Ol Referens Bilong Laip na Wok Autim Tok Miting Wok Buk
JANUERI 3-9
GUTPELA SAVE I KAM LONG BAIBEL | HETMAN 15-16
“Givim Baksait Long Pren—Pasin Nogut Tru!”
Givim Baksait Long Pren Mak Nogut Bilong Dispela Taim!
4 Namba 1 stori em bilong kusai meri Delaila, husat Jas Samson i laikim em tumas. Samson i laik go pas long pait long ol Filistia bilong helpim lain bilong God. Ating 5-pela bikman bilong ol Filistia i save pinis olsem Delaila i no laikim tru Samson long pasin we em bai stap gut long em. Ol i givim planti mani long Delaila na tokim em long painimaut as bilong bikpela strong bilong Samson na bihain ol i ken kilim em i dai. Delaila i wanpela gridi meri na em i orait long mekim olsem ol i tok. Tripela taim em i traim long painimaut as bilong strong bilong Samson, tasol em i no inap. Delaila i wok long “toktok planti na i wok long askim em.” Em i mekim i go inap Samson i “les nogut tru.” Olsem na Samson i tokaut long em olsem ol i no bin katim gras bilong em wanpela taim, na sapos ol i katim, strong bilong em bai pinis. Nau Delaila i save long as bilong strong bilong Samson, na taim Samson i slip i dai long lek bilong en, em i singautim wanpela man i kam katim gras bilong Samson. Delaila i putim em long han bilong ol birua na bai ol i ken mekim save long em. (Het. 16:4, 5, 15-21) Dispela em i pasin nogut tru! Delaila i gat pasin gridi, olsem na em i putim man husat i laikim em long han bilong ol birua.
Sampela Bikpela Tok Bilong Buk Hetman
14:16, 17; 16:16. Pasin bilong subim narapela long rot bilong krai na toktok planti inap bagarapim marit.—Sindaun 19:13; 21:19.
Givim Baksait Long Pren Mak Nogut Bilong Dispela Taim!
15 Ol marit i ken mekim wanem bilong strongim pasin bilong i stap gut long poroman bilong ol? Baibel i tok: ‘Amamas long meri [o man] bilong yu’ na, ‘yu mas amamas wantaim dispela meri [o man] bilong yu, em yu laikim tumas.’ (Snd. 5:18; Sav. 9:9) Taim krismas bilong tupela i go antap, ol i mas mekim olgeta samting ol inap mekim na bai pasin bilong ol long pas gut wantaim i ken stap strong, em long sait bilong skin na bel na tingting. Dispela i makim wanem? Tupela i mas pas gut wantaim long rot bilong tingim tru poroman, lukautim poroman long ol samting em i nidim, na lusim taim bilong i stap wantaim em. Ol i mas wok strong long lukautim marit bilong ol na pasin bilong ol long pas gut wantaim Jehova. Bilong mekim olsem, tupela marit i mas stadi Baibel wantaim, mekim wok autim tok wantaim, na beten wantaim na askim Jehova long blesim marit bilong ol.
STAP GUT LONG JEHOVA
16 Sampela long kongrigesen i bin mekim ol bikpela rong na ol elda i mas “givim strongpela tok long ol bilong stretim ol, bai bilip bilong ol i ken i stap gut.” (Tai. 1:13) Sampela i mas raus long kongrigesen. “Tasol ol lain i kisim skul pinis long wanpela i stretim ol,” dispela i bin helpim ol long pas gut gen wantaim God. (Hib. 12:11) Olsem wanem sapos wanpela wanblut o wanpela gutpela pren i raus? Samting yumi mekim long kain taim olsem i soim olsem yumi stap gut long dispela rausman o yumi stap gut long God. Yumi mas stap gut long Jehova. Em i lukluk long yumi bilong save olsem, yumi bihainim lo bilong em long no ken poroman wantaim wanpela rausman, o nogat.—Ritim 1 Korin 5:11-13.
Mekim Wok Painimaut
Samson i Win Long Strong Bilong Jehova!
