Ol Referens Bilong Laip na Wok Autim Tok Miting Wok Buk
SEPTEMBA 5-11
GUTPELA SAVE I KAM LONG BAIBEL | 1 KING 9-10
“Litimapim Nem Bilong Jehova Long Savetingting Bilong Em”
Em i Go Lukim King na Kisim Planti Gutpela Samting
Taim kwin i bungim Solomon, em i kirap long traim save bilong em na i kamapim “ol askim i hat tumas.” (1 King 10:1) Yumi ken tanim tok Hibru ol i mekim wok long en long hia olsem “tok bokis.” Tasol dispela i no makim olsem kwin i kirapim Solomon long insait long toktok i no gat as bilong en. Long Song 49:4, ol i mekim wok long dispela wankain tok Hibru bilong makim ol bikpela askim long ol samting bilong sin, indai, na long pasin bilong kisim bek ol man long sin na dai. Olsem na ating kwin bilong Seba i toktok wantaim Solomon long ol strongpela tok i traim save bilong em. Baibel i tok, kwin i “askim Solomon long olgeta askim em i bin tingting long askim.” Na Solomon i “bekim stret olgeta askim bilong en. I no gat wanpela askim i hat tumas long Solomon. Nogat tru.”—1 King 10:2b, 3.
Taim Man i Givim Planti Samting
Kwin i amamas tru long harim ol dispela tok na lukim ol samting, na long pasin daun em i bekim tok olsem: “Ol dispela ofisa bilong yu i save stap wantaim yu, ating ol tu i save amamas, long wanem, oltaim ol i save harim gutpela tingting bilong yu.” (1 King 10:4-8) Maski ol ofisa bilong Solomon i stap long wanpela hap i gat planti mani kago samting, olsem na ol i amamas, kwin i no tok long dispela as ol ofisa bilong Solomon i amamas, nogat. Ol ofisa bilong Solomon i bin stap gut tru, long wanem, oltaim ol inap harim ol gutpela tingting bilong Solomon, em God i as bilong en. Kwin bilong kantri Seba i stap olsem gutpela piksa ol manmeri bilong Jehova long nau inap bihainim, ol inap amamas long ol gutpela tingting na save bilong Man bilong wokim olgeta samting na Pikinini bilong em, Krais Jisas!
Em i Go Lukim King na Kisim Planti Gutpela Samting
Kwin bilong Seba i kirap nogut tru long gutpela save bilong Solomon na long planti gutpela samting bilong kantri bilong em, olsem na “em i kirap nogut tru na em i no gat tok.” (1 King 10:4, 5) Sampela i ting olsem dispela tok i makim olsem kwin i ‘no inap long toktok.’ Wanpela saveman i tok, ating ai bilong kwin i raun na em i pundaun. Tasol maski wanem samting i bin kamap, kwin i kirap nogut long ol samting em i lukim na harim. Em i tok, ol wokboi bilong Solomon ol i ken amamas, long wanem, ol inap harim gutpela tingting bilong king. Na kwin i litimapim nem bilong Jehova, long wanem, em i bin makim Solomon long kamap king. Em i givim ol presen i gat bikpela pe long king, pe bilong gol tasol em i givim long king i olsem 86 milion kina. Solomon tu i givim “planti gutpela samting long kwin bilong Seba, bilong inapim laik bilong kwin.”—1 King 10:6-13.
Mekim Wok Painimaut
Yu Save Long Dispela?
King Solomon i gat hamas gol?
Baibel i tok King Hiram bilong Tair i bin salim 4-pela ton gol i go long Solomon, na kwin bilong Seba i givim klostu wankain skel bilong gol long Solomon, na ol sip bilong Solomon i go long Ofir na bringim 14 ton gol i kam. Baibel i tok: “Olgeta yia Solomon i save kisim samting olsem 23 ton gol.” (1 King 9:14, 28; 10:10, 14) Yu ting yumi inap bilipim dispela tok bilong Baibel? Long dispela taim bipo, ol king i holim hamas gol?
Wanpela olpela rait em ol saveman i painim na ol i ting ol tok bilong en i tru, dispela rait i tok, Fero Tutmos Namba 3 bilong Isip (winim 1,000 yia paslain long Krais) i bin givim 13.5 ton gol long tempel bilong Amun-Ra long Karnak. Inap 700 yia samting paslain long Krais, king bilong Asiria, em Tiklat Pileser Namba 3 i singaut long takis na ol Tair i givim gol winim 4-pela ton long em, na Sargon Namba 2 i givim wankain skel bilong gol long ol god bilong Babilon. Ol i tok olsem long olgeta yia King Filip Namba 2 bilong Masedonia (359-336 B.C.E.) i save kisim gol winim 28 ton long ol main bilong Pangeam long Tres.
Taim pikinini man bilong Filip, em Bikpela King Aleksander (336-323 B.C.E.) i kisim Susa, em biktaun bilong Persia, ol i tok em i bin kisim 1,108 ton gol long dispela biktaun na klostu 7,000 ton gol long olgeta hap bilong kantri Persia. Olsem na taim ol man i skelim ol dispela tok wantaim tok bilong Baibel, stori Baibel i mekim long gol bilong King Solomon i no wanpela tok nating.
