Ol Referens bilong Laip na Wok Autim Tok Miting Wok Buk
FEBRUERI 4-10
GUTPELA SAVE I KAM LONG BAIBEL | ROM 1-3
“Wok Yet Long Skulim Maus Bilong Bel Bilong Yu”
(Rom 2:14, 15) Ol manmeri bilong ol arapela lain i no stap aninit long lo, tasol tingting bilong ol yet i kirapim ol long bihainim pasin bilong lo. Orait ol dispela lain, maski ol i no gat lo, tingting bilong ol i stap olsem lo bilong ol. 15 Ol dispela lain i kamapim klia olsem astingting bilong lo i stap long bel bilong ol. Na maus bilong bel bilong ol tu i tokaut na i skelim ol. Na taim ol i tingting long dispela, orait tingting bilong ol yet bai tok ol i gat asua o ol i no gat asua.
Maus Bilong Bel i Stap Stret Long Ai Bilong God
6 Ol man i no save long Jehova, ol tu i save long ol samting i stret na i no stret. Baibel i tok: “Tingting bilong ol yet bai tok ol i gat asua o ol i no gat asua.” (Rom 2:14, 15) Olsem, planti man i save i no stret long kilim man o stil. Tru ol i no luksave long dispela, tasol ol i bihainim maus bilong bel, em tingting ol i gat long wanem samting i stret na wanem samting i no stret em Jehova i putim insait long ol. Ol i bihainim tu ol stiatok bilong God, o ol bikpela tok i tru Jehova i givim bilong helpim yumi long mekim ol gutpela disisen long laip.
(Rom 2:15) Ol dispela lain i kamapim klia olsem astingting bilong lo i stap long bel bilong ol. Na maus bilong bel bilong ol tu i tokaut na i skelim ol. Na taim ol i tingting long dispela, orait tingting bilong ol yet bai tok ol i gat asua o ol i no gat asua.
Maus Bilong Bel i Stap Stret Long Ai Bilong God
8 Sampela man i ting taim ol i bihainim maus bilong bel, dispela i min olsem ol i bihainim tasol filings bilong ol. Ol i ting ol i ken mekim wanem samting ol i laikim, bikpela samting em ol i pilim gut long en. Tasol ol filings bilong yumi i no gutpela olgeta, na ol inap paulim yumi. Ol filings bilong yumi i gat bikpela strong na inap mekim sampela samting long maus bilong bel. Baibel i tok: “Bel bilong ol man i save tingting oltaim long mekim pasin giaman, na tingting bilong man em i nogut tru. Husat inap save long as tru bilong en?” (Jeremaia 17:9) So yumi inap kisim tingting olsem wanpela samting i stret maski dispela samting i no stret. Olsem, paslain long Pol i kamap Kristen, em i bin mekim nogut tru long ol manmeri bilong God na em i ting samting em i mekim i stret. Long tingting bilong em, maus bilong bel bilong em i stret. Tasol bihain em i tok: “Man i gat wok long skelim mi em Jehova tasol.” (1 Korin 4:4; Aposel 23:1; 2 Timoti 1:3) Taim Pol i kisim save long tingting bilong Jehova long samting em i mekim, em i luksave olsem em i mas senis. Tru tumas, paslain long mekim wanpela samting, yumi mas askim yumi yet, ‘Jehova i laik bai mi mekim wanem?’
9 Taim yu laikim wanpela, yu no laik mekim em i bel hevi. Yumi laikim Jehova, olsem na yumi no laik mekim em i bel hevi. Pasin bilong yumi long pret long mekim Jehova i bel hevi i mas strong tru. Yumi lukim dispela long eksampel bilong Nehemia. Em i no laik yusim namba bilong em olsem gavana long kamap maniman. Wai? Em i tok em i mekim olsem, ‘long wanem, em save pret long God.’ (Nehemia 5:15) Nehemia i no laik mekim wanpela samting bilong mekim Jehova i bel hevi. Olsem Nehemia, yumi tu i pret long mekim wanpela samting i no stret na mekim Jehova i bel hevi. Long rot bilong ritim Baibel, yumi inap kisim save long ol samting i amamasim Jehova.—Lukim Futnot 6.
Mekim Wok Painimaut
(Rom 3:4) Nogat tru! God bai mekim tok tru tasol, maski olgeta man i save giaman. Olsem Rait Holi i tok: “Long rot bilong tok bilong yu stretpela pasin bilong yu bai stap ples klia, na bai yu win taim ol man i kotim yu.”
Sampela Bikpela Tok Bilong Pas i Go Long Ol Rom
3:4. Taim tok bilong ol man i pait wantaim tok bilong God long Baibel, yumi ‘save God i save mekim tok tru oltaim’ olsem na yumi bilip long tok bilong em long Baibel na yumi mekim samting i stret wantaim laik bilong God. Taim yumi givim bel long autim tok bilong Kingdom na kamapim ol disaipel, yumi inap helpim ol arapela long kisim save olsem oltaim God i save tok tru.
