Ol Referens Bilong Laip na Wok Autim Tok Miting Wok Buk
Me 3-9
GUTPELA SAVE I KAM LONG BAIBEL | NAMBA 27-29
“Bihainim Pasin Bilong Jehova Long Mekim Wankain Pasin Long Olgeta Manmeri”
Pilim Tru Ol Gutpela Pasin Bilong Jehova
14 Ol i go long Moses na askim em long helpim ol, na ol i tok: “I tru, [papa bilong mipela] i no gat pikinini man bilong kisim nem bilong en, tasol bilong wanem nem bilong papa i mas lus long yumi Israel?” Yu ting Moses i tok, ‘Dispela tok i stap long lo, na i no gat wanpela samting mi inap mekim bilong helpim yupela’? Nogat, Moses i askim Jehova long helpim em long stretim dispela hevi. (Nam. 27:2-5) Orait Jehova i tok wanem? Em i tokim Moses olsem: “Dispela tok bilong ol pikinini meri bilong Selofehat em i stret. Olsem na yu mas givim ol dispela meri sampela graun bilong lain bilong papa bilong ol. Larim ol i kisim graun bilong en.” Na Jehova i mekim sampela samting moa. Em i tokim Moses long raitim dispela tok long Lo, olsem: “Sapos man i no gat pikinini man, na em i gat pikinini meri tasol, na bihain em i dai, orait ol pikinini meri bilong en i ken kisim ol samting bilong en.” (Nam. 27:6-8; Jos. 17:1-6) Kirap long dispela taim, olgeta meri long lain Israel husat i gat wankain hevi, ol inap kisim hap graun bilong papa.
Pilim Tru Ol Gutpela Pasin Bilong Jehova
15 Dispela disisen i soim klia olsem Jehova i save mekim wankain pasin long ol man na meri wantaim! Ol dispela 5-pela susa i no gat wanpela i stap bilong helpim ol, na Jehova i rispektim ol na mekim stretpela pasin long ol wankain olsem em i mekim long olgeta arapela manmeri bilong lain Israel. (Sng. 68:5) Dispela stori i wankain olsem planti stori bilong Baibel we i soim olsem Jehova i save mekim wankain pasin long ol manmeri bilong em.—1 Sml. 16:1-13; Apo. 10:30-35, 44-48.
Pilim Tru Ol Gutpela Pasin Bilong Jehova
16 Olsem wanem yumi inap bihainim pasin bilong Jehova na mekim wankain pasin long olgeta man? Tingim, yumi bai mekim wankain pasin long olgeta man sapos yumi holim tingting olsem i stret long mekim dispela pasin. Ating yu pilim olsem yu save bihainim dispela pasin. Tasol sampela taim i hatwok long save sapos yumi bihainim tru dispela pasin o nogat. Olsem na yu ken mekim wanem bilong save olsem tru tru yu save mekim wankain pasin long olgeta man o nogat? Jisas i stap gutpela piksa long yumi. Taim em i laik save long tok ol narapela i mekim long em, em i askim ol pren bilong em olsem: “Ol manmeri i wok long tok Pikinini bilong man i husat tru?” (Mat. 16:13, 14) Ating yu ken singautim wanpela pren husat bai tok tru long yu na askim olsem, ‘Yu ting mi save mekim wankain pasin long olgeta man? Ol narapela i ting mi save bihainim dispela pasin o nogat?’ Ating em bai tokim yu olsem, sampela taim yu save mekim gutpela pasin moa long ol manmeri bilong wanpela lain, o ol i gat planti mani, o bikpela save. Sapos em i mekim kain tok olsem long yu, orait yu mas mekim wanem? Beten long Jehova, na askim em long helpim yu long senisim tingting yu holim long ol narapela bambai yu inap bihainim gut pasin bilong Jehova na mekim wankain pasin long olgeta man.—Mat. 7:7; Kol. 3:10, 11.
it-2 528 par. 5
Ol Ofa
Kapsaitim wain olsem ofa. Taim lain Israel i mekim ol narapela ofa, ol i save kapsaitim tu wain olsem ofa, ol i mekim olsem taim ol i go sindaun long Graun Bilong Promis. (Nam 15:2, 5, 8-10) Ol save kapsaitim dispela wain long alta. (Nam 28:7, 14; skelim Ki 30:9; Nam 15:10.) Aposel Pol i raitim pas long ol Kristen long Filipai na i tok: “Sapos mi givim mi yet olsem ofa bilong wain em ol i kapsaitim antap long dispela sakrifais i makim wok holi, em bilip bilong yupela i kirapim yupela tu long mekim olsem, mi belgut.” Pol i kolim dispela tok ofa bilong wain bilong soim klia olsem em i redi long mekim sampela wok moa bilong helpim ol wanbilip Kristen. (Fi 2:17) Paslain liklik long em i dai, em i raitim pas long Timoti na tok: “Mi stap olsem ofa bilong wain ol i kapsaitim, na taim bilong mi long dai i klostu tru.”—2Ti 4:6.