SEPTEMBA 12-18
GUTPELA SAVE I KAM LONG BAIBEL | 1 KING 11-12
“Bihainim Savetingting Long Makim Poroman Marit”
“Husat Man i Laik Bihainim Bikpela?”
7 Yumi inap kisim planti gutpela skul long stori bilong King Solomon. Taim Solomon i yangpela mangi, em i save lukluk i go long Jehova long kisim ol tok bilong stiaim em. God i givim em gutpela savetingting na tokim em long wokim wanpela naispela tempel long Jerusalem. Tasol Solomon i sakim tok bilong God na em i no stap moa olsem pren bilong em. (1 Kin. 3:12; 11:1, 2) Lo Bilong God i tambuim king bilong ol Hibru long “maritim planti meri, long wanem, ol bai i mekim em i givim baksait long Bikpela.” (Lo 17:17) Tasol Solomon i sakim tok na maritim 700 meri. Na tu, em i gat 300 namba 2 lain meri. (1 Kin. 11:3) Planti bilong ol dispela meri i no bilong lain Israel na ol i save lotuim ol god giaman. Solomon i sakim lo bilong God na i maritim ol meri bilong ol narapela kantri.—Lo 7:3, 4.
Hau Bai Yu Inap Lukautim Bel?
6 Satan i laik bai yumi bihainim tingting na pasin bilong em—em i bikhet na tingim laik bilong em yet tasol na em i sakim ol lo bilong Jehova. Satan i no inap fosim yumi. Olsem na em i yusim ol poroman nogut bilong pulim yumi long bihainim tingting na pasin bilong em. Yumi stap namel long ol manmeri em ol i bihainim pasin bilong Satan. (1 Jon 5:19) Satan i laik bai yumi bung wantaim ol poroman nogut maski yumi save olsem ol bai “bagarapim,” o posinim, tingting na pasin bilong yumi. (1 Kor. 15:33) King Solomon i bung wantaim ol poroman nogut. Em i maritim planti haiden meri, na ol i “strong long pulim tingting bilong em” na “isi isi ol . . . i pulim tingting bilong em i go longwe” long Jehova.—1 Kin. 11:3; futnot.
“Husat Man i Laik Bihainim Bikpela?”
9 Jehova i save givim strafe long man i mekim rong. Baibel i tok: “God, Bikpela bilong Israel, i bin kamap tupela taim long Solomon na i tambuim em long lotu long ol giaman god. Tasol Solomon i sakim tok bilong Bikpela na i givim baksait long em. Olsem na Bikpela i kros long Solomon.” God i no orait long Solomon na sambai long em. Ol king i kamap long lain bilong Solomon, ol i no inap bosim lain Israel olsem wanpela lain olgeta, na bikpela hevi i painim ol lain tumbuna i kamap bihain.—1 Kin. 11:9-13.
Mekim Wok Painimaut
Rot i Op Long God Inap Orait Long Em
Rehoboam i lukim olsem lain Israel i bikhet na i bruk 2-pela lain, olsem na em i bungim ol soldia bilong em. Tasol Jehova i salim profet Semaia long i go na tokim Rehoboam: “Yupela i no ken i go pait long ol Israel, em ol wantok bilong yupela. Nogat. Yupela olgeta i mas i go bek long ples bilong yupela, long wanem, mi yet mi mekim na ol Israel i bruk na lusim yupela.”—1 Kin. 12:21-24.
Tingim, God i tokim Rehoboam long em i no ken i go pait. Ating dispela i bagarapim tru bel bilong Rehoboam! Ol manmeri bai ting olsem wanem long dispela king? Rehoboam i tok long “kisim strongpela wip na paitim” ol man em i bosim, tasol nau em i no mekim wanpela samting. (Skelim 2 Stori 13:7) Maski i olsem, Rehoboam wantaim ol soldia bilong em i bihainim tok bilong Jehova na “ol i go bek long ples bilong ol.”
Yumi kisim wanem skul long dispela stori? Em i savetingting long bihainim tok bilong God maski ol man inap tok bilas long yumi. Taim yumi bihainim tok bilong God, em bai orait long yumi na blesim yumi.—Lo 28:2.
Rehoboam i mekim wanem samting? Em i harim tok bilong God na em i no go pait long 10-pela lain Israel long hap not. Em i tokim ol wokman long strongim ol banis bilong ol taun i stap long Juda na Benjamin, em ol taun em i bosim. Rehoboam i mekim ol dispela taun i “kamap strong tru.” (2 Stori 11:5-12) Bikpela samting em olsem, em i bihainim ol lo bilong Jehova. Tenpela lain Israel i stap aninit long wok king bilong Jeroboam ol i insait tru long pasin bilong lotuim ol god giaman, tasol planti manmeri bilong 10-pela lain Israel i save go long Jerusalem na mekim lotu i tru. Dispela i “helpim Rehoboam i kamap strongpela king.” (2 Sto. 11:16, 17) Pasin bilong Rehoboam long bihainim tok i strongim wok bos bilong em.
SEPTEMBA 19-25
GUTPELA SAVE I KAM LONG BAIBEL | 1 KING 13-14
“Wai na Yu Mas Holim Tingting Olsem Ol Samting Yu Gat Pinis Em Inap?”