Samson i gat wanpela tingting tasol, em bilong mekim pait long ol Filistia. As na em i go stap long haus bilong wanpela pamukmeri long Gasa em bilong givim rot long em long mekim pait long ol birua bilong God. Em i mas painim ples slip insait long taun bilong ol birua, na em inap painim long haus bilong wanpela pamukmeri. Samson i no gat tingting long mekim pasin pamuk, nogat. Em i lusim haus bilong meri long biknait na em i holimpas tupela bikpela dua bilong taun wantaim tupela pos bilong en, na em i karim i go antap long wanpela maunten klostu long Hebron, em i longwe inap 60 kilomita. God i orait long dispela samting na em i givim strong long Samson long mekim olsem.—Hetman 16:1-3.
JANUERI 10-16
GUTPELA SAVE I KAM LONG BAIBEL | HETMAN 17-19
“Pasin Bilong Brukim Lo Bilong God Bai Kamapim Hevi”
it-2 390-391
Maika
1. Wanpela man bilong lain Efraim. Maika i brukim namba 8 lo i stap long Tenpela Lo (Ki 20:15), taim em i kisim 1,100 mani silva bilong mama bilong em. Taim Maika i tokaut long rong bilong em na givim mani i go bek long mama, mama bilong em i tok: “Mi givim dispela silva i go long Jehova olsem samting i holi na pikinini man bilong mi bai yusim dispela silva long wokim wanpela imis na wanpela stetiu. Nau mi givim bek long yu.” Bihain em i givim 200 mani silva long man bilong wokim ol samting long silva, na dispela man i wokim “wanpela imis na wanpela stetiu” na ol i putim long haus bilong Maika. Maika i gat “wanpela haus we em i save putim ol god long en,” na em i wokim wanpela ifot na terafim na makim wanpela pikinini man bilong em long kamap pris bilong em. Maski i luk olsem ol i mekim bilong onarim Jehova, dispela pasin em i nogut tru bikos dispela i brukim lo Jehova i givim long abrusim pasin bilong lotuim ol imis (Ki 20:4-6) na i sakim wok bilong haus lotu sel bilong Jehova na wok bilong ol pris. (He 17:1-6; Lo 12:1-14) Bihain, Maika i kisim Jonatan, em wanpela man bilong lain Gersom, em pikinini bilong Moses, na haiarim dispela yangpela Livai long kamap pris bilong em. (He 18:4, 30) Maika i ting em i mekim samting i stret, olsem na em i tok: “Nau mi save olsem Jehova bai mekim gut long mi.” (He 17:7-13) Tasol Jonatan em i no wanpela man long lain bilong Aron, olsem na em i no winim mak long mekim wok pris, dispela em narapela popaia Maika i mekim.—Nam 3:10.
it-2 391 par. 2
Maika
Bihain tasol long dispela, Maika na sampela man i go bihainim ol Dan. Taim ol i go kamap long ol Dan, ol Dan i askim ol long wai na ol i bihainim ol, Maika i tok: “Yupela i kisim ol god bilong mi em mi bin wokim, na yupela i kisim tu pris bilong mi. I no gat wanpela samting bilong mi i stap.” Na ol Dan i tok lukaut olsem ol bai paitim em sapos em i strong yet na bihainim ol. Maika i lukim olsem ol Dan i strongpela man winim ol man i go wantaim em, olsem na em i lusim ol na i go bek long haus bilong em. (He 18:22-26) Bihain ol Dan i bagarapim Lais, na wokim gen taun na kolim olsem Dan. Jonatan na ol pikinini man bilong em i stap olsem ol pris bilong ol Dan, na ol i “sanapim dispela imis Maika i bin wokim, na imis i sanap yet long dispela hap insait long haptaim we haus bilong God tru [haus lotu sel] i stap long Silo.”—He 18:27-31.