Me 10-16
GUTPELA SAVE I KAM LONG BAIBEL | NAMBA 30-31
“Inapim Ol Tok Promis Bilong Yu”
it-2 1162
Tok Promis
Man Yet i Mekim, Tasol Em Mas Inapim. Ol tok promis em samting bel bilong man yet i kirapim em long mekim. Tasol taim man i mekim wanpela tok promis, orait lo bilong God i tok em i mas inapim. Olsem na tok promis man i mekim ‘bai tambuim em long mekim wanpela samting,’ dispela i makim olsem ol samting em i mekim i mas soim olsem em inapim tok promis bilong em. (Nam 30:2; lukim tu Ro 1:31, 32.) Tok promis bai stiaim ol samting man bai mekim long laip, olsem na Baibel i tok man i mas tingting gut paslain long em i mekim tok promis, em i mas save gut long ol samting em i gat wok long mekim. Lo i tok: “Sapos yupela i mekim wanpela tok promis long Jehova, . . . God bilong yupela, i laik bai yupela inapim dispela promis, nogut yupela i no inapim na yupela i mekim sin. Tasol sapos yupela i no mekim wanpela tok promis, orait yupela i no gat asua long sin.”—Lo 23:21, 22.
it-2 1162
Tok Promis
Em strongpela tok promis man i mekim long God bilong mekim sampela samting, o bilong mekim ofa o bilong givim presen, o bilong insait long sampela wok, o abrusim sampela samting we i olsem i brukim lo. Tok promis em samting man i mekim long laik bilong em yet. Strongpela tok promis i gat wankain strong olsem tok tru antap, olsem na sampela taim Baibel i save kolim tupela tok wantaim. (Nam 30:2; Mt 5:33) “Tok promis” i makim tokaut man i mekim long wanpela samting, na “tok tru antap” i makim tok promis man i mekim long nem bilong wanpela man i gat bikpela namba olsem em bai truim promis bilong em. Planti taim man i mekim tok tru antap bilong mekim wanpela kontrak.—Ge 26:28; 31:44, 53.
Sampela Bikpela Tok Bilong Buk Namba
30:6-8—Olsem wanem? Wanpela man Kristen inap rausim tok promis meri bilong em i bin mekim? Long ol tok promis ol man i lotuim Jehova i mekim long nau, God i save tingim dispela i olsem samting bilong wan wan yet. Olsem, dediket em samting olgeta wan wan yet i mekim long Jehova. (Galesia 6:5) Man marit i no gat namba bilong rausim dispela kain tok promis. Tasol meri marit i no ken mekim wanpela tok promis i pait wantaim tok bilong God o long ol samting em i mas mekim long man bilong em.
Mekim Wok Painimaut
it-2 28 par. 1
Jepta
Man inap long go mekim wok bilong Jehova long haus bilong em long laip olgeta bilong em. Dispela em disisen ol papamama i gat rait long mekim. Kain samting olsem i bin painim Samuel, paslain long em i bon, mama bilong em Hana i bin tok promis long em bai mekim wok long haus lotu sel. Man bilong Hana, Elkanah, i tok orait long dispela tok promis. Taim Samuel i kamap bikpela na lusim susu, Hana i bringim em i go long haus lotu sel. Na tu, Hana i kisim wanpela animal bilong givim olsem ofa. (1Sm 1:11, 22-28; 2:11) Samson em narapela pikinini husat i mekim wok bilong God long laip olgeta bilong em olsem wanpela Nasarait.—He 13:2-5, 11-14; skelim tu hau papa i gat rait long mekim disisen bilong pikinini meri olsem tok i stap long Nam 30:3-5, 16.
Me 17-23
GUTPELA SAVE I KAM LONG BAIBEL | NAMBA 32-33
“Rausim Olgeta Manmeri Bilong Dispela Ples”
Yu Save Long Dispela?
Ol “ples lotu” bilong ol Kenan em Ol Skripsa Hibru i stori planti taim long en, ol i wanem kain ples?
Taim ol Israel i laik i go insait long Graun Bilong Promis, Jehova i tokim ol long ol i mas bagarapim olgeta ples lotu bilong ol Kenan em ol i bin sindaun long dispela hap. God i tokim ol: “Yupela i mas . . . bagarapim olgeta giaman god ol i bin wokim long ston na ain, na bagarapim olgeta ples lotu bilong ol.” (Namba 33:52) Ol dispela ples lotu bilong ol god giaman ol i stap antap long ol maunten o long ol narapela hap, olsem aninit long ol bikpela diwai o long ol taun. (1 King 14:23; 2 King 17:29; Esekiel 6:3) Ol dispela ples lotu i gat ol alta, ol pos ston, ol piksa, ples bilong kamapim smok i gat gutpela smel, na ol narapela kain samting olsem bilong lotu.