Stap Gut Long Jehova Wanpela Tasol
4 Orait nau Jeroboam i tokim profet: “Mi laik bai yu kam long haus bilong mi na kaikai wantaim mi. Na bai mi givim yu wanpela presen.” (1 Kin. 13:7) Profet bai mekim wanem? Em bai sakim dispela singaut bilong king, long wanem, nau tasol em i bin givim strongpela tok long king? (Sng. 119:113) O em bai go long haus bilong king na kisim presen, long wanem, i luk olsem king i tanim bel? Jeroboam i gat planti mani, olsem na em inap givim planti gutpela presen long ol pren bilong em. Sapos long pasin hait profet bilong God i bin kisim pasin bilong laikim tumas ol gutpela samting bilong skin, ating em bai hatwok long sakim dispela singaut. Tasol Jehova i bin tokim profet: ‘Yu no ken kaikai na dring wanpela samting na tu yu no ken bihainim dispela rot yu bin kam long en na go bek long ples. Yu mas bihainim narapela rot.’ Olsem na profet i tokaut klia long king olsem: “Maski sapos yu ting long tilim ol mani samting bilong yu long tupela hap na givim wanpela hap long mi, mi no inap i go long haus bilong yu na mi no inap kaikai na dring hia long Betel.” Orait profet i lusim Betel na i bihainim narapela rot na i go. (1 Kin. 13:8-10) Dispela disisen bilong profet i lainim yumi long wanem samting long pasin bilong stap gut long God?—Ro. 15:4.
Stap Gut Long Jehova Wanpela Tasol
15 Yumi inap kisim wanem skul moa long dispela pasin kranki bilong profet bilong Juda? Sindaun 3:5 i tok: “Bilip strong long Bikpela. Yu no ken ting save bilong yu yet inap helpim yu.” Pastaim dispela profet i bilip na wetim Jehova i stiaim em, tasol bihain em i larim tingting bilong em yet i stiaim em. Dispela pasin kranki i mekim na em i lusim laip bilong em na gutpela nem em i gat long ai bilong God. Samting i painim em i kamapim klia olsem yumi mas daunim yumi yet na stap gut long Jehova long wok bilong em yumi mekim!
Stap Gut Long Jehova Wanpela Tasol
10 Yumi ken ting olsem profet bilong Juda inap save olsem lapun profet i trikim em. Em inap askim em yet olsem: ‘Bilong wanem Jehova i salim wanpela ensel i go givim ol nupela tok long dispela lapun long ol samting mi mas mekim?’ Profet inap askim Jehova long kamapim klia dispela samting, tasol Baibel i no tok em i mekim olsem. Em “i go bek wantaim lapun long haus bilong em na i kaikai na dring.” Jehova i no orait long dispela. Taim profet bilong Juda i kirap gen na go bek long Juda, wanpela laion i bungim em na kilim em i dai. Sori tru! Em i no inap mekim wok moa olsem profet bilong God!—1 Kin. 13:19-25.
Mekim Wok Painimaut
Em i Save Lukim Gutpela Pasin Bilong Man
Bikpela samting em olsem, tok bilong 1 King 14:13 i skulim yumi long gutpela pasin bilong Jehova na long ol pasin em i wok long painim insait long yumi. Tingim, em i bin “lukim” gutpela samting long Abiya. I luk olsem Jehova i skelim bel bilong Abiya inap long Em i lukim gutpela pasin bilong em. Wanpela saveman i tok Abiya i olsem wanpela pel “i stap namel long ol liklik ston nating,” em i narapela kain long famili bilong em. Jehova i tingim dispela gutpela pasin na praisim em, em i marimari long dispela wanpela man tasol bilong wanpela famili nogut.
SEPTEMBA 26–OKTOBA 2
GUTPELA SAVE I KAM LONG BAIBEL | 1 KING 15-16
“Asa i Strongim Bel na Mekim Wok—Yu Mekim Wankain?”
“Bikpela i Lukim Wok Bilong Yupela na Mekim Gut Long Yupela”
Insait long 20 yia, bihain long Israel i bruk na kamap tupela kingdom, Juda i bagarap olgeta long pasin haiden. Taim Asa i kamap king long 977 B.C.E, ol lain long haus king i insait long pasin bilong lotuim god meri bilong ol Kenan. Tasol taim Baibel i stori long wok king bilong Asa, em i tok Asa i “mekim gutpela na stretpela pasin long ai bilong God.” Asa i “bagarapim ol ples bilong lotu long ol giaman god na em i brukim ol pos ston i gat piksa bilong ol giaman god na em i katim ol pos diwai i gat piksa bilong god meri Asera.” (2 Sto. 14:2, 3) Asa i rausim tu ‘ol man i gat wok long mekim pasin pamuk long ples bilong lotuim ol giaman god.’ Pasin bilong man long slip wantaim man em hap lotu bilong ol. Na Asa i mekim ol arapela samting tu. Em i kirapim ol manmeri long wok “strong long bihainim laik bilong God” na long “bihainim olgeta lo na tok bilong en.”—1 Kin. 15:12, 13; 2 Sto. 14:4.
Givim Bel Olgeta Long Mekim Wok Bilong Jehova!