Mekim Wok Painimaut
Trenslesen Bilong Tok Bilong God—Em i Gat Laip
6 Planti samting moa i soim klia olsem em i bikpela samting long putim nem bilong God long Baibel. Long nupela edisen bilong Nupela Taim Baibel bilong 2013 long tok Inglis, nem bilong God i stap inap 7,216 taim, na dispela nem i stap long 6-pela moa ves winim edisen bilong 1984. Long dispela nupela Baibel long tok Inglis, nem bilong God i kamap long ol dispela 5-pela ves, em 1 Samuel 2:25; 6:3; 10:26; 23:14, 16. Ol i putim bek nem bilong God long ol dispela ves bikos dispela nem i stap long Ol Olpela Rait Bilong Detsi. Ol dispela rait i stap winim 1 tausen yia paslain long ol saveman ol i kolim Masoret i kolektim na bungim olgeta tok bilong Ol Skripsa Hibru. Na tu, ol i putim bek nem bilong God long Hetman 19:18 bihain long ol i skelim gut ol manuskrip bilong bipo tru.
JANUERI 17-23
GUTPELA SAVE I KAM LONG BAIBEL | HETMAN 20-21
“Wok Yet Long Askim Jehova”
Yu Inap Bihainim Pasin Bilong Finias Taim Hevi i Painim Yu?
Ol man bilong Gibea, bilong lain Benjamin, i bin reipim na kilim i dai meri bilong wanpela man Livai. Bihain ol arapela lain bilong Israel i redi long go pait long lain Benjamin. (Het. 20:1-11) Paslain long ol i go pait, ol i beten askim Jehova long helpim ol, tasol tupela taim ol i lus long pait, na planti man i dai. (Het. 20:14-25) Bihain long dispela ol i no kliagut long ol i mas mekim wanem. Nogut ol i ting Jehova i no harim ol beten bilong ol na em i no laik bai ol i stretim dispela rong ol man Gibea i bin mekim.
Yu Inap Bihainim Pasin Bilong Finias Taim Hevi i Painim Yu?
Yumi kisim wanem skul long dispela? Sampela hevi insait long kongrigesen i stap yet maski ol elda i wok strong long stretim na beten askim God long helpim ol. Sapos samting olsem i kamap, ol elda i mas tingim tok bilong Jisas: “Wok yet long askim [olsem beten], na yupela bai kisim. Wok yet long painim, na yupela bai lukim. Wok yet long paitim dua, na dua bai op long yupela.” (Luk 11:9) Maski i luk olsem bekim bilong wanpela beten i no kam kwik, ol wasman i save olsem Jehova bai bekim beten long taim em yet i makim.
Mekim Wok Painimaut
Yu Save Long Dispela?
Olsem wanem ol i bin yusim ol katapel long ol pait bilong bipo?
Devit i bin yusim katapel bilong kilim i dai traipela man Goliat. I luk olsem Devit i save long yusim katapel taim em i mangi yet na em i save lukautim ol sipsip.—1 Samuel 17:40-50.
Long taim ol man i bin raitim Baibel, ol Isip na ol Asiria i wokim piksa bilong ol samting, na i gat piksa bilong katapel tu. Katapel bilong ol i olsem: Ol i wokim liklik paus long skin bilong animal o long laplap, na ol i pasim tupela string long maus bilong en. Man i save kisim wanpela liklik raunpela ston, braitpela bilong en i olsem 5 i go inap 7 sentimita na hevi bilong en inap olsem 250 gram, na em i pulimapim insait long liklik paus. Orait nau em bai tanim tanim paus antap long het bilong en na lusim wanpela string, na dispela i mekim na ston i sut i go stret long mak.
Taim ol i digim graun bilong painim ol samting bilong bipo, ol i painim planti katapel olsem long hap bilong Midel Is, em ol i bin yusim long ol pait. Ol soldia i gat save long yusim katapel i save tromoi ston i go longwe moa. Sampela saveman i ting ston bilong katapel i no save sut i go longwe olsem banara, tasol katapel inap tru long kilim man i dai, wankain olsem banara.—Hetman 20:16.
