet long kisim laip oltaim long graun. Wokman bilong Jehova i helpim dispela lain tu long ol i kamap stretpela manmeri long ai bilong Jehova. Ol i bilip long ofa bilong Krais bilong baim bek ol man na long dispela rot ol i bin “wasim ol klos bilong ol long blut bilong Pikinini Sipsip,” olsem na Jehova i kolim ol stretpela manmeri, tasol ol i no olsem pikinini bilong em long spirit, nogat, ol i olsem pren bilong em, na ol inap abrusim bagarap long taim bilong “bikpela hevi tru.” (KTH 7:9, 10, 14; NW; Jem. 2:23) Ol i no stap insait long nupela kontrak, olsem na ol i no wet long kisim laip long heven; ol dispela arapela sipsip i no kisim bret na wain long Memorial, tasol ol i go long bung bilong Memorial na long pasin rispek ol i lukluk tasol.
Bikpela Tenkyu i Go Long Jehova na Wokman Bilong Em!
17. Olsem wanem stadi long ol tok profet bilong Aisaia i toktok long Wokman i bin helpim yumi long redim tingting bilong yumi long Memorial?
17 Pasin bilong skelim ol tok profet bilong Aisaia long Wokman em gutpela rot long redim tingting bilong yumi long Memorial bilong i dai bilong Krais. Em i helpim yumi long “lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hi. 12:2) Yumi bin kisim save olsem Pikinini Bilong God i no bin bikhet long God. Satan i no bin amamas long Jehova i bin skulim em, tasol Jisas i narapela kain, em i amamas long Jehova i skulim em, na em i tingim Jehova olsem Bikpela King. Yumi bin kisim save olsem long taim Jisas i mekim wok bilong em long graun, em i soim pasin sori long ol man em i autim tok long ol, na em i oraitim sik bilong planti man na helpim planti long kamap wanbel gen wantaim God. Long dispela rot em i kamapim ol samting em bai mekim olsem King Mesaia long nupela taim we em bai “mekim stretpela pasin i win na i stap strong long olgeta hap bilong graun.” (Ais. 42:4) Em i givim bel tru long autim tok bilong Kingdom, olsem ‘lait bilong olgeta manmeri bilong graun,’ na dispela i helpim ol disaipel bilong em long tingim olsem ol i mas givim bel long autim gutnius long olgeta hap bilong graun.—Ais. 42:6.
18. Olsem wanem na tok profet bilong Aisaia i mekim na bel bilong yumi i pilim tru ol gutpela samting Jehova na gutpela Wokman bilong em i bin mekim?
18 Na tu, tok profet bilong Aisaia i helpim yumi long kliagut long bikpela samting Jehova yet i bin mekim taim em i salim gutpela Pikinini bilong em i kam long graun long kisim pen na dai bilong helpim yumi. Jehova i no amamas long lukim olsem Pikinini bilong em i karim pen na hevi, tasol em i amamas long lukim olsem Jisas i stap gut tru long em i go inap long em i dai. Yumi mas amamas wankain olsem Jehova i amamas, na tingim olgeta samting Jisas i bin mekim bilong soim olsem Satan i giaman, na em i mekim nem bilong Jehova i stap holi, na long dispela rot em i kamapim ples klia olsem i stret Jehova i stap Nambawan Bos. Na tu, Krais i karim ol sin bilong yumi na em i dai bilong helpim yumi. Long dispela rot liklik lain brata bilong em na ol arapela sipsip inap kamap stretpela manmeri long ai bilong Jehova. Taim yumi bung wantaim bilong mekim Memorial, bel bilong yumi i mas pilim tru ol gutpela samting Jehova na gutpela Wokman bilong em i bin mekim.
Sampela Askim
• Olsem wanem yumi ken tok Jehova i “amamas” long ol i “daunim” Pikinini bilong em?
• Olsem wanem Jisas i ‘kisim bagarap long asua bilong sin bilong yumi’?
• Long wanem rot Wokman i mekim na ‘planti i kamap stretpela manmeri’?
• Olsem wanem stadi long ol tok profet bilong Wokman i bin redim tingting na bel bilong yu long Memorial?
[Piksa long pes 26]
‘Ol i givim baksait long em na lukim em olsem man nating’
[Piksa long pes 28]
“Em i bin givim laip bilong em yet”
[Piksa long pes 29]
“Ol arapela sipsip” i go long Memorial olsem man i lukluk tasol na soim rispek