Referens Bilong Laip na Wok Autim Tok Miting Wok Buk
Mas 1-7
GUTPELA SAVE I KAM LONG BAIBEL | NAMBA 7-8
“Skul Yumi Kisim Long Lain Israel”
it-1 497 par. 3
Ol Manmeri i Bung
Long Israel, ol man God i makim, ol i stap mausman bilong ol manmeri na go pas long ol wok. (Esr 10:14) Olsem na taim ol i sanapim pinis haus lotu sel, ol “hetman bilong ol traib” i bringim ol samting i kam bilong mekim ofa. (Nam 7:1-11) Na tu, long taim bilong Nehemia, ol pris, ol Livai, na “ol hetman bilong ol manmeri” i makim maus bilong ol manmeri na “mekim strongpela tok promis long bihainim tok” na putim mak bilong ol bilong strongim dispela tok promis. (Ne 9:38–10:27) Taim lain Israel i stap long ples drai nating, 250 bilong “ol man ol Israel i bin makim na ol i gat nem namel long ol manmeri,” ol i bung wantaim Kora, Datan, Abairam, na On na ol i birua long Moses na Aron. (Nam 16:1-3) Moses i bihainim tok bilong God na em i makim 70 man namel long ol hetman bilong lain Israel long helpim em na ‘karim hevi bilong ol manmeri.’ (Nam 11:16, 17, 24, 25) Wok Pris 4:15 i tok “ol hetman bilong Israel,” na i luk olsem dispela i makim ol hetman, ol jas, na ol ofisa bilong ol manmeri.—Nam 1:4, 16; Jos 23:2; 24:1.
it-2 796 par. 1
Ruben
Long kem bilong lain Israel long hap saut bilong haus lotu sel, kem bilong lain Ruben i stap long namel, na kem bilong lain Simeon na lain Gat i stap long sait sait bilong en. Taim ol i wokabaut i go, lain Ruben i save go pas long lain Simeon na lain Gat, na ol i save bihainim lain Juda, lain Isakar, na lain Sebulun. (Nam 2:10-16; 10:14-20) Long taim ol i laik mekim ofa bilong dediketim haus lotu sel, ol i bihainim wankain pasin. Lain Juda i go pas long mekim ofa, na bihain ol arapela traib i bihainim ol na mekim ofa.—Nam 7:1, 2, 10-47.
Sampela Bikpela Tok Bilong Buk Namba
8:25, 26. Bilong ol man Livai i ken mekim gut wok bilong ol, na tu bilong tingim krismas bilong ol man i lapun, lo i tok long ol man i lapun i mas ritaia long wok bilong ol. Tasol ol i ken helpim ol narapela Livai long wok sapos ol i laik. Long nau yumi no inap ritaia long wok bilong autim tok bilong Kingdom, tasol stiatok long dispela lo i skulim yumi long wanpela bikpela samting. Sapos wanpela Kristen i no inap long mekim sampela wok, long wanem, em i lapun orait em i ken insait long wanpela wok i stret long strong bilong em.
Mekim Wok Painimaut
it-1 835
Fesbon Pikinini Man, Namba 1 Pikinini Bilong Animal
Ol fesbon pikinini man bilong ol Israel bai kamap ol hetman long olgeta wan wan famili, olsem na ol i makim lain Israel. Jehova i kolim lain Israel olsem “fesbon pikinini man” bilong em, long wanem, em i mekim ol i kamap wanpela kantri, em i mekim olsem bikos long kontrak em i wokim wantaim Abraham. (Ki 4:22) Jehova i bin kisim bek lain Israel, olsem na em i tokim ol “yupela i mas givim olgeta fesbon pikinini man bilong yupela ol Israel long mi. Ol fesbon pikinini man bilong yupela na bilong ol animal, ol i bilong mi.” (Ki 13:2) Dispela i as na olgeta fesbon pikinini man i bilong God.