(Rom 3:24, 25) God i kamapim bikpela pasin helpim long ol, na long wok bilong Krais Jisas long givim pe bilong baim bek man, God i kolim ol stretpela manmeri, na dispela i wanpela presen God i givim ol. 25 God i givim Krais olsem ofa na bai ol manmeri i ken kamap wanbel wantaim God long rot bilong bilip bilong ol long blut bilong Krais. God i mekim olsem bilong kamapim klia em i bihainim stretpela pasin taim em i bin lusim sin ol man i bin mekim long bipo, long taim em i isi long ol man.
Sampela Bikpela Tok Bilong Pas i Go Long Ol Rom
3:24, 25—Olsem wanem ‘blut bilong Jisas bilong rausim sin’ inap “tekewe ol sin bilong bipo,” (King Jems Nupela Testamen) em ol sin ol man i bin mekim paslain long Jisas i mekim ofa? Namba wan tok profet bilong Mesaia i stap long Stat 3:15 i kamap tru long yia 33 C.E. taim ol i hangamapim Jisas long pos diwai na em i dai. (Ga. 3:13, 16) Kirap stret long taim Jehova i mekim dispela tok profet, long ai bilong em i olsem dispela pe bilong baim bek ol man i kamap pinis, long wanem, i no gat wanpela samting inap pasim God long inapim laik bilong em. Olsem na long rot bilong ofa bilong Jisas Krais em bai kamap bihain, Jehova inap long lusim sin bilong ol tumbuna pikinini bilong Adam em ol i bin bilip long dispela tok promis bilong em. Ofa bilong baim bek ol man i opim rot bilong ol manmeri i stap paslain long taim bilong Jisas long ol tu i ken kirap bek.—Ap. 24:15.
Baibel Ritim
(Rom 1:1-17) Mi Pol, wanpela wokboi bilong Krais Jisas. Em i bin singautim mi long kamap aposel, na em i makim mi long tokaut long gutnius bilong God. 2 Em gutnius bipo God i bin tokaut long en long rot bilong ol profet na i stap long Rait Holi. 3 Dispela gutnius i stori long Pikinini bilong em, em dispela pikinini i kamap man bilong graun na em i bilong lain bilong Devit. 4 Strong bilong holi spirit i kamapim ples klia olsem em i Pikinini Bilong God. Dispela samting i kamap taim em i kirap bek long indai. Dispela pikinini em Jisas Krais, Bikpela bilong yumi. 5 Long rot bilong em mipela i kisim bikpela pasin helpim na wok aposel bai olgeta lain man i ken bilip na bihainim tok bilong em, na dispela i ken givim glori long nem bilong em. 6 Yupela tu i stap namel long ol dispela lain manmeri na God i singautim yupela long kamap lain bilong Jisas Krais. 7 Dispela pas i go long yupela ol lain long Rom em God i laikim tumas na i makim yupela long kamap manmeri holi: Bikpela pasin helpim na bel isi bilong God, Papa bilong yumi, na bilong Bikpela Jisas Krais i ken i stap wantaim yupela. 8 Pastaim, long rot bilong Jisas Krais mi laik tok tenkyu long God bilong mi long yupela olgeta. Long wanem, long olgeta hap bilong graun ol man i toktok long bilip bilong yupela. 9 Mi save givim mi yet olgeta long mekim wok bilong God na autim gutnius i stori long Pikinini bilong em. Na God yet i save, oltaim mi save kolim nem bilong yupela insait long ol beten bilong mi. 10 Mi askim God strong olsem, sapos em laik bilong em, orait mi ken i kam long yupela. 11 Mi gat bikpela laik long lukim yupela bai mi ken givim yupela presen i kam long God, na dispela i ken strongim yupela. 12 O i gutpela moa sapos yupela i strongim mi na mi strongim yupela, olsem bilip bilong mi i ken strongim yupela, na bilip bilong yupela i ken strongim mi. 13 Ol brata, mi laik bai yupela i save olsem, planti taim mi tingting long kam lukim yupela, tasol inap long nau sampela samting i wok long pasim mi. Mi laik kam bai mi ken lukim gutpela samting i kamap long wok autim tok bilong mi long hap bilong yupela, wankain olsem i bin kamap long ol arapela lain manmeri. 14 Mi gat dinau long ol Grik na long ol man bilong narapela ples, na long ol man i gat savetingting na long ol man i no bin skul; 15 olsem na bel bilong mi i kirap long autim gutnius long yupela ol manmeri i stap long Rom tu. 16 Mi no sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip. Em bilong kisim bek ol Juda pastaim, na ol Grik tu. 17 Ol manmeri i gat bilip ol i luksave olsem long rot bilong gutnius God i kamapim ples klia stretpela pasin bilong em na dispela i strongim bilip bilong ol. Olsem Rait Holi i tok: “Stretpela man bai stap laip long rot bilong bilip bilong em.”