7 Yumi olgeta wan wan i ken skelim yumi yet na painimaut sapos yumi givim bel tru long God o nogat. Askim yu yet, ‘Mi tingting strong long amamasim Jehova, sambai long lotu i tru, na abrusim ol pasin nogut we inap bagarapim pasin bilong ol manmeri bilong God?’ Asa i strongim bel tru na em inap rausim namba bilong Maka olsem “mama bilong king.” Ating i no gat wanpela Kristen i mekim wankain pasin olsem Maka, tasol sampela samting inap kamap na yu ken bihainim pasin bilong Asa. Bai yu mekim wanem sapos wanfamili bilong yu o wanpela gutpela pren i mekim sin na em i no tanim bel na i raus long kongrigesen? Bai yu tingting strong olsem yu no inap bung moa wantaim em? Bel bilong yu bai kirapim yu long mekim wanem?
it-1 184-185
Asa
Maski sampela taim Asa i no bihainim savetingting na kliagut long laik bilong God, planti taim em i mekim gutpela pasin na em i sakim pasin apostet, olsem na Baibel i kolim em olsem wanpela bilong ol gutpela king bilong Juda. (2St 15:17) Insait long 41-yia Asa i mekim wok king, i gat ol narapela 8-pela king tu i bosim Israel: Jeroboam, Nadap, Basa, Ila, Simri, Omri, Tipni (em i bosim wanpela hap na Omri i bosim narapela hap), na Ahap. (1Ki 15:9, 25, 33; 16:8, 15, 16, 21, 23, 29) Taim Asa i dai, pikinini man bilong em Jehosafat i kamap king.—1Ki 15:24.
Mekim Wok Painimaut
Yu Tingim God Em i Wanpela Man i Stap Tru?
Olsem: Kaunim tok profet i stori long strafe ol man i wokim gen Jeriko ol bai kisim, na tingim truim bilong en. Josua 6:26 i tok: “Josua i givim strongpela tok long ol manmeri olsem, ‘Sapos wanpela man i wokim gen dispela taun Jeriko, bai Bikpela i bagarapim em. Taim em i kirapim wok long dispela taun, bai namba wan pikinini man bilong en i dai. Na taim em i wokim ol bikpela dua bilong taun, bai las pikinini man bilong en i dai.’” Truim bilong dispela tok i kamap 500 yia bihain. Wan King 16:34 i tok: “Long taim Ahap i stap king, Hiel bilong taun Betel i wokim taun Jeriko gen. Taim Hiel i kirapim wok, orait Abiram, namba wan pikinini man bilong en, i dai. Na taim em i wokim ol bikpela dua bilong taun, orait Segup, las pikinini man bilong en, i dai. Dispela samting i kamap long Hiel, em inapim dispela tok bipo Bikpela i bin mekim long maus bilong Josua, pikinini man bilong Nun.” Wanpela God i stap tru, em tasol inap kamapim kain tok profet olsem na mekim dispela tok i kamap tru.
OKTOBA 3-9
GUTPELA SAVE I KAM LONG BAIBEL | 1 KING 17-18
“Wanem Taim Bai Yupela i Gat Wanpela Tingting Tasol?”
Yu Mas Bilip Mekim Gutpela Disisen!
6 Taim lain Israel i kisim pinis Graun Bilong Promis, ol i mas mekim wanpela bikpela disisen: Ol bai lotuim Jehova o lotuim ol narapela god. (Ritim Josua 24:15.) I luk olsem i no hatwok long mekim dispela disisen. Tasol disisen bilong ol inap makim olsem ol bai stap laip o ol bai dai. Long haptaim we ol Hetman i bosim lain Israel, planti taim lain Israel i no mekim ol gutpela disisen. Ol i givim baksait long Jehova na lotuim ol giaman god. (Het. 2:3, 11-23) Sampela haptaim bihain, lain Israel i gat wok long mekim wanpela disisen. Profet Elaija i tok: Yupela i mas lotu long Jehova o lotuim giaman god Bal. (1 Kin. 18:21) Elaija i krosim ol manmeri bikos ol i paul long mekim disisen. Ating yu inap pilim olsem dispela disisen em isi long mekim bikos i stret long yumi mas lotuim Jehova. Man i gat stretpela tingting i no inap lotuim Bal o laikim dispela giaman god. Tasol lain Israel i holim “tupela tingting.” Elaija i kirapim ol long mekim disisen long lotuim Jehova—i stret long lotuim Jehova bikos em i winim tru olgeta narapela god.
Em i Sambai Long Lotu i Tru
Olsem na ol pris bilong Bal i strong moa, ol i “singaut strong moa na ol i kisim ol naip na ol sotpela bainat na ol i bihainim pasin bilong lotu bilong ol na katim nabaut skin bilong ol yet. Na blut i ran long bodi bilong ol.” Tasol ol dispela samting i no helpim ol! “I no gat bekim long beten bilong ol, na i no gat wanpela samting i kamap. Nogat tru.” (1 King 18:28, 29) Tru tumas, i no gat Bal. Em wanpela god giaman em Satan i bin kamapim bilong pulim ol man long lusim Jehova. Long dispela taim bipo na long nau tu, sapos man i makim narapela bosman na i no makim Jehova, em bai kisim bikpela bel hevi na sem.—Song 25:3; 115:4-8.
