Ol Referens Bilong Laip na Wok Autim Tok Miting Wok Buk
MAS 7-13
GUTPELA SAVE I KAM LONG BAIBEL | 1 SAMUEL 12-13
“Pasin Bikhet i Mekim na Man i Kisim Sem”
Pasin Bikhet i Mekim na Man i Kisim Sem
17 Ating pastaim yumi bai ting olsem i stret Sol i mekim dispela samting. Long wanem, ol manmeri bilong God ol i “pilim olsem ol i no inap winim pait” na ol i pret nogut tru. (1 Samuel 13:6, 7) Tru, i no gat rong long mekim sampela wok long taim i stret long mekim. Tasol tingim: Jehova inap lukim bel bilong ol man na em i save long tingting tru bilong yumi. (1 Samuel 16:7) Olsem na ating Jehova i bin lukim sampela pasin bilong Sol em Baibel i no tokaut stret long en. Ating Jehova i lukim olsem Sol i gat pasin antap na dispela i bin kirapim em long les kwik. Sol em i king bilong olgeta Israel, olsem na taim em i mas wet long Samuel, long tingting bilong Sol, Samuel i olsem wanpela lapun profet i kam bihaintaim, ating dispela i mekim em i kros! Tasol maski wanem samting i mekim, Sol i pilim olsem Samuel i no kamap long taim stret, olsem na em yet i mas kirap long mekim ofa na sakim ol tok Samuel i bin givim long em. Wanem samting i kamap long dispela? Samuel i no mekim gutpela tok amamas long Sol olsem em i bin go pas na mekim dispela samting, nogat. Em i krosim Sol na tok: “Yu no inap i stap king longpela taim. Yu no bin bihainim tok bilong Bikpela.” (1 Samuel 13:13, 14) Pasin bikhet i mekim na em tu i kisim sem.
Jehova i Laikim Tru Pasin Bilong Yu Long Bihainim Tok
8 Stori bilong King Sol long Baibel i kamapim klia olsem pasin bilong bihainim tok em i bikpela samting. Taim Sol i kirap mekim wok king em i gat pasin daun na em i ting olsem em i “samting nating.” Tasol bihain pasin antap na ol tingting giaman i kirap bosim ol disisen em i mekim. (1 Samuel 10:21, 22; 15:17) Wanpela taim, Sol i mas pait wantaim ol Filistia. Samuel i tokim king long wetim em long kam na mekim ol ofa long Jehova, na long tokim king long samting em i mas mekim. Tasol Samuel i no kam long taim ol i ting em bai kam, na ol manmeri i kirap long lusim dispela bung. Sol i lukim dispela samting na em i “mekim ofa bilong paia i kukim olgeta.” Jehova i no amamas long dispela samting. Taim Samuel i kam kamap, king i givim eskius na i tok as na em i sakim tok em bikos Samuel i no kamap long taim stret, olsem na em i ting em i “mas mekim ofa” bilong Jehova i ken belgut long em. Long tingting bilong King Sol, pasin bilong mekim ofa em i bikpela samting moa winim pasin bilong bihainim tok long wetim Samuel long mekim ofa. Samuel i tokim em: “Pasin bilong yu i kranki tru. Yu no bihainim tok God, Bikpela bilong yumi, i bin givim yu.” Sol i sakim tok bilong Jehova, olsem na wok king bilong em i lus.—1 Samuel 10:8; 13:5-13.
Mekim Wok Painimaut
Bai Yu Bihainim Tok Bilong Jehova?
15 Olsem wanem? Ol Israel i ting ol king bilong graun ol i samting tru na gutpela moa, winim Jehova? Sapos ol i ting olsem, orait ol i bihainim ol samting nating tasol! Na ol inap kirap bihainim planti narapela tingting giaman bilong Satan. Ol king bilong graun inap pulim ol long lotuim ol giaman god. Ol man i lotuim giaman god ol i ting ol samting ol inap lukim long ai—olsem ol god ol i wokim long diwai na ston—ol i samting tru na ol inap bilip long ol, winim God em ol i no inap lukim, em Jehova, husat i bin wokim olgeta samting. Tasol olsem aposel Pol i tok, ol imis i “samting nating.” (1 Kor. 8:4) Ol i no inap lukluk, harim, toktok, o mekim wanpela samting. Yu inap lukim ol na tatsim ol, tasol sapos yu lotu long wanpela, tru tumas, yu bihainim ol samting nating tasol—em ol samting i no gat as bilong en na i kamapim bagarap tasol.—Sng. 115:4-8.