JANUERI 24-30
GUTPELA SAVE I KAM LONG BAIBEL | RUT 1-2
“Wok Strong Long Soim Gutpela Pasin Laikim”
Bihainim Pasin Bilong Ol Gutpela Pren Bilong Jehova
5 Rut inap kisim tingting olsem em i gat famili long Moap—mama na ol narapela wanblut bai lukautim em. Moap em asples bilong em. Kalsa bilong Moap em kalsa bilong em, tokples bilong Moap em tokples bilong em, na lain Moap em lain bilong em. Naomi inap tokim Rut olsem kalsa, tokples, na ol manmeri long Betlehem bai i no wankain olsem long Moap. Olsem na Naomi i tokim Rut long i go bek long Moap. Naomi i tingting planti, long wanem, em i no inap painim wanpela man bilong maritim Rut. Na tu, em i no inap painim wanpela haus em ol tambu meri bilong em inap i stap long en. Rut bai mekim wanem? Tingim: Orpa i “go bek long lain bilong en na long god bilong ol tumbuna bilong en.” (Rut 1:9-15) Olsem wanem? Rut i tingting long i go bek long ol god giaman bilong lain bilong em? Nogat.
Bihainim Pasin Bilong Ol Gutpela Pren Bilong Jehova
6 Ating Rut i kisim save long God Jehova long rot bilong man bilong em, o long rot bilong Naomi. Jehova i no olsem ol god bilong Moap. Rut i save olsem i stret long em i laikim Jehova na lotuim em. Rut i kisim pinis sampela save, tasol em i mas mekim sampela samting moa. Em i mas mekim disisen olsem: Em bai lotuim Jehova olsem God bilong em, o nogat. Rut i mekim gutpela disisen. Em i tokim Naomi: “Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Yumi pilim tru pasin bilong Rut long laikim Naomi, tasol yumi pilim moa yet pasin bilong em long laikim Jehova. Boas em papagraun long hap Rut i stap long en, na em i givim biknem long Rut long pasin bilong em long mekim Jehova i stap olsem ples hait bilong em. (Ritim Rut 2:12.) Dispela stori inap kirapim yumi long tingim wanpela bebi pisin i painim ples hait aninit long ol strongpela wing bilong mama bilong en. (Sng. 36:7; 91:1-4) Jehova i stap olsem mama pisin na em i lukautim Rut. Na tu, Rut i bilip long God, olsem na God i blesim em na em i no gat rigret long disisen em i bin mekim.
Mekim Wok Painimaut
Sampela Bikpela Tok Bilong Buk Rut
1:13, 21—Yu ting Jehova i bin mekim sindaun bilong Naomi i kamap nogut na em i bagarap? Nogat, na Naomi i no sutim tok long God olsem em i mekim pasin i no stret. Tasol ol samting i bin painim em i mekim na em i ting Jehova i no amamas long em. Em i bel nogut na i no amamas. Na tu, long dispela taim bilong ol long bipo, taim meri i karim pikinini ol i save tok em blesing i kam long God, na sapos meri i no karim pikinini, em i wanpela samting nogut. Em i no gat ol tumbuna pikinini na tupela pikinini man bilong em i dai, olsem na ating Naomi i pilim olsem Jehova i daunim em.
JANUERI 31–FEBRUERI 6
GUTPELA SAVE I KAM LONG BAIBEL | RUT 3-4
“Kisim Gutnem na Holim Strong”
Wanpela “Gutpela Meri”
Boas i mekim gutpela tok long pasin isi na dispela i mekim gut bel bilong Rut. Em i tok: “Bikpela i ken mekim gut long yu, pikinini. Dispela pasin nau yu mekim, em i winim gutpela pasin yu bin mekim long tambu mama bilong yu. Planti yangpela man i stap. Sampela i gat planti samting na sampela i no gat, tasol yu no tingting long maritim wanpela.” (Rut 3:10) Dispela tok “pasin yu bin mekim” i makim pasin Rut i bin mekim bilong laikim na stap gut long Naomi na poromanim em i kam bek long Israel na lukautim em. Dispela tok “pasin nau yu mekim” i makim samting Rut i mekim long nau. Boas i luksave olsem kain yangpela meri olsem Rut inap painim wanpela yangpela man long maritim em, maski em i maniman o man i no gat planti samting. Tasol Rut i laik mekim gut long Naomi, na tu, long man bilong Naomi husat i dai pinis bambai nem bilong man bilong Naomi i ken stap yet long ples bilong em. Boas i pilim tru pasin bilong dispela yangpela meri long daunim laik bilong em yet na tingim tru ol narapela.