Ol Popaia Bilong Ol Israel i Mas Skulim Yumi
Long nau i gat planti traim inap painim yumi, em ol i wankain olsem ol traim i bin painim ol Israel. Ol lain bilong nau tu ol i gat planti god giaman bilong ol. Olsem: Mani, ol lain i gat nem long singsing samting, o ol i gat nem long pilai spot, ol samting bilong politik, sampela bikman bilong lotu, na sampela insait long famili yet. Ol dispela samting inap kamap nambawan bikpela samting long laip bilong yumi. Sapos yumi kamap pren bilong ol lain i no save laikim Jehova, dispela inap bagarapim pasin bilong yumi long pas gut wantaim God.
Pasin pamuk i insait long lotu bilong Bal na dispela i bin pulim planti Israel. Na long nau tu, ol wankain traim olsem i save pulim sampela namel long lain bilong God. Olsem: Long haus bilong em yet wanpela Kristen inap lukim ol piksa nogut bilong pasin pamuk long Intenet na nau bel bilong em bai i gat tok. Sori tumas sapos wanpela Kristen i larim ol piksa nogut bilong Intenet i pulim em!
it-1 404 par. 2
Kenan
Josua i bihainim savetingting taim em i “mekim olgeta samting em Jehova i bin tokim Moses long en” bilong bagarapim lain Kenan. (Jos 11:15) Tasol lain Israel i no bihainim tok bilong Josua long bagarapim olgeta samting we i mekim dispela graun i stap doti. Ol i larim lain Kenan i stap yet namel long ol na sampela tingting na pasin bilong ol i kalap long lain Israel, olsem na long sampela haptaim, ating planti man moa i dai (em i kamapim tu pasin bilong pait na bagarapim narapela, pasin pamuk, na pasin bilong lotuim ol imis) winim namba bilong ol man i dai taim ol Israel i daunim lain Kenan. (Nam 33:55, 56; He 2:1-3, 11-23; Sg 106:34-43) Jehova i tok lukaut long lain Israel olsem em bai bihainim stretpela pasin na wok jas bilong em na i no inap mekim wankain pasin long lain Israel sapos ol i stap pren wantaim ol Kenan, marit i go i kam wantaim ol, bihainim bilip bilong ol, na bihainim pasin bilong ol long lotu na mekim ol pasin nogut, sapos ol i mekim olsem ol tu bai kisim wankain bagarap, graun bai ‘trautim ol.’—Ki 23:32, 33; 34:12-17; Wk 18:26-30; Lo 7:2-5, 25, 26.
Mekim Wok Painimaut
it-1 359 par. 2
Boda Bilong Graun
Taim ol i pilai satu na makim pinis graun i stap long wanem hap i bilong wan wan traib, orait nau ol i mas skelim sais bilong graun em wan wan traib bai kisim. Dispela em namba 2 samting: namba bilong hamas manmeri insait long ol wan wan traib. “Yupela i mas pilai satu bilong tilim graun bilong olgeta wan wan klen. Yupela i mas givim bikpela hap graun long lain i gat planti manmeri na givim liklik hap graun long lain i no gat planti manmeri. Wanem hap graun satu i makim bilong olgeta wan wan lain, orait em bai kamap graun bilong ol.” (Nam 33:54) Graun i stap long wanem hap em satu i makim bilong wan wan traib dispela bai i no inap senis, tasol sais bilong graun em wan wan traib bai kisim dispela i ken senis. Olsem na taim ol i lukim olsem graun ol i makim bilong lain Juda i bikpela tumas, lain bilong Simeon i kisim hap graun namel long graun bilong ol Juda.—Jos 19:9.
Me 24-30
GUTPELA SAVE I KAM LONG BAIBEL | NAMBA 34-36
“Go Stap Long Ples Hait Bilong Jehova”
Yu Larim Jehova i Stap Olsem Ples Hait Bilong Yu?
4 Lain Israel i save mekim wanem taim wanpela man i popaia na kilim narapela man? Maski dispela man i popaia na i kilim narapela husat i no bin mekim rong, em bai gat asua long samting em i mekim. (Stt. 9:5) Tasol dispela man inap ranawe i go long wanpela bilong ol 6-pela taun bilong hait na stap long hap. Em bai stap gut long dispela taun i go inap long taim hetpris i dai.—Nam. 35:15, 28.
Yu Larim Jehova i Stap Olsem Ples Hait Bilong Yu?
6 Taim man i popaia na kilim wanpela i dai, em i mas “i go long ples bilong kot long bikpela dua bilong taun, na tokaut long ol hetman long ol samting em i bin mekim.” Ol hetman i mas mekim gut long em. (Jos. 20:4) Sampela taim bihain, ol i mas salim em i go long taun we em i bin kilim man long en bambai ol hetman i ken skelim rong bilong em. (Ritim Namba 35:24, 25.) Sapos ol hetman i tokaut olsem em i popaia na kilim man i dai, orait em bai go bek long taun em i bin hait long en.