Mas 8-14
GUTPELA SAVE I KAM LONG BAIBEL | NAMBA 9-10
“Rot Jehova i Bihainim Bilong Stiaim Lain Bilong Em”
it-1 398 par. 3
Kem
Taim lain Israel i lusim wanpela ples na i go long narapela ples (inap olsem 40 taim ol i muv i go long narapela narapela hap na wokim kem na Moses i raitim nem bilong ol dispela ples long Buk Namba 33) ol i bihainim gut lo bilong wokim kem. Taim klaut i stap tasol antap long haus lotu sel, ol Israel i save stap tasol na ol i no kirap i go. Taim klaut i lusim haus lotu sel na i go, ol Israel i save kirap na i go. “Taim Jehova i tok, orait ol i save wokim kem, na taim Jehova i tok, orait ol i save kirap na i go.” (Nam 9:15-23) Ol i save winim 2-pela trampet em ol i wokim long silva bilong toksave long ol manmeri long ol dispela tok bilong Jehova. (Nam 10:2, 5, 6) Taim ol i winim trampet na krai bilong em i longpela na sotpela wantaim, dispela i makim olsem ol manmeri i mas kirap na i go. Namba 1 taim ol i mekim olsem, em long “namba 20 de bilong namba 2 mun bilong namba 2 yia [1512 B.C.E.].” Lain i karim bokis kontrak i go pas, na 3-pela traib, em lain Juda, lain Isakar, na lain Sebulun i bihainim ol na wokabaut i go. Lain Gersom na lain Merari i karim ol samting bilong haus lotu sel na bihainim dispela 3-pela traib. Bihain long ol, narapela 3-pela traim i bihainim ol, em lain Ruben, lain Simeon, na lain Gat. Na lain Kohat i karim ol samting bilong ples holi na bihainim ol i go. Na bihain long ol, narapela 3-pela traib, em lain Efraim, lain Manase, na lain Benjamin. Na 3-pela laspela traib i kam baksait long ol, em lain Dan, lain Aser na lain Naptali. Long dispela rot, i gat 3-pela bikpela traib i gat strong i go pas na 3-pela bikpela traib i gat strong i kam long baksait.—Nam 10:11-28.
Yu Luksave Olsem God i Stiaim Yumi?
Olsem wanem yumi ken soim olsem yumi amamas long God i stiaim yumi? Aposel Pol i tok: “Yupela i mas bihainim tok bilong ol man i go pas long yupela na stap aninit long ol.” (Hib. 13:17) Sampela taim dispela i hatwok. Olsem: Tingim olsem yu wanpela man Israel long taim bilong Moses. Yu bin wokabaut bihainim klaut inap sampela taim, na nau klaut i stop. Em bai stap olsem inap hamas de? Wanpela de? Wanpela wik? Sampela mun? Yu tingting, ‘Bai mi rausim ol kago bilong mi long ol mekpas?’ Ating pastaim yu rausim ol samting yu nidim. Tasol bihain long sampela de, yu les long painim ol samting, na yu kirap rausim ol narapela kago tu. Tasol taim yu rausim pinis olgeta samting, yu lukim klaut i kirap na go—na yu mas stat long putim ol kago i go bek! Dispela bai hatwok. Tasol lain Israel i mas “kisim ol samting na bihainim klaut i go.”—Nam. 9:17-22.
Yumi save mekim wanem taim yumi kisim tok i kam long God? Wantu yumi traim long bihainim dispela tok? O yumi save bihainim yet pasin bilong yumi long mekim ol samting? Yumi kliagut long ol tok yumi kisim long nau bilong stiaim yumi, em ol tok i stori long pasin bilong mekim ol Baibel stadi, autim tok long ol man i gat narapela tokples, mekim oltaim famili lotu, wok gut wantaim Hospital Lieson Komiti, na bihainim pasin i stret long ol kibung? Taim yumi bihainim tok bilong stretim yumi, yumi soim olsem yumi amamas long wok bilong God long stiaim yumi. Taim yumi mas wokim ol bikpela disisen, yumi no bilip long savetingting bilong yumi yet, nogat, yumi lukluk i go long Jehova na oganaisesen bilong em long soim rot long yumi. Pikinini i laik bai papamama bilong em i lukautim em taim bikpela win na ren i kamap, na olsem tasol taim ol bikpela hevi bilong dispela graun i painim yumi, yumi painim ples hait insait long oganaisesen bilong Jehova.