FEBRUERI 11-17
GUTPELA SAVE I KAM LONG BAIBEL | ROM 4-6
“God i Soim Pasin Laikim Bilong Em Long Yumi”
(Rom 5:8) Tasol God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.
(Rom 5:12) Olsem na long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.
God i Soim Pasin Laikim Bilong Em Long Yumi
5 Pol i kirap stori long dispela samting olsem: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Yumi inap kliagut long dispela samting, long wanem, God i bin kirapim ol man long raitim stori long olsem wanem ol man i bin kamap long graun. Jehova i wokim Adam na Iv pastaim. Krieta i gutpela olgeta, na namba wan man na meri tu i gutpela olgeta, em ol tumbuna bilong yumi. God i putim wanpela tambu tasol long ol, na em i tokim ol sapos ol i sakim dispela lo, strafe ol bai kisim em dai. (Stt. 2:17) Dispela lo i no putim hevi long ol, tasol ol i bikhet na sakim, na long dispela rot ol i givim baksait long God, em Man Bilong Givim Lo na King.—Lo 32:4, 5.
(Rom 5:13, 14) Taim Lo i no kamap yet, sin i stap pinis long graun. Tasol sapos i no gat lo na man i mekim sin, orait bai em i no gat kot. 14 Tasol kirap long taim bilong Adam na i kam inap long taim bilong Moses, dai i stap olsem king. Na dai i stap king tu bilong ol lain em ol i no mekim wankain sin olsem Adam i bin mekim. Adam i olsem piksa bilong dispela man husat bai kamap bihain.
God i Soim Pasin Laikim Bilong Em Long Yumi
6 Adam i mekim sin na bihain long dispela em i kamapim ol pikinini, olsem na ol pikinini i kisim sin na ol samting nogut sin i kamapim. Tru, ol i no brukim lo bilong God olsem Adam i bin mekim, olsem na God i no kotim ol long dispela sin, na tu, God i no bin givim yet lo long ol man. (Stt. 2:17) Tasol ol tumbuna bilong Adam i kisim sin long em. Olsem na sin na dai i stap olsem king i go inap long taim God i givim lo long ol Israel, na dispela lo i kamapim klia olsem ol i sinman. (Ritim Rom 5:13, 14.) Sin yumi kisim long Adam i kain olsem sampela sik pikinini i kisim long papamama. Tru, long kain famili olsem we sik i stap long blut bilong papamama, i no olsem olgeta pikinini bai kisim dispela sik. Tasol sin i no olsem. I no gat wanpela inap abrusim hevi em sin bilong Adam i kamapim. Olgeta i karim hevi bilong sin. Em i mekim na olgeta i save dai. Na olgeta pikinini i kisim sin long papamama bilong ol. Olsem wanem? I gat rot bilong winim dispela hevi?
(Rom 5:18) Rong bilong wanpela man i mekim na olgeta kain man i gat kot. Olsem tasol long rot bilong stretpela pasin wanpela man i mekim, God i kolim olgeta kain man stretpela man na ol inap kisim laip.
(Rom 5:21) Wanem as bilong dispela samting? Em olsem: Sin na dai i stap olsem king, olsem tasol bikpela pasin helpim bai stap olsem king long rot bilong stretpela pasin na em bai kamapim laip oltaim long rot bilong Jisas Krais, Bikpela bilong yumi.
God i Soim Pasin Laikim Bilong Em Long Yumi
9 Wanem as bilong tok Grik ol i tanim olsem “kolim planti olsem stretpela manmeri” na “kolim olgeta kain man stretpela man”? Wanpela man bilong tanim tok bilong Baibel i tok: “Em pasin bilong kolim ol tok long sait bilong lo. Em i makim olsem i stap bilong man long ai bilong God i senis, i no olsem pasin bilong man i senis . . . Dispela tok i kamapim olsem God em i jas na wanpela man i sanap long kot bilong em, long wanem, em i man nogut. Tasol long dispela kot God i tok olsem man i no gat asua.”
10 Olsem wanem stretpela “Jas bilong olgeta graun” inap tokaut olsem man nogut i no gat asua? (Stt. 18:25) Namba wan bikpela samting God i mekim, em i salim Pikinini tru bilong em long graun. Jisas i bihainim gut olgeta laik bilong Papa, maski ol traim i painim em, ol man i tok bilas nogut long em, na mekim nogut long em. Em i stap gut long God, maski em i mas i dai long diwai pos bilong mekim olsem. (Hib. 2:10) Taim Jisas i givim laip bilong em i gutpela olgeta, em i givim pe we inap baim bek ol tumbuna bilong Adam long sin na dai.—Mat. 20:28; Rom 5:6-8.