MAS 14-20
GUTPELA SAVE I KAM LONG BAIBEL | 1 SAMUEL 14-15
“Pasin Bilong Bihainim Tok i Winim Pasin Bilong Mekim Ofa”
Jehova i Laikim Tru Pasin Bilong Yu Long Bihainim Tok
4 Jehova em i Man Bilong Wokim olgeta samting, olsem na olgeta samting bilong skin yumi holim i bilong em. Sapos olsem, yu ting i gat wanpela samting yumi inap givim long em? Yes, yumi inap givim em samting i dia tumas. Em wanem samting? Yumi ken kisim bekim long dispela skripsa: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Yumi ken bihainim tok bilong God. Maski sindaun na pasin yumi bin go bikpela long en i narapela narapela, long rot bilong bihainim tok yumi wan wan i ken bekim dispela tok Satan i sutim long ol man olsem ol man i no inap stap gut long God sapos hevi i painim ol. Em i wanpela gutpela samting yumi ken mekim!
it-2 521 par. 2
Bihainim Tok
Yumi mas bihainim tok, sapos yumi no mekim olsem, God i no inap orait long yumi. Olsem tok Samuel i givim long King Sol: “Yu ting Jehova i laikim tasol ol ofa bilong paia i kukim olgeta na ol sakrifais? O Jehova i laik yumi bihainim tok bilong em? Harim! Pasin bilong bihainim tok i winim pasin bilong mekim sakrifais. Na pasin bilong harim tok em i winim ol gris bilong ol sipsip.” (1Sm 15:22) Sapos man i no bihainim tok bilong Jehova, dispela i kamapim klia olsem em i no bilip o trastim ol dispela tok, na tu, em i no bilip long Man i kamapim ol dispela tok. Olsem na man i no save bihainim tok i wankain long man i mekim wok glasman o lotuim ol giaman god. (1Sm 15:23; skelim Ro 6:16.) Yumi no ken tok tasol olsem yumi bilip, nogat, yumi mas mekim ol samting bilong soim bilip bilong yumi; sapos yumi no bihainim ol tok yumi kisim, i olsem yumi no bilipim ol dispela tok o yumi no rispektim man i kamapim ol dispela tok. (Mt 21:28-32) Ol lain husat i amamas long harim na kisim save long tok tru bilong God, tasol ol i no mekim samting ol i kisim save long en, ol i giamanim ol yet wantaim tingting kranki bilong ol na ol bai i no kisim blesing. (Jem 1:22-25) Pikinini bilong God i kamapim klia olsem maski ol lain i mekim samting i wankain long ol samting em i tokim ol long en, tasol sapos ol i no gat stretpela tingting na mekim, ol bai i no inap go insait long Kingdom bilong God.—Mt 7:15-23.
Mekim Wok Painimaut
it-1 493
Pasin Sori
Sapos yumi pret long ol man na yumi mekim pasin sori long wanpela maski em i no laikim God, dispela inap kamapim bikpela hevi. Dispela i tru taim yumi skelim samting i painim King Sol. Taim i kamap long God i mekim stretpela kot bilong em long bagarapim lain Amalek, em ol fes lain long pait long lain Israel bihain long ol i lusim Isip. God i tokim Sol long no ken sori long ol. Tasol Sol i laik amamasim ol man i stap aninit long wok bos bilong em, na em i no bihainim olgeta tok Jehova i givim long em. Olsem na Jehova i rausim wok king bilong Sol. (1Sm 15:2-24) Sapos man i laikim tru stretpela pasin bilong Jehova na putim pasin bilong stap gut long Em i stap nambawan, God bai orait long em na em i no inap kisim hevi olsem Sol.