Mekim Wok Painimaut
it-1 199 par. 3
Pasin Bilong Bung Wantaim
As na Pasin Bilong Bung Wantaim Em i Bikpela Samting. Bung bilong Pasova em ol i save mekim long olgeta yia i kamapim klia olsem em i bikpela samting long ol Israel i mas bihainim rot Jehova i makim bilong ol long bung wantaim bilong mekim lotu. Sapos wanpela man i klin long ai bilong Jehova na em i no go long wanpela longwe ples, tasol em i no redim ol samting bilong Pasova, orait ol i mas kilim em i dai. (Nam 9:9-14) Taim King Hesekia i singautim ol Juda na ol Israel i go long Jerusalem bilong mekim bung bilong Pasova, em i tok: “Ol manmeri bilong Israel, yupela i mas kam bek long Jehova . . . Yupela i no ken i gat strongpela het olsem ol tumbuna papa bilong yupela. Yupela i mas aninit long Jehova na kam long ples holi bilong em, em ples em i bin mekim i holi inap oltaim, na lotuim Jehova, God bilong yupela. Na bai em i no belhat moa long yupela. . . . Jehova, God bilong yupela, em i God bilong sori na marimari, olsem na sapos yupela i kam bek long em, em i no inap givim baksait long yupela.” (2St 30:6-9) Sapos wanpela man i no go long bung bilong Pasova, dispela i makim olsem em i givim baksait long God. Tru ol Kristen i no save mekim bung bilong Pasova, tasol Pol i kirapim ol long no ken lusim pasin bilong bung wantaim lain bilong God, em i tok: “Yumi wan wan i mas tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim, olsem sampela i save mekim, nogat. Yumi mas strongim bel bilong narapela narapela na mekim moa yet taim yumi lukim dispela de i kam klostu.”—Hi 10:24, 25.
Mas 15-21
GUTPELA SAVE I KAM LONG BAIBEL | NAMBA 11-12
“Bilong Wanem Yumi Mas Sakim Pasin Bilong Komplein?”
No Ken Harim Nating na Lusim Tingting Hariap
20 Tru, klostu olgeta Kristen i no bin pundaun na mekim pasin pamuk. Tasol yumi mas was gut, nogut yumi bihainim wanpela rot i kirapim yumi long kisim pasin bilong tok kros, olsem toktok planti, em dispela pasin inap mekim na God i no orait long yumi. Pol i tokim yumi: “Yumi no ken traim Krais [“Jehova,” NW ] tu, olsem sampela bilong ol [Israel] i bin mekim, na ol snek nogut i kaikaim ol na ol i bagarap. Na yupela i no ken tok kros long God, olsem sampela bilong ol i bin mekim, na ensel bilong kilim man i dai, em i bin kam na kilim ol i dai.” (1 Korin 10:9, 10) Ol Israel i tok kros long Moses na Aron—na long God yet—ol i toktok planti long mana God i givim long ol olsem mirakel. (Namba 16:41; 21:5) Yu ting Jehova i bel nogut tru long pasin pamuk bilong ol tasol em i no bel nogut tumas long pasin bilong ol long tok kros na toktok planti? Baibel i stori olsem ol snek i kaikaim planti bilong ol dispela lain i tok kros, na ol i dai. (Namba 21:6) Paslain long dispela taim, inap olsem 14,700 man i bin bikhet na tok kros, na God i bagarapim ol. (Namba 16:49) Olsem na yumi no ken traim pasin bilong Jehova long isi isi long yumi na yumi mekim olsem ol samting em i givim long yumi i samting nating tasol.
“No Ken Toktok Planti”
Pasin bilong lain Israel i bin senis olgeta! Pastaim ol i bin amamas tru long ol i lusim Isip na abrusim bagarap long solwara Retsi na dispela i bin kirapim ol long mekim singsing bilong litimapim nem bilong Jehova. (Kisim Bek 15:1-21) Tasol ples drai nating i gat ol hatwok bilong en na ol i pret long ol Kenan, olsem na amamas bilong lain bilong God i pinis na ol i kirap toktok planti. Ol i no tok tenkyu long God long em i bin helpim ol long kamap fri, nogat, ol i sutim tok long em olsem ol i sot long kaikai samting. Olsem na pasin bilong toktok planti i soim olsem ol i no gat stretpela tingting long ol samting Jehova i bin givim long ol. Yumi no kirap nogut long em i tok: “Planti taim ol dispela lain manmeri nogut i bin tok kros long mi. . . . Wanem taim bai ol i lusim dispela kain tok?”—Namba 14:27; 21:5.