Mekim Wok Painimaut
(Rom 6:3-5) Ating yupela i no save, a? Yumi olgeta husat i bin baptais na nau yumi pas wantaim Krais Jisas, yumi bin baptais bai yumi inap pas wantaim em long dai bilong em. 4 Yumi bin baptais na pas wantaim em long dai bilong em, na i olsem God i planim yumi wantaim em. Na long dispela rot, wankain olsem Papa i bin mekim wok long strong bilong em bilong kirapim bek Krais long dai, yumi tu i mas wokabaut long nupela laip. 5 Yumi pas wantaim em na yumi dai olsem em i bin dai, olsem tasol yumi pas wantaim em na yumi bai kirap bek olsem em i bin kirap bek.
Sampela Bikpela Tok Bilong Pas i Go Long Ol Rom
6:3-5—Dispela tok “pas wantaim Krais Jisas” na kisim baptais na “pas wantaim dai bilong em” i makim wanem samting? Taim Jehova i makim ol disaipel bilong Krais long holi spirit, ol i bung wantaim Jisas na ol i insait long kongrigesen bilong ol Kristen em God i bin makim, kongrigesen em i bodi bilong Krais na Krais em i Het bilong en. (1 Ko. 12:12, 13, 27; Kl. 1:18) Dispela i makim olsem ol i pas wantaim Krais Jisas na kisim baptais. Ol Kristen God i bin makim ol i pas wantaim dai bilong em, dispela i makim olsem ol i save bihainim pasin bilong daunim laik bilong ol yet na ol i no gat tingting long kisim laip long graun. Olsem na indai bilong ol em i olsem ofa, wankain olsem bilong Jisas, tasol indai bilong ol i no bilong baim bek ol man. Taim ol i dai na ol i kirap bek na kisim laip long heven, orait nau dispela baptais na pas wantaim dai bilong Krais i pinis.
(Rom 6:7) Long wanem, man i dai pinis, em i bekim pinis pe bilong ol sin bilong em.
Wanem Gutpela Samting Bai Painim Ol Tumbuna Bilong Mi?
Taim ol man nogut i kirap bek, yu ting God bai kotim ol long ol samting ol i bin mekim long bipo? Nogat. Rom 6:7 i tok: “Man i dai pinis, em i bekim pinis pe bilong ol sin bilong em.” Taim ol man nogut i dai ol i bekim pinis pe bilong ol sin bilong ol. Olsem na God bai skelim ol long ol samting ol i mekim bihain long ol i kirap bek, na i no long ol samting ol i mekim paslain long taim ol i no gat save yet long God na ol i dai. Ol bai kisim wanem helpim?
Baibel Ritim
(Rom 4:1-15) Olsem na bai yumi tok wanem long Abraham, tumbuna bilong yumi? 2 Sapos i tru Abraham i bin mekim ol gutpela wok na long dispela rot God i kolim em stretpela man, orait i gat as na em inap litimapim nem bilong em yet. Tasol em i no inap mekim olsem long ai bilong God. 3 Rait Holi i tok wanem? Em i tok: “Abraham i bilip long Jehova, olsem na em i tingim Abraham olsem stretpela man.” 4 Man i wok em i save kisim pe, dispela pe i no olsem wanpela presen, nogat, em samting i stret em i kisim. 5 Tasol man i no bilip long wok em yet i mekim, na em i bilip long Man husat i save tokaut olsem man nogut em i stretpela man, orait bilip bilong dispela man i mekim na God i tingim em olsem stretpela man. 6 Devit tu i toktok long amamas bilong man em God i tingim olsem stretpela man, na i no long wok dispela man i mekim. 7 Em i tok: “Ol man em ol i bin brukim ol lo na God i fogivim ol na i karamapim sin bilong ol, ol i ken amamas. 8 Man em Jehova i no save tingim ol sin bilong em, em i ken amamas.” 9 Dispela amamas i bilong ol man i katim skin tasol o em i bilong ol man i no katim skin tu? Yumi save tok olsem: “Bilip bilong Abraham i mekim na God i tingim em olsem stretpela man.” 10 Wanem taim God i tingim Abraham i olsem stretpela man? Long taim em i katim skin pinis o long taim em i no katim skin yet? Em i no katim skin yet na God i tingim em olsem stretpela man. 11 God i givim Abraham dispela pasin bilong katim skin olsem mak. Dispela mak i soim olsem long rot bilong bilip bilong em, God i tingim em olsem stretpela man paslain long em i bin katim skin. Olsem na em i kamap papa bilong olgeta man em God i kolim ol stretpela man, long wanem, ol i bilip, maski ol i no katim skin. 12 Na em i papa bilong ol pikinini i bihainim pasin bilong katim skin, tasol tu, em i papa bilong ol man husat i bihainim tru pasin bilong bilip. Em dispela bilip papa bilong yumi Abraham i bin i gat taim em i no katim skin yet. 13 Pasin bilong bihainim lo i no as na Abraham na ol tumbuna bilong em i bin kisim promis olsem em bai kisim nupela graun, nogat. Abraham i bilip na God i tingim em olsem stretpela man, dispela em i as na em i kisim dispela promis. 14 Sapos ol lain husat i bihainim lo, ol i man bilong kisim dispela promis olsem samting papa i laik givim pikinini, orait pasin bilong bilip i olsem samting nating. Na dispela promis i lus nating. 15 Lo Bilong Moses i save kamapim belhat. Tasol sapos i no gat lo, orait yumi no ken tok man i brukim lo.