MAS 21-27
GUTPELA SAVE I KAM LONG BAIBEL | 1 SAMUEL 16-17
“Dispela Pait Em i Pait Bilong Jehova Yet”
“Bikpela Yet Bai i Winim Dispela Pait”
Devit i stori long Sol long samting em i bin mekim taim laion na bea i laik kaikai ol sipsip. Yu ting em i laik kisim biknem? Nogat. Devit i save long risen na em i winim dispela pait. Em i tok: “Bikpela i bin helpim mi, olsem na ol laion na bea i no bin bagarapim mi. Na nau tu em bai i helpim mi, na dispela Filistia bai i no inap kilim mi i dai.” Ol dispela tok i strongim bel bilong Sol na em i tok: “Gutpela, yu ken i go. Na Bikpela i ken i stap wantaim yu.”—1 Samuel 17:37.
Olsem wanem? Yu laik kisim wankain bilip olsem bilong Devit? Tingim, i gat as na Devit i bilip na i no olsem em i tingting tasol o em i gat laik long mekim. Em i bilip long God, long wanem, em i kisim save long em na em i lukim ol samting God i bin mekim bilong helpim em. Em i save olsem Jehova em Man bilong lukautim em na Man bilong truim ol tok promis bilong em. Sapos yumi laik kisim dispela kain bilip, yumi mas wok yet long kisim save long God em Man i as bilong ol tok bilong Baibel. Taim yumi bihainim ol tok yumi kisim save long en, ol gutpela samting bai kamap na dispela bai strongim bilip bilong yumi.—Hibru 11:1.
“Bikpela Yet Bai i Winim Dispela Pait”
Long nau, Devit i stap olsem gutpela eksampel long pasin bilong bilip em yumi ken bihainim. Tingim olsem dispela yangpela man i singaut long Goliat: “Yu holim bainat na ol spia na yu kam pait long mi. Tasol mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en.” Devit i save olsem strong bilong man na ol samting ol i yusim bilong pait i samting nating. Goliat i no rispektim God Jehova, olsem na Jehova bai mekim sampela samting long bekim tok bilong em. Devit i tok: “Bikpela yet bai i winim dispela pait.”—1 Samuel 17:45-47.
Devit i luksave olsem Goliat i traipela man tru na em i gat ol samting bilong pait. Tasol Devit i no larim ol dispela samting i mekim em i pret. Em i no mekim wankain popaia olsem Sol na lain ami bilong em. Devit i no skelim em yet wantaim Goliat, nogat. Em i tingim strong bilong Goliat na strong bilong Jehova. Goliat em i longpela klostu 3 mita, em i traipela man tru winim olgeta man, tasol yu ting em i winim King bilong heven na graun? Nogat. Em i wankain olsem olgeta narapela man, em i olsem wanpela binatang em Jehova inap long bagarapim!
“Bikpela Yet Bai i Winim Dispela Pait”
Long nau, ol wokman bilong God i no insait long wanpela pait tru. Dispela taim bilong pait i pinis. (Matyu 26:52) Maski i olsem, yumi laik bihainim pasin bilong Devit long bilip. Olsem Devit, yumi laik tingim Jehova olsem God i stap tru, na yumi laik daun long em na lotuim em wanpela tasol. Sampela taim, yumi pilim olsem yumi no inap long karim ol hevi bilong yumi, tasol Jehova i gat bikpela strong na em bai helpim yumi long karim ol hevi. Sapos Jehova i stap olsem God bilong yumi na yumi bilip long em olsem Devit i bin mekim, orait i no gat wanpela hevi o wanpela samting bai traim bilip bilong yumi na yumi lusim God. Tru tumas Jehova i gat olgeta strong winim bilong ol man!
