I Stap Bilong Maniman na Lasarus i Senis

Jisas i bin givim skultok long ol disaipel long pasin bilong yusim gut mani kago. Tasol i no ol disaipel tasol i harim dispela tok, nogat. Ol Farisi tu i stap, na ol i gat wok long tingim gut tok bilong Jisas. Bilong wanem? Long wanem, ol i “laikim tumas mani.” Ol i harim tok Jisas i mekim na ol “i pulim nus long em.”—Luk 15:2; 16:13, 14.

Tasol dispela i no pretim Jisas. Em i tokim ol: “Yupela i save tokaut long ai bilong ol man olsem yupela i stretpela man, tasol God i save pinis long bel bilong yupela. Samting ol man i tingim olsem i bikpela samting, long ai bilong God em i stingpela samting.”—Luk 16:15.

Inap longpela taim, ol man i save tingim ol Farisi i olsem “bikpela samting.”Ol man i save litimapim ol, ol i gat planti mani kago, ol i gat namba long wok politik, na ol i save stiaim tingting bilong ol arapela long lotu, tasol nau ol i mas stap olsem ol man i no gat nem. Na ol manmeri nating husat i luksave olsem ol i gat wok long kisim save long God, nau em taim bilong litimapim ol. Jisas i kamapim klia olsem bikpela senis i wok long kamap. Em i tok:

“Ol man i autim tok bilong Lo na ol Profet i go inap long Jon i kamap. Kirap long dispela taim na i kam ol i autim tok bilong Kingdom bilong God olsem gutnius, na olgeta kain man i wok strong long i go long en. Tru tumas, em i isi moa long skai na graun i ken pinis paslain long wanpela liklik mak bilong wanpela leta i stap long Lo i pinis na i no gat truim bilong en.” (Luk 3:18; 16:16, 17) Olsem wanem tok bilong Jisas i soim olsem senis i wok long kamap?

Ol bikman bilong lotu Juda i save hambak na tokaut olsem ol i bihainim gut Lo Bilong Moses. Tingim, taim Jisas i bin oraitim wanpela aipas man long Jerusalem, ol Farisi i hambak na tok: “Mipela ol disaipel bilong Moses. Mipela i save olsem God i bin toktok long Moses.” (Jon 9:13, 28, 29) Wanpela wok bilong Lo em Moses i bin kisim, em long bringim ol man i gat pasin daun i go long Mesaia, em Jisas. Jon Bilong Baptais i tokaut olsem Jisas em i Pikinini Sipsip bilong God. (Jon 1:29-34) Kirap long taim Jon i autim tok, ol Juda i gat pasin daun, moa yet em ol man i no gat planti samting, ol i harim tok bilong “Kingdom bilong God.” Yes, i gat “gutnius” bilong tokim olgeta man i laik stap aninit long Kingdom Bilong God na ol i ken kisim helpim.

Ol samting Lo Bilong Moses i tokaut long en i kamap tru na i bringim ol man i go long Mesaia. Na tu, i no gat wok moa long bihainim dispela Lo. Olsem: Lo Bilong Moses i kolim planti risen na man i ken divosim meri, tasol Jisas i tok: “Man i katim marit na maritim narapela, em i mekim pasin adaltri, na man i maritim meri em marit bilong en i bruk olsem, orait dispela man i mekim pasin adaltri.” (Luk 16:18) Man! Dispela tok i sikirapim tru bel bilong ol Farisi husat i save kamapim ol lo long olgeta samting.

Orait nau Jisas i stori long wanpela tok piksa na dispela i soim klia olsem bikpela senis i wok long kamap. Tok piksa i stori long tupela man em bikpela senis i kamap long sindaun bilong ol. Taim yu skelim dispela tok piksa, tingim olsem namel long ol man i harim dispela tok em ol Farisi, ol i save laikim tumas mani na ol man i save litimapim ol.

Jisas i tok: “I gat wanpela maniman i stap, na em i save pasim klos i gat bikpela pe em kala bilong en pepol. Na long olgeta de em i kisim amamas long ol nambawan gutpela samting. Na i gat wanpela rabisman i stap, nem bilong en Lasarus, na bodi bilong en i pulap long ol sua. Ol i save sindaunim em long geit bilong dispela maniman, na em i laik tru long pulapim bel bilong en long ol samting i save pundaun long tebol bilong maniman. Na tu, ol dok i save kam na likim ol sua bilong en.”—Luk 16:19-21.

Ol man i harim tok i save olsem “maniman” long tok piksa bilong Jisas i makim ol Farisi, long wanem, ol i save laikim tumas mani. Na ol i save amamas long werim ol kain kain stail klos i gat bikpela pe. Na tu, ol i stap olsem maniman long sait bilong lotu, long wanem, ol inap long mekim ol wok bilong God. Tru tumas, long tok piksa Jisas i stori long man i pasim pepol klos i gat bikpela pe, dispela i makim olsem ol Farisi i save amamas long kisim bikpela namba. Na waitpela laplap i makim tingting ol i gat olsem ol i stretpela man.—Daniel 5:7, NW.

Ol Farisi i gat pasin antap na ol i maniman, olsem na ol i gat wanem tingting long ol man nating? Ol i luk daun long ol na tingim ol i olsem ‛am ha·’aʹrets, o ol manmeri bilong graun, em ol i no save long Lo na i no gat wok long skulim ol long Lo. (Jon 7:49) Dispela i kamapim klia i stap bilong dispela ‘rabisman, nem bilong en Lasarus,’ em i hangre tru long kaikai ol liklik “samting i save pundaun long tebol bilong maniman.” Wankain olsem maniman i luk daun long Lasarus, ol bikman bilong lotu i luk daun long ol man nating, ol i tingim ol olsem ol man em God i no amamas long ol.