FEBRUERI 18-24
GUTPELA SAVE I KAM LONG BAIBEL | ROM 7-8
“Yu ‘Gat Laik Stret Long Dispela Taim i Mas Kamap’?”
(Rom 8:19) Ol samting God i wokim i gat laik stret long dispela taim i mas kamap we glori bilong ol pikinini bilong God bai kamap ples klia.
Larim Jehova i Helpim Yu Long Kamap Fri Tru
17 Pol i stori long fridom Jehova bai givim long ol manmeri bilong en hia long graun. Em i tok: “Ol samting God i wokim i gat laik stret long dispela taim i mas kamap we glori bilong ol pikinini bilong God bai kamap ples klia.” Na Pol i tok moa olsem: “Olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.” (Rom 8:19-21) “Ol samting God i wokim” i makim ol manmeri husat i wet long kisim laip oltaim long graun na ol bai kisim helpim taim “ol pikinini bilong God,” em ol Kristen God i bin makim, “bai kamap ples klia.” Dispela bai kamap taim ol Kristen God i bin makim, em ol i stap long heven, ol i kirap helpim Krais long bagarapim ol man nogut na bringim “bikpela lain manmeri” i go insait long nupela taim.—Rev. 7:9, 14.
(Rom 8:20) Olgeta samting God i bin wokim, ol i stap nogut na i bagarap, dispela i no kamap long laik bilong ol yet, nogat. Em i kamap long laik bilong God, bai ol i ken bilip na wet long taim
Amamas Long Samting Yumi Bilip Na Wetim
11 Taim Jehova i tok promis olsem long rot bilong “lain bilong meri” ol man bai i no stap moa aninit long wok bos bilong Satan, dispela i mekim na ol manmeri i ‘ken bilip na wetim’ gutpela samting. (Stt. 3:15; Rev. 12:9) Namba wan man long dispela lain bilong meri em Jisas Krais. (Gal. 3:16) Indai na kirap bek bilong Jisas i opim rot long ol man long lusim kalabus bilong sin na dai. Tasol bilong dispela samting i ken kamap, ‘ol pikinini bilong God i mas kamap ples klia’ pastaim, em ol Kristen God i makim na ol i stap long heven. Ol tu i insait long dispela lain bilong meri. Ol dispela pikinini bilong God bai kamap ples klia, o kamapim klia olsem ol i stap king wantaim Krais, taim ol i helpim Krais long bagarapim dispela graun Satan i bosim. (Rev. 2:26, 27) Long dispela rot God bai kisim bek ol arapela sipsip husat i winim dispela traipela hevi tru.—Rev. 7:9, 10, 14.
(Rom 8:21) olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.
Amamas Long Samting Yumi Bilip Na Wetim
12 Ol samting i kamap long 1,000 yia bilong Krais i stap king bai mekim ol manmeri i amamas tru! Long dispela taim “ol pikinini bilong God” bai kamap ples klia long narapela rot. Ol bai wok pris wantaim Krais na mekim wok long sakrifais bilong en bilong helpim ol manmeri. Taim Kingdom Bilong God i bosim graun, isi isi ol manmeri i save bihainim tok bai “lusim dispela kalabus bilong bagarap.” Hevi bilong sin na dai i no kalabusim ol moa. Sapos ol i stap gut long Jehova long taim bilong 1,000 yia na long taim bilong laspela traim, orait nem bilong ol bai stap oltaim long “skrol bilong laip.” Ol bai kisim “dispela pasin bilong i stap fri i nambawan tru olsem bilong ol pikinini bilong God.” (Rev. 20:7, 8, 11, 12) Em wanpela gutpela samting tru ol i wetim!
Mekim Wok Painimaut
(Rom 8:6) Sapos tingting bilong man i stap long ol laik bilong bodi, orait dispela man bai dai. Tasol sapos tingting bilong man i stap long ol samting bilong holi spirit, orait dispela man bai i stap laip na i stap bel isi;
Yu Tingim Yet?
Olsem wanem “tingting bilong man i stap long ol laik bilong bodi” i narapela long “tingting bilong man i stap long ol samting bilong holi spirit”? (Rom 8:6)
Man i tingting long “ol laik bilong bodi,” em i save tingting tasol long inapim ol laik bilong skin, larim ol dispela laik i bosim em, na oltaim em i toktok long ol dispela samting. Man i tingting long “ol samting bilong holi spirit,” em i save larim holi spirit i stiaim tingting bilong em long bihainim tingting bilong God. Man i bihainim laik bilong bodi bai dai, tasol man i bihainim laik bilong holi spirit bai kisim laip oltaim na i stap bel isi.—w16.12, par.15-17.