Em i Sambai Long Lotu i Tru
Paslain long Elaija i mekim beten, ating ol manmeri long dispela hap i tingting planti, Jehova bai wankain olsem giaman god Bal o nogat. Tasol taim em i beten pinis i no gat taim bilong tingting planti. Baibel i tok: “Bikpela i salim paia i kam daun. Na paia i kukim tru dispela ofa na ol paiawut na ol ston bilong alta na graun long arere bilong alta. Na wara long baret tu i drai olgeta.” (1 King 18:38) Man! Em i narapela kain bekim tru, a? Na ol manmeri i mekim wanem?
Mekim Wok Painimaut
w08 4/1 19, blok
Em i Was na Wet i Stap
Bikpela San Long Taim Bilong Elaija i Bin Stap Hamas Yia?
Elaija, em profet bilong Jehova, em i tokaut long King Ahap olsem dispela longpela taim bilong bikpela san klostu i laik pinis. Dispela samting i kamap long “namba 3 yia”—ating kirap long de Elaija i bin tokaut pastaim long taim nogut bilong bikpela san bai kamap. (1 King 18:1) Jehova i salim ren kwiktaim bihain long taim Elaija i tok Em bai mekim. Olsem na ating sampela bai ting dispela taim bilong bikpela san i pinis namel long namba 3 yia, na em i no stap 3-pela yia olgeta. Tasol Jisas na Jems wantaim i tok dispela bikpela san i bin stap “3 yia na 6 mun.” (Luk 4:25; Jems 5:17) Yu ting tupela tok i pait wantaim?
Nogat tru. Taim bilong san long Israel bilong bipo i bin stap longpela taim liklik, inap olsem 6-pela mun. Yumi ken ting taim dispela bikpela san i kalapim pinis 6-pela mun na i stap longpela taim pinis, long dispela taim Elaija i tokaut long Ahap long taim nogut bilong bikpela san bai kamap. Yumi ken tok, dispela taim nogut i bin kirap klostu 6-pela mun paslain. Olsem na taim Elaija i tokaut olsem taim bilong bikpela san bai pinis long “namba 3 yia” kirap long taim bilong namba wan tokaut bilong em, bikpela san i bin stap klostu olsem 3-pela yia na 6-pela mun. Dispela “3 yia na 6 mun” olgeta i pinis long taim olgeta manmeri i bung bilong lukim bikpela samting i kamap long maunten Karmel.
Olsem na yumi mas tingim dispela namba wan taim Elaija i bin go lukim Ahap. Ol manmeri i bilip olsem Bal i save “sindaun antap long ol klaut,” em dispela god bai salim ren i kam bilong pinisim taim bilong bikpela san. Sapos dispela taim nogut i stap longpela taim tumas, ating ol manmeri bai tingting, “Bal i stap we? Wanem taim bai em i salim ren i kam?” Olsem na taim Elaija i tokaut olsem ren na wara bilong nait i no ken kam daun long graun inap long taim em i tok, ating dispela i bagarapim stret bel bilong ol lain i lotuim Bal.—1 King 17:1.
OKTOBA 10-16
GUTPELA SAVE I KAM LONG BAIBEL | 1 KING 19-20
“Askim Jehova Long Mekim Gut Bel Bilong Yu”
Kisim Helpim Long Jehova Taim Yu Bel Hevi
5 Ritim 1 King 19:1-4. Elaija i pret taim Kwin Jesebel i laik kilim em. Olsem na em i ranawe i go long Berseba. Em i bel hevi tru na em “i askim long em i laik i dai.” Bilong wanem em i pilim olsem? Elaija em sinman “wankain olsem yumi.” (Jems 5:17) Ating bel hevi i daunim em tru na em i pilim olsem em i no gat strong. Ating Elaija i ting olsem hatwok bilong em long strongim lotu i tru bai lus nating, na lain Israel i no senisim pasin bilong ol, na em wanpela tasol i lotuim Jehova. (1 Kin. 18:3, 4, 13; 19:10, 14) Ating yumi kirap nogut long dispela profet i pilim olsem. Tasol Jehova i kliagut long filings bilong Elaija.
Em i Larim God i Mekim Gut Bel Bilong Em
Yu ting Jehova i pilim olsem wanem taim em i lukluk i kam daun na lukim gutpela profet bilong em i slip aninit long diwai long ples drai nating na em i gat laik long i dai tasol? Yumi save pinis long bekim bilong dispela askim. Taim Elaija i slip indai, Jehova i salim wanpela ensel i kam long em. Isi tasol ensel i holim Elaija na kirapim em, na i tok: “Yu kirap na kaikai.” Elaija i mekim olsem, long wanem, ensel i redim pinis naispela bret em ol i bin wokim nau tasol na wara. Yu ting em i bin tok tenkyu long ensel? Baibel i tok em i kaikai na dring, na bihain em i slip gen. Yu ting em i bel hevi na em i no laik toktok? Yumi no save, tasol ensel i kirapim em namba tu taim gen, ating long apinun. Em i tokim gen Elaija olsem, “Yu mas kirap na kaikai,” na em i tok moa, “sapos nogat, yu no inap wokabaut i go long longpela rot.”—1 King 19:5-7.