Mekim Wok Painimaut
it-2 871-872
Sol
Bihain long dispela samting na bihain long God i makim Devit olsem man husat bai kamap king bilong ol Israel, long dispela taim spirit bilong Jehova i lusim Sol. Kirap long dispela taim “Jehova i larim tingting nogut bilong em yet i bagarapim tingting bilong em na i mekim em i pret nogut tru.” Taim Jehova i larim spirit bilong em i lusim Sol, em i larim tingting nogut long bosim em, dispela i mekim na tingting na bel bilong Sol i no stap isi na em i belhat, na em i tingting tasol long mekim ol samting nogut. Sol i no bihainim tok bilong Jehova na dispela i kamapim olsem tingting na bel bilong em i tingting tasol long mekim pasin nogut, olsem na spirit bilong God i no lukautim em moa. Taim Jehova i rausim spirit bilong em na larim “tingting nogut” long bagarapim tingting bilong em na mekim em i pret nogut tru, Baibel i kolim olsem “Jehova i larim tingting nogut bilong em yet,” olsem na ol wokman bilong Sol i tok “God i larim tingting nogut bilong yu yet” i bagarapim yu. Wanpela wokman bilong em i tok, na Sol i askim long Devit i ken kam stap long haus king na pilaim musik taim “tingting nogut” i laik daunim em.—1Sa 16:14-23; 17:15.
MAS 28–EPRIL 3
GUTPELA SAVE I KAM LONG BAIBEL | 1 SAMUEL 18-19
“Mekim Yet Pasin Daun Long Taim Yu Kisim Ol Blesing”
Bilip Long Spirit Bilong God Taim Ol Senis i Kamap Long Laip Bilong Yu
4 I no longtaim na dispela mangi bilong was long ol sipsip bai kamap man i gat biknem. Ol i singautim em long kam na stap olsem boi bilong king na bilong mekim musik king i ken harim. Em i kilim i dai soldia Goliat, wanpela traipela man bilong pait strong tru, em ol strongpela soldia bilong Israel ol i pret long pait wantaim em. Ol i makim Devit long go pas long ol soldia, na em i winim ol Filistia long pait. Ol manmeri i laikim em. Ol i kamapim ol singsing i givim biknem long em. Pastaim, wanpela wokman bilong King Sol i tok Devit “i save tumas long paitim musik. Na em i gutpela strongpela man bilong pait. Na em i man bilong mekim gutpela tok na i luk naispela tru.”—1 Samuel 16:18; 17:23, 24, 45-51; 18:5-7.
Pasin Bilong Ol Stretpela Man na Ol Man Nogut
6 Sampela manmeri i kisim pasin antap bikos ol i luk nais, planti lain i save long ol, ol i gat save long singsing o pilaim musik, ol i gat strong, o ol i holim bikpela namba. Devit i gat olgeta dispela samting, tasol em i bihainim pasin daun long laip olgeta bilong em. Bihain long Devit i kilim Goliat, King Sol i tok orait long Devit i ken maritim pikinini meri bilong em. Tasol Devit i tok: “Maski, mi no inap maritim em. Mi man nating tasol. Na tu ol lain famili bilong mi i no gat nem. Olsem na mi no inap maritim pikinini meri bilong yu.” (1 Sml. 18:18) Wanem samting i helpim Devit long i gat pasin daun? Devit i gat gutpela save, ol gutpela pasin, na em i holim ol wok i gat namba. Tasol em i no kisim pasin antap bikos em i save olsem God “i save lukluk i kam daun” long em na helpim em. (Sng. 113:5-8) Devit i save olsem olgeta gutpela samting em i kisim, ol i kam long Jehova.—Skelim 1 Korin 4:7.
7 Wankain olsem Devit, ol manmeri i lotuim Jehova i save soim pasin daun. Jehova em nambawan Man long heven na graun, na yumi amamas long save olsem em i save bihainim pasin daun. (Sng. 18:35) Yumi amamas long bihainim dispela gutpela tok kaunsel: “Yupela i mas kisim bikpela pasin sori, pasin helpim, pasin daun, pasin isi, na pasin bilong i no les kwik.” (Kol. 3:12) Na tu, yumi save olsem man i gat pasin laikim, “em i no save hambak, [na] em i no gat pasin antap.” (1 Kor. 13:4) Taim yumi mekim pasin daun, ol narapela bai luksave long gutpela pasin bilong yumi na ol bai amamas long kisim save long Jehova. Ol maritmeri i save daun long man bilong ol na soim pasin rispek, na man i lukim gutpela pasin bilong ol meri bilong ol na kamap bilipman. Olsem tasol, taim ol manmeri bilong God i bihainim pasin daun, ol narapela bai lukim pasin bilong ol na ol bai kam insait long tok i tru.—1 Pita 3:1.