it-2 719 par. 4
Kros
Toktok Planti. Pasin bilong toktok planti i save mekim ol man i bel hevi na kros. I no longtaim bihain long lain Israel i lusim Isip, ol i toktok planti long Jehova. Ol i mekim olsem taim ol i toktok planti long Moses na Aron, em tupela man Jehova i makim. (Ki 16:2, 7) Toktok bilong ol i mekim na Moses i bel hevi stret na em i askim Jehova long kilim em i dai. (Nam 11:13-15) Man bilong toktok planti bai kisim hevi long dispela pasin. Jehova tingim pasin bilong ol Israel long toktok planti long Moses i olsem ol i toktok planti long wok bos bilong em. (Nam 14:26-30) Dispela pasin bilong ol i mekim na planti bilong ol i lusim laip bilong ol.
Mekim Wok Painimaut
it-2 309
Mana
Mana Em Wanem Samting. Mana “em i waitpela olsem sid bilong korienda” na “lukluk bilong en i olsem delium,” em waitpela na seip bilong en olsem pel. Teis bilong en i “switpela olsem bisket ol i wokim wantaim hani” o “i olsem switpela bret ol i tanim wantaim oil.” Ol i save memeim long ston o paitim paitim insait long ston dis, na bihain ol i save boilim long sospen o ol i save wokim ol raunpela bret.—Ki 16:23, 31; Nam 11:7, 8.
Mas 22-28
GUTPELA SAVE I KAM LONG BAIBEL | NAMBA 13-14
“Olsem Wanem Pasin Bilong Bilip i Save Strongim Yumi?”
Strongim Bel Long Rot Bilong Bilip na Pret Long God
5 Tasol tupela man bilong lukstil, Josua na Kalep, i gat bikpela laik long go insait long Graun Bilong Promis. Ol i tok: “Ol [Kenan] i olsem abus bilong yumi tasol. Yumi no gat hatwok long winim ol. Bikpela i stap wantaim yumi na em i bagarapim pinis ol giaman god i save was long ol. Olsem na maski pret long ol.” (Namba 14:9) Yu ting Josua na Kalep i no gat gutpela tingting? Nogat! Tupela wantaim ol arapela Israel i bin lukim Jehova i semim strongpela kantri Isip wantaim ol god bilong en long rot bilong 10-pela bikpela hevi. Bihain ol i lukim Jehova i bagarapim king bilong Isip na ol soldia bilong em long solwara Retsi. (Song 136:15) Tru tumas, i no gat as na 10-pela man bilong lukstil na ol man i harim tok bilong ol i ken pret. Pasin bilong ol i mekim na Jehova i bel hevi. Em i tok: “Planti taim ol dispela lain manmeri . . . i no bilip long mi. Mi bin wokim planti mirakel namel long ol, tasol ol i no bilip.”—Namba 14:11.
6 Jehova i kamapim klia as bilong pret bilong ol—ol i no bilip. Yes, pasin bilong bilip na strongpela bel i poroman wantaim, olsem na aposel Jon i tokim kongrigesen Kristen, em ol i insait long wanpela pait bilong spirit, olsem: “Yumi bilip long God, na long dispela pasin yumi save winim pait na daunim strong bilong dispela graun.” (1 Jon 5:4) Long nau, strongpela bilip kain olsem bilong Josua na Kalep i mekim na 6 milion Witnes Bilong Jehova—ol yangpela na lapun, sampela i gat strong na sampela i no gat strong—ol i save autim gutnius bilong Kingdom long olgeta hap bilong graun. I no gat wanpela birua inap pasim maus bilong ol; ol i olsem wanpela bikpela lain ami i gat strongpela bel.—Rom 8:31.