Em i Larim God i Mekim Gut Bel Bilong Em
Long dispela tripela samting, stori i kirapim yumi long tingim olsem Jehova i no stap insait long ol dispela narakain strong bilong graun. Elaija i save olsem Jehova i no wanpela God i stap long ol strong bilong graun, olsem Bal, em ol man i save lotuim em na litimapim em olsem “Man Bilong Bosim Ol Klaut,” o man bilong bringim ren. Jehova em i As bilong ol bikpela strong i bosim graun, tasol strong bilong em i winim tru olgeta samting em i bin wokim. Ples antap i no bikpela inap long em i ken i stap long en. (1 King 8:27) Tasol olsem wanem olgeta dispela samting i helpim Elaija? Tingim pret bilong em. God Jehova i stap long sait bilong em, na Jehova i gat bikpela strong tru bilong mekim ol samting, olsem na Elaija i no gat wok long pret long Ahap na Jesebel!—Song 118:6.
Em i Larim God i Mekim Gut Bel Bilong Em
Taim paia i pinis, ples i no gat pairap na Elaija i harim “nois olsem man i toktok isi tru.” Dispela nek i kirapim Elaija long kamapim gen tingting bilong em, na em i mekim olsem namba tu taim. Ating dispela i mekim gut moa bel bilong em. Tasol ating Elaija i pilim bel isi tru long samting dispela “nois olsem man i toktok isi tru” i tokim em bihain. Jehova i tokim Elaija olsem em i gutpela tru long ai bilong Em. Olsem wanem Jehova i mekim olsem? God i kamapim klia ol samting em i tingting pinis long mekim bilong pinisim tru lotu bilong Bal long Israel. I klia tru olsem hatwok bilong Elaija i no lus nating, long wanem, laik bilong God i wok long kamap na i no gat wanpela samting inap stopim. Na tu, Elaija i insait long dispela laik, long wanem, Jehova i salim em i go bek long wok na tokim em long ol samting em i mas mekim.—1 King 19:12-17.
Mekim Wok Painimaut
Wanpela Gutpela Piksa Bilong Daunim Ol Laik Bilong Yumi na Stap Gut Long Narapela
Planti wokboi bilong God long nau i bihainim wankain pasin olsem bilong daunim laik bilong ol yet. Sampela i lusim “gaden” bilong ol, olsem wok bilong ol, bilong autim gutnius long ol narapela hap o bilong go mekim wok long Betel. Sampela i go long ol narapela kantri bilong mekim wok konstraksen bilong Sosaiti. Planti i orait long mekim ol wok em ol man i tingim olsem pipia wok. Tasol ol dispela wok bilong God ol i mekim, i no samting nating. Jehova i amamas long ol man i mekim wok bilong em long laik bilong ol yet, na em bai blesim pasin bilong ol long daunim laik bilong ol.—Mak 10:29, 30.
OKTOBA 17-23
GUTPELA SAVE I KAM LONG BAIBEL | 1 KING 21-22
“Bihainim Pasin Bilong Jehova Long Mekim Wok Bos”
it-2 21
Jehova Bosman Bilong Bikpela Lain Ami
Taim Josua i lukim wanpela ensel long arere long Jeriko na em i askim em olsem em i bilong lain Israel o em i bilong lain birua, em i bekim olsem, “Nogat, tasol mi kam olsem prins bilong ami bilong Jehova.” (Jos 5:13-15) Profet Mikaia i tokim King Ahap na Jehosafat, “Mi lukim Jehova i sindaun long sia king bilong em na olgeta ami bilong heven i sanap klostu long em, long rait sait na long left sait bilong em.” (1Ki 22:19-21) Dispela tok “Jehova, bosman bilong bikpela lain ami” i stret bikos i gat planti ensel, Baibel i no stori long wanpela lain ensel tasol olsem ol serap, serafim, na ol ensel, nogat. (Ai 6:2, 3; St 3:24; Re 5:11) Baibel i stori tu olsem i gat ol ensel i stap long ol grup, olsem na Jisas Krais inap tok “planti ensel . . . namba bilong ol i winim 12-pela lain ami.” (Mt 26:53) Long taim Hesekia i askim Jehova long helpim em, em i tok: “Jehova, bosman bilong bikpela lain ami, husat i save sindaun long sia king antap long ol serap,” i klia tru olsem dispela i makim bokis kontrak na ol serap i stap antap long en. (Ai 37:16; skelim 1Sm 4:4; 2Sm 6:2) Wokman bilong Elisa i pret so bilong strongim em, em i lukim wanpela visen we “ples maunten i pulap long ol hos na ol karis bilong pait i lait olsem paia,” em ol ensel bilong Jehova i kam banisim taun we Elisa i stap long en.—2Ki 6:15-17.