Mekim Wok Painimaut
it-2 695-696
Profet
Tru spirit bilong Jehova i makim ol profet, tasol dispela i no makim olsem oltaim spirit bilong God i stiaim olgeta tok ol i mekim, nogat. Spirit bilong God ‘i kam i stap long ol’ insait long sampela haptaim, na helpim ol long kliagut long tok ol bai autim. (Ese 11:4, 5; Mai 3:8) Dispela i save stiaim ol long mekim sampela samting, kirapim ol long autim tok. (1Sm 10:10; Jer 20:9; Am 3:8) Tru tumas, samting ol i mekim, tok ol i autim, na pasin ol i bihainim i narapela kain tru, em ol samting we wanpela man yet i no inap long mekim. Dispela i helpim yumi long save wai na sampela i “mekim pasin olsem ol profet.” (1Sm 10:6-11; 19:20-24; Jer 29:24-32; skelim Ap 2:4, 12-17; 6:15; 7:55) Ol i putim olgeta tingting i go long wok ol bai mekim, olsem na ol toktok na pasin ol i bihainim i narapela kain long ol narapela man, wankain olsem profet husat i go kamap long ol kepten bilong ami na makim Jehu long kamap king. Tru tumas, taim ol man i luksave olsem em wanpela profet, ol i bilipim tok bilong em. (2Ki 9:1-13; skelim Ap 26:24, 25.) Taim Sol i ronim Devit, em i ‘mekim pasin olsem wanpela profet,’ em i brukim klos bilong em na “em i slip skin nating long dispela de olgeta na long nait tu,” ating insait long dispela haptaim Devit i ranawe. (1Sm 19:18–20:1) Dispela i no makim olsem ol profet i save stap skin nating, long wanem, Baibel i tok dispela pasin i no stret. Long 2-pela narapela taim Baibel i stori olsem, profet i stap skin nating bilong givim skul long wanpela bikpela samting em dispela tok profet i makim. (Ai 20:2-4; Mai 1:8-11) Taim Sol i skin nating—yumi no save sapos dispela i makim olsem em wanpela man nating, em i no laik werim klos bilong king, em i no laik daun long man Jehova i makim bilong mekim wok king, o i gat sampela narapela risen—Baibel i no stori bilong dispela.
EPRIL 4-10
GUTPELA SAVE I KAM LONG BAIBEL | 1 SAMUEL 20-22
“Hau Bai Yu Inap Stap Gutpela Pren”
Strongim Pasin Pren Paslain Long Pinis i Kamap
18 Long nau ol bratasista bilong yumi i bungim kain kain hevi. Planti bilong ol i karim hevi i kamap long rot bilong ol disasta o hevi ol man yet i kamapim. Long kain taim olsem, sampela bilong yumi inap kisim ol bratasista i kam stap long haus bilong yumi. Sampela bilong yumi inap helpim ol long sait bilong mani. Tasol yumi olgeta inap askim Jehova long helpim ol bratasista bilong yumi. Sapos yumi harim olsem wanpela brata o sista i bel hevi, ating yumi no inap save long wanem tok o pasin i stret long yumi ken mekim. Tasol yumi olgeta inap givim helpim. Yumi inap lusim sampela haptaim long stap wantaim ol. Yumi ken putim gut yau taim ol i toktok. Na yumi ken stori long wanpela skripsa yumi laikim na i mekim gut bel bilong yumi. (Ais. 50:4) Bikpela samting moa em olsem, yu stap wantaim ol pren taim ol i nidim yu.—Ritim Provep 17:17.