Yu Larim Jehova i Stap Olsem Ples Hait Bilong Yu?
13 Taim man i ranawe i go hait long taun, ol birua i no inap bagarapim em. Jehova i tok, sapos wanpela man i popaia na kilim narapela, orait “em i ken ranawe i go long wanpela bilong ol dispela taun na hait.” (Jos. 20:2, 3) Jehova i tokaut olsem ol hetman i no ken kotim dispela man long wankain rong em i bin mekim. Na tu, wanblut bilong man i dai i no ken kam insait long taun na kilim i dai dispela man. Olsem na man i hait long taun i no gat wok long pret olsem ol birua bai kilim em. Taim em i stap long dispela taun, Jehova i lukautim em na em i stap gut. Dispela taun i no olsem wanpela haus kalabus. Dispela man inap mekim ol wok, helpim ol narapela, na mekim wok bilong Jehova. Tru tumas, em bai stap amamas na laip bilong em bai gutpela!
Mekim Wok Painimaut
Pe i Stret Bilong Baim Bek Olgeta Man
13 Pe bilong baim bek man i no inap helpim Adam na Iv. Lo Bilong Moses i kamapim dispela stiatok: “Yupela i no ken kisim pe bilong baim bek man long laip bilong wanpela kilman, long wanem, i stret em i mas i dai.” (Namba 35:31) Adam i no bilipim tok giaman, long laik bilong em yet em i mekim sin. (1 Timoti 2: 14) Samting em i mekim i kilim i dai ol pikinini bilong em, ol i kisim sin long em, na long dispela rot ol i save dai. I klia tru olsem, Adam i mas dai, bikos em i gutpela olgeta, tasol long laik bilong em yet em i sakim lo bilong God. Sapos Jehova i larim Adam i kisim helpim long pe bilong baim bek man, dispela bai i no stret wantaim ol stretpela stiatok bilong em. So Adam i kisim pe bilong sin bilong em, tasol i no stret ol pikinini i karim hevi long samting em i mekim! (Rom 5:16) Long ai bilong kot, samting nogut sin i kamapim i mas painim tasol man i mekim rong. Man i givim pe bilong baim bek man i “kisim ples bilong olgeta manmeri na i dai,” em i tekewe pe bilong sin bilong Adam long olgeta pikinini bilong em.—Hibru 2:9; 2 Korin 5:21; 1 Pita 2:24.
Me 31–Jun 6
GUTPELA SAVE I KAM LONG BAIBEL | LO 1-2
“Wok Jas Bilong God”
Jehova—Man Bilong Laikim Stretpela Pasin
Ol elda bilong kongrigesen ol i gat wok long harim kot taim wanpela man i mekim bikpela rong. (1 Korin 5:12, 13) Taim ol i mekim dispela wok ol i no lusim tingting olsem, taim God i skelim man long kot em i painim rot bilong mekim pasin marimari long man sapos em inap. Sapos i no gat as na ol elda i ken mekim pasin marimari—olsem long taim man i mekim rong na i no laik tanim bel—orait ol i no inap marimari long em. Tasol man bilong mekim rong, ol elda i no save rausim em long kongrigesen bilong bekim nogut long em. Taim ol i rausim em, ol i laik bai em i pilim rong bilong em na em i tanim bel. (Skelim wantaim Esekiel 18:23.) Ol elda i save stap aninit long Krais na ol i mekim wok bilong ol long stretpela pasin, na ol i stap olsem “ol ples hait ol manmeri i ken i go na hait long en long taim bilong bikpela win.” (Aisaia 32:1, 2) Olsem na ol i mas mekim wankain pasin long olgeta man na ol i mas isi long ol.—Lo 1:16, 17.
Stap Gut Aninit Long Wok Bos Bilong God
4 Man i mekim wok jas i mas save gut long Lo, tasol i gat sampela samting moa em i mas mekim. Ol dispela hetman i no gutpela olgeta, olsem na oltaim ol i mas bosim gut pasin kranki i stap long skin bilong ol yet—olsem pasin bilong tingim ol yet, na wantok pasin, na pasin bilong mangal—ol dispela samting inap paulim wok jas bilong ol. Moses i tokim ol: “Yupela i mas skelim olgeta man long wankain pasin tasol. Maski em i bikman o man nating. Na yupela i no ken pret long wanpela man, long wanem, God yet i stiaim tingting bilong yupela long taim bilong kot.” Yes, ol jas bilong Israel ol i mekim wok jas bilong God yet. Em i wanpela gutpela wok tru ol i holim!—Lo 1:16, 17.