(Rom 8:26, 27) Na tu, holi spirit i save helpim yumi taim yumi no gat strong. Sampela taim yumi no save yumi mas beten askim God long wanem samting. Yumi krai long bel na yumi no inap toktok. Long kain taim olsem holi spirit yet i save mekim askim long God bilong helpim yumi. 27 God i save skelim bel bilong ol man na em i kliagut long mining bilong ol tok em holi spirit i as bilong en. Long wanem, holi spirit i mekim ol askim i stret wantaim laik bilong God, na dispela i bilong helpim ol manmeri holi.
Ol Beten Bilong Yu i Kamapim Olsem Yu Wanem Kain Man?
20 Sampela taim, yumi no save yumi bai tok wanem long ol beten bilong yumi yet. Pol i tok: “Yumi no save yumi mas prea long wanem samting. Yumi save krai long bel tasol, na yumi no inap long tokaut. Na long dispela pasin Holi Spirit yet i save prea bilong helpim yumi. Na God i save lukim tru bel bilong man, em i save long dispela tingting bilong Holi Spirit.” (Ro. 8:26, 27) I gat planti beten i stap long Baibel. Jehova i larim ol dispela beten i kamap olsem prea bilong yumi yet na em i harim. God i save gut tru long yumi na long mining bilong ol tok em holi spirit i bin kirapim ol man long raitim long Baibel. Taim holi spirit i “prea bilong helpim” yumi, Jehova i save harim. Tasol taim yumi wok long save gut moa long Tok Bilong God, ating samting yumi mas beten long en bai kamap kwik moa long tingting bilong yumi.
Baibel Ritim
(Rom 7:13-25) Tasol olsem wanem? Gutpela samting i bin kilim mi i dai? Nogat tru! Sin tasol i bin kilim mi i dai. Long rot bilong gutpela samting, sin i bringim mi long dai bilong soim ples klia sin em i wanem samting. Na lo i kamapim ples klia olsem sin em i samting nogut tru. 14 Yumi save Lo i kam long God. Tasol mi man bilong graun tasol, na mi stap wokboi bilong sin. 15 Mi no kliagut long as tru bilong ol pasin mi mekim. Ol pasin mi gat laik long mekim, em mi no save mekim. Tasol ol pasin mi no laik tru long mekim, em mi save mekim. 16 Tasol sapos mi mekim ol pasin em mi no gat laik long mekim, orait dispela i soim olsem mi ting lo bilong God em i gutpela. 17 Olsem na mi yet i no mekim ol dispela pasin, nogat. Sin i stap insait long bodi bilong mi, em i save mekim. 18 Mi save olsem i no gat wanpela gutpela pasin i stap insait long bodi bilong mi; laik bilong mekim ol gutpela pasin i stap long mi, tasol mi no inap mekim samting mi laik mekim. 19 Gutpela pasin mi gat laik long mekim, em mi no save mekim. Tasol pasin nogut em mi no gat laik long mekim, em mi save mekim. 20 Tasol sapos mi mekim ol pasin em mi no gat laik long mekim, orait mi yet i no mekim ol dispela pasin, nogat. Sin i stap insait long bodi bilong mi, em i mekim. 21 Mi lukim olsem dispela lo i bosim mi: Taim mi gat laik long mekim pasin i stret, pasin nogut i stap wantaim mi. 22 Long bel bilong mi, mi amamas long lo bilong God. 23 Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi. 24 Mi pilim nogut tru! Husat bai kisim bek mi long dispela bodi em bilong i dai? 25 Mi tenkyu long God long rot bilong Jisas Krais, Bikpela bilong yumi! Olsem na long tingting bilong mi, mi stap wokboi bilong lo bilong God. Tasol long bodi, mi stap wokboi bilong lo bilong sin.
FEBRUERI 25–MAS 3
GUTPELA SAVE I KAM LONG BAIBEL | ROM 9-11
“Tok Piksa Bilong Diwai Oliv”
(Rom 11:16) Na tu, sapos hap bret i holi, em hap bret ol i ofaim olsem namba 1 kaikai i redi long gaden, orait bret olgeta i holi. Na sapos rop bilong diwai i holi, orait ol han bilong en tu i holi.