“Het Bilong Olgeta Man Em Krais”
9 Pasin daun. Jehova em Man i gat bikpela savetingting; tasol em i save harim tingting bilong ol wokman bilong em. (Stt. 18:23, 24, 32) Em i larim ol man i stap aninit long wok bos bilong em long kamapim tingting bilong ol. (1 Kin. 22:19-22) Jehova em i gutpela olgeta, tasol em i no ekspektim yumi long kamap gutpela olgeta. Em i save helpim ol man i no gutpela olgeta em ol i mekim wok bilong em long inapim wok bilong ol. (Sng. 113:6, 7) Baibel i tok Jehova em i “helpim” bilong yumi. (Sng. 27:9; Hib. 13:6) King Devit i tokaut stret olsem Jehova i mekim pasin daun na em i helpim em long inapim bikpela wok em i mekim.—2 Sml. 22:36.
it-2 245
Giaman
Jehova God i larim “wanpela tingting kranki i stiaim” ol man husat i laik mekim tok giaman na “bai ol i bilipim tok giaman,” na ol i no kisim gutnius bilong Jisas Krais. (2Te 2:9-12) Dispela i stap ples klia inap planti handret yia i go pinis taim yumi skelim samting i painim King Ahap bilong Israel. Ol profet giaman i bin tokim Ahap olsem em bai winim pait long taim em i go pait long Ramot-gileat, tasol long dispela taim profet bilong Jehova, em Mikaia, i tokim em olsem bikpela bagarap bai painim em. Olsem Jehova i kamapim long visen long Mikaia, Em i larim wanpela ensel i go mekim ol tok profet bilong “giamanim” ol profet bilong Ahap. Yumi ken tok, i olsem dispela ensel i yusim strong bilong em long stiaim ol long mekim ol tok i no tru, em ol tok ol yet i laik mekim na tok Ahap i amamas long harim. Maski Ahap i kisim tok long bagarap bai painim em, em yet i laik harim tok giaman bilong ol na em i dai.—1Ki 22:1-38; 2St 18.
Mekim Wok Painimaut
Tanim Bel Tru i Makim Wanem Samting?
4 Bihain pasin marimari bilong Jehova i kamap long pinis bilong en. Em i salim Elaija i go tokaut long strafe em bai givim long Ahap na Jesebel. God i tok long pinisim olgeta lain famili bilong tupela. Ahap i pilim tru tok bilong Elaija! Em narapela kain olsem, dispela man i gat pasin antap “i daunim em yet.”—1 Kin. 21:19-29.
5 Maski Ahap i daunim em yet long dispela taim, ol pasin em i mekim bihain i soim olsem em i no tanim bel tru. Em i no mekim samting bilong rausim pasin bilong lotuim Bal long kingdom bilong em. Na em i no kirapim ol manmeri long lotuim Jehova. Ol narapela samting Ahap i mekim tu i soim olsem em i no tanim bel tru.
6 Bihain taim Ahap i singautim gutpela King Jehosafat bilong Juda long joinim em long pait long ol Siria, Jehosafat i tok i gutpela ol i askim wanpela profet bilong Jehova long dispela samting paslain long ol i go pait. Pastaim, Ahap i sakim dispela tingting na em i tok: “I gat wanpela man moa i stap em yumi ken kisim tingting bilong Jehova long em; tasol mi save heitim em, bikos em i no save mekim wanpela gutpela tok profet long mi. Em i save mekim tok long ol samting nogut tasol i mas kamap long mi.” Maski i olsem, ol i kisim tingting bilong profet Mikaia. Olsem Ahap i bin tok long en, dispela profet bilong Jehova i tokaut long samting nogut bai painim Ahap! Dispela king nogut Ahap i no laik daunim em yet na askim Jehova long fogivim em, nogat, em i tok na ol i putim dispela profet long kalabus. (1 Kin. 22:7-9, 23, 27) Maski king i tok na ol i kalabusim profet bilong Jehova, em i no inap stopim dispela tok profet long kamap tru. Long pait i kamap bihain long dispela, ol i kilim i dai Ahap.—1 Kin. 22:34-38.
OKTOBA 24-30
GUTPELA SAVE I KAM LONG BAIBEL | 2 KING 1-2
“Gutpela Eksampel Bilong Trenim Ol Narapela”
Ol Elda i Trenim Ol Narapela Long Winim Mak
15 Stori bilong Elisa, em man i kisim ples bilong Elaija, i soim klia olsem ol brata long nau inap rispektim ol brata husat i mekim wok elda inap planti yia pinis. Elaija na Elisa i go visitim sampela profet long Jeriko, na bihain tupela i wokabaut i go long wara Jordan. “Elaija i rausim longpela klos bilong en na i raunim na i paitim wara Jordan long dispela klos. Na wara i bruk long tupela hap.” Tupela i wokabaut i go long hapsait bilong wara, na “tupela i wok long toktok na wokabaut i go.” Elisa i pilim olsem em i sot yet long save. Tasol taim Elaija i no stap moa, kirap long dispela taim Elisa i pilim tru olgeta tok bilong Elaija. God i mekim bikpela raunwin i kamap na kisim Elaija i go. Elisa i wokabaut i go bek long wara Jordan na em i yusim klos bilong Elaija long paitim wara na em i tok: “God, Bikpela bilong Elaija, em i stap we?” Long dispela taim tu, wara i bruk long 2-pela hap.—2 Kin. 2:8-14.