Mekim Wok Painimaut
Trastim Ol Tok Jehova i Givim Bilong Kirapim Yumi Long Tingim Gen Ol Samting
9 Taim lain Israel i kirapim wokabaut bilong 40 yia long ples drai nating, Jehova i no tokim ol long olgeta liklik samting em bai mekim bilong sambai long ol, stiaim, na lukautim ol. Tasol em i mekim planti samting long soim olsem ol inap stap gut sapos ol i trastim em na bihainim ol tok bilong em. Long san Jehova i yusim klaut na long nait em i yusim paia long soim rot long ol. Jehova i laik kirapim lain Israel long tingim gen olsem em i sambai long ol taim ol i mekim dispela wokabaut we i gat planti hatwok long en. (Kis. 40:36-38; Lo 1:19) Na tu, em i givim olgeta samting ol i nidim, na ol i no sot long wanpela samting. “Klos samting bilong ol i no bin bruk na lek bilong ol i no bin pen o solap.”—Neh. 9:19-21.
Jun 7-13
GUTPELA SAVE I KAM LONG BAIBEL | LO 3-4
“Ol Lo Bilong Jehova i Kamapim Savetingting na i Stret”
it-2 1140 par. 5
Kliagut
Pasin bilong stadi gut na bihainim Tok Bilong God na ol lo bilong en bai helpim man long skelim gut ol samting winim ol tisa bilong em na em bai kliagut moa long ol samting winim ol man i gat bikpela krismas. (Sg 119:99, 100, 130; skelim Lu 2:46, 47.) Ol stretpela lo na tok bilong God i kamapim savetingting na pasin bilong kliagut long ol samting; olsem na sapos ol Israel i bihainim gut ol dispela lo ol manmeri bilong ol kantri i stap klostu long ol bai tingim ol olsem lain “i gat savetingting na gutpela save.” (Lo 4:5-8; Sg 111:7, 8, 10; 1Ki 2:3.) Man bilong kliagut long ol samting bai luksave olsem em i no ken sakim Tok Bilong God, em bai laik olsem pasin bilong em i mas stret, na em bai askim God long helpim em long mekim olsem. (Sg 119:169) Em bai putim tok bilong God i go daun long bel bilong em (Mt 13:19-23), raitim long bel bilong em (Pr 3:3-6; 7:1-4), na kisim pasin bilong heitim olgeta “rot nogut” (Sg 119:104). Taim Pikinini bilong God i stap long graun, em i kamapim olsem em i bihainim pasin bilong kliagut, maski em inap long ranawe na stap laip, em i tingim olsem em i mas dai long pos bilong inapim ol tok bilong ol Skripsa i stori long hau ol man bai kilim em i dai.—Mt 26:51-54.
Taim Man i Givim Planti Samting
Kwin i amamas tru long harim ol dispela tok na lukim ol samting, na long pasin daun em i bekim tok olsem: “Ol dispela ofisa bilong yu i save stap wantaim yu, ating ol tu i save amamas, long wanem, oltaim ol i save harim gutpela tingting bilong yu.” (1 King 10:4-8) Maski ol ofisa bilong Solomon i stap long wanpela hap i gat planti mani kago samting, olsem na ol i amamas, kwin i no tok long dispela as ol ofisa bilong Solomon i amamas, nogat. Ol ofisa bilong Solomon i bin stap gut tru, long wanem, oltaim ol inap harim ol gutpela tingting bilong Solomon, em God i as bilong en. Kwin bilong kantri Seba i stap olsem gutpela piksa ol manmeri bilong Jehova long nau inap bihainim, ol inap amamas long ol gutpela tingting na save bilong Man bilong wokim olgeta samting na Pikinini bilong em, Krais Jisas!
Na tu, narapela tok kwin i mekim long Solomon i olsem: “Mi litimapim nem bilong God, Bikpela bilong yu.” (1 King 10:9) Em nau, em i bin luksave olsem Jehova i bin givim gutpela tingting na save na mani kago long Solomon. Dispela i stret wantaim ol samting Jehova i bin tok promis long ol Israel long pastaim. Em i tok: “Yupela i mas bihainim tru ol dispela lo. . . . Yupela i gat gutpela tingting na planti save. Taim ol i harim tok bilong ol dispela lo bilong yupela, bai ol i tok, ‘Man, ol dispela lain manmeri i gat gutpela tingting na bikpela save. Ol i winim yumi tru.’”—Lo 4:5-7.
Yu Stap Gut Long Ai Bilong God?