‘Savetingting Bilong God i Daun Tumas’
13 Aposel Pol i tok dispela lain husat i kamap ol pikinini bilong Abraham, ol i olsem ol han bilong diwai oliv. (Rom 11:21) Tok piksa bilong diwai oliv bilong gaden i makim truim bilong ol samting bilong kontrak bilong Abraham olsem God i tingting pinis long en. Rop bilong diwai i holi na i makim Jehova, em i Man i givim laip long lain Israel bilong spirit. (Ais. 10:20; Rom 11:16) Diwai i makim Jisas olsem nambawan pikinini bilong lain pikinini bilong Abraham. Ol han bilong diwai i makim ‘namba olgeta’ bilong nambatu lain pikinini bilong Abraham.
(Rom 11:17) God i bin rausim sampela han bilong dispela diwai, na maski yu wanpela han bilong wel diwai oliv, God i skruim yu namel long ol arapela han bilong diwai. Na nau yu kisim ol gutpela gris long rop bilong en.
(Rom 11:20, 21) Tru, ol i no bilip, olsem na God i rausim ol. Tasol yu bilip, olsem na yu sanap i stap. Lusim pasin bilong hambak, mobeta yu pret i stap. 21 Long wanem, God i no bin larim ol han tru bilong diwai i stap, olsem tasol em bai i no inap larim yu tu i stap.
‘Savetingting Bilong God i Daun Tumas’
15 Orait Jehova i mekim wanem bilong kamapim samting em i tingting pinis long mekim? Pol i tok olsem God bai skruim ol han bilong wel diwai oliv i go long diwai oliv bilong gaden, ol i bilong kisim ples bilong ol han God i bin rausim. (Ritim Rom 11:17, 18.) Olsem na ol Kristen God i bin makim bilong ol narapela lain, olsem sampela long kongrigesen long Rom, ol i olsem ol han bilong wel diwai oliv em God i skruim i go long diwai oliv bilong gaden. Long dispela rot ol i insait long lain pikinini bilong Abraham. Pastaim ol i olsem ol han bilong wel diwai oliv, ol i no gat rot bilong insait long kontrak bilong Abraham. Tasol Jehova i opim rot long ol inap kamap olsem ol Juda bilong spirit.—Rom 2:28, 29.
(Rom 11:25, 26) Ol brata, mi laik bai yupela i kliagut long dispela tok hait holi, nogut yupela i ting yupela yet i gat save. Em i olsem, bel bilong sampela Israel i pas i stap i go inap long taim ol manmeri bilong ol arapela lain ol i inapim namba na kam insait. 26 Na long dispela rot God bai kisim bek olgeta Israel. Olsem Rait Holi i tok: “Man bilong kisim bek ol man bai lusim Saion na i kam, na em bai mekim ol pikinini bilong Jekop i lusim ol pasin nogut ol i save mekim.
‘Savetingting Bilong God i Daun Tumas’
19 Yes, olsem Jehova i tingting pinis long en, ol samting bilong “lain Israel bilong God” i wok long kamap long rot i nambawan tru. (Gal. 6:16) Olsem Pol i tok, “God bai kisim bek olgeta Israel.” (Rom 11:26) Long taim Jehova i makim, “olgeta Israel”—em olgeta bilong lain Israel bilong spirit—ol bai mekim wok king na pris long heven. I no gat wanpela samting inap pasim Jehova long kamapim samting em i tingting pinis long mekim!
Mekim Wok Painimaut
(Rom 9:21-23) Man bilong wokim sospen graun em i ken kisim wanpela hap graun na long laik bilong em yet, em i ken wokim 2-pela sospen long en. Wanpela sospen bilong mekim gutpela wok, na narapela bilong mekim wok nogut. Ating dispela pasin i no stret, a? 22 Orait olsem wanem sapos God i gat laik long kamapim belhat bilong em na kamapim strong bilong em, tasol em i no les kwik long ol sospen bilong kisim pe nogut, em ol i bilong kisim bagarap? 23 Na sapos em i bin mekim olsem bilong kamapim klia bikpela glori bilong em long ol sospen bilong kisim marimari, em ol sospen em i bin redim bipo yet bilong kisim glori,
Larim Tok Bilong Jehova i Stretim Stretim Yu
5 Olsem wanem sapos wanpela man i bikhet na em i no laik larim Jehova, em Man bilong wokim sospen graun, long stretim stretim em? Olsem wanem Jehova inap yusim namba bilong em olsem man bilong wokim sospen graun? Sapos graun i no gutpela inap long man i ken wokim sospen em i laikim, orait man inap yusim dispela graun long wokim narapela samting, o em inap rausim na tromoi. Dispela samting i save kamap taim man bilong wokim sospen graun i mekim popaia taim em i stretim graun. Tasol Jehova i no save mekim popaia taim em i stretim ol man, nogat, oltaim em i save bihainim stretpela pasin. (Lo 32:4) Taim wanpela man i no larim Jehova i stretim stretim em, orait dispela man yet i gat asua. Jehova i save lukim pasin ol man i mekim taim em i stretim ol, na dispela i save stiaim em long senisim pasin em i bihainim long stretim stretim ol. Taim ol manmeri i bihainim tok bilong Jehova, em inap yusim ol long mekim kain kain wok. Olsem: Ol Kristen God i bin makim ol i stap olsem “ol sospen bilong kisim marimari,” na God i bin stretim stretim ol na ol i kamap olsem ol “sospen bilong mekim gutpela wok.” Tasol ol manmeri husat i sakim tok bilong God, ol bai kamap olsem “ol sospen bilong kisim pe nogut,” olsem ol i no inap mekim wanpela gutpela wok.—Rom 9:19-23.