Mekim Wok Painimaut
it-1 740
Graun God i Givim Long Lain Israel
GRAUN God i givim long Israel em gutpela graun tru. Taim Moses i salim ol man bilong lukstil i go pas bilong sekim Graun Bilong Promis na kisim sampela kaikai bilong dispela hap i kam, ol i bringim i kam bek ol fik, ol pomigranet, na rop wain i gat planti greip em ol i putim long longpela stik na tupela man i karim! Tru ol dispela man bilong lukstil i no gat strongpela bilip na ol i pret, tasol ol i tokaut stret olsem: “Dispela graun i gat planti milk na hani.”—Nam 13:23, 27.
Mas 29–Epril 4
GUTPELA SAVE I KAM LONG BAIBEL | NAMBA 15-16
“Was Gut Long Pasin Antap na Pasin Bilong Bilip Long Yu Yet”
Jehova i Save Long Yu?
12 Tasol taim ol Israel i wokabaut i go long Graun Bilong Promis, Kora i kisim tingting olsem wei bilong Jehova long stiaim lain Israel i no stret. Kora i laik senisim sampela samting. Na 250 man long lain Israel i bihainim em. Ol i tingting strong olsem Jehova i orait long ol. Ol i tokim Moses: “Yumi olgeta i bilong Bikpela. I no yutupela tasol. Na Bikpela i stap wantaim yumi olgeta.” (Nam. 16:1-3) Tingting na pasin bilong ol i soim olsem ol i gat pasin antap tru. Ol i bilip tumas long pasin bilong ol yet long mekim ol samting. Moses i tokim ol: “Bikpela bai i soim yumi husat ol man i bilong em.” (Ritim Namba 16:5.) Long neks de, Kora na ol man i bihainim em, ol i dai.—Nam. 16:31-35.
Jehova i Save Long Yu?
11 Yumi bai skelim eksampel bilong tupela man husat i bin bihainim narapela narapela pasin, em Moses na Kora. Pasin tupela i mekim i helpim yumi long kliagut olsem pasin bilong yumi long rispektim ol disisen Jehova i wokim na wei bilong em long mekim ol samting, dispela i bikpela samting long em. Kora em i wanpela man Livai bilong lain Kohat. Ating em i bin lukim samting Jehova i bin mekim bilong kisim bek ol Israel long solwara Retsi. Na ating Kora i insait long lain i givim strafe long ol Israel i bikhet long maunten Sainai, olsem kot bilong Jehova i makim. Na tu, ating em i bin helpim wok bilong karim Bokis Kontrak. (Kis. 32:26-29; Nam. 3:30, 31) I luk olsem em i bin stap gut long Jehova inap planti yia, na long dispela as planti Israel i rispektim em.
Mekim Wok Painimaut
Putim Ol Bikpela Samting i Go Pas Long Ol Narapela Wok!
Tasol Jehova i gat narapela tingting long dispela samting. Baibel i tok: “Bikpela i tokim Moses olsem, ‘Yupela i mas kilim dispela man i dai.’” (Namba 15:35) Bilong wanem Jehova i mekim strongpela tok olsem?
Ol man i gat sikspela de bilong kisim paiawut na mekim ol narapela wok bilong ol samting bilong kaikai, klos, na haus. Long de namba 7 ol i mas mekim wok bilong tingim ol samting bilong spirit. I no gat rong long kisim paiawut, tasol i gat rong long mekim wok long dispela hap taim lo i makim bilong lotuim Jehova. Tru, ol Kristen i no stap aninit long Lo Bilong Moses, tasol dispela samting i skulim yumi long pasin bilong putim ol bikpela samting i go pas long ol narapela wok.—Filipai 1:10.
Epril 5-11
GUTPELA SAVE I KAM LONG BAIBEL | NAMBA 17-19
“Mi . . . Samting Yupela Bai Kisim”
Yu Larim Jehova i Stap Helpim Bilong Yu?
9 Tingim ol Livai em ol i no kisim wanpela hap graun. Wok bilong ol long Israel em long go pas long mekim lotu i tru, olsem na ol i mas bilip olsem Jehova bai stap helpim bilong ol na em bai lukautim ol long sait bilong skin. (Nam. 18:20) Maski yumi no mekim wok long wanpela tempel olsem ol pris na ol Livai i bin mekim, yumi tu inap bilip strong long Jehova. Yumi wok long kamap klostu moa long pinis bilong dispela taim nogut, olsem na em i bikpela samting tru long yumi mas bilip long God long lukautim yumi.—Rev. 13:17.