Bihainim Ol Tok Bilong Jehova
7 God i laik yumi stap olsem gutpela pren ol narapela inap bilip long em. (Snd. 17:17) Jonatan, pikinini man bilong King Sol, i kamap pren bilong Devit. Taim Jonatan i harim olsem Devit i bin kilim i dai Goliat, Jonatan “i givim bel bilong en moa yet long Devit na em i laikim Devit tru olsem em i laikim em yet.” (1 Sml. 18:1, 3) Na Jonatan i givim tok lukaut long Devit taim Sol i laik kilim Devit i dai. Taim Devit i ranawe pinis, Jonatan i go bungim em na i mekim wanpela kontrak wantaim em. Taim Jonatan i toktok long Sol long ol samting bilong Devit, Sol i laik kilim Jonatan i dai, tasol tupela pren i bung gen na strongim pasin pren bilong ol. (1 Sml. 20:24-41) Taim ol i bung long laspela taim, Jonatan i strongim Devit long “bilip strong long God.”—1 Sml. 23:16-18.
Holimpas Pasin Pren Namel Long Ol Manmeri i No Gat Pasin Laikim
11 Stap gut long narapela. Solomon i tok: “Ol gutpela pren i save laikim yumi long olgeta taim. [Na ol i olsem] ol brata i save sambai long helpim yumi long taim bilong hevi.” (Snd. 17:17) Taim Solomon i raitim ol dispela tok, ating em i tingim pasin pren i stap namel long papa bilong en, Devit, na Jonatan. (1 Sml. 18:1) King Sol i laik bai pikinini man bilong em Jonatan i kisim ples bilong em na kamap king bilong Israel. Tasol Jonatan i save olsem Jehova i bin makim Devit long kamap king, na Jonatan i wanbel long dispela samting. Jonatan i no olsem Sol, em i no bel nogut long Devit. Em i no kros olsem Devit i kisim biknem long ai bilong ol manmeri, na em i no bilipim ol tok giaman Sol i mekim bilong bagarapim gutnem bilong Devit. (1 Sml. 20:24-34) Olsem wanem? Yumi kain olsem Jonatan? Taim ol pren bilong yumi i kisim sampela wok insait long kongrigesen, yumi save amamas long ol? Taim ol i karim hevi, yumi save mekim gut bel bilong ol na helpim ol? Taim yumi harim ol narapela i tok baksait long ol, yumi hariap long bilipim dispela tok baksait? O, olsem Jonatan, yumi laik stap gut long ol pren bilong yumi na sambai long ol?
Mekim Wok Painimaut
Sampela Bikpela Tok Bilong Buk Namba 1 Samuel
21:12, 13. Jehova i laik bai yumi mekim wok long tingting na save bilong yumi long karim ol hevi long i stap bilong yumi. Em i givim Baibel long yumi, na Baibel i save kamapim gutpela tingting na save. (Sindaun 1:4) Yumi inap kisim helpim tu long ol elda Kristen.
EPRIL 18-24
GUTPELA SAVE I KAM LONG BAIBEL | 1 SAMUEL 23-24
“Wet Long Jehova na No Ken Les Kwik”
Bilip Long Spirit Bilong God Taim Ol Senis i Kamap Long Laip Bilong Yu
8 Devit i tok nogat long mekim nogut long Sol. Em i bihainim pasin bilong bilip na pasin bilong isi na no ken les kwik, em i orait long larim ol dispela samting i stap long han bilong Jehova. Taim king i lusim pinis dispela bikpela hul, Devit i singaut long em olsem: “Bikpela yet i ken skelim pasin bilong mitupela na makim husat i mekim rong. Em i ken mekim save long yu bilong bekim dispela pasin nogut yu bin mekim long mi. Tasol mi yet mi no inap mekim nogut long yu.” (1 Samuel 24:12) Devit i save pinis olsem Sol i no mekim stretpela pasin long em, tasol em yet i no bekim rong long Sol; na tu em i no toknogutim em o tok baksait long em. Long sampela narapela taim Devit i no kirap na bekim rong long ol narapela. Nogat. Em i larim Jehova long stretim ol dispela samting.—1 Samuel 25:32-34; 26:10, 11.
Ol Hevi Long Sindaun Bilong Yu i Bosim Laip Bilong Yu?