13 Taim Jehova i givim ol gutpela samting long ol manmeri bilong em, em i save givim ol samting i nambawan tru. (Jems 1:17) Olsem: Taim Jehova i givim ol Israel wanpela hap graun bilong sindaun long en, dispela hap em i “gutpela graun i gat planti gris.” Baibel i tok kantri Isip tu i kain olsem, tasol dispela hap graun Jehova i givim long ol Israel em i narapela kain long wanpela bikpela samting. Olsem Moses i tokim ol Israel, Jehova “i save was gut long dispela graun.” Dispela i makim olsem ol Israel bai stap gut, long wanem, Jehova bai lukautim ol. Taim ol Israel i stap gut long Jehova, em i mekim gut tru long ol na ol i kisim gutpela sindaun, winim sindaun bilong ol arapela lain i stap klostu. Tru tumas, Jehova i bin givim “planti gutpela samting” long ol!—Lo 4:5-8; 11:8-15; Namba 16:13.
Mekim Wok Painimaut
Sampela Bikpela Tok Bilong Buk Lo
4:15-20, 23, 24—Lo i tambuim pasin bilong wokim piksa bilong ol samting olsem na yu ting dispela i makim olsem i gat rong long wokim piksa nating bilong bilas tasol? Nogat. Dispela tambu i bilong tambuim pasin bilong wokim piksa bilong “lotuim.” Baibel i no tambuim pasin bilong wokim o droim ol piksa bilong i stap olsem bilas tasol.—1 King 7:18, 25.
Jun 14-20
GUTPELA SAVE I KAM LONG BAIBEL | LO 5-6
“Skulim Pikinini Long Laikim Jehova”
Ol Papamama, Lukautim Gut Famili Bilong Yupela
11 Taim yumi stori long dispela samting, ol i save kamapim planti taim tok bilong Lo 6:5-7. Plis opim Baibel bilong yu na ritim ol dispela ves. Pastaim skripsa i tokim papamama long wok long kamap strong long ol samting bilong spirit, wok long laikim Jehova na putim tok bilong em long bel bilong ol. Tru tumas, yu mas stadi gut long Baibel, ritim Baibel long olgeta taim na wok long tingim tingim long bel tok bilong en na bai yu ken kliagut na laikim tru ol pasin, ol stiatok, na ol lo bilong Jehova. Dispela bai mekim na bel bilong yu bai pulap long ol gutpela tok bilong Baibel na ol dispela tok bai kirapim yu long amamas, rispektim, na laikim tru Jehova. Bai yu gat planti gutpela samting bilong givim long ol pikinini bilong yu.—Luk 6:45.
Olsem Wanem Mi Ken Helpim Pikinini Long Kisim Nambawan Gutpela Skul?
Ol mak yu laik winim na ol samting yu ting i bikpela samting ol i save kamap ples klia long ol samting yu mekim, na i no long ol tok tasol bilong yu. (Rom 2:21, 22) Taim ol i yangpela yet, ol pikinini i save lain na kisim save long ol samting ol i lukim long pasin bilong papamama. Ol pikinini i luksave long wanem samting i bikpela samting long papamama bilong ol, na ol dispela samting i save kamap bikpela samting long ol yet. Sapos yu laikim tru Jehova, ol pikinini bilong yu bai luksave long dispela samting. Olsem: Ol bai lukim olsem pasin bilong ritim na stadi long Baibel i bikpela samting long yu. Ol bai luksave olsem yu putim ol samting bilong Kingdom i go pas long ol narapela samting long i stap bilong yu. (Matyu 6:33) Pasin bilong yu long go long olgeta miting Kristen na autim tok bilong Kingdom bai soim ol olsem pasin bilong mekim wok bilong Jehova em i bikpela samting tru long yu.—Matyu 28:19, 20; Hibru 10:24, 25.
Ol Papamama, Lukautim Gut Famili Bilong Yupela
14 Olsem Lo 6:7 i kamapim, i gat kain kain taim na ples we yupela papamama i ken toktok wantaim ol pikinini long ol samting bilong spirit. Taim yupela i raun wantaim, mekim wok long haus wantaim, o yupela i malolo wantaim, yupela inap painim rot bilong givim pikinini bilong yupela ol samting bilong spirit ol i mas kisim. I no olsem oltaim yupela i mas “tokim” ol long tok tru bilong Baibel. Nogat. Taim yupela i toktok, stori long ol samting bilong spirit i save strongim narapela. Olsem: Magasin Kirap! i save stori long kain kain samting. Sampela stori inap opim rot long yupela long toktok long ol animal samting Jehova i wokim, ol naispela ples long ol narapela hap, na ol manmeri bilong ol narapela narapela hap ol i gat ol narapela narapela pasin na sindaun. Taim yupela i stori olsem, ating dispela bai kirapim ol yangpela long ritim moa yet ol buk na nius em wokboi i gat gutpela tingting i save redim.—Matyu 24:45-47.