Jehova Em i Helpim Bilong Mi
4 Taim Jehova i makim ol Livai long mekim wok bilong em, olsem wanem em i kamap helpim bilong ol? Jehova i no givim hap graun long ol, nogat, em i givim ol wanpela samting i dia tumas, em wanpela bikpela wok ol i mas mekim. Em wok bilong i “stap pris bilong Bikpela.” (Jos. 18:7) Buk Namba sapta 18 i helpim yumi long kliagut olsem ol bai kisim yet ol samting bilong skin ol i nidim. (Ritim Namba 18:19, 21, 24.) Ol Livai i save kisim namba 10 hap bilong olgeta samting ol Israel i givim “olsem pe bilong wok ol i mekim bilong lukautim haus sel.” Dispela i makim olsem ol i kisim namba 10 hap bilong olgeta kaikai samting na bilong ol nupela animal i kamap. Na bilong lukautim ol pris, ol Livai bai givim 1-pela hap i gutpela tru bilong ol dispela 10-pela hap ol i bin kisim. (Nam. 18:25-29) Ol pris i kisim tu “ol dispela ofa” ol Israel i kisim i kam long God long hap ol i lotu long en. So ol pris i ken bilip tru olsem Jehova bai lukautim ol long ol samting ol i nidim.
Mekim Wok Painimaut
Sol—Wanpela Gutpela Samting
Na tu sol i makim samting i stap strong na stap oltaim. Olsem na long Baibel, ol i bin kolim kontrak bilong pasim tok long wanpela samting olsem “wanpela kontrak bilong sol,” na planti taim ol man i insait long dispela kontrak i kaikai wantaim na i gat sol i stap bilong strongim dispela kontrak. (Namba 18:19, NW ) Aninit long Lo Bilong Moses, ol i mas putim sol long ol ofa ol i mekim long alta bilong makim samting i no inap bagarap o sting.
Epril 12-18
GUTPELA SAVE I KAM LONG BAIBEL | NAMBA 20-21
“Mekim Pasin Daun Taim Ol Samting i Kamap i Putim Presa Long Yu”
Daunim Yumi Yet na Jehova i Ken Belgut
19 Abrusim ol popaia. Tingim gen stori bilong Moses. Inap planti yia em i daunim em yet na Jehova i belgut long em. Tasol klostu long namba 40 yia bilong lain Israel long wokabaut long ples drai nating, Moses i lusim pasin bilong daunim em yet. Susa bilong em husat i bin seivim laip bilong em long Isip, em i dai na ol i planim em long Kades. Lain Israel i komplein gen. Ol i “kros long Moses” bikos ol i no gat wara. Maski Jehova i yusim Moses long wokim planti mirakel na Moses i daunim laik bilong em yet na stap lida bilong ol inap planti yia, ol manmeri i komplein yet. I olsem ol i laik sutim tok long Moses, olsem em asua bilong em na ol i no gat wara.—Nam. 20:1-5, 9-11.
Daunim Yumi Yet na Jehova i Ken Belgut
20 Moses i belhat nogut tru na em i mekim hatpela pasin na em i no bihainim pasin isi. Jehova i tokim Moses long toktok long ston, tasol Moses i toktok long ol manmeri na em i krosim ol. Em i tok em yet bai givim wara. Olsem na em i paitim ston 2-pela taim na bikpela wara i kamaut long ston. Pasin antap na belhat i pulim em long mekim bikpela popaia. (Sng. 106:32, 33) Moses i no daunim em yet, olsem na em i no kisim blesing bilong i go insait long Graun Bilong Promis.—Nam. 20:12.
21 Yumi kisim gutpela skul long dispela stori. Namba 1: Oltaim yumi mas wok strong long daunim yumi yet. Sapos yumi no mekim olsem, pasin antap inap pulim yumi long mekim pasin kranki. Namba 2: Taim yumi wari na tingting planti, yumi inap pilim hatwok long bihainim pasin daun. Olsem na yumi mas wok strong long daunim yumi yet, maski sampela samting i putim presa long yumi.