Namba 3 samting i olsem: Yumi no ken mekim ol samting i no stret wantaim tok bilong Baibel bambai ol hevi bilong yumi i ken pinis, nogat. Yumi mas wetim Jehova. Disaipel Jems i tok: “Oltaim yupela i mas sanap strong na karim hevi, bai dispela pasin i ken kamap strong tru long yupela. Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.” (Jems 1:4) Yumi mas karim hevi bilong yumi i go inap long pinis, olsem bai pasin bilong sanap strong na karim hevi “i ken kamap strong tru” long laip bilong yumi na yumi no mekim ol samting i no stret wantaim Baibel bilong pinisim kwik dispela hevi. Olsem na bai yumi traim bilip bilong yumi, em i strong o nogat, na yumi mekim i kamap gutpela moa, na bai strong bilong en long helpim yumi i kamap ples klia. Josep na Devit i gat dispela kain pasin bilong sanap strong na karim hevi. Ol i no wok long painim rot bilong stretim hevi em ating Jehova bai i no orait long en, nogat. Ol i wok wantaim ol hevi bilong ol. Ol i wetim Jehova, olsem na em i mekim gut tru long ol! Jehova i mekim wok long rot bilong tupela long kisim bek lain bilong Em na soim rot long ol.—Stat 41:39-41; 45:5; 2 Samuel 5:4, 5.
Sampela taim hevi inap bungim yumi tu na yumi laik painim sampela rot i no stret wantaim tok bilong Baibel bambai yumi ken stretim dispela hevi. Olsem: Ating yu bel hevi, long wanem yu no painim yet wanpela poroman bilong marit long en? Sapos olsem, orait givim baksait long ol traim i laik kirapim yu long sakim tok bilong Jehova long “maritim man i bilip long Bikpela” tasol. (1 Korin 7:39) Yu gat sampela hevi long marit bilong yu? Yu no ken bihainim tingting bilong dispela graun i laik kirapim ol marit long lusim poroman na katim marit. Yu mas wok gut wantaim poroman bilong yu long stretim hevi bilong yutupela. (Malakai 2:16; Efesus 5:21-33) Olsem wanem? Yu sot long mani na yu gat hatwok long lukautim famili bilong yu? Sapos yu wetim Jehova, bai yu no wok long mekim sampela samting i no stret long lo bilong gavman na bai yu inap painim mani. (Song 37:25; Hibru 13:18) Tru tumas, yumi olgeta i mas wok strong long karim ol hevi long sindaun bilong yumi na mekim yet wok bilong yumi na bai Jehova i ken mekim gut long yumi. Taim yumi wok long mekim olsem, yumi mas strong long wetim Jehova i kamapim klia gutpela rot tru bilong stretim ol dispela hevi.—Maika 7:7.
Mekim Wok Painimaut
No Ken Larim Wanpela Samting i Pasim Yu Long Kisim Prais
11 Sapos yumi gat pasin laikim na pasin helpim, yumi no inap jeles long ol narapela. Baibel i tok: “Man i gat pasin laikim em i no save les kwik, na em i save mekim gutpela pasin. Em i no save jeles.” (1 Kor. 13:4) Yumi mas sakim pasin bilong jeles long ol narapela. Yumi laik wok strong long holim wankain tingting olsem bilong God long ol bratasista bilong yumi, na tingim olsem yumi olgeta i stap olsem ol wanbilip. Dispela bai helpim yumi long amamas wantaim ol narapela, na dispela i stret wantaim tok bilong Baibel, em i tok: “Sapos wanpela hap bilong bodi i kisim biknem, orait olgeta arapela hap bilong bodi i amamas wantaim em.” (1 Kor. 12:16-18, 26) Yumi bai amamas wantaim ol narapela taim ol i kisim ol blesing na yumi no inap jeles. Tingim eksampel bilong Jonatan, em pikinini bilong King Sol. Em i no jeles taim God i makim Devit long kamap king. Em i strongim Devit. (1 Sml. 23:16-18) Yumi ken bihainim pasin bilong Jonatan na kamapim pasin laikim na pasin helpim.