Mekim Wok Painimaut
Pasin Laikim na Jastis Long Israel Bilong Bipo
11 Skul: Jehova i lukim pasin bilong yumi, na em i lukim tu ol tingting na laik i stap insait long bel. (1 Sml. 16:7) I no gat wanpela tingting, filings, na pasin i stap hait long ai bilong em. Em i laik bai yumi bihainim stretpela pasin. Tasol em i laik bai yumi luksave na kontrolim ol tingting nogut na bai yumi no ken mekim rong.—2 Sto. 16:9; Mat. 5:27-30.
Jun 21-27
GUTPELA SAVE I KAM LONG BAIBEL | LO 7-8
“Yupela i No Ken Marit i Go i Kam Wantaim Ol”
Bilong Wanem God i Laik Ol Man i Lotuim Em Ol i Mas Maritim Wanbilip Tasol?
Namba 1 as em olsem, Jehova i save olsem Satan i laik bagarapim lain bilong Em na pulim ol i go lotuim ol giaman god. God i tokim lain bilong Em olsem, ol haiden bai “pulim ol pikinini bilong yupela i go longwe long [mi] Bikpela na bai ol i lotu long ol giaman god.” Lain Israel inap lus long kisim planti samting. Sapos ol i lotuim ol narapela god, Jehova bai i no orait moa long ol, na em bai i no inap lukautim ol, olsem na em bai isi tru long ol birua i daunim ol. Sapos olsem, lain Israel bai i no gat rot bilong kamapim Mesaia em God i bin tok promis long en. Em long dispela as tasol na Satan i laik pulim lain Israel i go maritim ol man na meri i no bilip long Jehova.
Maritim “Man i Bihainim Bikpela”—I Stret Yet Long Bihainim?
Jehova i putim lo long Baibel long ol wokman bilong em i mas maritim man o meri i bihainim Bikpela. Em i save long ol samting i gutpela long helpim lain bilong em. Em i laik lukautim ol wokman bilong em na bai ol i ken abrusim ol hevi i save kamap taim man i bihainim rot nogut, na tu, em i laik bai ol i stap amamas. Long taim bilong Nehemia, planti Juda i maritim ol meri bilong ol narapela lain husat i no lotuim Jehova, na Nehemia i kamapim stori bilong Solomon, em man husat i no stap olsem gutpela eksampel. Nehemia i tok, “God i bin laikim King Solomon . . . Tasol em i bin maritim sampela haiden meri na ol i bin paulim tingting bilong en na em i mekim sin.” (Neh. 13:23-26) God i laik helpim ol wokman bilong em long i stap gut, olsem na em i tokim yumi long yumi mas maritim man o meri i lotuim em. (Sng. 19:7-10; Ais. 48:17, 18) Ol Kristen i pilim tru pasin bilong God long laikim na tingim ol, na ol i larim em i stiaim ol. Taim ol i stap aninit long em olsem King bilong ol, dispela i soim olsem ol i daun long em olsem King Bilong Heven na Graun.—Snd. 1:5.
Abrusim Ol Poroman Nogut Long Haptaim Bilong Las De
12 Sapos singel Kristen i laik marit, orait em i mas abrusim ol poroman nogut. Baibel i tokaut klia olsem: “Yupela i no ken pas wantaim ol man i no bilip. Olsem wanem? Stretpela pasin na pasin bilong sakim lo, tupela i ken poroman wantaim? O olsem wanem, lait i ken bung wantaim tudak?” (2 Kor. 6:14) Baibel i kamapim tok bilong helpim ol Kristen husat i laik marit. Baibel i tok, ol “i mas maritim man i bihainim Bikpela,” na dispela i makim olsem ol i mas maritim man o meri husat i dediket long Jehova na kisim baptais, na em i save bihainim ol stretpela lo bilong Baibel. (1 Kor. 7:39) Sapos ol Kristen i maritim wanbilip, i olsem ol i kisim wanpela pren husat i dediket pinis long Jehova, na dispela pren bai helpim ol long i stap gut long God.
Mekim Wok Painimaut
Jehova i Save Givim Yumi Ol Samting Yumi Mas Kisim
4 Taim yumi beten long kisim kaikai bilong ol wan wan de, dispela i mas kirapim tingting bilong yumi olsem yumi mas kisim kaikai bilong spirit tu long ol wan wan de. Taim Jisas i no bin kaikai inap planti de, em i hangre nogut tru, tasol em i sakim traim bilong Satan long tanim ol ston i kamap bret. Em i tokim Satan: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’” (Matyu 4:4) Long dispela ves Jisas i kamapim tok bilong profet Moses, em i bin tokim ol Israel: “[Jehova] i bin mekim yupela i hangre, na bihain em i givim yupela mana bilong kaikai. . . . Em i mekim olsem bai yupela i ken save, yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip.” (Lo 8:3) Pasin Jehova i bin mekim bilong kamapim mana, dispela i mekim na ol Israel i kisim kaikai bilong skin, na tu, em i skulim ol long sampela samting bilong spirit. Wanpela samting i olsem: “Long olgeta de wan wan ol manmeri i mas i go kisim kaikai bilong dispela de.” Sapos ol i kisim planti, winim skel bilong wanpela de, hap kaikai i stap yet bai smel nogut na ol liklik snek bai pulap long en. (Kisim Bek 16:4, 20) Tasol dispela samting i no kamap long namba 6 de, taim ol i mas bungim kaikai bilong dispela de na bilong de Sabat wantaim. (Kisim Bek 16:5, 23, 24) Olsem na mana i kirapim tingting bilong ol olsem ol i mas bihainim tok, na bilong i stap laip ol i no inap kisim kaikai tasol, ol i mas kisim “olgeta tok bilong God tu.”