Wanpela Jas Husat i Strong Long Mekim Samting i Stret
Namba 1, God i no bin tokim Moses long givim tok long ol manmeri o kotim ol na tok ol i lain bilong bikhet. Namba 2, Moses na Aron i no bin givim biknem long God. God i tok: “Yutupela i no soim strong bilong mi long ol manmeri.” (Ves 12) Taim Moses i tok “mipela i mas kisim wara bilong yupela,” i olsem em i tok em wantaim Aron i wokim mirakel na kamapim dispela wara, na God i no bin mekim. Namba 3, dispela kot God i mekim long tupela i stret wantaim ol narapela kot God i bin mekim long bipo. Em i no bin larim bikhet lain tumbuna bilong pastaim i go insait long Kenan, na olsem tasol em i mekim wankain pasin long Moses na Aron. (Namba 14:22, 23) Namba 4, Moses na Aron ol i lida bilong Israel. Ol man i holim bikpela namba na wok, God bai skelim moa yet pasin ol i mekim.—Luk 12:48.
Mekim Wok Painimaut
Yu Holim Wankain Tingting Olsem Jehova Long Ol Man i No Gat Strong?
12 Taim wan wan bilong ol dispela samting i bin kamap, Jehova inap panisim Aron long dispela taim stret. Tasol Em i luksave olsem Aron i no man nogut, na i no olsem em tasol i gat asua. I luk olsem Aron i larim ol hevi na ol narapela long pulim em long lusim stretpela pasin. Tasol taim em i luksave long rong em i mekim, em i tokaut long ol dispela rong, na em i orait long kisim panismen i kam long Jehova. (Kis. 32:26; Nam. 12:11; 20:23-27) Jehova i tingim bilip bilong Aron na pasin bilong em long tanim bel. Inap planti yia bihain, ol manmeri i tingim Aron na ol tumbuna pikinini bilong em olsem ol man bilong pret long Jehova.—Sng. 115:10-12; 135:19, 20.
Epril 19-25
GUTPELA SAVE I KAM LONG BAIBEL | NAMBA 22-24
“Jehova i Senisim Tok Bilong Bagarapim Israel i Kamap Tok Bilong Blesim Ol”
Autim Tok “Long Gutnius Bilong Jisas”
5 Long nau, olsem long taim bilong ol aposel, pasin birua i no stopim lain bilong God long autim tok. Taim ol i rausim ol Kristen long wanpela hap i go long narapela hap—olsem long narapela kalabus o long narapela kantri—planti taim dispela i bin helpim wok bilong autim gutnius bilong Kingdom i go long ol hap we ol i no bin autim tok bipo. Olsem: Long taim bilong Wol Woa 2, ol Witnes Bilong Jehova i bin autim gut tok long ol man taim ol i stap long ol kalabus nogut bilong ol Natsi. Wanpela man Juda husat i bin bungim ol Witnes long hap, i tok: “Ol Witnes Bilong Jehova husat i stap long kalabus, tingting bilong ol i stap strong, na taim mi lukim dispela mi save olsem Baibel i as bilong bilip bilong ol—na bihain mi yet i kamap wanpela Witnes.”
it-2 291
Longlong
Em Longlong Pasin Long Birua Long Jehova. Profet Balam i bihainim longlong pasin taim em i tingting long mekim tok bilong bagarapim lain Israel na bai em i ken kisim mani long King Balak bilong Moap, tasol Jehova i pasim rot bilong em. Aposel Pita i stori long Balam olsem “wanpela donki i toktok olsem man, na em i pasim dispela profet long bihainim longlong pasin.” Aposel Pita i yusim tok Grik pa·ra·phro·niʹa long dispela ves bilong makim longlong pasin bilong Balam, na mining bilong dispela tok i olsem, “belhat nogut tru.”—2Pi 2:15, 16; Nam 22:26-31.
Mekim Wok Painimaut
Sampela Bikpela Tok Bilong Buk Namba
22:20-22—Bilong wanem Jehova i kros long Balam? Jehova i bin tokim profet Balam long em i no ken mekim tok bilong bagarapim ol Israel. (Namba 22:12) Tasol dispela profet i go wantaim ol man bilong Balak na em i tingting long mekim tok bilong bagarapim ol Israel. Balam i laik amamasim king bilong Moap na kisim pe long em. (2 Pita 2:15, 16; Jut 11) Maski God i subim Balam long mekim tok bilong blesim lain Israel na i no bagarapim ol, Balam i laik bai king i orait long em olsem na em i tokim king long mekim wok long ol meri i save lotuim Bal long grisim ol man Israel. (Namba 31:15, 16) Olsem na God i kros long Balam long pasin nogut bilong em long mangal.