Ol Elda i Trenim Ol Narapela Long Winim Mak
16 Tingim: Taim Elisa i mekim namba 1 mirakel, em i bihainim stret wankain pasin olsem Elaija i bin mekim. Wai na yumi mas tingim gut dispela samting? Long dispela taim, Elisa i kirap long mekim wok profet, tasol em i no pilim olsem kwiktaim em i mas senisim wei bilong mekim dispela wok, nogat. Em i bihainim yet pasin bilong Elaija, na long dispela rot em i soim rispek long Elaija na dispela i strongim ol narapela profet. (2 Kin. 2:15) Elisa i mekim wok profet inap 60 yia, na Jehova i kirapim em long mekim planti moa mirakel winim Elaija. Sapos yu brata na yu wok long kisim trening long nau, yu inap kisim wanem skul long dispela stori?
Mekim Wok Painimaut
Sampela Bikpela Tok Bilong Buk Namba 2 King
2:11—Taim “raunwin i kisim Elaija i go,” tru tru em i go long heven? Tok Hibru bilong bipo ol i tanim olsem ‘heven’ ol inap tanim tu olsem ‘skai.’ Lukim Song 78:26 we ol i bin yusim wankain tok Hibru. Elaija i go antap long skai, em i no go long ples antap we san na mun na ol sta i stap o long hap we God na ol ensel i stap long en. (Lo 4:19; Song 11:4; Matyu 6:9; 18:10) Dispela karis i kisim Elaija i go long narapela hap bilong graun, na em i stap long dispela hap. Olsem na sampela yia bihain Elaija i raitim wanpela pas i go long Jehoram, king bilong Juda.—2 Stori 21:1, 12-15.
OKTOBA 31–NOVEMBA 6
GUTPELA SAVE I KAM LONG BAIBEL | 2 KING 3-4
“Yu Ken Kisim Pikinini Man Bilong Yu”
“Mi Save Em Bai Kirap Bek”
7 Namba 2 taim Baibel i stori long kirap bek em long taim bilong profet Elisa, em man i kisim ples bilong profet Elaija. Wanpela meri long Sunem husat i gat planti mani kago i mekim gutpela pasin long Elisa. Long rot bilong profet Elisa, God i truim tok promis bilong em na em i blesim dispela meri na man bilong em na i givim wanpela pikinini man long ol. Sampela yia bihain, dispela pikinini i dai. Tingim hau dispela mama i pilim taim pikinini bilong em i dai. Man bilong em i tok orait, na em i wokabaut inap 30 kilomita bilong i go lukim Elisa long maunten Karmel. Profet Elisa i salim wokman bilong em, Gehasi, i go pas long Sunem. Tasol Gehasi i no inap kirapim bek dispela pikinini. Bihain, mama bilong dispela pikinini na Elisa i kam kamap long Sunem.—2 Kin. 4:8-31.
“Mi Save Em Bai Kirap Bek”
8 Elisa i stap klostu long bodi bilong pikinini na em i beten. Long rot bilong mirakel, dispela pikinini i kirap bek na bungim mama bilong em! (Ritim 2 King 4:32-37.) Ating dispela meri i tingim stori bilong Hana. Pastaim Hana i no inap karim pikinini, tasol bihain em i karim Samuel. Taim Hana i laik kisim em i go long haus lotu sel, em i beten olsem: “Bikpela . . . i save kisim ol man i dai pinis, na bringim ol i kam bek gen na ol i gat laip.” (1 Sml. 2:6) God i kirapim bek dispela pikinini long Sunem, na dispela i soim klia olsem Em i gat strong long kirapim bek ol man i dai pinis.
Mekim Wok Painimaut
it-2 697 par. 2
Profet
“Ol Pikinini Man Bilong Ol Profet.” Olsem Gesenius’ Hebrew Grammar i kamapim (Oxford, 1952, p. 418), tok Hibru ben (pikinini man bilong) o benehʹ (ol pikinini man bilong) i makim “ol i bilong wanpela grup (o wanpela traib, o wanpela lain stret).” (Skelim Ne 3:8, em i tok “wanpela bilong ol man i save wokim ol paura i gat gutpela smel” i makim “wanpela pikinini man bilong ol man i save wokim ol paura i gat gutpela smel.”) “Ol profet” i makim “ol pikinini man bilong ol profet.” Dispela inap makim skul we ol profet i lain long mekim dispela wok o wanpela lain profet i wok wantaim. Baibel i stori olsem dispela kain lain i bin stap long Betel, Jeriko, na Gilgal. (2Kin. 2:3, 5; 4:38; skelim 1Sm 10:5, 10.) Samuel i bin stap wantaim sampela profet long Rama (1Sm 19:19, 20), na i luk olsem Elisa i holim wankain namba long taim bilong em. (2Kin. 4:38; 6:1-3; skelim 1Ki 18:13.) Ol stori i kamapim olsem ol i wokim ol ples bilong stap long en na i gat ol tul ol i bin yusim, dispela i makim olsem ol i bin stap tru. Maski planti taim ol i save serim ples slip na kaikai, ating ol i kisim ol asainmen bilong ol yet o go long ol narapela hap long mekim wok profet.—1Kin. 20:35-42; 2Kin. 4:1, 2, 39; 6:1-7; 9:1, 2.