Jun 28–Julai 4
GUTPELA SAVE I KAM LONG BAIBEL | LO 9-10
“Jehova, God Bilong Yupela, i Laik Bai Yupela i Mas Mekim Wanem?”
Jehova i Laik Bai Yumi Mekim Wanem?
Wanem samting inap kirapim yumi long bihainim tok bilong God? Wanpela samting Moses i kolim, i olsem: “Yupela i mas aninit [“pret,” NW ] long God.” (Ves 12) Dispela pasin bilong pret i no olsem yumi pret long samting nogut bai painim yumi, nogat. Em pasin bilong daun long God na rispek long em na long ol lo bilong em. Sapos yumi laikim tru God, bai yumi no mekim wanpela samting God i no laikim.
Wanem nambawan samting i mas kirapim yumi long bihainim tok bilong God? Moses i tok: “Yupela i mas laikim em [God] tru, na amamas tru wantaim bel na tingting bilong yupela long mekim wok bilong em.” (Ves 12) I gat planti samting i insait long pasin bilong laikim God, na i no makim tasol ol samting yumi pilim long bel, nogat. Wanpela buk i tok: “Long tok Hibru ol tok bilong makim samting man i pilim long bel, sampela taim em inap makim tu ol pasin man i kamapim long ol samting em i pilim.” Sapos yumi laikim tru God, yumi bai mekim ol pasin em i laikim.—Sindaun 27:11.
Jehova i Laik Bai Yumi Mekim Wanem?
Pasin bilong yumi long amamas long bihainim tok bai kamapim ol gutpela samting. Moses i tok: “Yupela i mas bihainim olgeta lo . . . nau mi givim long yupela. Sapos yupela i bihainim, bai yupela i ken stap gut.” (Ves 13) Tru tumas, olgeta lo bilong Jehova—olgeta samting em i laik yumi mekim—ol i bilong helpim yumi long i stap gut. Ol dispela lo inap helpim yumi, long wanem, Baibel i tok: ‘God yet em i as bilong pasin laikim.’ (1 Jon 4:8) God i givim ol lo em ol i bilong helpim yumi long stap gut inap oltaim oltaim. (Aisaia 48:17) Taim yumi mekim olgeta samting Jehova i tokim yumi long mekim, bai yumi no bungim planti hevi long nau, na dispela bai opim rot long yumi kisim planti blesing tru aninit long Kingdom bilong em.
cl 16 2
Yu Inap ‘Go Klostu Long God’ o Nogat?
2 Abraham bilong bipo i bin stap klostu long God. Jehova i tok dispela bilipman em i “pren bilong mi.” (Aisaia 41:8) Yes, Jehova i tok Abraham em i pren bilong em. Abraham “i bilip long God,” na long dispela as em i ken pas gut wantaim God. (Jems 2:23) Long nau tu, Jehova i painim rot bilong “laikim tumas” ol manmeri i mekim wok bilong em, long wanem, ol i laikim em tru. (Lo 10:15) Baibel i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Dispela ves i gat tok promis long en na i singautim yumi long mekim sampela samting.
Mekim Wok Painimaut
it-1 103
Lain Anak
Ol man bilong dispela lain i traipela na longpela, ol i save stap long ol ples maunten bilong Kenan, na tu, long sampela ples arere long solwara long hap saut. Wanpela taim tripela man bilong lain Anak i gat biknem, em Ahiman, Sesai, na Talmai, ol i bin stap long Hebron. (Nam 13:22) Long dispela hap 12-pela man Hibru bilong lukstil i bin lukim ol man bilong lain Anak, na 10-pela bilong ol i bin bringim ripot bilong pretim ol man na ol i tok, ol dispela man i luk olsem ol tumbuna bilong ol Nefilim i stap paslain long taim bilong Bikpela Tait, na ol Hibru i olsem “ol grasopa tasol.” (Nam 13:28-33; Lo 1:28) Ol dispela lain i traipela na longpela, olsem na ol man i ting ol i wankain long ol man bilong lain Em na Refaim. Ol i strongpela man, olsem na ol man i save tok: “Husat man inap pait long ol Anak?”—Lo 2:10, 11, 20, 21; 9:1-3.