Epril 26–ME 2
GUTPELA SAVE I KAM LONG BAIBEL | NAMBA 25-26
“Pasin Bilong Wanpela Man Inap Helpim Planti Manmeri”
“Ranawe Long Pasin Pamuk!”
WANPELA man bilong painim pis i go long hap we em i ken hukim wanpela kain pis em i laikim. Em i makim beit na tromoi string i go insait long wara. Em i wet i stap, na taim pis i kaikaim beit, em i pulim string na huk i pas long maus bilong pis na em i pulim pis i kam antap.
2 Long wankain pasin, ol manmeri inap pas long huk. Olsem, klostu long taim ol Israel i kamap long Graun Bilong Promis, ol i wokim kem long Ples Nating Bilong Moap. King bilong Moap i tok promis long givim planti mani long wanpela man, nem bilong em, Balam, bambai em i ken mekim tok bilong bagarap i ken painim ol Israel. Bihain Balam i painim rot long mekim ol Israel i bringim bagarap long ol yet. Em i makim gut beit. Em i salim ol yangpela meri Moap i go insait long kem bilong Israel bilong grisim ol man.—Namba 22:1-7; 31:15, 16; Revelesen 2:14.
“Ranawe Long Pasin Pamuk!”
4 Wai na planti Israel i pundaun long plen bilong Balam? Ol i tingting tasol long inapim laik bilong ol yet long kisim amamas, na ol i lusim tingting long olgeta samting Jehova i bin mekim bilong helpim ol. Ol Israel i gat planti risen long stap gut long God. Em i bin kisim bek ol long Isip taim ol i stap sleiv, em i givim kaikai long ol long ples nating, na bringim ol i go gut long boda bilong Graun Bilong Promis. (Hibru 3:12) Maski i olsem, ol meri Moap i grisim ol na ol i mekim pasin pamuk. Aposel Pol i tok: “Yumi no ken mekim pasin pamuk olsem sampela bilong ol i bin mekim pasin pamuk, na . . . ol i bin i dai.”—1 Korin 10:8.
Mekim Wok Painimaut
it-1 359 par. 1-2
Boda Bilong Graun
I luk olsem ol i bihainim tupela rot bilong tilim graun bilong lain Israel: Ol i pilai satu, na namba bilong hamas manmeri insait long ol wan wan traib. Ating ol i pilai satu bilong save graun i stap long wanem hap i bilong wan wan traib, long dispela rot ol i brukim graun i go long wan wan hap, kain olsem long hap Not o Saut, Is o Wes, hap arere long solwara, o long maunten. Ol disisen ol i wokim long rot bilong pilai satu i kam long Jehova na dispela i mekim na pasin jeles i no inap kamap o ol traib i no ken kros long narapela narapela. (Pr 16:33) Na tu, long dispela rot God bai stiaim ol samting na bai olgeta wan wan traib i kisim graun olsem Jekop i bin tok profet long en long Stat 49:1-33.
Taim ol i pilai satu na makim pinis graun i stap long wanem hap i bilong wan wan traib, orait nau ol i mas skelim sais bilong graun em wan wan traib bai kisim. Dispela em namba 2 samting: namba bilong hamas manmeri insait long ol wan wan traib. “Yupela i mas pilai satu bilong tilim graun bilong olgeta wan wan klen. Yupela i mas givim bikpela hap graun long lain i gat planti manmeri na givim liklik hap graun long lain i no gat planti manmeri. Wanem hap graun satu i makim bilong olgeta wan wan lain, orait em bai kamap graun bilong ol.” (Nam 33:54) Graun i stap long wanem hap em satu i makim bilong wan wan traib dispela bai i no inap senis, tasol sais bilong graun em wan wan traib bai kisim dispela i ken senis. Olsem na taim ol i lukim olsem graun ol i makim bilong lain Juda i bikpela tumas, lain bilong Simeon i kisim hap graun namel long graun bilong ol Juda.—Jos 19:9.