Wanpela “Gutpela Meri”
Rut i belgut tru taim em i tingim gen tok Boas i mekim long em olsem olgeta manmeri long ples i save olsem em i “gutpela meri”! Em i bin wok strong long save long Jehova na mekim wok bilong em na dispela i mekim na em i kisim dispela gutnem. Em i bin mekim bikpela pasin helpim long Naomi na long lain bilong em, na em i redi long bihainim ol pasin na ol kastam em bipo em i no save long en, na em i no laik mekim wanpela samting bilong bagarapim bel bilong ol. Sapos yumi bihainim bilip bilong Rut, orait bai yumi wok strong long rispektim ol narapela manmeri na rispektim tu ol pasin na ol kastam bilong ol. Sapos yumi mekim olsem, yumi tu bai kisim gutnem.
Wanpela “Gutpela Meri”
Boas i maritim Rut. Bihain, Baibel i tok, ‘Bikpela i mekim gut long tupela na Rut i gat bel na bihain em i karim wanpela pikinini man.’ Ol meri bilong Betlehem i tok amamas long Naomi na litimapim nem bilong Rut long em i bin mekim gut long Naomi, winim pasin em 7-pela pikinini man inap mekim long em. Bihain yumi kisim save olsem pikinini man bilong Rut i kamap tumbuna bilong King Devit. (Rut 4:11-22) Bihain Devit i kamap tumbuna bilong Jisas Krais.—Matyu 1:1.
Mekim Wok Painimaut
Sampela Bikpela Tok Bilong Buk Rut
4:6—I gat wanem as na wanpela man bilong baim graun i no laik baim graun bilong narapela wanblut bilong em? Pastaim, sapos wanpela man i kamap rabis na em i salim graun bilong em, wanpela man i laik baim dispela graun i mas kaunim hamas yia i stap yet inap long namba 50 yia, orait nau em bai save hamas mani em bai givim bilong baim dispela graun. (Wok Pris 25:25-27) Taim dispela man i mekim olsem dispela bai mekim na pe bilong graun samting bilong em bai go daun. Na tu, sapos Rut i karim wanpela pikinini man, em bai kisim dispela graun em man i baim graun i bin baim na i no ol wanfamili stret bilong dispela man.
FEBRUERI 7-13
GUTPELA SAVE I KAM LONG BAIBEL | 1 SAMUEL 1-2
“Beten Long Jehova na Autim Olgeta Tingting”
Em i Beten na Kamapim Tru Bel Bilong Em Long God
12 Em nau, long pasin bilong beten Hana i stap gutpela piksa long olgeta wokman bilong God i ken bihainim. Long gutpela pasin Jehova i save singautim lain bilong em long autim olgeta tingting na hevi bilong ol long em, olsem pikinini i save mekim long gutpela papa bilong em. (Song 62:8; 1 Tesalonaika 5:17) Holi spirit i kirapim aposel Pita long raitim dispela gutpela tok long pasin bilong beten long Jehova, em i tok: “God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:7.
Rot Bilong Hana Long Painim Bel Isi
Yumi inap lainim wanem samting long dispela stori? Taim yumi beten long Jehova na kamapim ol hevi bilong yumi, yumi ken tokim em long samting yumi pilim long bel na yumi ken askim em long helpim yumi. Sapos yumi no inap mekim wanpela samting bilong stretim hevi, orait yumi mas lusim hevi long han bilong Jehova. I no gat narapela gutpela rot bilong bihainim.—Sindaun 3:5, 6.