(Rom 10:2) Mi tokaut olsem ol i save givim bel tru long mekim wok bilong God, tasol ol i no gat stretpela save na ol i mekim olsem.
it-1-E 1260 par. 2
Pasin Bilong Bel Nogut Long Narapela
Pasin bilong Givim Bel Long Wanpela Samting We i No Stret. Man inap givim bel long mekim wanpela samting, tasol dispela samting i no stret na God i no orait long en. Planti Juda long taim bilong ol aposel ol i mekim dispela kain pasin. Ol i mekim ol wok i stret olsem Lo Bilong Moses i makim na long dispela rot ol i ting ol i bihainim stretpela pasin. Tasol Pol i soim olsem pasin bilong ol long givim bel long mekim wok i no stret, long wanem, ol i no gat stretpela save. Olsem na ol i no bihainim stretpela pasin em God i as bilong en. Ol i mas luksave olsem ol i gat asua na long rot bilong Krais ol i ken i go long God na bai ol i ken kamap stretpela man na Lo i no kotim ol. (Ro 10:1-10) Sol bilong Tarsis em i wanpela bilong ol kain man olsem, em i bin givim bel tru long bihainim lotu Juda na “mekim nogut tru long kongrigesen bilong God na . . . traim long bagarapim olgeta.” Em i bihainim gut Lo na i olsem em i “no gat asua.” (Ga 1:13, 14; Fl 3:6) Tasol dispela pasin bilong em long givim bel tru long lotu Juda i no stret. Em i gat gutpela bel, olsem na Jehova i soim bikpela pasin helpim long em long rot bilong Krais na stiaim em i go long lotu i tru.—1Ti 1:12, 13.
Baibel Ritim
(Rom 10:1-15) Ol brata, samting mi laikim tru long bel na mi beten strong long God long en em olsem, mi laik bai God i kisim bek ol. 2 Mi tokaut olsem ol i save givim bel tru long mekim wok bilong God, tasol ol i no gat stretpela save na ol i mekim olsem. 3 Ol i no bin daun long stretpela pasin bilong God, long wanem, ol i no save long stretpela pasin bilong em, nogat. Long strong bilong ol yet ol i laik kamapim klia olsem ol i stretpela man. 4 Yumi save, Lo i pinis long Krais, olsem na olgeta manmeri husat i soim olsem ol i gat bilip, ol bai kamap stretpela manmeri. 5 Moses i raitim tok long man i bihainim Lo na long dispela rot em i stretpela man, olsem: “Man i bihainim Lo em bai stap laip long dispela rot.” 6 Rait Holi i stori long stretpela pasin em bilip i as bilong en, na i tok: “Long bel no ken tok, ‘Husat bai go antap long heven?’ I olsem em i laik bringim Krais i kam daun. 7 O, ‘Husat bai i go insait long hul i daun tru?’ I olsem em i laik kirapim bek Krais long dai.” 8 Tasol Rait Holi i tok wanem? “Dispela tok i stap klostu long yu, na insait long maus bilong yu na insait long bel bilong yu.” Em “dispela tok” bilong bilip em mipela i wok long tokaut long en. 9 Sapos long ai bilong ol man yu autim dispela tok i stap insait long maus bilong yu, olsem Jisas em i Bikpela, na long bel yu bilip olsem God i kirapim em bek long dai, orait God bai kisim bek yu. 10 Long bel man i save bilip na em i kamap stretpela man, tasol long maus em i save tokaut long dispela bilip bilong em long ai bilong ol manmeri, na God i kisim bek em. 11 Rait Holi i tok: “Man i bilip long em bai i no inap bel hevi.” 12 Ol Juda na ol Grik ol i wankain, long wanem, Bikpela em i Bikpela bilong olgeta wantaim. Em i save givim planti blesing long olgeta manmeri husat i singaut long em. 13 Olsem na “olgeta manmeri i singaut long nem bilong Jehova, em bai kisim bek ol.” 14 Tasol olsem wanem ol bai singaut long man em ol i no bilip long em? Na olsem wanem ol bai bilip long man em ol i no bin kisim save long em? Na olsem wanem ol bai kisim save long dispela man sapos i no gat wanpela i autim tok long ol? 15 Na olsem wanem ol bai autim tok sapos i no gat wanpela i salim ol i go? Olsem Rait Holi i tok: “Ol man i autim gutnius long ol gutpela samting, lek bilong ol i naispela tumas!”