Askim
Wanem ol samting i mekim na Juda i slip wantaim wanpela meri em i ting em i pamukmeri, olsem Stat 38:15, 16 i tok?
Juda i bin slip wantaim wanpela meri em i ting em i pamukmeri, tasol tru tru em i no wanpela pamukmeri. Buk Stat sapta 38 i stori long ol samting i bin kamap.
Namba wan pikinini man bilong Juda i no kamapim yet ol pikinini long meri bilong em, Tamar, na Bikpela i kilim em i dai, long wanem, ‘pasin bilong em i nogut tru long ai bilong Bikpela.’ (Stat 38:7) Long dispela taim ol i gat kastam olsem sapos wanpela man i no gat pikinini yet na em i dai, orait brata bilong em i mas maritim meri bilong dispela man i dai na bai em inap kamapim pikinini husat bai kisim ol samting bilong dispela man i dai pinis. Tasol namba tu pikinini man bilong Juda, em Onan, em i no laik inapim samting em i mas mekim. Olsem na God i kilim em i dai. Orait Juda i salim tambu meri bilong em, Tamar, i go bek long haus bilong papa bilong em na bai em i ken stap long hap i go inap long namba tri pikinini man bilong Juda, em Sela, em i kamap bikpela na em inap long maritim Tamar. Tasol ol yia i kam na i go pinis, na Juda i no givim Sela bilong maritim Tamar. Olsem na taim meri bilong Juda i dai, Tamar i kisim tingting long mekim wanpela samting na bai em i ken kisim pikinini long rot bilong Juda, em tambu papa bilong em. Em i bilas olsem wanpela pamukmeri bilong tempel na em i sindaun arere long rot we em i save olsem Juda bai wokabaut long en.
Juda i no luksave long Tamar, olsem na em i slip wantaim em. Tamar i bihainim gutpela tingting na em i kisim sampela samting bilong Juda olsem pe bilong Juda i ken slip wantaim em, na bihain em i soim ol dispela samting bilong kamapim klia olsem em i bin kisim bel long Juda. Taim stori tru i kamap ples klia, Juda i no sutim tok long Tamar, tasol em i mekim pasin daun na em i tok: “Mi tasol mi bin mekim rong, na dispela meri nogat. Em i mas maritim Sela, pikinini bilong mi. Tasol mi no bin stretim marit bilong tupela.” Olsem na i stret Juda “i no slip moa wantaim [Tamar].”—Stat 38:26.
Juda i no mekim stretpela pasin, long wanem, em i no givim Tamar i go long pikinini man bilong em, Sela, olsem em i bin tok promis long mekim. Na tu, em i slip wantaim meri em i ting em i wanpela pamukmeri bilong tempel. Dispela i no stret wantaim tok God i bin mekim pinis, olsem pasin bilong man i slip wantaim meri em samting i mas kamap insait long marit tasol. (Stat 2:24) Tasol tru tru, Juda i no bin slip wantaim wanpela pamukmeri. Em i mekim samting em i no bin tingting long mekim: Em i kisim ples bilong pikinini bilong em, Sela, na em i kamapim pikinini husat inap kisim ol samting bilong man bilong Tamar.
Tamar yet em i no mekim pasin pamuk. Em i karim tupela pikinini man i twins na ol i no gat nem olsem ol pikinini i kamap long rot bilong pamuk. Taim Boas bilong Betlehem i bihainim dispela kastam bilong maritim tambu meri na em i maritim meri Moap, em Rut, ol hetman bilong Betlehem i mekim gutpela tok long pikinini man bilong Tamar, em Peres, na ol i tokim Boas: “Bikpela i ken givim planti pikinini long yutupela, na lain bilong yu i ken kamap bikpela olsem lain bilong Peres, pikinini man bilong Juda na Tamar.” (Rut 4:12) Na Baibel i kolim tu nem bilong Peres olsem wanpela tumbuna papa bilong Jisas Krais.—Matyu 1:1-3; Luk 3:23-33.