Kain samting olsem i bin i stap inap longpela taim, tasol Jisas i save olsem taim i kamap pinis long bikpela senis i mas kamap long sindaun bilong ol man i olsem dispela maniman na ol man i olsem Lasarus.

SENIS I KAMAP LONG MANIMAN NA LASARUS

Jisas i stori moa long bikpela senis i kamap. Em i tok: “Bihain dispela rabisman i dai na ol ensel i karim em i go stap klostu long bros bilong Abraham. Na maniman tu i dai na ol i planim em. Na em i stap long Matmat na karim pen, na em i lukluk i go antap na em i lukim Abraham i stap longwe. Na Lasarus i stap klostu long bros bilong Abraham.”—Luk 16:22, 23.

Ol man i putim yau long em i save olsem Abraham i dai planti yia i go pinis na em i stap long Matmat. Tok Bilong God i kamapim klia olsem, ol man i stap long Matmat i no inap lukluk o toktok. Na Abraham tu i no inap mekim olsem. (Saveman 9:4, 5, 10) So ol bikman bilong lotu i ting tok piksa bilong Jisas i gat wanem mining? Ating em i laik kamapim wanem tok long ol man nating na ol bikman bilong lotu husat i laikim tumas mani?

Jisas i kamapim klia olsem senis i kamap taim em i tok: ‘Ol man i autim tok bilong Lo na ol Profet i go inap long Jon Bilong Baptais i kamap. Kirap long dispela taim na i kam ol i autim tok bilong Kingdom bilong God olsem gutnius.’ Olsem na taim Jon na Jisas Krais i kirap long mekim wok autim tok, senis i kamap long i stap bilong Lasarus na maniman. Nau long ai bilong God, i stap bilong ol i no wankain olsem long bipo.

Em i klia tru olsem inap longpela taim ol man nating i hangre tru long kisim tok bilong God. Na ol i bin kisim helpim taim ol i harim na bihainim tok bilong Kingdom em pastaim Jon i bin autim na bihain Jisas i autim. Bipo ol i bin kisim ol liklik hap tok bilong God, olsem ol “samting i save pundaun long tebol” bilong ol bikman bilong lotu. Tasol nau ol i kisim save long ol bikpela tok i tru bilong Baibel, moa yet ol gutpela samting Jisas i wok long stori long en. Na i olsem nau God Jehova i amamas long ol.

Tasol ol bikman bilong lotu, em ol i maniman na ol i gat namba i no laik harim tok bilong Kingdom em Jon i bin autim na bihain Jisas i autim wankain tok long olgeta hap. (Matyu 3:1, 2; 4:17) Tok Jon na Jisas i autim i mekim ol i belhat, na i givim bikpela pen long ol, dispela i makim olsem kot bilong God bai painim ol olsem paia i kukim ol. (Matyu 3:7-12) Ol dispela bikman bilong lotu, em ol i save laikim tumas mani, i laik bai Jisas na ol disaipel bilong em i no ken autim moa tok bilong God na bai ol i ken stap bel isi. Ol dispela bikman i olsem maniman long tok piksa, em i tok: “Papa Abraham, marimari long mi na salim Lasarus i go putim pinga bilong en long wara na kam mekim kol tang bilong mi, long wanem, mi karim pen na hevi long dispela bikpela paia.”—Luk 16:24.

Tasol dispela samting i no inap kamap. Planti bilong ol dispela bikman bilong lotu i no inap senis. Ol i no laik “putim yau long ol rait bilong Moses na ol Profet,” em ol rait we inap bringim ol i go long Jisas na bai ol i ken bilip olsem em i King na Mesaia God i makim. (Luk 16:29, 31; Galesia 3:24) Na ol i no daunim ol yet na kisim helpim long ol dispela man nating husat i bilip long Jisas na nau God i orait long ol. Ol disaipel bilong Jisas i no surik long autim stret tok i tru bilong amamasim ol bikman bilong lotu na bai ol i stap bel isi, nogat. Long tok piksa bilong Jisas, em i kamapim klia dispela samting na i stori long tok “Papa Abraham” i mekim long maniman, olsem:

“Pikinini, tingim, taim yu stap laip yu bin kisim ol gutpela samting i inap tru long yu, na Lasarus i bin kisim olgeta samting nogut. Tasol nau bel bilong en i stap gutpela na yu karim pen na hevi. Na tu, wanpela traipela baret i stap namel long mipela na yupela na em bilong i stap oltaim, na ol man i stap long hia na i laik go long yupela, ol i no inap, na ol manmeri long hapsait i no inap brukim baret na kam long mipela.”—Luk 16:25, 26.

Man! I stret tru long dispela kain bikpela senis i kamap long ol man nating na ol bikman bilong lotu em ol i gat pasin antap. Ol man nating i amamas long karim hap plang bilong Jisas, nau ol i kisim nupela strong na planti save long tok bilong God. (Matyu 11:28-30) Sampela mun bihain na dispela senis bai kamap ples klia moa taim nupela kontrak i senisim kontrak bilong Lo. (Jeremaia 31:31-33; Kolosi 2:14; Hibru 8:7-13) Taim God i kapsaitim holi spirit long de Pentikos 33 C.E., ol man bai save tru olsem God i orait long ol disaipel bilong Jisas, na em i no orait long ol Farisi na ol arapela bikman bilong lotu.