EPRIL 25–ME 1
GUTPELA SAVE I KAM LONG BAIBEL | 1 SAMUEL 25-26
“Yu Save Kirap Kwik Long Mekim Samting?”
Em i Bihainim Savetingting
Ol soldia bilong Devit ol i save mekim wanem kain pasin long ol wasman bilong sipsip? Ating sampela taim i no hatwok long ol i stilim wanpela sipsip bilong kaikai, tasol ol i no mekim olsem. Ol i lukautim gut ol sipsip na wokman bilong Nabal na bai i no gat samting i ken bagarapim ol. (1 Samuel 25:15, 16) I gat planti samting inap bagarapim ol sipsip na ol wasman bilong ol. Planti wel dok nogut na laion samting i raun na painim abus bilong ol. Na boda bilong Israel long hap saut i stap klostu, olsem na i gat ol lain bilong ol narapela kantri olsem ol raskol i save kam pait na stilim nabaut ol sipsip samting.
Yumi save, em i no isi long Devit i painim kaikai bilong bikpela lain bilong em long ples drai nating. Olsem na wanpela taim Devit i salim 10-pela man i go long Nabal bilong askim em long givim helpim. Long savetingting Devit i makim wanpela taim i stret bilong singaut long kisim helpim. Em taim bilong katim gras bilong ol sipsip na ol i save amamas na mekim gut long ol man na mekim ol bikpela kaikai. Na Devit i skelim gut ol tok em i mekim, olsem gutpela tok i soim rispek. Na em i kolim Nabal olsem “papa,” ating bilong makim olsem em i rispek long Nabal, em i gat bikpela krismas moa long Devit. Orait Nabal i mekim wanem?—1 Samuel 25:5-8.
Em i belhat nogut tru! Olsem yangpela man i bin kamapim long Abigel, “[Nabal] i givim tok nogut long ol.” Nabal i bikmaus na komplein, long wanem, em i no laik givim gutpela bret, wara, na abus long ol. Em i tok bilas long Devit olsem em i pipia nating na i kolim em olsem wanpela wokboi i ranawe long bos bilong em. Ating tingting bilong Nabal i wankain olsem bilong Sol, em i bel nogut tru long Devit. Tupela wantaim i no gat tingting olsem bilong Jehova. God i laikim tumas Devit na em i no tingim Devit olsem wanpela wokboi nating i bikhet na ranawe—em i tingim Devit olsem man bihain bai kamap king bilong Israel.—1 Samuel 25:10, 11, 14.
Em i Bihainim Savetingting
Abigel i putim asua bilong dispela hevi i go long em yet, na em i askim Devit long lusim tingting long rong bilong em. Em i tokaut olsem man bilong em Nabal em i krankiman olsem nem bilong em i makim, na ating em i kamapim olsem Devit i bikman tumas long krosim kain krankiman olsem. Em i tok em i bilip olsem Devit em i mausman bilong Jehova, na em i save olsem Devit i mekim ol pait bilong Jehova. Na Abigel i soim olsem em i save long tok promis bilong Jehova long Devit bai kamap king, long wanem, em i tok: “Bikpela bai i mekim yu i kamap king . . . bilong Israel.” Na em i tokim Devit long em i no ken mekim wanpela samting na bai em i gat asua long kilim man i dai o i ‘mekim em i bel hevi o mekim em i sem’—olsem bel bilong Devit bai i kotim em. (1 Samuel 25:24-31) Em i mekim ol gutpela tok stret!
Mekim Wok Painimaut
Em i Bihainim Savetingting
Orait yu ting Abigel i mekim pasin bikhet long man bilong em, em het bilong famili? Nogat. Nabal i bin mekim pasin nogut tru long wokman em Jehova i bin makim bilong kamap king, na planti man long haus bilong Nabal em ol i no gat asua, ol bai kisim bagarap long dispela. Sapos Abigel i no kirap long mekim wanpela samting, ating em bai i gat asua wantaim man bilong em, a? Olsem na em i mas putim pasin bilong daun long God i stap namba wan, winim pasin bilong stap daun long man bilong em.