Mekim Wok Painimaut
Sampela Bikpela Tok Bilong Buk Namba 1 Samuel
2:10—Bilong wanem Hana i beten long Jehova olsem “givim strong long king em i bin makim” taim i no gat king i bin bosim Israel long dispela taim? Lo Bilong Moses i bin tok profet olsem ol Israel bai i gat wanpela man i kamap king. (Lo 17:14-18) Long taim Jekop i laik i dai, em i tok profet olsem: “Em i holim dispela stik i makim strong bilong king, na em bai i stap king oltaim.” (Stat 49:10) Na tu, Jehova i tok long Sera, tumbuna mama bilong ol Israel, olsem: “Bai em i kamap tumbuna bilong planti lain manmeri, na sampela bai i kamap king.” (Stat 17:16) Olsem na Hana i beten long wanpela king bai kamap bihain.
FEBRUERI 14-20
GUTPELA SAVE I KAM LONG BAIBEL | 1 SAMUEL 3-5
“Jehova i Save Tingim Gut Yumi”
God i Gat Olgeta Strong i Save Tingim Gut Yumi
3 Samuel i kirap “mekim wok bilong Bikpela” long haus lotu sel taim em i mangi yet. (1 Sml. 3:1) Wanpela nait taim Samuel i slip, narakain samting i kamap. (Ritim 1 Samuel 3:2-10.) Em i harim wanpela nek i kolim nem bilong em. Samuel i ting olsem Hetpris Eli i singautim em, olsem na em i kirap na ran i go long Eli na tok: “Mi harim yu singautim mi, olsem na mi kam.” Tasol Eli i tok em i no singautim Samuel. Wankain samting i kamap 2-pela taim moa, na nau Eli i luksave olsem God i wok long singaut long Samuel. Olsem na Eli i tokim Samuel long tok em i mas mekim, na Samuel i bihainim tok bilong em. Taim Jehova i kolim nem bilong Samuel long namba 1 taim, bilong wanem long rot bilong ensel Em i no tokaut long em i husat? Baibel i no stori long dispela samting, tasol ol samting i kamap long dispela stori inap helpim yumi long ting olsem God i tingim gut Samuel bikos em i liklik mangi yet. Bilong wanem yumi tok olsem?
God i Gat Olgeta Strong i Save Tingim Gut Yumi
4 Ritim 1 Samuel 3:11-18. Lo Bilong Jehova i tok ol pikinini i mas rispektim ol lapun, na moa yet ol hetman. (Kis. 22:28; Wkp. 19:32) Olsem wanem? Yu ting Samuel i no pret long i go lukim Eli long bikmoning na tokim em long strongpela tok God i mekim bilong kotim em? Nogat! Baibel i tok Samuel i “pret long tokim Eli long em i bin lukim dispela samting olsem driman.” Tasol God i kamapim klia long Eli olsem Em i wok long singautim Samuel. Olsem na Eli i tokim Samuel: “Yu no ken haitim wanpela tok long mi.” Olsem na Samuel i “tokim em long olgeta tok bilong Bikpela.”
Mekim Wok Painimaut
Sampela Bikpela Tok Bilong Buk Namba 1 Samuel
3:3—Olsem wanem? Samuel i bin slip tru tru insait long Rum Tambu Tru? Nogat, em i no bin slip insait long dispela rum. Samuel em i bilong lain Kohat, em wanpela lain Livai i no bilong lain pris. (1 Stori 6:33-38) Olsem na i tambu long em i “go insait long haus sel na lukim ol . . . dispela samting” bilong Jehova. (Namba 4:17-20) Wanpela hap bilong haus lotu sel em Samuel inap i go insait long en em dispela banis i raunim haus lotu sel. Olsem na ating em i bin slip insait long dispela hap. Eli tu i mas slip insait long wanpela hap bilong dispela banis. Dispela tok “rum Bokis Kontrak bilong God i stap long en” i makim haus lotu sel wantaim banis i raunim en.
FEBRUERI 21-27
GUTPELA SAVE I KAM LONG BAIBEL | 1 SAMUEL 6-8
“Husat Em i King Bilong Yu?”
it-2 163 par. 1
Kingdom Bilong God
Askim Long Makim Wanpela Man Olsem King. Klostu 400 yia bihain long God i Kisim Bek lain Israel, na winim 800 yia bihain long God i wokim kontrak wantaim Abraham, ol Israel i askim long wanpela man i mas i stap king bilong ol, wankain olsem ol narapela kantri we ol i gat king bilong ol. Askim bilong ol i soim olsem ol i no laik bai Jehova i stap king bilong ol. (1Sm 8:4-8) I stret ol i wet long God i kamapim wanpela kingdom bikos God i bin promisim Abraham na Jekop long dispela samting. Na tu, ol inap bilip na wet long dispela kingdom bikos dispela hop i kamap ples klia long rot bilong tok profet bilong Jekop long Juda paslain long em i dai (St 49:8-10), tok Jehova i mekim long lain Israel bihain long em i Kisim Bek ol (Ki 19:3-6), kontrak bilong Lo (Lo 17:14, 15), na tu, long tok em God i stiaim profet Balam long autim (Nam 24:2-7, 17). Hana mama bilong bilipman Samuel i kamapim olsem em i bilip na wet long dispela samting taim em i beten. (1Sm 2:7-10) Maski i olsem, Jehova i no kamapim klia olgeta “tok hait holi” bilong Kingdom na em i no kamapim klia dispela Kingdom bai kamap long wanem taim, na tu, em i no tokaut long dispela Kingdom bai stap long heven o long graun. Olsem na ol manmeri i mekim samting em ol i no gat rait long mekim taim ol i askim long wanpela man long i stap king bilong ol.
Em i Sanap Strong Maski Em i Karim Hevi
Tingim tok Jehova i mekim taim Samuel i beten na tokim em long samting ol Israel i laikim. Jehova i tok: “Harim tok bilong ol manmeri long olgeta dispela samting. Yu no ken ting ol i les long yu na ol i laik rausim yu. Nogat. Ol i no laik mi stap king bilong ol, na ol i rausim mi.” Dispela tok i mekim gut bel bilong Samuel, tasol ol manmeri i bagarapim tru bel bilong God i Gat Olgeta Strong! Jehova i tokim profet bilong em long givim tok lukaut long lain Israel long ol samting nogut bai kamap sapos ol i gat wanpela king bilong graun. Taim Samuel i tokim ol long dispela samting, ol i strong na tok: “Maski, mipela i laik yu makim wanpela king.” Samuel i bihainim tok bilong God na em i makim wanpela king em God yet i bin makim.—1 Samuel 8:7-19.
Wok Bos Bilong Jehova i Win Tru!
9 Ol samting i kamap bipo i truim tok lukaut bilong Jehova. Lain Israel i bungim ol bikpela hevi taim ol i makim man bilong graun i kamap king bilong ol, na moa yet long taim dispela king i no stap gut long God. Yumi tingim dispela stori bilong lain Israel, na yumi no kirap nogut olsem stat long bipo yet na i kam inap long nau, i no gat gutpela samting i bin kamap long wok bos bilong ol man husat i no save long Jehova. Tru, sampela lain politik i save askim God long blesim wok bilong ol long kamapim bel isi na gutpela sindaun, tasol God i no inap blesim ol man husat i no daun long wok bos bilong em.—Sng. 2:10-12.
Mekim Wok Painimaut
I Gat Wanem As na Yumi Mas Kisim Baptais?
13 Taim yumi laik kisim baptais na kamap wanpela Witnes Bilong Jehova, pastaim yumi mas baut. Pasin bilong baut em samting man i mekim long laik bilong em yet. Kain man olsem i bin pasim tok long bel long bihainim Krais Jisas. Taim em i baut, em i sakim pasin nogut bipo em i bihainim na em i tingting strong long mekim ol pasin i stret long ai bilong God. Em i baut na i go long God. (1 King 8:33, 34) Em i mas mekim ‘pasin i soim olsem em i tanim bel pinis.’ (Aposel 26:20) Pasin bilong baut i olsem yumi mas lusim lotu giaman, na mekim pasin i stret wantaim ol lo bilong God, na lotu long Jehova wanpela tasol. (Lo 30:2, 8-10; 1 Samuel 7:3) Taim yumi baut, yumi senisim sampela tingting na pasin na laik bilong yumi. (Esekiel 18:31) Yumi baut taim yumi lusim ol pasin nogut na kamap olsem nupela man.—Aposel 3:19; Efesus 4:20-24; Kolosi 3:5-14.
FEBRUERI 28–MAS 6
GUTPELA SAVE I KAM LONG BAIBEL | 1 SAMUEL 9-11
“Sol i Kirap Mekim Wok King Wantaim Pasin Daun”
Mekim Pasin Daun Taim Yu Wokabaut Wantaim God Bilong Yu
11 Tingim samting i kamap long King Sol. Pastaim em i bihainim pasin daun. Taim em i yangpela man, em i tingim em yet olsem man i no gat nem, na em i surik taim ol i makim em long mekim bikpela wok. (1 Sml. 9:21; 10:20-22) Tasol bihain pasin bilong Sol i senis. Em i kisim pasin antap bihain tasol long em i kamap king. Wanpela taim, em i wetim profet Samuel inap sampela de, na em i les long wet. Sol i no bihainim pasin daun na em i no bilip olsem Jehova bai helpim ol manmeri bilong em, olsem na em i mekim sakrifais bilong paia i kukim olgeta, tasol em i no gat rait long mekim olsem. Jehova i no amamas moa long Sol, na em i no orait long Sol i mekim wok king. (1 Sml. 13:8-14) Eksampel bilong Sol i mas stap olsem tok lukaut na stiaim yumi long abrusim pasin antap.
Holim Yet Pasin Bilong Daunim Laik Bilong Yumi Yet
8 Stori bilong King Sol bilong Israel i stap olsem tok lukaut long yumi. Em i helpim yumi long luksave olsem sapos yumi tingim yumi yet tasol, dispela bai pasim yumi long daunim laik bilong yumi yet. Taim Sol i kirap long mekim wok king, em i bin bihainim pasin daun. (1 Sml. 9:21) Sampela man bilong lain Israel i no bin amamas taim em i kisim wok king, tasol em i no givim strafe long ol maski em i gat namba long sambai long dispela wok em God i bin givim long em. (1 Sml. 10:27) King Sol i larim spirit bilong God i stiaim em long gopas long lain Israel taim ol i pait long lain Amon. Taim lain Israel i winim pait, King Sol i mekim pasin daun na givim biknem long Jehova.—1 Sml. 11:6, 11-13.
Ol Amon—Ol i Mekim Pasin Birua Olsem Bekim Bilong Gutpela Pasin
Em nau, ol Amon i mekim pasin birua gen long lain bilong Jehova, olsem bekim bilong gutpela pasin Jehova i bin mekim long ol. Tasol Jehova i tingim tok bilong Nahas long mekim nogut long ol Israel. “Orait spirit bilong God i kamap strong long [Sol] na em i belhat moa yet.” Spirit bilong God i stiaim Sol na em i bungim 330,000 soldia na ol i mekim save kilim i dai ol Amon, na “ol wan wan Amon i no bagarap, ol i ranawe nabaut.”—1 Samuel 11:6, 11.
Mekim Wok Painimaut
Sampela Bikpela Tok Bilong Buk Namba 1 Samuel
9:9—Dispela hap tok “bipo ol Israel i save kolim ol profet, glasman” i makim wanem samting? Dispela hap tok i soim olsem taim ol profet i mekim bikpela wok moa long taim bilong Samuel na long taim bilong ol king, ol i senisim dispela tok “glasman” na kolim “profet.” Samuel em i namba wan man long lain profet.—Aposel 3:24.